Ayezaya 37:1-38

  • Hɛzikaya luale Ayezaya anwo zo kpondɛle Nyamenle moalɛ (1-7)

  • Sɛnakɛlebe nwunlonwunlanle Gyɛlusalɛmma (8-13)

  • Hɛzikaya asɔneyɛlɛ ne (14-20)

  • Ayezaya hanle Nyamenle mualɛ ne (21-35)

  • Anwumabɔvolɛ bie hunle Aseleama 185,000 (36-38)

37  Belemgbunli Hɛzikaya dele edwɛkɛ ne ala la, ɔsuosuanle ye adɛladeɛ ne mɔ anu na ɔhedale ɛrele ɔhɔle Gyihova sua nu ɛkɛ.+  Akee ɔzoanle Yilayakem mɔɔ nea sua nu* ɛkɛ ne, kɛlɛhɛlɛvolɛ Hyɛbena yɛɛ ɛsɔfo mgbanyinli mɔɔ bɛheda ɛrele la wɔ ngapezonli Ayezaya,+ Emɔzo ara ne ɛkɛ.  Bɛzele ye kɛ: “Hɛzikaya se, ‘Ɛnɛ le anwongyelelɛ, ndeanlɛ nee anyiemgba kenle; ɔluakɛ ngakula ne mɔ ɛra kɛ bɛmaa bɛawo bɛ,* noko anwosesebɛ mɔɔ bɛfa bɛawo bɛ la ɛnle ɛkɛ.+  Bie a Gyihova wɔ Nyamenle ne bade Relabehyaki ne edwɛkɛ ne mɔɔ ɔ menle Aselea belemgbunli ne ɛva ɛzoa ye kɛ ɔva ɔrabɔ tease Nyamenle ne aholoba la,+ na yeadua ye kakɛ wɔ edwɛkɛ mɔɔ Gyihova wɔ Nyamenle ne ɛde la anwo. Ɔti yɛ asɔne+ maa menli ekyi ne mɔɔ ɛha la.’”+  Yemɔti Belemgbunli Hɛzikaya azonvolɛ ne mɔ hɔle Ayezaya ɛkɛ,+  na Ayezaya zele bɛ kɛ: “Bɛha bɛhile bɛ menle ne kɛ, ‘Mɔɔ Gyihova ɛha la ɛne: “Mmamaa munzule edwɛkɛ mɔɔ Aselea belemgbunli ne azonvolɛ ɛha ɛtia me mɔɔ wɔde la maa wɔ ahonle tu.+  Nea, mebava nzuzulɛ bie meawula ye adwenle nu,* na ɔbade edwɛkɛ bie na yeazia yeahɔ ye maanle nu;+ na mebamaa yeadɔ dadeɛ nloa wɔ ye maanle nu.”’”+  Mɔɔ Relabehyaki ne dele kɛ Aselea belemgbunli ne ɛvi Leekehye la, ɔziale ɔhɔle ɔ nwo ɛkɛ na ɔnwunle kɛ ɔ nee Lebena ɛlɛko.+  Akee belemgbunli ne dele Yiteyopea Belemgbunli Tɛheeka anwo edwɛkɛ kɛ: “Yera kɛ ɔ nee wɔ baho.” Mɔɔ ɔdele ɛhye la, ɔzoanle soanvolɛma wɔ Hɛzikaya anwo lɔ+ bieko kɛ: 10  “Bɛha bɛhile Dwuda Belemgbunli Hɛzikaya kɛ, ‘Mmamaa wɔ Nyamenle ne mɔɔ ɛ rɛle wɔ ye nu la bɛlɛbɛla wɔ kɛ: “Bɛnrɛva Gyɛlusalɛm bɛnrɛwula Aselea belemgbunli ne asa anu.”+ 11  Nea! Wɔde mɔɔ Aselea arelemgbunli vale yɛle maanle maanle ne mɔ kɔsɔɔti nee kɛzi bɛzɛkyele bɛ la.+ Asoo ɛ ngomekye a bɛbalie wɔ a? 12  Asoo maanle maanle ne mɔ mɔɔ me nenyia mɔ zɛkyele bɛ la nyamenle ne mɔ liele bɛ?+ Gozan, Hɛlan,+ Rilizɛfe nee Yidɛn amra mɔɔ ɛnee wɔ Tɛle-asaa la wɔ ni? 13  Heemate belemgbunli, Aapade belemgbunli yɛɛ azuamgbole Sifaveeyem,+ Hina yɛɛ Ayeva arelemgbunli ne mɔ hale ni?’” 14  Hɛzikaya liele ngɛlata ne vile soanvolɛma ne asa anu na ɔgengale. Akee Hɛzikaya hɔle Gyihova sua nu ɛkɛ na ɔdɛlɛle nuhua wɔ Gyihova anyunlu.+ 15  Na Hɛzikaya zɛlɛle Gyihova+ kɛ: 16  “O ɛlɔne Gyihova,+ Yizilayɛ Nyamenle mɔɔ ɛde belemgbunli ebia nu wɔ kyɛlɔbe ne mɔ azo anwuma,* ɛ ngomekye a ɛle nɔhalɛ Nyamenle wɔ azɛlɛ ye azo arelemgbunlililɛ kɔsɔɔti azo a. Ɛdawɔ a ɛbɔle anwuma nee aze* a. 17  O Gyihova, yɛ ɛnzolɛ na tie!+ O Gyihova, buke ɛ nye na nea!+ Tie edwɛkɛ kɔsɔɔti mɔɔ Sɛnakɛlebe ɛva ɛzoa kɛ bɛva bɛrabɔ tease Nyamenle ne aholoba la.+ 18  O Gyihova, ɔle nɔhalɛ kɛ Aselea arelemgbunli ɛzɛkye azɛlɛ kɔsɔɔti+ nee bɛdabɛ mumua ne bɛ azɛlɛ ɛdeɛ ne. 19  Na bɛvuandi bɛ nyamenle ne mɔ bɛgua senle nu,+ ɔluakɛ bɛnle nyamenle, bɛle sonla sa anloa gyima,+ bɛle mbaka nee awolɛ. Ɛhye ati a bɛholale bɛzɛkyele bɛ la. 20  Noko kɛkala, O Gyihova yɛ Nyamenle, die yɛ fi ɔ sa nu, amaa azɛlɛ ye azo arelemgbunlililɛ kɔsɔɔti anwu kɛ ɛ ngomekye a ɛle Nyamenle a, O Gyihova.”+ 21  Akee Emɔzo ara Ayezaya zoanle maanle bɛhɔzele Hɛzikaya kɛ: “Mɔɔ Gyihova, Yizilayɛ Nyamenle ne ɛha la ɛne, ‘Kɛmɔ ɛyɛle Aselea Belemgbunli Sɛnakɛlebe anwo asɔne la ati,+ 22  mɔɔ Gyihova ɛha ɛtia ye la ɛne: “Zayɔn* ɛmbu wɔ bie, ɔsele wɔ. Gyɛlusalɛm* woso ɔ ti kile wɔ. 23  Nwane a wɔbɔ ye aholoba+ na wɔha munzule edwɛkɛ wɔtia ye la? Nwane a wɔmaa ɛ ne zo wɔtia ye+Na wɔholoholo ɛ nye wɔhile ye la? Yizilayɛ Nwuanzanwuanza Ko ne ɔ!+ 24  Wɔlua wɔ azonvolɛ nwo zo wɔbɔ Gyihova aholoba+ na wɔha kɛ,‘Mebava konle ehwili dɔɔnwoMeavo awoka ne mɔ ati zo,+Na meahɔ Lɛbanɔn moamoa lɔ. Mebapepɛ ye sida mbaka ndendenle ne, ye dwunipa mbaka ngɛnlɛma ne mɔ. Mebahɔ ye tɛnlabelɛ ne mɔɔ wɔ anwuma kpalɛ la, ye kpɔkɛmile ne mɔ anu. 25  Mebadu bula dɔɔnwo na meanlo nzule;Mebava me gyakɛ abo meaha Yigyibiti azudenle* ne mɔ meamaa bɛasesa.’ 26  Asoo ɛtɛtele? Membɔle nwolɛ kpɔkɛ* dɛbadɛba. Mengyehyɛle mendole ɛkɛ ɔvi tete.+ Akee mebamaa yeara nu.+ Ɛbamaa azuamgbole mɔɔ bɛlie nwolɛ bane la adɔ mgbane na bɛayɛ ewula edukue.+ 27  Menli mɔɔ wɔ zo la ɛnrɛhola ɛhwee yɛ;Bɛ ahonle badu na bɛ nyunlu agua aze. Bɛbayɛ kɛ ɛya nu ninyɛne nee ndile amolɛ,Bɛbayɛ kɛ sua ti zo ndile mɔɔ aduduleɛ anwoma wuluwulu ɛbɔ ye la. 28  Noko meze mekɛ mɔɔ ɛtɛnla aze, mekɛ mɔɔ ɛfinde, mekɛ mɔɔ ɛba,+Nee mekɛ mɔɔ ɛkɛva me nwo ɛya la,+ 29  Ɔluakɛ me nwo ɛya mɔɔ wɔva la+ nee wɔ ɛhululɛ ne ɛdwu me nzo nu.+ Yemɔti mebava me koba ne meawula ɛ bonyi nu na meava me bulalɛ ne+ meawula ɛ nloa anu,Na mebamaa wɔalua adenle mɔɔ ɛvale zo ɛrale la azo wɔazia.” 30  “‘Ɛhye a bayɛ sɛkɛlɛneɛ amaa wɔ* a: Ɛvolɛ ɛhye, bɛbali ninyɛne mɔɔ bɛ ngome bɛfifi la;* na ɛvolɛ bieko, bɛbali ma mɔɔ bavi yemɔ anu afifi la; noko ɛvolɛ nsa ne azo, bɛbalua ma na bɛapɛ yɛɛ bɛbayɛ vanye egyinli na bɛali nuhua ma.+ 31  Dwuda abozoamra mɔɔ banyia bɛ ti, bɛdabɛ mɔɔ bɛbaha la+ bazɔ ndinli wɔ aze na bɛazo ma wɔ anwuma. 32  Ɔluakɛ menli mɔɔ baha la bavi Gyɛlusalɛm yɛɛ bɛdabɛ mɔɔ bɛbanyia bɛ ti la bavi Zayɔn Boka ne azo.+ Ɛlɔne Gyihova mɔdenlebɔlɛ ne a bayɛ ɛhye a.+ 33  “‘Ɔti Aselea belemgbunli ne anwo edwɛkɛ mɔɔ Gyihova ɛha la ɛne:+ “Ɔnrɛra suakpole ɛhye azo+Yɛɛ ɔnrɛdo ɛda wɔ zolɛAnzɛɛ ɔnrɛva enyinlike ɔ nee ye ɛnrɛhoYɛɛ ɔnrɛhuohua ɛnwea* ɔnrɛbɛnga ye ɔnrɛyia.”’+ 34  ‘Adenle mɔɔ ɔluale zo ɔrale la, ɔbalua zo yeazia;Ɔnrɛra suakpole ɛhye azo,’ kɛ Gyihova se la ɛne. 35  ‘Mebaho meamaa suakpole ɛhye+ na mealie ye ɔlua medameNee me sonvolɛ Devidi ati.’”+ 36  Na Gyihova anwumabɔvolɛ hɔle Aseleama azokoɛleɛ ne na ɔhunle menli 185,000. Mɔɔ menli dwazole nwonlomɔ mangyee ne la, bɛnwunle avunli ne mɔ kɔsɔɔti.+ 37  Yemɔti Aselea Belemgbunli Sɛnakɛlebe ziale hɔle Nenɛvɛ+ na ɔhɔdɛnlanle ɛkɛ.+ 38  Na mɔɔ ɔlɛbɔ ɔ ti aze wɔ ye nyamenle Nezelɔko sua ne* anu la, ɔ mra mrenyia, Adelamɛlɛke nee Hyalizɛ vale konle dadeɛ hunle ye+ na bɛnriandile bɛhɔle Arelalate azɛlɛ zo.+ Na ɔ ra Yisaa-hadɔn+ ralile ye agya lile belemgbunli.

Ɔbodwɛkɛ

Anzɛɛ “belemgbunli sua nu.”
Hibulu aneɛ nu, “ɛra awodeɛ ne anloa.”
Hibulu aneɛ nu, “sunsum bie meawula ye nu.”
Anzɛɛ ɔkola ɔkile, “avinli.”
Anzɛɛ “azɛlɛ ne.”
Hibulu aneɛ nu, “Zayɔn ara raalɛ ne mɔɔ ɛnze nrenyia la.”
Hibulu aneɛ nu, “Gyɛlusalɛm ara raalɛ ne.”
Anzɛɛ “Naele kanale.”
Hibulu aneɛ nu, “Menyɛle ye.”
Ɛhye kile, Hɛzikaya.
Anzɛɛ “ma bo zo mɔɔ ɛfifi la.”
Anzɛɛ “awolɛ.”
Anzɛɛ “ɛzonlenlɛ sua ne.”