Ayezaya 36:1-22

  • Sɛnakɛlebe ratetale Dwuda (1-3)

  • Relabehyaki ne dendɛle tiale Gyihova (4-22)

36  Wɔ Belemgbunli Hɛzikaya ɛvolɛ mɔɔ tɔ zo 14 ne azo, Aselea Belemgbunli Sɛnakɛlebe+ ratetale Dwuda azuamgbole kɔsɔɔti mɔɔ bɛlie nwolɛ bane la na ɔlile zolɛ konim.+  Akee Aselea belemgbunli ne zoanle Relabehyaki ne*+ yɛɛ ɛlɔne dɔɔnwo ɔmaanle bɛvile Leekehye+ bɛhɔle Belemgbunli Hɛzikaya anwo lɔ wɔ Gyɛlusalɛm. Bɛhɔgyinlanle sɔlɔ nzubula+ adenle ne mɔɔ kɔ azɛlɛ ne mɔɔ bɛkpo ninyɛne wɔ zo la ademgbole ne azo la anwo.+  Na Helekaya ara Yilayakem+ mɔɔ nea sua nu* ɛkɛ ne, kɛlɛhɛlɛvolɛ Hyɛbena+ yɛɛ Esafe ara Dwowaa mɔɔ le kɛlɛvolɛ la rayiale ye.  Ɔti Relabehyaki ne zele bɛ kɛ: “Mesɛlɛ bɛ, bɛhɔha bɛhile Hɛzikaya kɛ, ‘Edwɛkɛ mɔɔ belemgbunli kpole ne, Aselea belemgbunli ne ɛha la ɛne: “Duzu bɔbɔ a wɔva ɛ nwo wɔdo zo a?+  Ɛka kɛ, ‘Meze konle nye zo yɛɛ melɛ tumi mɔɔ mefa meko a,’ noko ɛhye le edwɛkɛ mgbane. Nwane a wɔva ɛ rɛle wɔwula ye nu mɔɔ ɔti wɔzi ɛ kɛnra kɛ ɛte atua wɔatia me a?+  Nea! Wɔva ɛ rɛle wɔwula Yigyibiti, ndɔ baka ɛhye mɔɔ ɛkposo mɔɔ awie kisa ye a ɔbawowɔ ɔ sa akunlu la anu. Kɛ Yigyibiti Belemgbunli Falo de maa menli kɔsɔɔti mɔɔ fa bɛ rɛle wula ye nu la ɛne.+  Na saa bɛka bɛkile me kɛ, ‘Yɛ rɛle wɔ Gyihova yɛ Nyamenle ne anu a,’ asoo tɛ ye ɛzonlenlɛ ɛleka nee ye afɔlemokyea ne mɔ a Hɛzikaya ɛbubu bɛ+ na yeha yehile Dwudama nee Gyɛlusalɛmma kɛ, ‘Ɔwɔ kɛ bɛkoto afɔlemokyea ɛhye anyunlu’ la ɔ?”’+  Yemɔti mesɛlɛ bɛ, bɛ nee me menle, Aselea belemgbunli ne+ ɛyɛ ngyehyɛleɛ ɛhye: Saa bɛkɛnyia menli mɔɔ baha la a, anrɛɛ mebamaa bɛ mgbɔnwɔ 2,000.  Ɛnee kɛ ɔkɛyɛ na wɔahola wɔavoa amɛnlado ko bɔbɔ mɔɔ le me menle azonvolɛ ne mɔ anu ekyi wɔ mekɛ mɔɔ wɔva ɛ nwo wɔdo Yigyibiti ehwili nee mgbɔnwɔkavoma ne anwo zo la ɛ? 10  Asoo tɛ Gyihova a maanle me adenle kɛ membɛla maanle ɛhye anwo zo na menzɛkye ye a? Gyihova zele me kɛ, ‘Kɔ maanle ɛhye anwo zo na sɛkye ye.’” 11  Na Yilayakem nee Hyɛbena+ yɛɛ Dwowaa zele Relabehyaki ne kɛ:+ “Yɛsɛlɛ wɔ tendɛ kile wɔ azonvolɛ wɔ Elam* aneɛ nu,+ ɔluakɛ yɛbade ɔ bo; mmatendɛ ɛkile yɛ wɔ Dwuuma aneɛ nu ɛmaa menli mɔɔ gua bane ne azo la te bie.”+ 12  Noko Relabehyaki ne hanle kɛ: “Asoo bɛdabɛ nee bɛ menle ne ala ati a me menle zoanle me kɛ membanga edwɛkɛ ɛhye ɔ? Asoo tɛ menli mɔɔ gua bane ye azo, mɔɔ bɛ nee bɛ bali bɛ ebinli na bɛanlo bɛ miene la noko ati a ɔzoanle me ɔ?” 13  Akee Relabehyaki ne gyinlanle na ɔhanle ye kpole wɔ Dwuuma aneɛ nu+ kɛ: “Bɛdie belemgbunli kpole ne, Aselea belemgbunli ne edwɛkɛ.+ 14  Belemgbunli ne se, ‘Bɛmmamaa Hɛzikaya bɛlɛbɛla bɛ ɔluakɛ ɔnrɛhola ɔnrɛlie bɛ.+ 15  Yɛɛ bɛmmadi Hɛzikaya anzi bɛfa bɛ rɛle bɛwula Gyihova anu+ na bɛka kɛ: “Ye biala anu, Gyihova balie yɛ, na ɔnrɛva suakpole ɛhye ɔnrɛwula Aselea belemgbunli ne asa anu.” 16  Bɛmmatie Hɛzikaya, ɔluakɛ edwɛkɛ mɔɔ Aselea belemgbunli ne ɛha la ɛne: “Bɛ nee me ɛyɛ anzodwolɛ ngyehyɛleɛ na bɛva bɛ nwo bɛmaa me,* na bɛ nuhua ko biala bali ye vanye nee ye feege baka zo ma na yeanlo ye bula nu nzule, 17  kɔkpula kɛ mebarava bɛ meahɔ azɛlɛ mɔɔ le kɛ bɛ ɛdeɛ ne la azo,+ azɛlɛ mɔɔ ma nee nwanye fofolɛ wɔ zo, azɛlɛ mɔɔ aleɛ nee vanye egyinli wɔ zo la. 18  Bɛmmamaa Hɛzikaya bɛlɛbɛla bɛ na ɔka kɛ, ‘Gyihova balie yɛ.’ Asoo maanle maanle ne mɔ nyamenle ne mɔ bie ɛlie bɛ maanle ne ɛvi Aselea belemgbunli ne asa anu ɔ?+ 19  Heemate nee Aapade nyamenle ne mɔ hale ni?+ Sifaveeyem nyamenle ne mɔ hale ni?+ Na bɛhola bɛlie Samɛlea bɛvi me sa nu ɔ?+ 20  Maanle maanle ɛhye mɔ nyamenle ne mɔ amuala anu boni a ɛlie bɛ maanle ne ɛvi me sa nu, mɔɔ ɔti ɔwɔ kɛ Gyihova die Gyɛlusalɛm fi me sa nu a?”’”+ 21  Noko bɛyɛle koonwu na bɛanga edwɛkɛ biala bɛangile ye, ɔluakɛ ɛnee belemgbunli ne ɛha kɛ, “Bɛmmabua ye.”+ 22  Na Helekaya ara Yilayakem mɔɔ nea sua nu* ɛkɛ ne, kɛlɛhɛlɛvolɛ Hyɛbena+ yɛɛ Esafe ara Dwowaa mɔɔ le kɛlɛvolɛ la suosuanle bɛ adɛladeɛ ne mɔ anu na bɛhɔle Hɛzikaya ɛkɛ bɛhɔhanle Relabehyaki ne edwɛkɛ ne bɛhilele ye.

Ɔbodwɛkɛ

Anzɛɛ “nzasuvolɛ kpanyinli ne.”
Anzɛɛ “belemgbunli sua nu.”
Anzɛɛ “Selea.”
Hibulu aneɛ nu, “Bɛrɛla me nwo ɛke na menyila bɛ.”
Anzɛɛ “belemgbunli sua nu.”