Ayezaya 30:1-33
30 Kɛ Gyihova se la ɛne: “Anzosesebɛ mralɛ, bɛ gyakɔ,+Bɛdi kpɔkɛbɔlɛ mɔɔ ɛnvi me ɛkɛ la anzi,+Bɛyɛ ngyehyɛleɛ* mɔɔ me sunsum ɛngile bɛ adenle a,Amaa bɛava ɛtane bɛaboka ɛtane nwo.
2 Bɛkɔ Yigyibiti a+ bɛmbiza me,*+Bɛkɔ kɛ bɛkavea Falo banebɔlɛ bo*Na bɛanyia feabelɛ wɔ Yigyibiti alubo ne anu!
3 Noko Falo banebɔlɛ ne bamaa bɛ nyunlu agua aze,Na Yigyibiti alubo ne anu feabelɛ ne amaa bɛabɔ anyiemgba.+
4 Ɔluakɛ ye mgbanyima ne mɔ wɔ Zowan,+Yɛɛ ye soanvolɛma ɛdwu Heenɛze.
5 Bɛ muala bɛ nyunlu bagua azeƆluakɛ menli ne anwo ɛnrɛyɛ nvasoɛ ɛnrɛmaa bɛ,Bɛnrɛboa bɛ yɛɛ bɛnrɛnyia bɛ nwo zo nvasoɛ biala,Nyiane nee anyiemgba ala a bɛbanyia a.”+
6 Nrɛlaleɛ mɔɔ tia nyiakɛ nane anwo ɛzulolɛ ne mɔ la ɛne:
Bɛdua amaneɛnwunlɛ nee anwongyelelɛ azɛlɛ zo,Ɛleka mɔɔ awenade, awenade mɔɔ kpo la wɔ,Ɛleka mɔɔ bɔna nee ɛwɔlɛ mɔɔ anwo yɛ ndɛ na ɔtu* wɔ la,Bɛfa bɛ anwonyia ne bɛgua asoaso zoYɛɛ bɛfa bɛ ninyɛne bɛgua afunlumu nzi.
Noko ninyɛne ɛhye mɔ ɛnrɛboa menli ne.
7 Ɔluakɛ Yigyibiti moalɛ ne le mgbane.+
Yemɔti mevɛlɛ ɛhye: “Releehabe+ mɔɔ tɛnla koonwu la.”
8 “Akee kɔ, na kɔhɛlɛ ye wɔ bolɛ ɛdɛbaa zo wɔ bɛ nyunlu ɛkɛ,Na kɛlɛ ye wɔ buluku nu,+Amaa kenle bie yeayɛDaselɛ mɔɔ wɔ ɛkɛ dahuu.+
9 Ɔluakɛ bɛle atuadelɛ menli,+ mɛlɛbɛla mralɛ,+Mralɛ mɔɔ bɛngulo kɛ bɛtie Gyihova mɛla* la.+
10 Bɛka bɛkile ɛnyelɛzodeɛnwunlɛma kɛ, ‘Bɛmmanwu debie,’
Na bɛka bɛkile ngapezoma kɛ, ‘Bɛmmaka ngapezo mɔɔ le nɔhalɛ la.+
Bɛha edwɛkɛ menlemenle* bɛhile yɛ; bɛha adalɛ ngapezo.+
11 Bɛvi adenle ne azo; bɛmakyi bɛvi adenle kpalɛ ne azo.
Bɛmmaka Yizilayɛ Nwuanzanwuanza Ko ne anwo edwɛkɛ bɛkile yɛ bieko.’”+
12 Yemɔti edwɛkɛ mɔɔ Yizilayɛ Nwuanzanwuanza Ko ne ɛha la ɛne:
“Kɛmɔ bɛkpo edwɛkɛ ɛhye+Bɛva bɛ rɛle bɛwula nzisi nee mɛlɛbɛla nuNa bɛva bɛ nwo bɛdo ninyɛne ɛhye mɔ azo la ati,+
13 Ɛtane ɛhye bayɛ kɛ bane mɔɔ ɛgyigya,Ɔbayɛ kɛ bane tendenle mɔɔ ɔkpondɛ yeade yeagua la yeamaa bɛ.
Ɔbabu yeagua aze arɛlevilɛ nu ɛkɛ ne ala.
14 Ɔbabubu kɛ nwovolɛ buakɛ kpole la,Ɔbabubu bɔkɔɔ mɔɔ bɛnrɛnyia ekyi bɔbɔMɔɔ bɛfa bɛfa senleAnzɛɛ bɛfa bɛfe nzule wɔ azɛlɛ nwo* bɔbɔ a ɔyɛ boɛ la.”
15 Ɔluakɛ edwɛkɛ mɔɔ Tumivolɛ Awulae Gyihova, Yizilayɛ Nwuanzanwuanza Ko ne ɛha la ɛne:
“Saa bɛsia bɛ nzi bɛba me ɛkɛ na bɛdie bɛ menle a, bɛbalie bɛ;Saa bɛsie bɛ nwo dii na bɛnyia anwodozo a, bɛbanyia anwosesebɛ.”+
Noko bɛangulo.+
16 Na bɛhanle kɛ: “Kyɛkyɛ, yɛbadɛnla mgbɔnwɔ zo yɛanriandi!”
Yemɔti bɛbanriandi amgba.
“Yɛɛ yɛbadɛnla mgbɔnwɔ mɔɔ anwo yɛ ndɛ la azo!”+
Yemɔti menli mɔɔ ɛlɛfoa bɛ la anwo bayɛ ndɛ.+
17 Sonla ko banwunlonwunla menli apenle ko yeamaa bɛ nwo awoso bɛ;+Menli nnu banwunlonwunla bɛ yeamaa bɛanriandiKɔkpula kɛ bɛ nuhua mɔɔ baha la bayɛ kɛ fɛlɛnra mɔɔ gyi boka zo,Kɛ sɛkɛlɛneɛ baka mɔɔ gyi boka ekyi zo la.+
18 Noko Gyihova ɛlɛfa abotane ahendɛ* kɛ ɔboa bɛ,+Na ɔbamaa ɔ nwo zo yeaze bɛ anwunvɔne.+
Ɔluakɛ Gyihova le pɛlepɛle Nyamenle.+
Anyelielɛ a le menli kɔsɔɔti mɔɔ bɛ nye la ɔ nwo zo* la.+
19 Saa menli ne tɛnla Zayɔn, wɔ Gyɛlusalɛm a,+ bɛnrɛzu bieko.+ Saa ɔte kɛ bɛlɛsu bɛakpondɛ moalɛ a, ɔbaze bɛ anwunvɔne; saa ɔte bɛ ne ala a, ɔbalie bɛ zo.+
20 Gyihova bava anwongyelelɛ ayɛ aleɛ amaa bɛ na yeava amaneɛnwunlɛ yeayɛ nzule yeamaa bɛ bɔbɔ ɛdeɛ,+ noko bɛ Kilehilevolɛ Kpole Kpalɛ ne ɛnrɛva ɔ nye ɛnrɛvea bɛ bieko, na bɛbava bɛ nye bɛanwu bɛ Kilehilevolɛ Kpole Kpalɛ ne.+
21 Na bɛ nzo bade edwɛkɛ bie wɔ bɛ nzi kɛ, “Adenle ne ɛne.+ Bɛlua nu,” saa bɛfa fema zo o, bɛne zo o.+
22 Na bɛbagua bɛ ananze mɔɔ bɛva dwɛtɛ fufule bɛfɔle nwo nee ananze mɔɔ bɛva nvutuke bɛfɔle nwo la anwo evinli.+ Bɛbavuandi bɛ bɛagua bɛ lɔ kɛ raalɛ mɔɔ ɛhɔ amozi la ɛdanlɛ na bɛaha kɛ, “Bɛhɔ!”*+
23 Na ɔbamaa ezule adɔ agua bɛ ma mɔɔ bɛlua la azo,+ na bɛanyia aleɛ dɔɔnwo mɔɔ le kpalɛ* la wɔ azɛlɛ ne azo.+ Kenle zɔhane, bɛ nyɛmoa badidi wɔ adidileka mɔɔ tɛlɛ la azo.+
24 Na nlankɛ nee asoaso mɔɔ bɛfa bɛyɛ gyima wɔ azɛlɛ ne azo la bali ndile mɔɔ bɛva aleɛ kpalɛ bɛfonla ye, na bɛva sofi nee faka bɛkpogya la.
25 Azule nee azudenle baze boka tendenle nee boka ekyi biala azo,+ wɔ kenle mɔɔ bɛbahu menli dɔɔnwo na tawa ne mɔ abubu agua la.
26 Na siane ne wienyi ne bayɛ kɛ sɛnzɛne ne wienyi ne la; na sɛnzɛne ne wienyi ne bayɛ mɔnwo nsuu+ kɛ kenle nsuu wienyi la wɔ kenle mɔɔ Gyihova bayɛ ye menli ne mɔɔ ɛbodɛboda* la ayile+ na yeakyekye nganlɛ mɔɔ dule bɛ wɔ mekɛ mɔɔ ɔbole bɛ la.+
27 Nea! Gyihova duma vi moamoa ɛlɛba,Ɔlɛfa ɛya kpole nee amungu ɛlomboɛ yeara.
Ɔ nloa anu le ɛya ngome,Yɛɛ ɔ tafinlima le kɛ sendɔlɔra.+
28 Ye sunsum* ne le kɛ azuyilɛ mɔɔ dwu bɛ kɔme nu la,Ɔbava ɛzɛkyelɛ akegyebɛ yeahegye maanle maanle ne;Na yeava bulalɛ mɔɔ bamaa menli ne aminli la yeawula bɛ awudwelɛ nu.+
29 Noko bɛbado edwɛne kɛ mɔɔ bɛto ye nɔɔzoWɔ mekɛ mɔɔ bɛlɛsiezie bɛ nwo* bɛamaa ɛvoyialilɛ la,+Na bɛ ahonle bali fɛlɛkoKɛ awie mɔɔ ɛlɛfa fulutuAhɔ Gyihova boka ne azo, Yizilayɛ Bodane ne ɛkɛ ne la.+
30 Gyihova bamaa bɛade ɔ ne kpole ne+Na yeamaa bɛanwu ɔ sa ne+ mɔɔ ɔlɛdwula ye aze wɔ ɛya kpole nu,+Sendɔlɔra kpole nu,+Ezule kpole,+ ahumu nee ezuawolɛ nu la.+
31 Ɔlua Gyihova ane ne ati, Aselea ahonle badu;+Ɔbava baka yeabɔ ye.+
32 Na ndeanlɛ baka biala mɔɔGyihova bava ara Aselea anwo zo laBɛbava akɛya nee haape bɛalie zolɛ+Wɔ mekɛ mɔɔ ɔlɛtende ɔ sa yeatia bɛ wɔ konle nu la.+
33 Ɔluakɛ yeziezie ye Tofɛte* ne+ yewie;Eza bɛziezie bɛmaa belemgbunli ne.+
Ɛleka mɔɔ yeziezie ɛyɛne ne la anu kɔ yɛɛ ɔtɛlɛ,Ɛyɛne dɔɔnwo nee senle wɔ nu.
Gyihova ɛnwomenle ne, mɔɔ le kɛ sɔlefa dɔɔnwo la,Bado senle wɔ nu.
Ɔbodwɛkɛ
^ Hibulu aneɛ nu, “bɛgua nza,” mɔɔ kile kɛ bɛlɛyɛ ngyehyɛleɛ la.
^ Anzɛɛ “bɛmbiza bɛndie me nloa anu edwɛkɛ.”
^ Hibulu aneɛ nu, “Falo aranemgbole nu.”
^ Anzɛɛ “ɛwɔlɛ mɔɔ pɔezen wɔ ɔ nloa anu.”
^ Anzɛɛ “adehilelɛ.”
^ Hibulu aneɛ nu, “edwɛkɛ mɔɔ fie.”
^ Anzɛɛ ɔkola ɔkile, “wɔ angola nu.”
^ Anzɛɛ “bɛlɛkendɛ ye ɛsesebɛ.”
^ Anzɛɛ “anye la.”
^ Anzɛɛ ɔkola ɔkile, “na bɛavɛlɛ bɛ evinli.”
^ Hibulu aneɛ nu, “mɔɔ le sosɔɔ.”
^ Anzɛɛ “ɛbubu.”
^ Anzɛɛ “ɛnwomenle.”
^ Anzɛɛ “bɛlɛte bɛ nwo.”
^ “Tofɛte” le sɛkɛlɛneɛ adenle zo ɛleka mɔɔ bɛyela debie la, na ɔkile ɛzɛkyelɛ.
