Zɛkalaya 8:1-23
8 Ɛlɔne Gyihova edwɛkɛ ne rale me ɛkɛ ne bieko kɛ:
2 “Mɔɔ ɛlɔne Gyihova ɛha la ɛne, ‘Melɛ ɛlɔlɛ kpalɛ mɔɔ anu yɛ se la memaa Zayɔn+ na mebava ɛya kpole mealie ye na meabɔ ɔ nwo bane.’”
3 “Mɔɔ Gyihova ɛha la ɛne, ‘Mebazia meara Zayɔn+ na meadɛnla Gyɛlusalɛm;+ na bɛbavɛlɛ Gyɛlusalɛm kɛ nɔhalɛ* suakpole,+ na bɛavɛlɛ ɛlɔne Gyihova boka ne kɛ boka nwuanzanwuanza.’”+
4 “Mɔɔ ɛlɔne Gyihova ɛha la ɛne, ‘Mrenyia mrelera nee mraalɛ mrelera badɛnlɛdɛnla Gyɛlusalɛm gua ne mɔ azo bieko, ko biala lɛ ye kpɔma ɔ sa nu ɔluakɛ yenyi kpalɛ.*+
5 Na ngakula mrenyia nee mraalɛ mɔɔ ɛlɛdi nwɔhoa la bayi suakpole ne gua ne mɔ azo.’”+
6 “Mɔɔ ɛlɔne Gyihova ɛha la ɛne, ‘Saa ɔbayɛ se yeamaa menli mɔɔ ɛha la wɔ mekɛ zɔhane a, asoo ɔwɔ kɛ ɔyɛ se ɔmaa medame noko ɔ?’ kɛ ɛlɔne Gyihova se la ɛne.”
7 “Mɔɔ ɛlɔne Gyihova ɛha la ɛne, ‘Bɛnlea, mebalie me menli ne meavi aduduleɛ nee adɔleɛ azɛlɛ ne mɔ azo.+
8 Na mebava bɛ meara Gyɛlusalɛm na bɛadɛnla ɛkɛ;+ bɛbayɛ me menli na meayɛ bɛ Nyamenle+ wɔ nɔhalɛlilɛ* nee tenleneyɛlɛ nu.’”
9 “Mɔɔ ɛlɔne Gyihova ɛha la ɛne, ‘Bɛmia bɛ sa nu,*+ bɛdabɛ mɔɔ kɛkala bɛde edwɛkɛ ɛhye mɔ bɛvi ngapezoma ne mɔ anloa anu,+ edwɛkɛ ko ne ala mɔɔ bɛhanle ye wɔ kenle mɔɔ bɛwulale ɛlɔne Gyihova sua ne adiabo ne aze kɛ bɛsi ye ɛzonlenlɛsua ne la.
10 Kolaa na mekɛ zɔhane adwu la, sonla anzɛɛ nane biala annyia ahatualɛ;+ yɛɛ awie biala anva ɔ nwo kɔlɔnwo angɔ amba ɔlua kpɔvolɛ ne ati, ɔluakɛ memaanle menli kɔsɔɔti dwazole tiale bɛ nwo ngoko.’
11 “‘Noko kɛkala, me nee menli mɔɔ ɛha la ɛnrɛli ye kɛ dɛba ne la bieko,’+ kɛ ɛlɔne Gyihova se la ɛne.
12 ‘Ɔluakɛ bɛbalua anzodwolɛ ma; vanye bazo ma yɛɛ azɛlɛ ne bazo ye ma,+ anwuma badɔ ɛbɔlɛ; na mebamaa menli mɔɔ ɛha la anyia ninyɛne ɛhye mɔ amuala.+
13 O Dwudama nee Yizilayɛma, kɛ mɔɔ ɛnee bɛle munzule debie wɔ maanle maanle ne mɔ anu la,+ zɔhane ala noko a mebalie bɛ na bɛayɛ nyilalɛ a.+ Bɛmmasulo!+ Bɛmia bɛ sa nu.’*+
14 “Ɔluakɛ mɔɔ ɛlɔne Gyihova ɛha la ɛne, ‘“Kɛ mɔɔ menzile kpɔkɛ kɛ mefa munzule meara bɛ nwo zo ɔluakɛ bɛ ze mɔ hanle me ɛya na meangakyi me adwenle* la,” ɛlɔne Gyihova a se a,+
15 zɔhane ala noko a, kɛkala mezi kpɔkɛ kɛ meyɛ Gyɛlusalɛm nee Dwudama boɛ a.+ Bɛmmasulo!”’+
16 “‘Ninyɛne mɔɔ ɔwɔ kɛ bɛyɛ la ɛne: Bɛha nɔhalɛ bɛhile bɛ nwo ngoko,+ na bɛbua ndɛne wɔ bɛ nlenkɛ mgbole ne mɔ anloa nɔhalɛ nu na bɛmaa anzodwolɛ ɛrɛla.+
17 Bɛmmafa bɛ gɔnwo mɔ anwo adwenle ɛtane wɔ bɛ ahonle nu,+ yɛɛ bɛmmamaa bɛ nye die adalɛ ndane biala anwo;+ ɔluakɛ mekyi ninyɛne ɛhye mɔ amuala,’+ kɛ Gyihova se la ɛne.”
18 Ɛlɔne Gyihova edwɛkɛ ne rale me ɛkɛ ne bieko kɛ:
19 “Mɔɔ ɛlɔne Gyihova ɛha la ɛne, ‘Siane mɔɔ tɔ zo nna ɛhɔnehyelɛ ne,+ siane mɔɔ tɔ zo nnu ɛhɔnehyelɛ ne,+ siane mɔɔ tɔ zo nsuu ɛhɔnehyelɛ ne+ nee siane mɔɔ tɔ zo bulu ɛhɔnehyelɛ ne+ bayɛ anyelielɛ nee fɛlɛkolilɛ mekɛ amaa Dwudama—fɛlɛkolilɛ ɛvoyia.+ Ɔti bɛhulo nɔhalɛ nee anzodwolɛ.’
20 “Mɔɔ ɛlɔne Gyihova ɛha la ɛne, ‘Ɔbara ye kɛ maanle maanle nee azuamgbole dɔɔnwo azo amra bara;
21 na menli mɔɔ de suakpole ko azo la bahɔ fofolɛ zo ahɔha kɛ: “Bɛmaa yɛbɔ mɔdenle yɛhɔzɛlɛ Gyihova anyunlu ɛlolɛ na yɛkpondɛ ɛlɔne Gyihova abo zo. Medame noko melɛkɔ.”+
22 Na menli dɔɔnwo nee maanle mgbole barakpondɛ ɛlɔne Gyihova wɔ Gyɛlusalɛm+ na bɛazɛlɛ Gyihova anyunlu ɛlolɛ.’
23 “Mɔɔ ɛlɔne Gyihova ɛha la ɛne, ‘Mekɛ zɔhane, mrenyia bulu mɔɔ bɛvi aneɛ mɔɔ maanle maanle ne mɔ ka la amuala anu+ la barazɔ, ɛhɛe, bɛbarazɔ Dwuunli* tɛladeɛ nu* ɛsesebɛ na bɛaha kɛ: “Yɛkpondɛ kɛ yɛ nee bɛ kɔ,+ ɔluakɛ yɛde kɛ Nyamenle nee bɛ lua.”’”+
Ɔbodwɛkɛ
^ Anzɛɛ “nɔhalɛlilɛ.”
^ Hibulu aneɛ nu, “ɔlua ye ɛvolɛ dɔɔnwo ne ati.”
^ Hibulu aneɛ nu, “nɔhalɛ.”
^ Anzɛɛ “Bɛnyia akɛnrasesebɛ.”
^ Anzɛɛ “Bɛnyia akɛnrasesebɛ.”
^ Anzɛɛ “meannu me nwo.”
^ Hibulu aneɛ nu, “Dwuunli nrenyia.”
^ Anzɛɛ “tɛladeɛ ne anloa.”
