Zɛkalaya 2:1-13

  • Ɛnyelɛzodeɛnwunlɛ 3: Nrenyia bie lɛ ɛzuzunyɛma (1-13)

    • Bɛbazuzu Gyɛlusalɛm (2)

    • Gyihova bayɛ ‘senle bane abɔ ye ayia’ (5)

    • Ɛva ɔ sa ɛha Nyamenle anye ma ne (8)

    • Maanle dɔɔnwo bara Gyihova afoa (11)

2  Akee memaanle me nye zo na menwunle nrenyia bie mɔɔ lɛ ɛzuzunyɛma+ ɔ sa nu la.  Ɔti membizale ye kɛ: “Nienwu a ɛlɛkɔ a?” Ɔbuale kɛ: “Mekazuzu Gyɛlusalɛm meanwu ye tɛtɛlɛ nee ye tendenle.”+  Na nea! anwumabɔvolɛ ne mɔɔ ɛnee ɔ nee me ɛlɛtendɛ la hɔle, na anwumabɔvolɛ fofolɛ rayiale ye.  Akee ɔzele ye kɛ: “Nriandi kɔha kile kpavolɛ ne kɛ, ‘“Menli badɛnla Gyɛlusalɛm+ kɛ namule mɔɔ bɛtɛdiele nwolɛ bane la, ɔlua menli nee nyɛmoa kɔsɔɔti mɔɔ wɔ ɛkɛ ne la ati.”+  Kɛ Gyihova se la ɛne, “Mebayɛ kɛ senle bane la meabɔ ye meayia,+ na mebayɛ anyunlunyia wɔ ɛkɛ.”’”+  “Bɛrɛla! Bɛrɛla! Bɛvi sɔlɔ azɛlɛ ne azo bɛnriandi,”+ kɛ Gyihova se la ɛne. “Ɔluakɛ mebɔ bɛ asande mehɔgua anwuma anwoma nna ne anu,”+ kɛ Gyihova se la ɛne.  “Zayɔn bɛla! Wɔmɔ mɔɔ ɛ nee Babelɔn ara raalɛ ne a de la, nriandi.+  Ɔluakɛ mɔɔ ɛlɔne Gyihova ɛha la ɛne, mekɛ mɔɔ bɛwulale ye anyunlunyia bɛwiele la ɔzoanle me wɔ maanle maanle mɔɔ bɛvenle bɛ ninyɛne la anwo ɛkɛ ne kɛ:+ ‘Awie biala mɔɔ kɛva ɔ sa kɛha bɛ la ɛva ɔ sa ɛha me nye ma* ne.+  Ɔluakɛ kɛkala, mebamaa me sa zo meatia bɛ, na bɛdabɛ mumua ne bɛ ngɛkɛlɛ ave bɛ ninyɛne.’+ Na bɛbanwu ye wienyi kɛ ɛlɔne Gyihova a zoanle me a. 10  “O Zayɔn ara raalɛ, fa anyelielɛ tea nu;+ ɔluakɛ melɛba,+ na mebadɛnla bɛ avinli,”+ kɛ Gyihova se la ɛne. 11  “Kenle zɔhane maanle maanle dɔɔnwo bara Gyihova afoa,+ na bɛbayɛ me menli; na mebadɛnla wɔ avinli.” Na ɛbanwu kɛ ɛlɔne Gyihova a zoanle me ɛ nwo ɛkɛ a. 12  Gyihova bava Dwuda ayɛ ye kyɛfoa wɔ azɛlɛ nwuanzanwuanza ne azo, na ɔbakpa nu yeaye Gyɛlusalɛm bieko.+ 13  Alesama amuala, bɛyɛ koonwu wɔ Gyihova anyunlu, ɔluakɛ ɔvi ye ɛleka nwuanzanwuanza ne yeheha ɔ nwo.

Ɔbodwɛkɛ

Anzɛɛ “kuduarizi, kolonvia.”