Zɛkalaya 14:1-21

  • Nɔhalɛ ɛzonlenlɛ bali konim bɔkɔɔ (1-21)

    • Ɔlivi Boka ne anu bahyɛ nwiɔ (4)

    • Gyihova bayɛ kokye na ye duma ayɛ kokye (9)

    • Gyɛlusalɛm dwazotiama ngyegyelɛ (12-15)

    • Kpɔda Bo Ɛdɛnlanlɛ Ɛvoyia ne ɛlilɛ (16-19)

    • Buakɛ biala bayɛ nwuanzanwuanza amaa Gyihova (20, 21)

14  “Nea! Kenle ne ɛlɛba, Gyihova kenle ne, mɔɔ bɛbahyɛ ninyɛne mɔɔ bɛvenle ye wɔ wɔ* ɛkɛ ne la wɔ ɛ nye zo a.  Mebaboɔboa maanle maanle ne mɔ kɔsɔɔti anloa meamaa bɛ nee Gyɛlusalɛm aho; bɛbava suakpole ne, bɛbave ninyɛne mɔɔ wɔ bɛ azua ne mɔ anu la na bɛahye mraalɛ mɔɔ wɔ zo la bɛ nee bɛ ala. Na bɛbava menli mɔɔ wɔ sua ne azo la foa ko bɛahɔ akɛlɛzonlenlɛ nu, noko menli mɔɔ kɛha la, bɛnrɛye bɛ bɛnrɛvi suakpole ne azo.  “Gyihova bavinde na ɔ nee maanle zɔhane mɔ ahɔho+ kɛ mɔɔ ɔyɛ ye wɔ konle kenle la.+  Kenle zɔhane ɔbava ɔ gyakɛ yeazie Ɔlivi Boka ne+ mɔɔ ɔ nee Gyɛlusalɛm bɛ nye bɔ zo wɔ aduduleɛ la azo; Ɔlivi Boka ne anu bahyɛ nwiɔ, ɔvi aduduleɛ yeahɔdwu adɔleɛ, ɔbayɛ bɔnza kpole kpalɛ; na boka ne foa ko bahɔli sɔlɔ na foa ko arali nyiakɛ.  Bɛbanriandi bɛahɔ me boka ne bɔnza ne anu, ɔluakɛ me awoka ne mɔ bɔnza ne bahɔ too ahɔdwu Ezɛle. Bɛbanriandi kɛ mɔɔ bɛnriandile wɔ Dwuda Belemgbunli Yuzaya mekɛ zo ɔlua azɛlɛkpusulɛ ne ati la.+ Na Gyihova me Nyamenle ne bara, na nwuanzanwuanzama ne mɔ amuala baboka ɔ nwo.+  “Kenle zɔhane wienyi biala ɛnrɛra+—ninyɛne bagyengye.*  Na ɔbayɛ kenle mɔɔ bɛbabu ye kɛ ɔle Gyihova ɛdeɛ a.+ Aleɛ ɛnrɛhye yɛɛ aleɛ ɛnrɛdwo; yɛɛ wienyi bada nɔsolɛ nu.  Kenle zɔhane, ngoane nzule+ vi Gyɛlusalɛm baze,+ foa ko bahɔ aduduleɛ nyevile* ne anu+ na foa ko ahɔ adɔleɛ nyevile* ne anu.+ Ɔbazi wɔ wawaa nu yɛɛ fɔsɛlɛ nu.  Na Gyihova bayɛ Belemgbunli wɔ azɛlɛ ye kɔsɔɔti azo.+ Kenle zɔhane, Gyihova bayɛ kokye+ na ye duma ayɛ kokye.+ 10  “Azɛlɛ ne amuala bayɛ kɛ Alaba la,+ ɔvi Giba+ kɔdwu Relemɔn,+ Gyɛlusalɛm nyiakɛ; na ɔbamaa ɔ nwo zo na menli badɛnla ɛkɛ wɔ ɔ bo zo ne,+ ɔvi Bɛngyaman Anlenkɛ Kpole ne anloa+ too kɔdwu ɛleka mɔɔ Anlenkɛ Kpole Mɔɔ Limoa la wɔ la, too kɔdwu Muleɛ Anlenkɛ Kpole ne anwo, yɛɛ ɔvi Hananile Tawa ne anwo+ too kɔdwu belemgbunli kuma ne mɔɔ ɔtwihwi ye nwanye ma ne wɔ nu la anwo. 11  Na menli badɛnla ɛkɛ; na bɛnrɛbua suakpole ɛhye ndɛne bɛnrɛzɛkye ye bieko,+ na bɛbadɛnla Gyɛlusalɛm anzodwolɛ nu.+ 12  “Na ɛhye a le ngyegyelɛ mɔɔ Gyihova bava agyegye menli kɔsɔɔti mɔɔ bɛ nee Gyɛlusalɛm ko la:+ Bɛ nwonane bakpɔlɔ wɔ mekɛ mɔɔ bɛde ngoane nu la, bɛ nye bakpɔlɔ wɔ ye mbɔne ne mɔ anu yɛɛ bɛ tafinlima bakpɔlɔ bɛ nloa anu. 13  “Kenle zɔhane, Gyihova bamaa bɛ nye zo ada bɛ; na bɛ nuhua ko biala bazɔ ɔ gɔnwo asa, na yeamaa ɔ sa zo yeatia ɔ gɔnwo asa.*+ 14  Dwuda noko bava ɔ nwo awula konle ne mɔɔ bɛbaho ye wɔ Gyɛlusalɛm la anu; na bɛbaboɔboa maanle maanle mɔɔ bikye bɛ la kɔsɔɔti anwonyia nloa, nvutuke nee dwɛtɛ fufule yɛɛ adɛladeɛ dɔɔnwo kpalɛ.+ 15  “Na ngyegyelɛ mɔɔ le kɛ ngyegyelɛ ko ne la bara mgbɔnwɔ, mgbɔnwɔndua,* afunlumu yɛɛ asoaso nee nyɛmoa mɔɔ wɔ zɔhane azokoɛleɛ ne mɔ la amuala noko anwo zo. 16  “Awie biala mɔɔ kɛha wɔ maanle maanle kɔsɔɔti mɔɔ dwazole tiale Gyɛlusalɛm anu la, bahɔ ahɔhoto* Belemgbunli ne, ɛlɔne Gyihova+ ɛvolɛ biala,+ na yeali Kpɔda Bo Ɛdɛnlanlɛ Ɛvoyia ne.+ 17  Noko saa mbusua mɔɔ wɔ azɛlɛ ye azo la anu bie angɔ Gyɛlusalɛm angɔngoto Belemgbunli ne, ɛlɔne Gyihova a, ezule ɛnrɛdɔ ɛnrɛmaa bɛ.+ 18  Na saa Yigyibiti abusua ne anvinde amba a, ezule ɛnrɛdɔ ɛnrɛmaa bɛ. Emomu, ngyegyelɛ ne mɔɔ Gyihova fa gyegye maanle maanle mɔɔ ambanli Kpɔda Bo Ɛdɛnlanlɛ Ɛvoyia ne la bara bɛ nwo zo. 19  Ɛhye a bayɛ Yigyibitima nee maanle maanle kɔsɔɔti mɔɔ bɛngɔnli Kpɔda Bo Ɛdɛnlanlɛ Ɛvoyia ne la ɛtane nwo anzohwenlɛ a. 20  “Kenle zɔhane, bɛbahɛlɛ edwɛkɛ ‘Gyihova Le Nwuanzanwuanza!’+ wɔ dɔne ne mɔ mɔɔ hendɛhenda mgbɔnwɔ ne mɔ anwo la anwo. Na mbuakɛ*+ mɔɔ wɔ Gyihova sua nu ɛkɛ ne la bayɛ kɛ ahyɛnze+ mɔɔ gyigyi afɔlemokyea ne anyunlu la. 21  Na buakɛ* biala mɔɔ wɔ Gyɛlusalɛm nee Dwuda la bayɛ nwuanzanwuanza, ɔbayɛ ɛlɔne Gyihova ɛdeɛ, na bɛdabɛ kɔsɔɔti mɔɔ bɛbara afɔle ɛbɔlɛ la bava bie ado debie. Kenle zɔhane, bɛnrɛnwu Keenanli* bieko wɔ ɛlɔne Gyihova sua ne anu.+

Ɔbodwɛkɛ

Ɛhye kile, suakpole ne mɔɔ bɛha nwolɛ edwɛkɛ wɔ ngy. 2 ne la.
Anzɛɛ “ɛnrɛhola bɛ bo tu,” kɛ asɛɛ ɛyɛyɛlɛ ɛmaa bɛgyengye la.
Ɛhye kile, Nyevile Wulera.
Ɛhye kile, Mɛdetɛlenia.
Anzɛɛ “na sonla ko bateta ɔ gɔnwo.”
Asoaso nyinli nee ɛkpɔnwɔ belɛ a wole ye a.
Anzɛɛ “ahɔzonle.”
Anzɛɛ “mbuakɛ mgbole.”
Anzɛɛ “buakɛ kpole.”
Anzɛɛ ɔkola ɔkile, “gualilɛnli.”