Yizikeɛle 5:1-17

  • Bɛhilele kɛzi Gyɛlusalɛm badɔ aze la (1-17)

    • Bɛhyɛle ngapezonli ne enrinli ne mɔɔ ɔkpale la anu nsa (1-4)

    • Gyɛlusalɛm ɛzɛkye ɛdɛla maanle maanle ne mɔ (7-9)

    • Bɛlile atuadelɛma ne anwo gyima wɔ ndenle nsa azo (12)

5  “Na wɔmɔ, sonla ra, fa konle dadeɛ mɔɔ yɛ nla la kakyi biledi mɔɔ bɛfa bɛkpa enrinli la. Kpa ɛ ti nee ɛ kɛsa, na fa tone suzu enrinli ne na kyɛ nuhua nsa.  Saa mekɛ mɔɔ ɛfa wɔabɛnga suakpole ne wɔayia la wie a, ɛbava senle wɔayela ko wɔ suakpole ne azo.+ Akee ɛbava ko na wɔava konle dadeɛ wɔapepɛ nu wɔabɛnga suakpole ne wɔayia,+ yɛɛ ɛbakponde mɔɔ li awieleɛ la wɔ anwoma ne anu, na mebahwe konle dadeɛ meadoa bɛ.+  “Eza fa enrinli ne ekyi na fa kyekye wɔ tɛladeɛ ne anloa.  Fa bie dɔɔnwo gua senle nu na yela ye bɔkɔɔ. Na senle bavi ɛhye anu adɛlɛ ahɔ Yizilayɛma kɔsɔɔti anwo zo.+  “Mɔɔ Tumivolɛ Awulae Gyihova ɛha la ɛne: ‘Gyɛlusalɛm ɛne. Meva ye mezie maanle maanle avinli, memaa maanle maanle ɛbɔ ye ɛyia.  Noko yede atua yetia me ndɛnebualɛ nee me mɛla ne mɔ, na yeyɛ amumuyɛ dɔɔnwo yedɛla maanle maanle nee azɛlɛ mɔɔ ɛbɛnga ye ɛyia la.+ Ɔluakɛ bɛkpo me ndɛnebualɛ ne mɔ yɛɛ bɛanlua me mɛla ne mɔ anu.’  “Ɛhye ati mɔɔ Tumivolɛ Awulae Gyihova ɛha la ɛne: ‘Kɛmɔ ɛle agyegyeamra ɛtɛla maanle maanle mɔɔ ɛbɛnga wɔ ɛyia, na wɔanlua me mɛla ne mɔ anu anzɛɛ wɔanva me ndɛnebualɛ ne mɔ wɔanyɛ gyima, na emomu, ɛhɔlile maanle maanle mɔɔ ɛbɛnga wɔ ɛyia la ndɛnebualɛ nzi la ati,+  mɔɔ Tumivolɛ Awulae Gyihova ɛha la ɛne: “O suakpole, nea, meyɛ wɔ kpɔvolɛ,+ na mebabua ndɛne wɔ wɔ avinli wɔ maanle maanle ne mɔ anye zo.+  Ɔlua wɔ bɛkyi nyɛleɛ ne mɔ kɔsɔɔti ati, mebayɛ debie mɔɔ metɛyɛle bie ɛlɛ la wɔ wɔ avinli, yɛɛ menrɛyɛ ye zɔhane bieko.+ 10  “‘“Ɔti selɛma mɔɔ wɔ bɛ nu la bɛahye bɛ mra mrenyia ali,+ yɛɛ mralɛ mrenyia bɛahye bɛ papa mɔ ali, na mebabua ndɛne wɔ bɛ avinli na meabɔ bɛdabɛ mɔɔ bɛbaha la amuala asande meahɔ ɛleka biala.”’*+ 11  “‘Mekɛ ala mɔɔ mede aze la, Tumivolɛ Awulae Gyihova a se a, ‘kɛ mɔɔ wɔva wɔ kyibadeɛ ananze ne mɔ nee wɔ bɛkyi nyɛleɛ ne mɔ wɔgua me ɛzonlenlɛsua ne anwo evinli la ati,+ medame noko mebakpo wɔ;* me nye ɛnrɛze wɔ anwunvɔne yɛɛ me kunlu ɛnrɛyelɛyela me.+ 12  Ewulenzane* bahyɛ bɛ nuhua nsa ahu ko anzɛɛ ɛhɔne babɔ bɛ bo zo wɔ bɛ avinli. Konle dadeɛ noko bahu bɛ nuhua ko abɛnga wɔ ayia.+ Na mebabɔ ko ne mɔɔ baha la asande meahɔ ɛleka biala* na meahwe konle dadeɛ meavoa bɛ.+ 13  Akee me ɛya ne badwo, na bɛ nwo ɛya kpole ne mɔɔ meva la baha aze, na me kunlu adwo.+ Na saa mewola me ɛya kpole ne megua bɛ nwo zo mewie a, bɛbanwu kɛ medame Gyihova, meha mezi zo kɛ mekulo kɛ bɛsonle me ngomekye.+ 14  “‘Mebamaa wɔayɛ ɛleka mɔɔ ɛdɔ mgbane na wɔayɛ anyiemgba debie wɔ maanle maanle mɔɔ ɛbɛnga wɔ ɛyia la avinli nee awie biala mɔɔ ɛlɛpɛ nu la anye zo.+ 15  Ɛbayɛ anyiemgba nee agolobɛnwo debie,+ saa mefa ɛya nee ɛya kpole mebua wɔ ndɛne na metwe ɛ nzo wɔ mekɛ mɔɔ meva ɛya kpalɛ la a, ɛbayɛ kɔkɔbɔlɛ nwo neazo nee debie ɛzulolɛ wɔamaa maanle maanle mɔɔ ɛbɛnga wɔ ɛyia la. Medame, Gyihova a mese a. 16  “‘Mebamaa ɛhɔne ɛda mbaka anwo ɛzulolɛ ne mɔ arazɛkye bɛ. Ɛda mbaka ne mɔ mɔɔ mebamaa bɛara la babɔ bɛ bo zo.+ Mebazɛkye ɛleka mɔɔ bɛfa bɛ aleɛ bɛsie la* na meamaa ɛhɔne ne anu ayɛ se kpalɛ amaa bɛ.+ 17  Mebamaa ɛhɔne nee nane anwo ɛzulolɛ+ ara bɛ nwo zo, na bɛahu bɛ mra. Ewulenzane nee mogya mɔɔ bɛka bɛgua la babo ɛ nwo zo, na mebava konle dadeɛ meara ɛ nwo zo.+ Medame, Gyihova a mese a.’”

Ɔbodwɛkɛ

Hibulu aneɛ nu, “meahɔ anwoma biala anu.”
Anzɛɛ “mebamaa wɔ zo ade.”
Anzɛɛ “Ewule.”
Hibulu aneɛ nu, “meahɔ anwoma biala anu.”
Hibulu aneɛ nu, “mebabubu wɔ mbaka mɔɔ ɛkendɛhenda paano wɔ zo la anu.” Ɔkola ɔkile mbaka mɔɔ bɛkendɛhenda paano mɔɔ bɛfa bɛazie wɔ zo la.