Yizikeɛle 43:1-27

  • Gyihova anyunlunyia ɛyi ɛzonlenlɛsua ne tɛkɛɛ (1-12)

  • Afɔlemokyea ne (13-27)

43  Akee ɔvale me ɔhɔle anlenkɛ kpole ne mɔɔ ɔ nye kile aduduleɛ la anloa.+  Wɔ ɛkɛ ne, menwunle kɛ Yizilayɛ Nyamenle ne anyunlunyia vi aduduleɛ ɛlɛba,+ na ɔ ne le kɛ azule mɔɔ ɛlɛse kpole la ane;+ na ye anyunlunyia ne maanle azɛlɛ ne azo dale.+  Mɔɔ menwunle ye la le kɛ ɛnyelɛzodeɛnwunlɛ ne mɔɔ menwunle ye wɔ mekɛ mɔɔ membale* kɛ mebazɛkye suakpole ne la, na ɔle kɛ mɔɔ menwunle ye wɔ azule Kibaa ne anloa la;+ na membutule me nyunlu aze.  Akee Gyihova anyunlunyia ne luale anlenkɛ kpole ne mɔɔ ɔ nye kile aduduleɛ la anu wolole ɛzonlenlɛsua* ne anu.+  Sunsum ne* maanle me zo hɔle ɔ kunlu lɔ alienwo ɛkɛ, na menwunle kɛ Gyihova anyunlunyia ne ɛyi ɛzonlenlɛsua ne tɛkɛɛ.+  Akee mendele kɛ awie ɛlɛtendɛ ahile me wɔ ɛzonlenlɛsua ne anu, na nrenyia ne ragyinlanle me nwo ɛkɛ.+  Ɔzele me kɛ: “Sonla ra, ɛke a me belemgbunli ebia+ ne gyi na mefa me gyakɛ mesiezie a,+ ɛleka mɔɔ mebadɛnla ye wɔ Yizilayɛma avinli dahuu la.+ Yizilayɛma nee bɛ arelemgbunli ɛnrɛva bɛ sunsum nu tuutuubɔlɛ nee bɛ arelemgbunli ne mɔ avunli ɛnrɛgua me duma nwuanzanwuanza ne anwo evinli bieko.+  Bɛvale bɛ anuhɔlɛ bɛziele me anuhɔlɛ ɛdeɛ ne anwo ɛkɛ, yɛɛ bɛvale bɛ anlenkɛ felɛmo bɛziele me anlenkɛ felɛmo ɛdeɛ ne anwo ɛkɛ mɔɔ ɛnee bane bie a wɔ me nee bɛ avinli a,+ bɛvale bɛ bɛkyi ninyɛne mɔɔ bɛyɛle la bɛguale me duma nwuanzanwuanza ne anwo evinli, ɔti menvale ɛya membɔle bɛ bo zo.+  Kɛkala maa bɛye bɛ sunsum nu tuutuubɔlɛ ne nee bɛ arelemgbunli ne mɔ avunli bɛvi me nwo ɛkɛ bɛhɔ moamoa, na me nee bɛ badɛnla dahuu.+ 10  “Wɔmɔ sonla ra, ka ɛzonlenlɛsua ne anwo edwɛkɛ kile Yizilayɛma,+ amaa bɛ nvonleɛ ne mɔ ati bɛabɔ anyiemgba+ na bɛazukoa kɛzi bɛzile ye la anwo debie.* 11  Saa bɛbɔ anyiemgba wɔ mɔɔ bɛyɛ la amuala anwo a, ɔwɔ kɛ ɛmaa bɛnwu kɛzi bɛzile ɛzonlenlɛsua ne, kɛzi bɛhyehyɛle ye, ye ndenle mɔɔ bɛdua nu bɛfinde nee ye nlenkɛ ne mɔ.+ Fa kɛzi bɛzile ye nee nwolɛ ngyehyɛleɛ ne mɔ, yɛɛ kɛzi bɛzile ye nee nwolɛ mɛla ne mɔ amuala kile bɛ na kɛlɛ bɛ to ɛkɛ wɔ bɛ nye zo, amaa bɛanwu kɛzi bɛzile ye la amuala na bɛali nwolɛ ngyehyɛleɛ ne mɔ azo.+ 12  Ɛhye a le ɛzonlenlɛsua ne anwo mɛla ne a. Boka ne azo nee nwolɛ azɛlɛ ne amuala le nwuanzanwuanza kpalɛ.+ Nea! Ɛhye a le ɛzonlenlɛsua ne anwo mɛla ne a. 13  “Kɛzi bɛzuzule afɔlemokyea ne wɔ kubit* nu la ɛne+ (kubit ko biala, bɛvale bɛ sa mrɛlɛsɛka nna tɛtɛlɛ ko bɛdole zo). Ɔ bo ne le kubit ko yɛɛ ye tɛtɛlɛ le kubit ko. Ɔlɛ kɛba mɔɔ ye tɛtɛlɛ le waa ko* la wɔ ɔ nloa ne anwo amuala. Ɛhye a le afɔlemokyea ne abo a. 14  Ɔvi ɔ bo azɛlɛ nwo mɔɔ kɔdwu ndazo ekyi ne anwo la le kubit nwiɔ, yɛɛ ye tɛtɛlɛ le kubit ko. Ɔvi ndazo ekyi ne anwo mɔɔ kɔdwu ndazo kpole ne anwo la le kubit nna, yɛɛ ye tɛtɛlɛ le kubit ko. 15  Afɔlemokyea ne ɛleka mɔɔ bɛsɔ senle ne la tendenle le kubit nna, yɛɛ mɛne nna gyigyi afɔlemokyea ne azo wɔ ɛleka mɔɔ bɛsɔ senle ne la.+ 16  Afɔlemokyea ne ɛleka mɔɔ bɛsɔ senle ne la tɛbanu nna ne amuala sɛ, ye tendenle le kubit 12 yɛɛ ye tɛtɛlɛ le kubit 12.+ 17  Ndazo kpole ne tɛbanu nna ne mɔ ndendenle le kubit 14 yɛɛ bɛ tɛtɛlɛ le kubit 14; ɔ nloa kɛba ne le kubit foa ko yɛɛ ɔ bo ne mɔɔ ɛbɛnga ye ɛyia la tɛbanu biala le kubit ko. “Na ye kpolike ne anye kile aduduleɛ.” 18  Akee ɔzele me kɛ, “Sonla ra, mɔɔ Tumivolɛ Awulae Gyihova ɛha la ɛne: ‘Saa bɛyɛ afɔlemokyea ne a, adehilelɛ ɛhye mɔ a ɔwɔ kɛ bɛfa bɛdi gyima a, amaa bɛabɔ ɛyelalɛ afɔle wɔ zo na bɛakponde mogya wɔ zolɛ.’*+ 19  “‘Fa ɛnlankɛ ralɛ nyinli ko maa Livae ɛsɔfoma mɔɔ le Zeedɔko abozoamra, mɔɔ bɛba me nyunlu bɛbasonle me la maa bɛva bɛbɔ ɛtane nwo afɔle,’+ Tumivolɛ Awulae Gyihova a se a. 20  ‘Ɔwɔ kɛ ɛfa ye mogya ne bie ɛyɛ afɔlemokyea ne mɛne nna ne mɔ, ndazo kpole ne mgbɛnezo nna ne mɔ yɛɛ ɔ nloa kɛba ne amuala anwo, amaa wɔade nwolɛ wɔavi ɛtane nwo na wɔali ɔ ti mgbɔdalɛ.+ 21  Akee fa ɛnlankɛ ralɛ nyinli, ɛtane afɔlebɔdeɛ ne, na yela ye wɔ ɛleka mɔɔ bɛhile la wɔ ɛzonlenlɛsua ne anzi.+ 22  Kenle mɔɔ tɔ zo nwiɔ la azo, ɛbava abɔnkye nyinli mɔɔ dɛne ɛnle ɔ nwo la wɔabɔ ɛtane nwo afɔle; na bɛbade afɔlemokyea ne anwo bavi ɛtane nwo kɛ mɔɔ bɛfa ɛnlankɛ ralɛ nyinli bɛte nwolɛ bɛfi ɛtane nwo ala la.’ 23  “‘Saa ɛte nwolɛ ɛfi ɛtane nwo ɛwie a, ɛbava ɛnlankɛ ralɛ nyinli mɔɔ dɛne ɛnle ɔ nwo nee boane nyinli mɔɔ dɛne ɛnle ɔ nwo la wɔabɔ afɔle. 24  Fa bɛ bɛla Gyihova anyunlu, na maa ɛsɔfo ne mɔ ɛdo ngyenle ɛgua bɛ nwo+ na fa bɛ bɔ nane mumua ɛyelalɛ afɔle maa Gyihova. 25  Ɛbava abɔnkye nyinli wɔabɔ ɛtane nwo afɔle kenle ko biala too kenle nsuu,+ yɛɛ ɛbava ɛnlankɛ ralɛ nyinli nee boane nyinli noko wɔabɔ afɔle; nane mɔɔ dɛne ɛnle bɛ nwo* la a ɛbava wɔabɔ afɔle ne a. 26  Bɛva kenle nsuu bɛyɛ mgbɔdalɛ bɛmaa afɔlemokyea ne, bɛde nwolɛ na bɛbɔ ɔ bo bɛva bɛyɛ gyima. 27  Saa kenle ne mɔ wie a, ɔvi ye kenle mɔtwɛ ne azo+ mɔɔ kɔ la, ɛsɔfo ne mɔ bɛabɔ nane mumua ɛyelalɛ afɔle nee anzodwolɛ afɔle wɔ afɔlemokyea ne azo amaa bɛ;* na me nye bɛalie bɛ nwo,’+ Tumivolɛ Awulae Gyihova a se a.”

Ɔbodwɛkɛ

Anzɛɛ ɔkola ɔkile, “ɔrale.”
Hibulu aneɛ nu, “sua.”
Wɔ Hibulu nu edwɛkɛkpɔkɛ ɛhye kola kile Nyamenle sunsum ne anzɛɛ anwumabɔvolɛ.
Hibulu aneɛ nu, “bɛazuzu kɛzi ɔde la.”
Ɛhye le kubit ndendenle. Nea Mok. B14.
Ɛhye kile, bɛ sa waa ko, kɛyɛ sm 22.2. (enkyi 8.75) Nea Mok. B14.
Anzɛɛ “nwolɛ.”
Anzɛɛ “bɛdi munli.”
Ɛhye kile, menli ne mɔ.