Yizikeɛle 39:1-29

  • Gɔgo nee ye ɛlɔnema ne ɛzɛkyelɛ (1-10)

  • Bɛbazie ye wɔ Heemɔn-Gɔgo Bɔnza ne anu (11-20)

  • Yizilayɛ bazia ara (21-29)

    • Bɛwolale Nyamenle sunsum ne bɛguale Yizilayɛma anwo zo (29)

39  “Na wɔmɔ sonla ra, ka ngapezo tia Gɔgo+ na se ye kɛ, ‘Mɔɔ Tumivolɛ Awulae Gyihova ɛha la ɛne: “Meyɛ wɔ kpɔvolɛ, Gɔgo, Mihyɛke nee Tubale adekilevolɛ kpanyinli.*+  Mebamaa wɔ adwenle ahakyi na meava wɔ meavi sɔlɔ moamoa nehane+ meara Yizilayɛ awoka ne mɔ azo.  Mebabɔ wɔ ɛda ne meavi ɛ sa bɛne ne anu meado ye lɔ na meamaa wɔ ɛda mbaka ne mɔ avi ɛ sa fema ne anu agua aze.  Ɛ nee wɔ ɛlɔnema ne mɔ yɛɛ menli mɔɔ baboka ɛ nwo la amuala bawu agua Yizilayɛ awoka ne mɔ azo.+ Mebava wɔ meamaa nloma ngakyile mɔɔ bɛdi nane la nee ɛbɔ nu nane anwo ɛzulolɛ kɔsɔɔti kɛ aleɛ.”’+  “‘Ɛbawu wɔala ɛbɔ nu,+ ɔluakɛ medame mumua ne a medendɛ a,’ Tumivolɛ Awulae Gyihova a se a.  “‘Na mebamaa senle ara Meegɔgo nee bɛdabɛ mɔɔ bɛde anzodwolɛ nu wɔ mbɔra ne mɔ azo la anwo zo,+ na bɛbanwu kɛ medame a mele Gyihova a.  Mebamaa bɛanwu me duma nwuanzanwuanza ne wɔ me menli Yizilayɛma avinli, na menrɛmaa bɛnrɛgua me duma nwuanzanwuanza ne anwo evinli bieko; na maanle maanle ne mɔ banwu kɛ medame a mele Gyihova,+ Nwuanzanwuanzanli Ko ne mɔɔ wɔ Yizilayɛ la a.’+  “‘Ɛhɛe, ɛhye ɛlɛba, na ɔbayɛ zɔ,’ Tumivolɛ Awulae Gyihova a se a. ‘Ɛhye a le kenle ne mɔɔ menganle nwolɛ edwɛkɛ la.  Bɛdabɛ mɔɔ bɛde Yizilayɛ azuamgbole ne mɔ azo la bɛahɔ na bɛahɔva akodeɛ bɛawuda senle—enyinlike ngyikyi* nee enyinlike mgbole, ɛda nee ɛda mbaka, konle ahoholombaka* nee atwɛ. Na bɛbava bɛawuda senle+ too ɛvolɛ nsuu. 10  Bɛnrɛhɔkpondɛ mbaka wɔ ɛbɔ nu anzɛɛ bɛnrɛhɔkpondɛ ɛyɛne wɔ ɛhoayelɛ nu, ɔluakɛ bɛbava akodeɛ a bɛawuda senle a.’ “‘Bɛbave menli mɔɔ venle bɛ ninyɛne la ninyɛne na bɛasesa menli mɔɔ sesale bɛ ninyɛne la ninyɛne,’ Tumivolɛ Awulae Gyihova a se a. 11  “‘Kenle zɔhane mebamaa Gɔgo+ ɛleka mɔɔ bɛbazie ye la wɔ Yizilayɛ, wɔ bɛdabɛ mɔɔ bɛtu adenle bɛfi aduduleɛ bɛkɔ nyevile ne anloa la bɔnza ne anu, na bɛbadua bɛdabɛ mɔɔ bɛpɛ nu wɔ ɛkɛ la adenle ne. Ɛkɛ ne a bɛbazie Gɔgo nee ye menli dɔɔnwo ne amuala a, na bɛbavɛlɛ ye Heemɔn-Gɔgo Bɔnza.*+ 12  Yizilayɛma bava siane nsuu azie bɛ amaa azɛlɛ ne azo ade.+ 13  Menli mɔɔ de azɛlɛ ne azo la amuala bayɛ gyima azie bɛ, na ɛhye bamaa bɛalie duma wɔ kenle mɔɔ mebawula me nwo anyunlunyia la,’+ Tumivolɛ Awulae Gyihova a se a. 14  “‘Bɛbaye menli bɛamaa bɛaluolua azɛlɛ ne azo dahuu na bɛazie avunli mɔɔ baha azɛlɛ ne azo la, amaa zolɛ ade. Bɛbahɔ zo bɛakpondɛ bɛ too siane nsuu. 15  Saa menli mɔɔ luolua azɛlɛ ne azo la nwu sonla bowule bie a, bɛbayɛ sɛkɛlɛneɛ bɛazie nwolɛ. Na bɛdabɛ mɔɔ bɛye bɛ kɛ bɛzie avunli ne mɔ la bazie bɛ wɔ Heemɔn-Gɔgo Bɔnza ne anu.+ 16  Na bɛbakyekye suakpole bie noko wɔ ɛkɛ, bɛbavɛlɛ ye Hamonaa.* Na bɛbamaa azɛlɛ ne azo ade.’+ 17  “Na wɔmɔ sonla ra, mɔɔ Tumivolɛ Awulae Gyihova ɛha la ɛne: ‘Ka kile nloma ngakyile yɛɛ ɛbɔ nu nane anwo ɛzulolɛ kɔsɔɔti kɛ, “Bɛboɔboa bɛ nloa na bɛrɛla. Bɛrabɔ me afɔle ne mɔɔ melɛbɔ meamaa bɛ la anwo bɛyia, afɔlebɔlɛ kpole wɔ Yizilayɛ awoka ne mɔ azo.+ Bɛbali nwonane na bɛanlo mogya.+ 18  Bɛbali katakyiema nwonane na bɛanlo azɛlɛ ye azo mgbanyima mogya—mboane nyinli, mboane mralɛ, mbɔnkye nee nlankɛ nyinli—Beehyan nane mɔɔ ɛlɔ la amuala. 19  Bɛbali ɛnlome bɛ ko ayi na bɛanlo mogya too bɛabo wɔ afɔlebɔlɛ ne mɔɔ meziezie memaa bɛ la abo.”’ 20  “‘Bɛbali mgbɔnwɔ nee konle ehwili kavolɛma, katakyiema nee kovolɛma ngakyile kɔsɔɔti nwonane wɔ me ɛkponle zo bɛ ko ayi,’+ Tumivolɛ Awulae Gyihova a se a. 21  “‘Mebala me anyunlunyia ne ali wɔ maanle maanle ne mɔ anu, na maanle maanle kɔsɔɔti banwu ndɛne mɔɔ mebua nee tumi* mɔɔ mela ye ali wɔ bɛ avinli la.+ 22  Ɔvi kenle zɔhane mɔɔ kɔ la, Yizilayɛma banwu kɛ medame a mele Gyihova bɛ Nyamenle ne a. 23  Na maanle maanle ne mɔ banwu kɛ Yizilayɛma hɔle akɛlɛzonlenlɛ nu ɔlua bɛ nvonleɛ ti, ɔluakɛ bɛanli nɔhalɛ bɛammaa me.+ Ɔti menyele me nye mendole ahane+ na menvale bɛ menwulale bɛ kpɔvolɛma asa anu,+ na bɛ muala bɛwule konle dadeɛ nloa. 24  Menyele me nye mendole ahane na me nee bɛ lile ye kɛ mɔɔ bɛ mɛladonlɛ ne mɔ nee bɛ nwo evinli ne mɔ de la.’ 25  “Ɛhye ati mɔɔ Tumivolɛ Awulae Gyihova ɛha la ɛne: ‘Mebamaa Gyekɔbo abozoamra mɔɔ hɔle akɛlɛzonlenlɛ nu la azia ara bɛ azɛlɛ ne azo+ na meaze Yizilayɛma amuala anwunvɔne;+ na mebabɔ mɔdenle kpalɛ meabɔ me duma nwuanzanwuanza ne anwo bane.*+ 26  Saa bɛbɔ anyiemgba wɔ nɔhalɛ mɔɔ bɛanli bɛammaa me la amuala anwo bɛwie a,+ bɛbadɛnla bɛ azɛlɛ ne azo anzodwolɛ nu, mɔɔ awie biala ɛnrɛha bɛ ɛzulolɛ a.+ 27  Saa me nee bɛ vi menli ne anu meba na meboɔboa bɛ nloa mefi bɛ agbɔvolɛ azɛlɛ ne mɔ azo a,+ eza mebahile me nwuanzanwuanzayɛlɛ ne wɔ bɛ nu wɔ maanle maanle dɔɔnwo anyunlu.’+ 28  “‘Saa memaa bɛkɔ akɛlɛzonlenlɛ nu wɔ maanle maanle ne mɔ anu na mesia meboɔboa bɛ nloa meba bɛ azɛlɛ ne azo na meangyakyi bɛ nuhua bie mɔ wɔ nehane a, bɛbanwu kɛ medame a mele Gyihova bɛ Nyamenle ne a.+ 29  Menrɛye me nye menrɛdo ahane bieko,+ ɔluakɛ mebawola me sunsum ne meagua Yizilayɛma anwo zo,’+ Tumivolɛ Awulae Gyihova a se a.”

Ɔbodwɛkɛ

Anzɛɛ “kpanyinli kpalɛ.”
Enyinlike ngyikyi mɔɔ ɛdatovoma ta dɛ ye bɛ sa nu.
Anzɛɛ ɔkola ɔkile, “baka” mɔɔ bɛzinzi ɔ ti mɔɔ bɛva bɛyɛ akodeɛ la.
Anzɛɛ “Gɔgo Menli Dɔɔnwo Ne Bɔnza.”
Ɔ bo kile “Menli Dɔɔnwo.”
Hibulu aneɛ nu, “ɛsalɛ.”
Hibulu aneɛ nu, “meahile kɛ mekulo kɛ bɛsonle me ngomekye.”