Yizikeɛle 38:1-23

  • Gɔgo bateta Yizilayɛ (1-16)

  • Gyihova ɛva Gɔgo anwo ɛya (17-23)

    • ‘Maanle maanle bɛanwu kɛ medame a mele Gyihova a’ (23)

38  Gyihova nee me dendɛle bieko kɛ:  “Sonla ra, kakyi ɛ nye wɔ Gɔgo mɔɔ vi Meegɔgo la azɛlɛ zo,+ Mihyɛke nee Tubale adekilevolɛ kpanyinli* ne anwo,+ na ka ngapezo tia ye.+  Ka kɛ, ‘Mɔɔ Tumivolɛ Awulae Gyihova ɛha la ɛne: “Nea meyɛ wɔ kpɔvolɛ, O Gɔgo, Mihyɛke nee Tubale adekilevolɛ kpanyinli.*  Mebamaa wɔ adwenle ahakyi na meava koba measosɔ wɔ awudwelɛ+ na meahwe ɛ nee wɔ ɛlɔnema ne amuala meavinde,+ mgbɔnwɔ nee mgbɔnwɔkavoma, bɛ muala bɛziezie bɛ nwo ngɛnlɛma, menli ekpunli dɔɔnwo mɔɔ bɛdedɛ enyinlike mgbole nee enyinlike ngyikyi,* bɛ muala bɛdedɛ konle dadeɛ;  Pɛhyea, Yiteyopea yɛɛ Pɛɛte+ boka bɛ nwo, bɛ muala bɛdedɛ enyinlike ngyikyi yɛɛ bɛzo mbulalɛ ahyɛlɛ;  Goma nee ye ɛlɔnema kɔsɔɔti, bɛ nee Togamaa abozoamra+ mɔɔ bɛvi sɔlɔ afoa nu moamoa nehane la, nee bɛ ɛlɔnema kɔsɔɔti—menli dɔɔnwo boka ɛ nwo.+  “‘“Siezie ɛ nwo, boɔboa ɛ nwo, ɛ nee wɔ ɛlɔnema mɔɔ bɛhuohua bɛ nloa wɔ ɛ nwo ɛkɛ ne la amuala, na ɛbayɛ bɛ kpanyinli.*  “‘“Kenle dɔɔnwo anzi, mebahakyi me nye wɔ ɛ nwo zo.* Wɔ ɛvolɛ ne mɔ mɔɔ li awieleɛ la anu, ɛbara azɛlɛ ne mɔɔ zolɛ menli ne nriandile vile konle dadeɛ nloa, na bɛboɔboale bɛ nloa bɛvile menli dɔɔnwo anu bɛrale Yizilayɛ awoka ne mɔ mɔɔ dɔle mgbane mekɛ tendenle azo la anwo zo. Bɛ nee menli mɔɔ de azɛlɛ ɛhye azo la vi menli ne mɔ anu, na bɛ muala bɛde anzodwolɛ nu.+  Ɛbara bɛ nwo zo kɛ ahumu, na wɔaheda azɛlɛ ne azo kɛ amungu la, ɛ nee wɔ ɛlɔnema ne mɔ amuala nee menli dɔɔnwo ne mɔɔ boka ɛ nwo la.”’ 10  “Mɔɔ Tumivolɛ Awulae Gyihova ɛha la ɛne: ‘Kenle zɔhane nzuzulɛ dɔɔnwo bara wɔ ahonle nu na wɔabɔ adwenle ɛtane bie. 11  Ɛbaha kɛ: “Mebahɔ azɛlɛ ne mɔɔ bɛde zo mɔɔ bɛtɛbɔle nwolɛ bane* la azo.+ Mebahɔ bɛdabɛ mɔɔ bɛde ye anzodwolɛ nu, debie ɛngyegye bɛ, bɛ muala bɛde azua mɔɔ bɛtɛdiele nwolɛ bane, bɛnlɛ mbulalɛ wɔ bɛ nlenkɛ nzi, anzɛɛ bɛnlɛ nlenkɛ mgbole kɛ bɛfa bɛabɔ nwolɛ bane la anwo zo.” 12  Wɔ adwenle a le kɛ ɛkasesa na wɔave ninyɛne dɔɔnwo, kɛ ɛkateta ɛleka ne mɔ mɔɔ dɔle mgbane+ na kɛkala menli de ɛkɛ yɛɛ menli ne mɔɔ bɛboɔboale bɛ nloa bɛvile maanle maanle ne mɔ anu,+ mɔɔ bɛnyia anwonyia nee agyapadeɛ dɔɔnwo,+ mɔɔ bɛde azɛlɛ ne avinli la. 13  “‘Hyiba+ nee Didan,+ Tahyehye gualilɛma+ nee ye kovolɛma* amuala babiza wɔ kɛ: “Ɛlɛba wɔarasesa na wɔave ninyɛne dɔɔnwo ɔ? Wɔboɔboa wɔ ɛlɔne ne mɔ anloa kɛ ɛbazoa dwɛtɛ fufule nee nvutuke, anwonyia nee agyapadeɛ wɔahɔ, na wɔave ninyɛne dɔɔnwo kpalɛ ɔ?”’ 14  “Ɔti sonla ra, ka ngapezo na se Gɔgo kɛ, ‘Mɔɔ Tumivolɛ Awulae Gyihova ɛha la ɛne: “Kenle mɔɔ me menli Yizilayɛma badɛnla aze anzodwolɛ nu la, asoo ɛnrɛnwu ye?+ 15  Ɛbavi ɛleka mɔɔ ɛde, wɔ sɔlɔ moamoa nehane wɔara,+ ɛ nee menli dɔɔnwo ne mɔɔ boka ɛ nwo la, bɛ muala bɛdede mgbɔnwɔ zo, menli dɔɔnwo kpalɛ, ɛlɔne kpole bie.+ 16  Ɛbara me menli Yizilayɛma anwo zo kɛ amungu mɔɔ ɛheda azɛlɛ ne azo la. Mekɛ mɔɔ li awieleɛ la anu, mebamaa wɔara me azɛlɛ ne azo+ na saa medua ɛ nwo zo mekile me nwuanzanwuanzayɛlɛ ne wɔ maanle maanle ne mɔ anyunlu a, bɛbanwu me, O Gɔgo.”’+ 17  “Mɔɔ Tumivolɛ Awulae Gyihova ɛha la ɛne: ‘Tɛ ɛdawɔ ko ne ala a menluale me azonvolɛ ngapezoma, mɔɔ bɛvi Yizilayɛ la anwo zo menganle ɛ nwo edwɛkɛ wɔ tete ne, mɔɔ bɛhanle ngapezo ɛvolɛ dɔɔnwo kɛ mebamaa wɔara bɛ nwo zo la ɔ?’ 18  “‘Wɔ kenle zɔhane, kenle mɔɔ Gɔgo bara Yizilayɛ azɛlɛ ne azo la,’ Tumivolɛ Awulae Gyihova a se a, ‘me ɛya kpole ne bazɔ.+ 19  Wɔ me ɛyavalɛ nu, me ɛya wuluwulu ne anu, mebadendɛ; na kenle zɔhane azɛlɛkpusulɛ kpole bie bazi Yizilayɛ azɛlɛ ne azo. 20  Medame ti, nyevile nu fɛlɛ, anwomanyunlu nloma, ɛbɔ nu nane anwo ɛzulolɛ, nane biala mɔɔ twenle ɔ nwo aze yɛɛ menli kɔsɔɔti mɔɔ bɛde azɛlɛ ne azo la anwo bawoso bɛ,+ na awoka nee bodane yɛɛ bane biala bade agua aze.’ 21  “‘Mebavɛlɛ konle dadeɛ meara ɔ nwo zo wɔ me awoka ne mɔ amuala azo,’ Tumivolɛ Awulae Gyihova a se a. ‘Awie biala bahwe ɔ diema anwo konle dadeɛ.+ 22  Mebava ewulenzane nee mogya mɔɔ bɛka bɛgua la meabua ye ndɛne;*+ na mebamaa ezule kpole bie nee ezuawolɛ+ nee senle+ yɛɛ sɔlefa+ adɔ agua ɔ nee ye ɛlɔnema ne yɛɛ menli dɔɔnwo ne mɔɔ boka ɔ nwo la anwo zo.+ 23  Akee mebawula me nwo anyunlunyia na meahile me nwuanzanwuanzayɛlɛ ne na meamaa bɛanwu me wɔ maanle maanle dɔɔnwo anyunlu; na bɛbanwu kɛ medame a mele Gyihova a.’

Ɔbodwɛkɛ

Anzɛɛ “kpanyinli kpalɛ.”
Anzɛɛ “kpanyinli kpalɛ.”
Enyinlike ngyikyi mɔɔ ɛdatovoma ta dɛ ye bɛ sa nu.
Hibulu aneɛ nu, “sinzavolɛ.”
Anzɛɛ “mebamaa bɛaravɛlɛ wɔ.”
Anzɛɛ “bɛtɛtole nwolɛ bane.”
Anzɛɛ “awenade ngakula mɔɔ bɛ nwo yɛ se.”
Anzɛɛ “Mebava me ndɛnebualɛ ne meara ɔ nwo zo.”