Yizikeɛle 33:1-33

  • Sinzavolɛ ɛzonlelilɛ (1-20)

  • Gyɛlusalɛm azedɔlɛ nwo amaneɛbɔlɛ (21, 22)

  • Menli mɔɔ de Gyɛlusalɛm mɔɔ ɛdɔ mgbane azo la nrɛlaleɛ (23-29)

  • Menli ɛnli edwɛkɛ ne azo (30-33)

    • Yizikeɛle le “kɛ ɛhulolɛ edwɛne” (32)

    • “Ɛnee ngapezonli bie wɔ bɛ avinli” (33)

33  Na Gyihova nee me dendɛle kɛ:  “Sonla ra, tendɛ kile wɔ menli ne,+ na se bɛ kɛ,“‘Bɛva ye kɛ meva konle dadeɛ mera azɛlɛ bie azo,+ na menli mɔɔ de azɛlɛ zɔhane azo la amuala ɛye sonla ko kɛ bɛ sinzavolɛ,  na ɔnwu kɛ konle dadeɛ ɛlɛba azɛlɛ ne azo na ɔbɔ aweɛne ne ɔbɔ menli ne kɔkɔ.+  Na saa awie te aweɛne ne ane na yeandie kɔkɔbɔlɛ ne+ na konle dadeɛ ne fa ye ngoane* a, ye mogya bagua ɔdaye ɔ ti zo.+  Ɔdele aweɛne ne ane, noko yeandie kɔkɔbɔlɛ ne. Ye mogya bagua ɔdaye ɔ ti zo. Saa ɔdiele kɔkɔbɔlɛ ne a, anrɛɛ ɔbalie ɔ nwo ngoane.*  “‘Noko saa sinzavolɛ ne nwu kɛ konle dadeɛ ɛlɛba na yeambɔ aweɛne ne+ yeambɔ menli ne kɔkɔ na konle dadeɛ ne bafa bɛ nuhua bie ngoane* a, zɔhane sonla ne bawu wɔ ye nvonleɛ ti, noko mebabiza ye mogya ne meavi sinzavolɛ ne ɛkɛ.’*+  “Na wɔmɔ sonla ra, meye wɔ kɛ ɛyɛ Yizilayɛma sinzavolɛ; na saa ɛte me nloa anu edwɛkɛ a ɔwɔ kɛ ɛbɔ bɛ kɔkɔ ɛmaa me.+  Saa meka mekile amumuyɛnli kɛ, ‘Amumuyɛnli, ɛbawu!’+ na wɔandendɛ wɔangile amumuyɛnli ne wɔambɔ ye kɔkɔ kɛ ɔhakyi ye adenle a, ye nvonleɛ ne ati ɔbawu kɛ amumuyɛnli,+ noko mebabiza ye mogya ne meavi wɔ ɛkɛ.  Noko saa ɛbɔ amumuyɛnli bie kɔkɔ kɛ ɔhwe ɔ nwo ɔvi ye adenle ne anwo na yeanvi ye adenle ne azo a, ye nvonleɛ ne ati ɔbawu,+ noko wɔmɔ ɛbalie ɛ nwo ngoane.*+ 10  “Na wɔmɔ sonla ra, ka kile Yizilayɛma kɛ, ‘Bɛha kɛ: “Yɛ atuadelɛ nee yɛ ɛtane yɛ ɛlomboɛ wɔ yɛ nwo zo, bɛlɛmaa yɛanwa;+ ɔti kɛ ɔkɛyɛ na yɛadɛnla ngoane nu ɛ?”’+ 11  Ka kile bɛ kɛ, ‘“Mekɛ ala mɔɔ mede aze la,” Tumivolɛ Awulae Gyihova a se a, “me nye ɛnlie amumuyɛma ewule nwo,+ emomu kɛ amumuyɛnli bahakyi ye adenle+ na yeadɛnla ngoane nu.+ Bɛzia bɛ nzi, bɛzia bɛ nzi bɛvi bɛ ndenle ɛtane ne mɔ azo,+ O Yizilayɛma, duzu ati a ɔwɔ kɛ bɛwu a?”’+ 12  “Na wɔmɔ sonla ra, ka kile wɔ menli ne kɛ, ‘Saa tenlenenli te atua a, ye tenleneyɛlɛ ne ɛnrɛhola ɛnrɛlie ye ngoane;+ anzɛɛ saa amumuyɛnli twe ɔ nwo fi ye amumuyɛ ne anwo a ye amumuyɛyɛlɛ ne ɛnrɛmaa ɔnrɛkpo aze;+ anzɛɛ tenlenenli biala tenleneyɛlɛ ɛnrɛhola ɛnrɛlie ye ngoane wɔ kenle mɔɔ ɔbayɛ ɛtane la.+ 13  Saa meka mekile tenlenenli kɛ: “Kɛ ɔde ye biala la, ɛbanyia ngoane,” na ɔfa ɔ nwo ɔto ye tenleneyɛlɛ ne azo na ɔyɛ ɛtane* a,+ bɛnrɛhakye ye tenleneyɛlɛ ne mɔ anu biala, emomu ɛtane ne mɔɔ yeyɛ la ati ɔbawu.+ 14  “‘Na saa meka mekile amumuyɛnli bie kɛ: “Kɛ ɔde ye biala la, ɛbawu,” na ɔtwe ɔ nwo ɔfi ye ɛtane nwo na ɔdi pɛlepɛle ɔyɛ mɔɔ tenrɛ la,+ 15  na amumuyɛnli ne siane mɔɔ bɛvale bɛlile agyinlanu la+ na ɔtua mɔɔ ɔwuale la,+ na ɔdi ngoane mɛla ne mɔ azo na yeanyɛ ɛtane bieko a, ɔbanyia ngoane,+ ɔnrɛwu. 16  Ɔnrɛli ɛtane mɔɔ ɔyɛle la anu biala anwo ɛzonle.*+ Kɛmɔ yeli pɛlepɛle na yeyɛ mɔɔ tenrɛ la ati, ɔbanyia ngoane.’+ 17  “Noko wɔ menli ne ɛha kɛ, ‘Gyihova adenle ɛndenrɛ,’ wɔ mekɛ mɔɔ bɛmɛ a bɛ adenle ɛndenrɛ la. 18  “Saa tenlenenli gyakyi ye tenleneyɛlɛ na ɔyɛ ɛtane a, ɔwɔ kɛ ɔwu wɔ ye ɛtane ne ati.+ 19  Noko saa amumuyɛnli twe ɔ nwo fi ye amumuyɛ ne anwo na ɔdi pɛlepɛle na ɔyɛ mɔɔ tenrɛ la a, kɛmɔ ɔyɛle zɔ la ati, ɔbanyia ngoane.+ 20  “Noko bɛha kɛ, ‘Gyihova adenle ɛndenrɛ.’+ O Yizilayɛma, mebabua bɛ nuhua ko biala ndɛne kɛ mɔɔ ye ndenle ne mɔ de la.” 21  Mɔɔ yɛhɔle akɛlɛzonlenlɛ nu la, ye ɛvolɛ 12 ne, ye siane bulu ne, ye kenle nnu ne azo, nrenyia bie mɔɔ vile ɛsalɛ wɔ Gyɛlusalɛm la rale me nwo ɛkɛ+ na ɔhanle kɛ: “Bɛbubu suakpole ne bɛgua aze!”+ 22  Na nɔsolɛ ne mɔɔ ye alehyenlɛ nu a nrenyia ne mɔɔ vile ɛsalɛ la rale la, Gyihova asa rale me nwo zo, na ɛnee yebuke me nloa kolaa na nrenyia ne ara ye nwonlomɔ nu. Ɔti bɛbukele me nloa, na meanyɛ mumule bieko.+ 23  Na Gyihova nee me dendɛle kɛ: 24  “Sonla ra, menli mɔɔ de azɛlɛ ɛhye mɔ mɔɔ ɛdɔ mgbane azo la+ ɛlɛka ye wɔ Yizilayɛ azɛlɛ ne anwo kɛ, ‘Ɛnee Ebileham le sonla kokye, noko ɔvale azɛlɛ ne ɔyɛle ye ɛdeɛ.+ Na akee yɛmɛ mɔɔ yɛ nwo zonle la; bɛva azɛlɛ ne bɛmaa yɛ kɛ yɛ ɛdeɛ bɔkɔɔ.’ 25  “Ɛhye ati ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Bɛdi nane mɔɔ ye mogya ne tɛbɔ ye nu la,+ na bɛmaa bɛ nye zo bɛnea bɛ kyibadeɛ ananze* ne mɔ yɛɛ bɛka mogya bɛgua dahuu.+ Ɔti duzu ati a ɔwɔ kɛ bɛfa azɛlɛ ne bɛyɛ bɛ ɛdeɛ ɛ? 26  Bɛva bɛ nwo bɛdo bɛ konle dadeɛ zo,+ bɛva bɛ nwo bɛwulowula bɛkyi nyɛleɛ nu yɛɛ bɛ nuhua ko biala ɛgua ɔ gɔnwo aye anwo evinli.+ Ɔti duzu ati a ɔwɔ kɛ bɛfa azɛlɛ ne bɛyɛ bɛ ɛdeɛ ɛ?”’+ 27  “Ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Mekɛ ala mɔɔ mede aze la, bɛdabɛ mɔɔ bɛde azɛlɛ ne mɔ mɔɔ ɛdɔ mgbane azo la bawu wɔ konle dadeɛ nloa; bɛdabɛ mɔɔ bɛwɔ ɛbɔ nu la, mebamaa bɛayɛ nane anwo ɛzulolɛ aleɛ; yɛɛ bɛdabɛ mɔɔ bɛde aranemgbole nee awolɛ mbɔne nu la ewulenzane bahu bɛ.+ 28  Mebamaa azɛlɛ ne adɔ mgbane bɔkɔɔ,+ na ye adubɛnwo anwomemaazo ne bara awieleɛ, na Yizilayɛ awoka ne mɔ badɔ mgbane,+ mɔɔ awie biala ɛnrɛze zolɛ a. 29  Na saa bɛkyi ninyɛne ne mɔ mɔɔ bɛyɛ la amuala la ati memaa azɛlɛ ne tɔ mgbane bɔkɔɔ a,+ bɛbanwu kɛ medame a mele Gyihova a.”’+ 30  “Na wɔmɔ sonla ra, wɔ menli ne mɔ gyigyi bane ne mɔ anwo nee azua nlenkɛ nloa bɛlɛka ɛ nwo edwɛkɛ.+ Bɛlɛka bɛahile bɛ nwo ngoko, awie biala nee ɔ diema ɛlɛka kɛ, ‘Bɛla maa yɛdie edwɛkɛ mɔɔ vi Gyihova ɛkɛ ne la.’ 31  Bɛbara dɔɔnwo bɛaradɛnlɛdɛnla ɛ nyunlu ɛkɛ ne kɛ me menli la; na bɛbadie wɔ edwɛkɛ ne noko bɛnrɛli zo.+ Ɔluakɛ bɛfa bɛ nloa bɛkanvo wɔ adalɛ nu,* noko bɛ ahonle anye bolo nvasoɛ ɛtane. 32  Nea! Ɛle kɛ ɛhulolɛ edwɛne mɔɔ bɛva ɛnelɛ fɛlɛko bɛdo na bɛva getaa* bɛbɔ ye kɛnlɛma la wɔ bɛ nye zo. Bɛbadie wɔ edwɛkɛ ne, noko awie biala ɛnrɛva ɛnrɛyɛ ɛhwee. 33  Na saa ɛhye ba nu a—na ɔbara nu noko—bɛbanwu kɛ ɛnee ngapezonli bie wɔ bɛ avinli.”+

Ɔbodwɛkɛ

Hibulu aneɛ nu, “fa ye kɔ.”
Anzɛɛ “ye ɛkɛla.”
Anzɛɛ “ɛkɛla.”
Anzɛɛ “mebamaa sinzavolɛ ne ali ye mogya ne anwo ɛzonle.”
Anzɛɛ “wɔ ɛkɛla.”
Anzɛɛ “yeanli pɛlepɛle.”
Hibulu aneɛ nu, “Bɛnrɛhakye ɛtane ne mɔ mɔɔ ɔyɛle la anu biala.”
Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
Anzɛɛ “bɛka edwɛkɛ menlemenle.”
Tete ɛdeɛ ne le ngakyile fi ɛnɛ mekɛ ye getaa nwo.