Yizikeɛle 18:1-32

  • Awie biala di ye ɛtane nwo ɛzonle (1-32)

    • Ɛkɛla mɔɔ kɛyɛ ɛtane la bawu (4)

    • Ralɛ ɛnrɛli fɔlɛ wɔ ye papa ɛtane ti (19, 20)

    • Ɔ nye ɛnlie amumuyɛnli ewule nwo (23)

    • Anlubɛnwo maa bɛnyia ngoane (27, 28)

18  Na Gyihova nee me dendɛle bieko kɛ:  “Ɛrɛlɛ ɛhye mɔɔ bɛta bɛbu ye wɔ Yizilayɛ azɛlɛ zo kɛ, ‘Selɛma di vanye ma nyinyianlera, noko mralɛ a agye nyia a’ la kile duzu?+  “‘Mekɛ ala mɔɔ mede aze la,’ Tumivolɛ Awulae Gyihova a se a, ‘bɛnrɛha edwɛkɛ ɛhye wɔ Yizilayɛ bieko.  Nea! Ɛkɛla* kɔsɔɔti le me ɛdeɛ. Kɛ mɔɔ selɛ ɛkɛla le me ɛdeɛ la, zɔhane ala a ralɛ noko ɛkɛla le me ɛdeɛ a. Ɛkɛla* mɔɔ kɛyɛ ɛtane la, yemɔ a ɔbawu a.  “‘Fa ye kɛ nrenyia bie le tenlenenli na ɔdi pɛlepɛle na ɔyɛ mɔɔ tenrɛ la.  Ɔnli afɔle mɔɔ bɛbɔ bɛmaa awozonle wɔ awoka ne mɔ azo la bie;+ ɔnva ɔ nye ɔndo Yizilayɛma kyibadeɛ ananze* ne mɔ azo; ɔnva awie aye*+ anzɛɛ ɔnva raalɛ mɔɔ ɛhɔ amozi la;+  ɔnsisi awie,+ emomu awie fa debie di agyinlanu a ɔye ɔmaa ye;+ ɔnwua awie,+ emomu ɔfa ye aleɛ ɔmaa mɔɔ ɛhɔne ɛlɛku ye la+ na ɔfa ɛdanlɛ ɔkeda mɔɔ anwo la zo la;+  ɔbɔ awie bosea a ɔnlie mpaefoa anzɛɛ ɔnva bie ɔngua zo,+ emomu ɔtwe ɔ nwo ɔfi nzisi nwo;+ ɔfa pɛlepɛlelilɛ ɔdi awie nee ɔ gɔnwo avinli edwɛkɛ;+  na ɔfa me mɛla ne mɔ ɔdua na ɔdi me ndɛnebualɛ ne mɔ azo amaa yeali nɔhalɛ. Sonla zɛhae le tenlenenli na ɔbadɛnla ngoane nu,’+ Tumivolɛ Awulae Gyihova a se a. 10  “‘Noko fa ye kɛ yewo ralɛ nrenyia na kakula ne le awule+ anzɛɛ kodiawu*+ anzɛɛ ɔyɛ ninyɛne gyɛne ɛhye mɔ anu bie 11  (ɔnva nwo kɛ selɛ ne anyɛ ninyɛne ɛhye mɔ anu bie la)—ɔdi afɔle mɔɔ bɛbɔ bɛmaa awozonle wɔ awoka ne mɔ azo la bie, ɔfa awie aye, 12  ɔsisi mɔɔ ɛnlɛ bie la nee ehyianli,+ ɔwua debie, ɔnva debie mɔɔ bɛva bɛli agyinlanu* la ɔmmaa, ɔfa ɔ nye ɔto kyibadeɛ ananze ne mɔ azo,+ ɔfa ɔ nwo ɔwulowula bɛkyi nyɛleɛ nu,+ 13  ɔbɔ bosea ɔdie mpaefoa anzɛɛ ɔfa bie ɔgua zo a+—yemɔ ralɛ ne ɛnrɛnyia ngoane. Ɔluakɛ yeyɛ bɛkyi ninyɛne ɛhye mɔ amuala la ati, bɛbahu ye. Ye mogya bagua ɔdaye ɔ ti zo. 14  “‘Noko fa ye kɛ selɛ bie lɛ ɔ ra nrenyia mɔɔ yenwu ɛtane mɔɔ ye papa ne ɛyɛ la amuala, na ɔnva nwo kɛ yenwu bɛ la, ɔnyɛ ninyɛne zɔhane mɔ bie. 15  Ɔnli afɔle mɔɔ bɛbɔ bɛmaa awozonle wɔ awoka ne mɔ azo la bie; ɔnva ɔ nye ɔndo Yizilayɛma kyibadeɛ ananze ne mɔ azo; ɔnva awie aye; 16  ɔnsisi awie; saa awie fa debie wula ye awoba a ɔye ɔmaa ye; ɔnwua awie, ɔfa ye aleɛ ɔmaa mɔɔ ɛhɔne ɛlɛku ye la na ɔfa ɛdanlɛ ɔkeda mɔɔ anwo la zo la; 17  ɔnsisi ehyianli; ɔbɔ bosea a ɔnlie mpaefoa anzɛɛ ɔnva bie ɔngua zo; yɛɛ ɔdi me ndɛnebualɛ ne mɔ azo na ɔfa me mɛla ne mɔ ɔdua. Sonla zɛhae ɛnrɛwu ɔlua ye papa nvonleɛ ti. Ɔbanyia ngoane. 18  Noko ɔluakɛ ye papa sisile awie mɔ, ɔwuale ɔ diema debie, na ɔyɛle ɛtane wɔ ye menli ne avinli la ati, ye nvonleɛ ti, ɔbawu. 19  “‘Noko bɛbaha kɛ: “Duzu ati a ralɛ ɛnli fɔlɛ ɔlua ye papa nvonleɛ ti ɛ?” Kɛmɔ ralɛ ne ɛli pɛlepɛle na yeyɛ mɔɔ tenrɛ, yedie me mɛla ne mɔ amuala na yeli zo la ati, ɔbanyia ngoane.+ 20  Ɛkɛla* mɔɔ kɛyɛ ɛtane la, yemɔ a bawu a.+ Ralɛ ɛnrɛli fɔlɛ wɔ ye papa nvonleɛ ti, yɛɛ selɛ ɛnrɛli ɔ ra nvonleɛ nwo ɛzonle. Bɛbanlea tenlenenli tenleneyɛlɛ nwo na bɛabua ye ndɛne yɛɛ bɛbanlea amumuyɛnli amumuyɛyɛlɛ nwo na bɛabua ye ndɛne.+ 21  “‘Na saa amumuyɛnli twe ɔ nwo fi ɛtane mɔɔ ɔyɛle la kɔsɔɔti anwo na ɔdi me mɛla ne mɔ azo, ɔdi pɛlepɛle na ɔyɛ mɔɔ tenrɛ la a, ɔbanyia ngoane. Ɔnrɛwu.+ 22  Bɛnrɛhakye ye mɛla ne mɔ mɔɔ yedo la anu biala.*+ Ye tenlene mɔɔ yeyɛ la ati, ɔbanyia ngoane.’+ 23  “‘Asoo me nye die amumuyɛnli ewule nwo?’+ Tumivolɛ Awulae Gyihova a se a. ‘Asoo tɛ mɔɔ mekulo la a le kɛ ɔbahwe ɔ nwo yeavi ye ndenle nwo na yeanyia ngoane ɔ?’+ 24  “‘Noko saa tenlenenli gyakyi ye tenleneyɛlɛ na ɔyɛ ɛtane,* ɔyɛ bɛkyi ninyɛne mɔɔ amumuyɛma yɛ la amuala bie a, asoo ɔbanyia ngoane? Bɛnrɛhakye ye tenlene nyɛleɛ ne mɔ mɔɔ ɔyɛle la anu biala.+ Ɔlua nɔhalɛ mɔɔ yeanli nee ɛtane mɔɔ yeyɛ la ati, ɔbawu.+ 25  “‘Noko bɛbaha kɛ: “Gyihova adenle ɛndenrɛ.”+ O Yizilayɛma, mesɛlɛ bɛ, bɛdie! Asoo me adenle a ɛndenrɛ a?+ Asoo tɛ bɛmɛ a bɛ ndenle ɛndenrɛ a?+ 26  “‘Saa tenlenenli gyakyi ye tenleneyɛlɛ na ɔyɛ ɛtane na ɔwu wɔ ye ɛtane ti a, ɔbawu ɔlua ɔdaye ye ɛtane mɔɔ ɔyɛle la ati. 27  “‘Na saa amumuyɛnli twe ɔ nwo fi amumuyɛ ne mɔɔ ɔyɛle la anwo na ɔbɔ ɔ bo ɔdi pɛlepɛle na ɔyɛ mɔɔ tenrɛ la a, ɔbalie ɔdaye ɔ nwo ngoane.*+ 28  Saa ɔnwu mɛla mɔɔ yedo la kɔsɔɔti na ɔtwe ɔ nwo ɔfi nwo a, ɔbanyia ngoane. Ɔnrɛwu. 29  “‘Noko Yizilayɛma baha kɛ: “Gyihova adenle ɛndenrɛ.” O Yizilayɛma, asoo ɔle nɔhalɛ kɛ me ndenle ɛndenrɛ ɔ?+ Asoo tɛ bɛmɛ a bɛ ndenle ɛndenrɛ a?’ 30  “‘Ɛhye ati, O Yizilayɛma, mebabua bɛ nuhua ko biala ndɛne kɛ mɔɔ ye ndenle ne mɔ de la,’+ Tumivolɛ Awulae Gyihova a se a. ‘Bɛhwe bɛ nwo, ɛhɛe, bɛhwe bɛ nwo bɛvi bɛ mɛladonlɛ kɔsɔɔti anwo bɔkɔɔ amaa bɛanyɛ azedolɛ bolɛ mɔɔ bamaa bɛali fɔlɛ a. 31  Bɛgyakyi bɛ mɛladonlɛ ne mɔ amuala+ na bɛnyia* ahonle fofolɛ nee sunsum fofolɛ,+ na duzu ati a ɔwɔ kɛ bɛwu ɛ,+ O Yizilayɛma?’ 32  “‘Me nye ɛnlie awie biala ewule nwo fee.+ Ɔti bɛzia bɛ nzi na bɛnyia ngoane,’ Tumivolɛ Awulae Gyihova a se a.”+

Ɔbodwɛkɛ

Anzɛɛ “Ngoane.” Nea Edwɛkɛbohilelɛ.
Anzɛɛ “Sonla.” Nea Edwɛkɛbohilelɛ.
Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
Hibulu aneɛ nu, “ɔngua awie aye anwo evinli.”
Hibulu aneɛ nu, “ka mogya gua.”
Anzɛɛ “bɛwula awoba.”
Anzɛɛ “Sonla.”
Hibulu aneɛ nu, “Ɔnrɛli nwolɛ ɛzonle.”
Anzɛɛ “yeanli pɛlepɛle.”
Anzɛɛ “ye ɛkɛla.” Nea Edwɛkɛbohilelɛ.
Hibulu aneɛ nu, “bɛkpondɛ.”