Yizikeɛle 1:1-28

  • Yizikeɛle nyianle Nyamenle anwo ɛnyelɛzodeɛnwunlɛ wɔ Babelɔn (1-3)

  • Gyihova anwuma ehwili ne anwo ɛnyelɛzodeɛnwunlɛ (4-28)

    • Ahumu, amungu nee senle (4)

    • Tease abɔdeɛ nna ne (5-14)

    • Ehwili gyakɛ nna ne (15-21)

    • Bama bie mɔɔ ta kɛ ayese la (22-24)

    • Gyihova belemgbunli ebia ne (25-28)

1  Wɔ ɛvolɛ mɔɔ tɔ zo 30 la anu, ye siane nna ne kenle nnu ne azo, mekɛ mɔɔ ɛnee meboka menli mɔɔ wɔ akɛlɛzonlenlɛ nu+ wɔ azule Kibaa+ ne anloa la anwo, anwuma bukele na menyianle Nyamenle anwo ɛnyelɛzodeɛnwunlɛ.  Siane ne kenle mɔɔ tɔ zo nnu la anu—ɛhye le mekɛ mɔɔ bɛvale Belemgbunli Gyɛhɔyakɛn+ bɛhɔle akɛlɛzonlenlɛ nu la, ye ɛvolɛ mɔɔ tɔ zo nnu la azo—  Gyihova dendɛle hilele ɛsɔfo Buza ara Yizikeɛle* wɔ Kaledeama azɛlɛ zo wɔ azule Kibaa ne anloa.+ Gyihova asa rale ɔ nwo zo wɔ ɛkɛ.+  Mɔɔ melɛnea la, menwunle kɛ ahumu kpole bie+ vi sɔlɔ ɛlɛba, na ɛnee amungu kpole bie nee ɛsɛlɛmanye mɔɔ wienyi+ ɛbɛnga ye ɛyia la wɔ ɛkɛ, na debie bie mɔɔ le kɛ nvutuke nee dwɛtɛ fufule afonla mɔɔ ta la wɔ senle bie anu.+  Ɛnee debie mɔɔ le kɛ tease abɔdeɛ nna+ mɔɔ ko biala zɔho sonla la wɔ nu.  Ko biala lɛ ɔ nyunlu nna yɛɛ ndɛbalɛ nna.+  Bɛ gyakɛ taboa ne tenrɛ fɔɔnwo, yɛɛ bɛ gyakɛ akunlu le kɛ ɛnlankɛ ralɛ ɛdeɛ ne la, na bɛta kɛ kɔbele mɔɔ bɛbolo nwolɛ la.+  Ɛnee bɛlɛ sonla sa wɔ bɛ ndɛba nna ne ko biala abo, na nna ne mɔ amuala anu ko biala lɛ bɛ nyunlu nee bɛ ndɛba.  Bɛ ndɛba ne mɔ yia zolɛ. Saa bɛlɛkɔ a, bɛmpɛne bɛ nwo; bɛ nuhua ko biala kɔ ɔ nyunlu fɔɔnwo.+ 10  Kɛ bɛ nyunlu ne mɔ de la ɛne: Nna ne anu ko biala lɛ sonla nyunlu, ɔlɛ awenade+ nyunlu wɔ fema zo, ɛnlankɛ nyinli+ nyunlu wɔ bɛne zo yɛɛ nna ne anu ko biala lɛ kɔleɛ+ nyunlu.+ 11  Ɛnee kɛ bɛ nyunlu ne mɔ de la ɛne. Bɛdɛlɛdɛlɛ bɛ ndɛba ne mɔ anu bɛhɔ anwuma. Bɛ nuhua ko biala lɛ ndɛbalɛ nwiɔ mɔɔ bɛyia zo a, yɛɛ ndɛbalɛ nwiɔ mɔɔ bɛfa bɛkeda bɛ nwo a.+ 12  Bɛ nuhua ko biala kɔ ɔ nyunlu fɔɔnwo, bɛkɔ ɛleka biala mɔɔ sunsum ne kɛha bɛ kɛ bɛhɔ la.+ Saa bɛlɛkɔ a, bɛmpɛne bɛ nwo. 13  Na tease abɔdeɛ ne mɔ le kɛ samɛnlakɛ mɔɔ ɛlɛsɔ la, yɛɛ debie mɔɔ le kɛ tɛkɛ mɔɔ senle la nu la di akɔneaba wɔ tease abɔdeɛ ne mɔ avinli, na ɛsɛlɛmanye kpakye fi senle ne anu.+ 14  Na saa tease abɔdeɛ ne mɔ ɛlɛdi akɔneaba a, bɛ ɛhɔlɛ nee bɛ ɛralɛ le kɛ ɛsɛlɛmanye mɔɔ kɛkpakye la. 15  Mekɛ mɔɔ melɛnea tease abɔdeɛ ne mɔ la, menwunle kɛ ehwili gyakɛ ko wɔ azɛlɛ ne azo wɔ tease abɔdeɛ ne mɔ mɔɔ bɛ nyunlu le nna nna la anu ko biala anwo ɛkɛ.+ 16  Ehwili gyakɛ ne mɔ nee kɛzi bɛyɛ bɛ la ta kɛ kelesɔlaete la, na nna ne amuala zɔho bɛ nwo. Kɛzi bɛde nee kɛzi bɛyɛ bɛ la le kɛ ehwili gyakɛ mɔɔ vea ehwili gyakɛ* nu la. 17  Saa bɛtu bɛ bo a, bɛkola bɛkɔ afoa nna ne ɛleka biala mɔɔ bɛmpɛne bɛ nwo a. 18  Ehwili gyakɛ ne mɔ kɔ anwuma kpalɛ ɔmaa ɔyɛ ɛzulolɛ, na ɛnyelɛ wɔ ehwili gyakɛ nna ne mɔ anwo amuala.+ 19  Saa tease abɔdeɛ ne mɔ tu bɛ bo a, ehwili gyakɛ ne mɔ noko tu bɛ bo bɛ nee bɛ kɔ, yɛɛ saa bɛmaa tease abɔdeɛ ne mɔ zo bɛfi azɛlɛ ne azo a, bɛmaa ehwili gyakɛ ne mɔ noko zo.+ 20  Bɛkɔ ɛleka biala mɔɔ sunsum ne kɛhile bɛ kɛ bɛhɔ, ɛleka biala mɔɔ sunsum ne kɛhɔ la. Bɛmaa ehwili gyakɛ ne mɔ zo bɛboka bɛ nwo, ɔluakɛ sunsum ne mɔɔ yɛ gyima wɔ tease abɔdeɛ ne mɔ anwo zo la* wɔ ehwili gyakɛ ne mɔ noko anu. 21  Saa bɛtu bɛ bo a, ɛhye mɔ noko tu bɛ bo; na saa bɛgyinla a, ɛhye mɔ noko gyinla; yɛɛ saa bɛmaa bɛ zo bɛfi azɛlɛ ne azo a, bɛmaa ehwili gyakɛ ne mɔ noko zo bɛboka bɛ nwo, ɔluakɛ sunsum ne mɔɔ yɛ gyima wɔ tease abɔdeɛ ne mɔ anwo zo la wɔ ehwili gyakɛ ne mɔ noko anu. 22  Wɔ tease abɔdeɛ ne mɔ ati zo, debie bie mɔɔ le kɛ bama mɔɔ ta kɛ ayese kɛnlɛma la wɔ ɛkɛ, ɔtɛlɛ ɔkeda bɛ ti zo.+ 23  Bɛ ndɛba ne mɔ tenrɛ fɔɔnwo* wɔ bama ne abo, yɛɛ bɛyia zolɛ. Ko biala lɛ ndɛbalɛ nwiɔ mɔɔ ɔfa ɔkeda ye foa ko ɛke yɛɛ ndɛbalɛ nwiɔ mɔɔ ɔfa ɔkeda ye foa ko nehane a. 24  Mɔɔ mendele bɛ ndɛba ne mɔ ane la, ɛnee ɔle kɛ azule mɔɔ ɛlɛtu la ane, ɔle kɛ Tumivolɛ Bedevinli ne ane.+ Saa bɛtu bɛ bo a, ɔle kɛ ɛlɔnema ane la. Saa bɛgyinla a, bɛgua bɛ ndɛba ne mɔ aze. 25  Ɛnee ɛnelɛ bie wɔ bama ne mɔɔ wɔ bɛ ti zo la azo. (Saa bɛgyinla a, bɛgua bɛ ndɛba ne mɔ aze.) 26  Debie bie mɔɔ le kɛ safaya bolɛ la wɔ bama ne mɔɔ wɔ bɛ ti zo la anwuma,+ na ɔzɔho belemgbunli ebia.+ Awie mɔɔ zɔho sonla la de belemgbunli ebia ne mɔɔ wɔ anwuma la anu.+ 27  Ɔvi ɔ nze zo mɔɔ kɔ ye anwuma la, menwunle debie mɔɔ ta kɛ nvutuke nee dwɛtɛ fufule afonla,+ kɛ senle mɔɔ ɛlɛsɔ la; yɛɛ ɔvi ɔ nze zo mɔɔ ba ye aze la, menwunle debie mɔɔ le kɛ senle la.+ Ɛnee ɔ nwo amuala ta 28  kɛ nyangondonle mɔɔ kɛvinde amungu nu wɔ kenle mɔɔ ezule kɛdɔ la.+ Kɛ wienyi ne mɔɔ ɛnee ɛbɔ ye ɛyia la de la ɛne. Ɔle kɛ Gyihova anyunlunyia ne la.+ Mɔɔ menwunle ye la, membutule me nyunlu aze, na mendele awie ane kɛ ɔlɛtendɛ.

Ɔbodwɛkɛ

Ɔ bo kile “Nyamenle Maa Anwosesebɛ.”
Ɔbayɛ kɛ ehwili gyakɛ ɛhye mɔ mgbole sɛ.
Hibulu aneɛ nu, “tease abɔdeɛ ne sunsum ne.”
Anzɛɛ ɔkola ɔkile, “bɛmaa bɛ zo fɔɔnwo.”