Kɔmaa Taetɛse 3:1-15
3 Kɔ zo kakye bɛ kɛ bɛbɛlɛ bɛ nwo aze na bɛyɛ tieyɛ bɛmaa arane nee tumivolɛma,+ na bɛziezie bɛ nwo bɛmaa gyima kpalɛ biala,
2 bɛmmaka awie biala anwo edwɛkɛ ɛtane, bɛmmakulo butule, emomu bɛde edwɛkɛ bo,+ na bɛla bɛtɛɛyɛlɛ ali bɛhile menli kɔsɔɔti.+
3 Ɔluakɛ mekɛ bie ɛnee yɛdayɛ noko yɛnze nrɛlɛbɛ, yɛ nzo yɛ se, yɛminli, yɛyɛle ngɛkɛlɛ yɛmaanle atiakunluwɔzo nee anyelielɛ ngakyile, yɛbɔle yɛ ɛbɛla wɔ ɛtaneyɛlɛ nee anyebolo nu, yɛyɛle kyibadeɛ, yɛkpɔle yɛ nwo ngoko.
4 Noko, mekɛ mɔɔ yɛ Ngoanedievolɛ Nyamenle ne atiakunlukɛnlɛma ne+ nee ye ɛlɔlɛ mɔɔ ɔlɛ ɔmaa alesama la lale ali la
5 (tɛ tenlene gyima bie mɔɔ yɛyɛle la ati ɔ,+ emomu ye anwunvɔnezelɛ ne ati ɔ),+ ɔluale yɛ nwo mɔɔ ɔdele* ɔvale yɛ ɔrale ngoane nu+ nee sunsum nwuanzanwuanza ne mɔɔ yɛle yɛ fofolɛ la azo ɔliele yɛ ngoane.+
6 Ɔluale yɛ Ngoanedievolɛ Gyisɛse Kelaese anwo zo ɔwolale sunsum ɛhye dɔɔnwo ɔguale yɛ nwo zo,+
7 amaa bɛdua ye ɛlolɛ kpole ne azo bɛbu yɛ tenlenema a,+ yɛayɛ koliagyama+ kɛ mɔɔ dahuu ngoane anyelazo ne kile la.+
8 Edwɛkɛ ɛhye mɔ le nɔhalɛ, na mekulo kɛ ɛkɔ zo ɛsi ɛhye mɔ azo, amaa bɛdabɛ mɔɔ bɛlie Nyamenle bɛli la ava bɛ adwenle azie gyima kpalɛ zo na bɛayɛ. Ninyɛne ɛhye mɔ le kpalɛ yɛɛ nvasoɛ wɔ zo maa menli.
9 Noko kpo kpolerazulɛ mɔɔ nrɛlɛbɛ ɛnle nu nee mbusua nu ɛhilehilelɛ nee butulelilɛ nee Mɛla ne anwo mgbondedolɛ, ɔluakɛ nvasoɛ ɛnle zo yɛɛ ɔle debie mgbane.+
10 Awie mɔɔ kilehile adalɛ ngilehilelɛ la,+ saa ɛtu ye folɛ* fane nwiɔ ɛwie a,+ twe ɛ nwo fi ɔ nwo,+
11 ɔluakɛ ɛze kɛ sonla zɛhae ɛvo adenle na ɔlɛyɛ ɛtane yɛɛ yebua ɔ nwo fɔlɛ.
12 Saa mesoa Aatɛmase anzɛɛ Tekekɛse+ wɔ ɛ nwo lɔ a, bɔ mɔdenle bɛla me nwo lɔ wɔ Nekɔpɔlese, ɔluakɛ ɛkɛ ne a meyɛ me adwenle kɛ mebali fɔsɛlɛ ne a.
13 Bɔ mɔdenle maa Zinase mɔɔ ze Mɛla ne kpalɛ la nee Apɔlɔso ɛnyia mɔɔ bɛhyia nwo wɔ bɛ adendulɛ ne anu la amaa bɛangyia debie.+
14 Na maa yɛ menli ne noko ɛzukoa kɛ bɛbayɛ gyima kpalɛ amaa bɛaboa wɔ mekɛ mɔɔ debie nwo kɛhyia ɛsesebɛ la,+ amaa bɛanyɛ menli mɔɔ ɛnzo ma.+
15 Bɛdabɛ mɔɔ bɛwɔ me nwo ɛke la amuala biza bɛ. Mebiza bɛdabɛ mɔɔ bɛkulo yɛ edwɛkɛ wɔ diedi ne anu la.
Ɛlolɛ kpole ɛha bɛ muala.
