Kɔmaa Taetɛse 2:1-15
2 Noko wɔmɔ, kɔ zo ka edwɛkɛ mɔɔ nee ngilehilelɛ kpalɛ ne* le ko la.+
2 Ɔwɔ kɛ mrenyia mgbanyinli anye gyinla bɛ ti anwo, bɛ nye ka aze, bɛ adwenle nu da ɛkɛ, bɛyɛ se wɔ diedi, ɛlɔlɛ nee kpundiigyinlanlɛ nu.
3 Zɔhane ala noko a ɔwɔ kɛ mraalɛ mgbanyinli bɔ ɛbɛla mɔɔ anwo te a, bɛmmasɛkye awie mɔ duma, bɛmmayɛ akɛlɛ bɛmaa nza, emomu bɛhilehile mɔɔ le kpalɛ la,
4 amaa bɛadu mbɛlɛra folɛ* bɛamaa bɛahulo bɛ hu mɔ nee bɛ mra,
5 bɛ adwenle nu ala ɛkɛ, bɛ nwo ade, bɛayɛ gyima wɔ sua nu,* bɛayɛ atiakunlukɛnlɛma,* bɛabɛlɛ bɛ nwo aze bɛamaa bɛ hu mɔ,+ na bɛanga Nyamenle edwɛkɛ ne anwo edwɛkɛ ɛtane.
6 Zɔhane ala a kɔ zo tu mgbavolɛ folɛ kɛ bɛmaa bɛ adwenle nu ɛla ɛkɛ a,+
7 na da ɛ nwo ali wɔ adenle biala anu kɛ ɛyɛ neazo wɔ nyɛleɛ kpalɛ nu. Maa ɛ nye ɛbolo kilehile ninyɛne mɔɔ anwo te la,*+
8 fa ɛdendɛlɛ kpalɛ* mɔɔ menli ɛnrɛha nwolɛ edwɛkɛ la kilehile,+ amaa bɛdabɛ mɔɔ bɛdwazo bɛtia la anyunlu agua aze, na bɛannyia yɛ nwo edwɛkɛ ɛtane biala bɛanga.+
9 Ɔwɔ kɛ ngɛkɛlɛ bɛlɛ bɛ nwo aze maa bɛ menle mɔ wɔ debie biala anu,+ bɛbɔ mɔdenle bɛzɔ bɛ nye, bɛmmayeye bɛ nloa azo,
10 bɛmmawua bɛ debie,+ emomu bɛli nɔhalɛ dahuu, amaa bɛahanvo yɛ Ngoanedievolɛ Nyamenle ne ngilehilelɛ ne wɔ adenle biala anu.+
11 Ɔluakɛ Nyamenle ɛla ye ɛlolɛ kpole ne mɔɔ bamaa menli kɔsɔɔti anyia ngoane la ali.+
12 Ɔtete yɛ ɔmaa yɛkpo ɛbɛlatane nee ewiade atiakunluwɔzo+ na yɛfa adwenle mɔɔ anu la ɛkɛ nee tenleneyɛlɛ yɛɛ nyamenlezonlenlɛ kpalɛ yɛtɛnla kɛkala ewiade ye* anu,+
13 wɔ mekɛ mɔɔ yɛlɛkendɛ anyelazo kɛnlɛma ne+ nee Nyamenle bedevinli ne nee yɛ Ngoanedievolɛ Gyisɛse Kelaese mɔɔ bɛbala bɛ nwo ali wɔ anyunlunyia nu la,
14 yemɔ a vale ɔ nwo bɔle afɔle maanle yɛ+ liele yɛ*+ vile mɛladonlɛ biala anu na ɔdele menli bie anwo ɔvale ɔyɛle ɔdaye mumua ne ye menli titili a, na bɛbɔ gyima kpalɛ nwo mɔdenle.+
15 Kɔ zo ka ɛhye mɔ anwo edwɛkɛ na tu folɛ* na fa tumi ne mɔɔ yɛvale yɛmaanle wɔ la twi bɛ nyunlu.+ Mmamaa awie biala fa ɛ nyunlu kyikyi aze.
Ɔbodwɛkɛ
^ Anzɛɛ “mɔɔ nvasoɛ wɔ zo.”
^ Anzɛɛ “amaa bɛahakye mbɛlɛra; bɛatete mbɛlɛra.”
^ Anzɛɛ “bɛanlea bɛ azua nu.”
^ Giliki aneɛ nu, “bɛayɛ kpalɛ.”
^ Anzɛɛ ɔkola ɔkile, “fa anwodelɛ kilehile.”
^ Anzɛɛ “mɔɔ nvasoɛ wɔ zo.”
^ Anzɛɛ “mekɛ ɛhye.” Nea Edwɛkɛbohilelɛ.
^ Giliki aneɛ nu, “kpɔnenle yɛ.”
^ Anzɛɛ “maa bɛ anwosesebɛ.”
