Nolobɔvo 8:1-17
8 Nwane a le kɛ nrɛlɛbɛvolɛ ne a? Nwane a ze ngyegyelɛ bie sɔbelɛ a?* Sonla nrɛlɛbɛ maa ɔ nyunlu ta na ɔ nyunlu ɛmunlanlɛ kakyi ɛzelekɛ.
2 Mese: “Di belemgbunli ne edwɛkɛ zo+ ɔlua ndane mɔɔ wɔha wɔ Nyamenle anyunlu la ati.+
3 Mmapele ɛ nwo ɛfi ɔ nyunlu ɛkɔ.+ Mmafa ɛ nwo ɛwula ɛtaneyɛlɛ nu;+ ɔluakɛ ɔkola ɔyɛ debie biala mɔɔ ɔkulo la,
4 ɔluakɛ tumi wɔ belemgbunli ne edwɛkɛ nu;+ nwane a bahola aha ahile ye kɛ, ‘Duzu a ɛlɛyɛ la?’”
5 Sonla mɔɔ di mɛla ne azo la, esiane ɛnrɛdo ye,+ na nrɛlɛbɛvolɛ ahonle ze mekɛ kpalɛ nee kɛzi bɛdi edwɛkɛ biala anwo gyima la.*+
6 Edwɛkɛ biala lɛ ye mekɛ nee kɛzi bɛdi nwolɛ gyima la,*+ ɔluakɛ alesama ngyegyelɛ zonle.
7 Kɛmɔ awie ɛnze mɔɔ bazi la ati, nwane a bahola aha kɛzi ɔbazi la ɛ?
8 Kɛ mɔɔ sonla biala ɛnlɛ sunsum* ne azo tumi anzɛɛ ɛngola ɛnzi sunsum ne adenle la, zɔhane ala a awie ɛnlɛ ewule kenle nwo zo tumi a.+ Kɛ mɔɔ bɛmmaa awie adenle kɛ ɔvi konle nloa la, zɔhane ala a amumuyɛyɛlɛ ɛnrɛmaa menli mɔɔ bɔ amumuyɛ ɛbɛla la ɛnrɛnyia bɛ ti a.*
9 Menwu ɛhye amuala, na menvale me ahonle menlile gyima biala mɔɔ bɛyɛ wɔ ewiade ye la anzi, mekɛ mɔɔ ɛnee sonla di sonla nwo zo tumi maa ɔnwu amaneɛ la.+
10 Na menwunle kɛ bɛlɛsie amumuyɛma, menli mɔɔ ɛnee wolo ɛleka nwuanzanwuanza ne finde la, noko bɛ rɛle vile bɛ ndɛndɛ wɔ suakpole ne mɔɔ bɛbɔle bɛ ɛbɛla ne wɔ zo la azo.+ Ɛhye noko le mgbane.
11 Kɛmɔ bɛmbua ɛtaneyɛlɛ nwo ndɛne ndɛndɛ la ati,+ menli si bɛ ahonle kɛ bɛdi ɛtane.+
12 Ɛtanevolɛ bahola ayɛ ɛtane fane ɛya ko na yeadɛnla ngoane nu mekɛ tendenle ɛdeɛ, noko meze ye wienyi kɛ ɔbawie menli mɔɔ sulo nɔhalɛ Nyamenle ne la boɛ, ɔluakɛ bɛsulo ye.+
13 Noko ɔnrɛwie amumuyɛnli boɛ,+ yɛɛ ɔnrɛhola ɔnrɛmaa ye mekɛ ne mɔɔ le kɛ ɛlawolɛ la ɛnrɛwa,+ ɔluakɛ ɔnzulo Nyamenle.
14 Debie mgbane* bie kɔ zo wɔ ewiade ye anu: Bɛyɛ tenlenema kɛ asɛɛ bɛbɔ amumuyɛ ɛbɛla,+ yɛɛ bɛyɛ amumuyɛma kɛ asɛɛ bɛbɔ tenlene ɛbɛla.+ Mese ɛhye noko le mgbane.
15 Yemɔti menganvole anyelielɛ,+ ɔluakɛ debie kpalɛ biala ɛnle ewiade ye anu ɛmmaa sonla ɛndɛla kɛ ɔkɛli na ɔkɛnlo na ɔkɛlie ɔ nye; ɔwɔ kɛ ɔyɛ ɛhye wɔ mekɛ mɔɔ ɔlɛfa ye ngoane mekɛ mɔɔ nɔhalɛ Nyamenle ne ɛva ɛmaa ye wɔ ewiade ye anu la yeayɛ gyima ɛsesebɛ la.+
16 Menyɛle me adwenle kɛ mekpondɛ nrɛlɛbɛ na meanlea gyima mɔɔ kɔ zo wɔ azɛlɛ ye azo la amuala,+ alehyenlɛ nee aledwolɛ bɔbɔ menla.*
17 Akee menzuzule nɔhalɛ Nyamenle ne gyima kɔsɔɔti anwo, na menwunle kɛ alesama ɛnrɛhola ɛnrɛde ninyɛne mɔɔ sisi ewiade ye anu la abo.+ Menli babɔ mɔdenle biala, noko bɛnrɛhola bɛnrɛde ɔ bo. Saa bɛka kɛ bɛze nrɛlɛbɛ kpole mɔɔ ɔbamaa bɛanwu ye bɔbɔ a, bɛnrɛhola bɛnrɛde ɔ bo kpalɛ.+
Ɔbodwɛkɛ
^ Anzɛɛ “edwɛkɛ bo kile a?”
^ Anzɛɛ “nee ndɛnebualɛ.”
^ Anzɛɛ “nee ye ndɛnebualɛ.”
^ Anzɛɛ “ɛnwomenle; anwoma.”
^ Anzɛɛ ɔkola ɔkile, “amumuyɛma amumuyɛyɛlɛ ne ɛnrɛhola bɛ die a.”
^ Anzɛɛ “Abodelɛ edwɛkɛ.”
^ Anzɛɛ ɔkola ɔkile, “mɔɔ ɔti menli solo nafelɛ alehyenlɛ nee aledwolɛ la.”
