Nolobɔvo 7:1-29
7 Duma kpalɛ le kpalɛ tɛla nwole kpalɛ,+ yɛɛ ewule kenle le kpalɛ tɛla awolɛ kenle.
2 Ɔle kpalɛ kɛ ɛbahɔ sua mɔɔ bɛlɛdi nyane wɔ nu la anu tɛla kɛ ɛbahɔ sua mɔɔ bɛlɛto ɛkponle wɔ nu la anu,+ ɔluakɛ sonla biala awieleɛ ɛne, na ɔwɔ kɛ anyewɔzoamra fa sie bɛ ahonle nu.
3 Nyanelilɛ le kpalɛ tɛla ɛzelekɛ,+ ɔluakɛ bɛ nyunlu alɔbɔlɛ ɛyɛlɛ maa ahonle di boɛ.+
4 Nrɛlɛbɛvolɛ ahonle wɔ sua mɔɔ bɛlɛdi nyane wɔ nu la anu, yɛɛ koasea ahonle wɔ sua mɔɔ bɛlɛdi fɛlɛko* wɔ nu la anu.+
5 Ɔle kpalɛ kɛ ɛkɛdie nrɛlɛbɛvolɛ ndeanlɛ+ tɛla kɛ ɛkɛdie ahoasea edwɛne.
6 Ɔluakɛ kɛ mɔɔ mbowule ɛyɛne mɔɔ ɛlɛsɔ la tite wɔ buakɛ bo la, zɔhane ala a koasea ɛzelekɛ de a;+ na ɛhye noko le mgbane.
7 Noko nzisi kola maa nrɛlɛbɛvolɛ yɛ ɛzɛlɛde, yɛɛ belaebo sɛkye ahonle.+
8 Edwɛkɛ awieleɛ le kpalɛ tɛla ye mɔlebɛbo. Ɔle kpalɛ kɛ ɛbazi abotane tɛla kɛ ɛbayɛ anwomemaazo.+
9 Mmafa ɛya ndɛndɛ,*+ ɔluakɛ ahoasea a fa ɛya sie bɛ nu a.*+
10 Mmaka kɛ, “Duzu ati a mekɛ mɔɔ ɛze ɛhɔ la le kpalɛ tɛla ɛnɛ a?” ɔluakɛ nrɛlɛbɛ ɛnle nu kɛ ɛkɛbiza ɛhye.+
11 Nrɛlɛbɛ nee agyapadeɛ le debie kpalɛ, yɛɛ ɔle nvasoɛ ɔmaa menli mɔɔ nwu alehyenlɛ nu wienyi la.*
12 Ɔluakɛ nrɛlɛbɛ bɔ bɛ nwo bane+ kɛ mɔɔ ezukoa bɔ bɛ nwo bane la,+ noko nvasoɛ mɔɔ wɔ adwenle nee nrɛlɛbɛ zo la a le kɛ bɛdie bɛ menle ngoane.+
13 Suzu nɔhalɛ Nyamenle ne gyima nwo, ɔluakɛ nwane a kɛhola kɛdenrɛ mɔɔ yehyea ye la ɛ?+
14 Wɔ mekɛ kpalɛ nu, da kpalɛyɛlɛ ali,+ noko wɔ amaneɛnwunlɛ* mekɛ nu, ɔwɔ kɛ ɛnwu ye kɛ nɔhalɛ Nyamenle ne a ɛmaa mekɛ kpalɛ nee mekɛ ɛtane ne anwo adenle a,+ amaa menli annwu mɔɔ bazi kenle bie la.+
15 Wɔ me ngoane mekɛ ɛhye mɔɔ se ndɛndɛ la*+ anu, menwu debie biala, ɔvi tenlenenli mɔɔ ɔwu wɔ ye tenleneyɛlɛ nu+ kɔdwu amumuyɛnli mɔɔ tɛnla aze kyɛ ɔnva nwo kɛ ɔdi ɛtane la anwo zo.+
16 Mmayɛ ɛ nwo tenlenenli somasoma+ yɛɛ mmakile kɛ ɛze nrɛlɛbɛ somasoma.+ Duzu ati a ɔwɔ kɛ ɛsɛkye ɛ nwo a?+
17 Mmayɛ amumuyɛ somasoma yɛɛ mmayɛ koasea.+ Duzu ati a ɔwɔ kɛ ɛwu kolaa na wɔ mekɛ adwu a?+
18 Ɔle kpalɛ kɛ ɛkɛzɔ kɔkɔbɔlɛ ko anu yɛɛ ɔnle kɛ ɛgyakyi ko ne noko anu;+ ɔluakɛ sonla mɔɔ sulo Nyamenle la badie ɔ mu nwiɔ.
19 Nrɛlɛbɛ maa nrɛlɛbɛvolɛ nyia tumi kpole tɛla menli bulu mɔɔ bɛ nwo yɛ se wɔ suakpole zo la.+
20 Ɔluakɛ tenlenenli biala ɛnle azɛlɛ ye azo mɔɔ dahuu yɛ kpalɛ na ɔnyɛ ɛtane ɛlɛ a.+
21 Eza mmafa wɔ ahonle ɛdi edwɛkɛ biala mɔɔ menli ka la anzi;+ anrɛɛ ɛbade kɛ wɔ sonvolɛ ɛlɛka ɛ nwo edwɛkɛ ɛtane;*
22 ɔluakɛ ɛze ye wɔ wɔ ahonle nu bɔkɔɔ kɛ ɛdawɔ noko wɔha awie mɔ anwo edwɛkɛ ɛtane fane dɔɔnwo.+
23 Menvale nrɛlɛbɛ menzɔle ɛhye amuala meneanle, na menganle kɛ: “Mebanwu nrɛlɛbɛ.” Noko ɛnee mendwu nwolɛ.
24 Mɔɔ wɔ ɛkɛ la wɔ moa yɛɛ nuhua le kuloonwu kpalɛ. Nwane a kɛhola kɛde ɔ bo a?+
25 Menyɛle me adwenle kɛ menea na meavedevede ninyɛne nu na meakpondɛ nrɛlɛbɛ nee deɛmɔti ninyɛne sisi, na meade kɛzi koaseayɛlɛ le amumuyɛ na ngoaseadeyɛlɛ le ɛzɛlɛde la abo.+
26 Akee menwunle ɛhye: Debie mɔɔ yɛ ɛnwonle tɛla ewule la a le raalɛ mɔɔ le kɛ bɔvolɛ asawu, ye ahonle le kɛ avonle na ɔ sa le kɛ efiade kyeenyi la. Sonla mɔɔ sɔ nɔhalɛ Nyamenle ne anye la balie ɔ nwo avi ɔ sa nu,+ noko ɔbahye ɛtanevolɛ ne.+
27 Nolobɔvo ne se, “Bɛnlea, mɔɔ menwu ye la ɛne,+ meneɛnleanle ninyɛne ne mɔ anu ngoko ngoko amaa meade ɔ bo,
28 noko mɔɔ memkpondɛle la, meannwu ye. Menwunle nrenyia tenlenenli ko wɔ menli apenle avinli, noko meannwu raalɛ tenlenenli ko bɔbɔ wɔ bɛ avinli.
29 Ko ɛhye a menwunle ye a: Nɔhalɛ Nyamenle ne bɔle sonla fɔɔnwo+ noko bɛdabɛ mumua ne a bɛyɛ bɛ adwenle ngyehyɛleɛ dɔɔnwo a.”+
Ɔbodwɛkɛ
^ Anzɛɛ “pelasili.”
^ Hibulu aneɛ nu, “Mmapele ɛ nwo ɛfa ɛya.”
^ Anzɛɛ ɔkola ɔkile, “ɛyavalɛ le ahoasea sɛkɛlɛneɛ.”
^ Ɛhye kile, anyewɔzoamra.
^ Anzɛɛ “munzule.”
^ Anzɛɛ “mgbane ɛhye.”
^ Hibulu aneɛ nu, “ɛlɛwa wɔ amonle.”
