Nolobɔvo 11:1-10
11 Fuandi* wɔ paano ne to azule ne anye+ na mekɛ dɔɔnwo anzi, ɛbanwu ye bieko.+
2 Fa bie maa menli nsuu anzɛɛ menli mɔtwɛ bɔbɔ,+ ɔluakɛ ɛnze esiane* mɔɔ bazi azɛlɛ ne azo a.
3 Saa ezule ne munla a, ɔbadɔ yeagua azɛlɛ ne azo; yɛɛ saa baka tudu tɔ nyiakɛ anzɛɛ sɔlɔ a, ɛleka mɔɔ baka ne badɔ la ɛkɛ ne a ɔbala a.
4 Sonla mɔɔ nea anwoma ne la ɛnrɛlua ma, yɛɛ sonla mɔɔ nea amungu ne la ɛnrɛde ma.+
5 Kɛ mɔɔ ɛnze kɛzi sunsum ne yɛ gyima wɔ kakula mɔɔ la nrenzɛvolɛ kunlu la mbowule nu la,*+ zɔhane ala a ɛnze nɔhalɛ Nyamenle ne mɔɔ yɛ ninyɛne kɔsɔɔti la gyima a.+
6 Dua wɔ ma ne nwonlomɔ, na mmaye ɛ sa ɛfi nwo too nɔsolɛ;+ ɔluakɛ ɛnze mɔɔ bayɛ kpalɛ a, saa ɛhye anzɛɛ ɛhendeɛ ne anzɛɛ saa ɔ mu nwiɔ bayɛ kpalɛ a.
7 Wienyi le kɛnlɛma, yɛɛ ɔle kpalɛ ɔmaa ɛnyelɛ kɛ ɔkɛnwu sɛnzɛne ne.
8 Ɔti saa sonla tɛnla ngoane nu di ɛvolɛ dɔɔnwo a, maa ɔlie ɔ nye wɔ ɔ muala anu.+ Noko ɔwɔ kɛ ɔkakye kɛ awozinli mekɛ ne bayɛ dɔɔnwo; mɔɔ bara la amuala le mgbane.+
9 Kpavolɛ, die ɛ nye wɔ wɔ mgbavolɛ nu na maa wɔ ahonle ɛli fɛlɛko wɔ wɔ mgbavolɛ mekɛ nu. Di wɔ ahonle ndenle ne mɔ anzi na kɔ ɛleka biala mɔɔ ɛ nye kɛhile wɔ la; noko nwu ye kɛ, nɔhalɛ Nyamenle ne babua wɔ ndɛne* wɔ ninyɛne ɛhye mɔ amuala anwo.+
10 Ɔti ye ninyɛne mɔɔ gyegye adwenle la fi wɔ ahonle nu, na ye ninyɛne mɔɔ boda la fi wɔ sonlabaka* ne anwo, ɔluakɛ mgbavolɛ mekɛ nee mgbavosɛm le mgbane.+
Ɔbodwɛkɛ
^ Anzɛɛ “To.”
^ Anzɛɛ “munzule.”
^ Hibulu aneɛ nu, “wɔ mbowule mɔɔ wɔ nrenzɛvolɛ awodeɛ nu la.”
^ Anzɛɛ “bamaa wɔabu mgbonda.”
^ Anzɛɛ “nwonane.”