Ndɛnebuavolɛma 2:1-23
2 Akee Gyihova anwumabɔvolɛ ne+ vi Gelegale+ hɔle Bokem na ɔhanle kɛ: “Menyele bɛ menvile Yigyibiti mengɔle azɛlɛ ne mɔɔ menganle nwolɛ ndane mengilele bɛ nenyia mɔ la azo.+ Eza menganle kɛ, ‘Menrɛzɛkye ngyekyeleɛ mɔɔ me nee bɛ yɛle la ɛlɛ.+
2 Bɛdabɛ noko, ɔnle kɛ bɛ nee menli mɔɔ de azɛlɛ ɛhye azo la yɛ ngyekyeleɛ,+ na ɔwɔ kɛ bɛbubu bɛ afɔlemokyea ne mɔ.’+ Noko bɛandie me ne.+ Duzu ati a bɛyɛle ɛhye a?
3 Ɛhye ati a medame noko menganle kɛ, ‘Menrɛvoa bɛ menrɛvi bɛ nyunlu,+ na bɛbayɛ ɛhane bɛamaa bɛ+ na bɛ nyamenle ne mɔ ahwe bɛ ali bɛ nzi’ la.”+
4 Mekɛ mɔɔ Gyihova anwumabɔvolɛ ne hanle edwɛkɛ ɛhye hilele Yizilayɛma amuala la, bɛzunle kpole.
5 Ɔti bɛdonle ɛkɛ ne duma Bokem,* na bɛbɔle afɔle wɔ ɛkɛ ne bɛmaanle Gyihova.
6 Mekɛ mɔɔ Dwɔhyua maanle menli ne hɔle la, Yizilayɛnli ko biala hɔle ye agyapadeɛ zo kɛ ɔkadɛnla ye azɛlɛ ne azo.+
7 Menli ne hɔle zo zonlenle Gyihova wɔ Dwɔhyua ngoane mekɛ kɔsɔɔti anu nee mgbanyima mɔɔ Dwɔhyua wule la ɛnee bɛde aze na bɛnwunle ninyɛne mgbole kɔsɔɔti mɔɔ Gyihova yɛle maanle Yizilayɛma la mekɛ zo.+
8 Akee Gyihova sonvolɛ Dwɔhyua, Nɛn ara ne wule wɔ mekɛ mɔɔ ɛnee yeli ɛvolɛ 110 la.+
9 Yemɔti bɛziele ye wɔ ye azɛlɛ ne mɔɔ wɔ Temenate-hilɛse+ la azo wɔ Yifelaem awoka zo, wɔ Geeyahye Boka ne sɔlɔ.+
10 Bɛziele awolɛndoazo zɔhane kɔsɔɔti kɛ bɛ nenyia mɔ la,* na awolɛndoazo fofolɛ li bɛ nzi rale mɔɔ ɛnee bɛnze Gyihova anzɛɛ mɔɔ ɔyɛle ɔmaanle Yizilayɛma la.
11 Yemɔti Yizilayɛma yɛle ɛtane wɔ Gyihova anye zo na bɛzonlenle Beeyale ananze ne mɔ.+
12 Bɛkpole Gyihova, bɛ papa mɔ Nyamenle ne mɔɔ yele bɛ vile Yigyibiti azɛlɛ zo la.+ Na bɛzonlenle nyamenle gyɛne, menli mɔɔ ɛbɔ bɛ nwo mgbɔlɔka ɛyia la nyamenle ne mɔ+ na bɛbɔle bɛ ti aze bɛmaanle bɛ na bɛhanle Gyihova ɛya.+
13 Bɛkpole Gyihova na bɛzonlenle Beeyale nee Ahyetɔlɛte ananze ne mɔ.+
14 Ɛhye ati Gyihova vale Yizilayɛma anwo ɛya kpole, na ɔvale bɛ ɔwulale bɛ agbɔvolɛ asa anu ɔmaanle bɛsesale bɛ nwo ninyɛne.+ Ɔdɔnenle bɛ ɔmaanle bɛ agbɔvolɛ mɔɔ ɛbɔ bɛ ɛyia la,+ na bɛangola bɛangyinla bɛ agbɔvolɛ ne mɔ anyunlu.+
15 Ɛleka biala mɔɔ bɛhɔle la, Gyihova maanle ɔ sa zo tiale bɛ na ɔmaanle munzule dole bɛ+ kɛ mɔɔ Gyihova hanle la, nee kɛ mɔɔ Gyihova hanle nwolɛ ndane hilele bɛ la,+ na ɛnee bɛlɛnwu amaneɛ kpole.+
16 Ɔti Gyihova maanle bɛ ndɛnebuavolɛma mɔɔ balie bɛ avi bɛ agbɔvolɛ asa anu la.+
17 Noko bɛkpole kɛ bɛbadie ndɛnebuavolɛma ne bɔbɔ na bɛ nee nyamenle gyɛne bɔle tuutuu na bɛbɔle bɛ ti aze bɛmaanle bɛ. Bɛhwenle bɛ nwo ndɛndɛ bɛvile adenle ne mɔɔ bɛ nenyia mɔ mɔɔ lile Gyihova mɛla ne mɔ azo la+ luale zolɛ la azo. Bɛmɛ bɛanyɛ ye zɔ.
18 Mekɛ biala mɔɔ Gyihova bamaa bɛ ndɛnebuavolɛ la,+ Gyihova boa ndɛnebuavolɛ ne ɔmaa ɔdie bɛ ɔfi bɛ agbɔvolɛ asa anu wɔ ndɛnebuavolɛ ne ngoane mekɛ kɔsɔɔti anu; ɔluakɛ saa bɛlɛdi nyane wɔ bɛdabɛ mɔɔ bɛsisi bɛ+ nee bɛdabɛ mɔɔ bɛkile bɛ ateetee la asa anu a, ɔyɛ Gyihova nyane.*+
19 Noko saa ndɛnebuavolɛ ne wu a, bɛbɔ ɔ bo bɛyɛ ninyɛndane bɛtɛla bɛ papa mɔ na bɛdi nyamenle gyɛne nzi, bɛsonle bɛ na bɛbɔ bɛ ti aze bɛmaa bɛ.+ Bɛangyakyi bɛ nyɛleɛ ne mɔ nee bɛ anzosesebɛ ne.
20 Akee Gyihova vale Yizilayɛma anwo ɛya kpole+ na ɔhanle kɛ: “Kɛmɔ maanle ɛhye ɛzɛkye me ngyekyeleɛ ne+ mɔɔ me nee bɛ nenyia mɔ yɛle la na bɛandie me+ la ati,
21 medame noko menrɛvoa maanle maanle mɔɔ Dwɔhyua gyakyile bɛ ɛkɛ ne kolaa na yeawu la anu ko bɔbɔ menrɛvi bɛ nyunlu.+
22 Ɛhye bazɔ Yizilayɛma anlea kɛ saa bɛbalua Gyihova adenle ne anu+ kɛ mɔɔ bɛ papa mɔ yɛle la a.”
23 Ɔti Gyihova gyakyile maanle maanle ɛhye mɔ wɔ ɛkɛ. Yeanvoa bɛ ndɛndɛ, yɛɛ yeanva bɛ yeanwula Dwɔhyua asa anu.
