Ndɛnebuavolɛma 15:1-20
-
Samesɛn lile Filisitiama nzenralɛ (1-20)
15 Mekɛ ekyi guale nu, mɔɔ ɛnee bɛlɛte hwiiti la, Samesɛn vale abɔnkye ralɛ hɔle kɛ ɔkakpɔla ɔ ye. Ɔhanle kɛ: “Mekulo kɛ mekɔ me ye anwo ɛkɛ wɔ suakunlu ɛkɛ.” Noko ye papa ammaa ye adenle yeammaa yeangɔ ɛkɛ.
2 Ɔ ye papa hanle kɛ: “Menganle ye wɔ me ti anu kɛ, ‘Bie a ɛkpɔ ye.’+ Ɔti menvale ye memaanle mgbavolɛ ne mɔ mɔɔ nee wɔ luale la anu ko.+ Ɔ diema kakula ne anwo ɛnyɛ fɛ ɛndɛla ye ɔ? Mesɛlɛ wɔ, gya yemɔ.”
3 Noko Samesɛn zele bɛ kɛ: “Mekɛ ɛhye ɛdeɛ, saa meyɛ Filisitiama ɛtane a, bɛnrɛhola bɛnrɛbɔ me somolɛ.”
4 Ɔti Samesɛn hɔhyele ɛzonlɛ 300. Akee ɔvale tɛkɛ, ɔkyekyele ɛzonlɛ nwiɔ biala adua ɔbɔle nu na ɔvale tɛkɛ ko ɔzianle dualɛ nwiɔ biala avinli.
5 Akee ɔsosɔle tɛkɛ ne mɔ na ɔmaanle ɛzonlɛ ne mɔ hɔle Filisitiama hwiiti ɛya ne mɔ anu. Ɔdole senle wɔ debie biala anu, hwiiti mɔɔ bɛkyekye ye avile nee mɔɔ gyigyi ɛkɛ la amuala yɛɛ vanye egyinli nee ɔlivi mbaka kɔsɔɔti.
6 Filisitiama ne bizale kɛ: “Nwane a yɛle ɛhye a?” Bɛzele bɛ kɛ: “Samesɛn mɔɔ ye ase a le Temenaanli ne la ɔ, ɔluakɛ ɔvale ɔ ye ɔmaanle mgbavolɛ ne mɔ mɔɔ nee ye luale la anu ko.”+ Na Filisitiama ne hɔyelale raalɛ ne nee ye papa.+
7 Akee Samesɛn zele bɛ kɛ: “Ɛhye mɔɔ bɛyɛ la ati, menrɛgyakyi kɔkpula kɛ mebali bɛ nzenralɛ la.”+
8 Akee ɔhɔle bɛ nwo zo ngoko na ɔhunle bɛ nuhua dɔɔnwo,* ɛhye anzi ɔhɔdɛnlanle Yitam bodane ne bolɛ bɔne bie anu.
9 Nzinlii, Filisitiama rayɛle bɛ azokoɛleɛ wɔ Dwuda, na bɛkpɔsɛkpɔsale Lihae.+
10 Akee Dwudama hanle kɛ: “Duzu ati a bɛra yɛ nwo zo ɛ?” na bɛbuale kɛ: “Yɛra kɛ yɛbahye* Samesɛn, na mɔɔ yeva yeyɛ yɛ la yɛava bie yɛayɛ ye.”
11 Ɔti Dwuda mrenyia 3,000 hɔle Yitam bodane ne bolɛ bɔne ne anu na bɛzele Samesɛn kɛ: “Ɛnze kɛ Filisitiama a di yɛ nwo zo tumi ɔ?+ Ɛnee duzu ati a wɔyɛ yɛ zɛhae a?” Ɔzele bɛ kɛ: “Mɔɔ bɛva bɛyɛ me la bie a meva meyɛ bɛ a.”
12 Noko bɛzele ye kɛ: “Yɛra kɛ yɛbahye* wɔ na yɛava wɔ yɛahɔmaa Filisitiama.” Akee Samesɛn hanle kɛ: “Bɛha ndane bɛhile me kɛ bɛdabɛ mumua ne bɛnrɛva bɛ sa bɛnrɛha me.”
13 Bɛhanle bɛhilele ye kɛ: “Kyɛkyɛ, yɛbakyekye wɔ ala na yɛava wɔ yɛahɔmaa bɛ, noko yɛnrɛhu wɔ.”
Ɔti bɛvale nyɛma fofolɛ nwiɔ bɛkyekyele ye na bɛ nee ye vi bolɛ bɔne ne anu hɔle.
14 Mɔɔ ɔdwule Lihae la, Filisitiama ne vale fɛlɛkolilɛ deɛdeanle nuhua wɔ mekɛ mɔ bɛnwunle ye la. Akee Gyihova sunsum ne maanle ye anwosesebɛ,+ na nyɛma ne mɔɔ kyekye ɔ sa la yɛle kɛ lenen nyɛma mɔɔ senle ɛdɔ nuhua la, na nyɛma ne mɔɔ kyekye ɔ sa la tetele guale.+
15 Akee ɔnwunle asoaso nyinli awudwelɛ bowule fofolɛ bie; ɔhɔvale na ɔvale ɔhunle mrenyia 1,000.+
16 Na Samesɛn hanle kɛ:
“Meva asoaso awudwelɛ bowule ko mehuohua edukue ko, edukue nwiɔ!
Meva asoaso awudwelɛ bowule ko mehu mrenyia 1,000.”+
17 Mɔɔ ɔdendɛle ɔwiele la, ɔvuandinle awudwelɛ bowule ne ɔdole ye lɔ na ɔvɛlɛle ɛkɛ ne Releemate-lihae.*+
18 Akee nzuhɔne hunle ye, na ɔvɛlɛle Gyihova na ɔhanle kɛ: “Ɛdawɔ yɛɛ wɔlua wɔ sonvolɛ anwo zo wɔmaa ngoanelielɛ kpole zɛhae ɛra a. Noko kɛkala, asoo ɔwɔ kɛ nzuhɔne ku me na metɔ menli mɔɔ bɛtɛpɛle bɛ mrenyiazo la asa anu ɔ?”
19 Ɔti Nyamenle maanle kuma bie mɔɔ wɔ Lihae la anu bukele na nzule vi nu rale.+ Mekɛ mɔɔ ɔnlonle bie la, ɔnyianle ye anwosesebɛ* ne bieko na ɔ nwo gyinlanle ye. Ɛhye ati a ɔvɛlɛle ɛkɛ ne Ɛn-hakɔli* la, na ɔwɔ Lihae too badwu ɛnɛ.
20 Na ɔbuale Yizilayɛma ndɛne ɛvolɛ 20 wɔ Filisitiama mekɛ zo.+
Ɔbodwɛkɛ
^ Hibulu aneɛ nu, “ɔhunle bɛ nuhua dɔɔnwo mɔɔ egyakɛ la ɛzɔlɛ zo.”
^ Anzɛɛ “yɛbakyekye.”
^ Anzɛɛ “yɛbakyekye.”
^ Ɔ bo kile “Awudwelɛ Bowule Boka.”
^ Hibulu aneɛ nu, “ye sunsum.”
^ Ɔ bo kile “Awie Mɔɔ Ɛlɛfɛlɛ La Nzubula.”
