Ndɛnebuavolɛma 13:1-25
13 Yizilayɛma yɛle ɛtane wɔ Gyihova anye zo bieko,+ na Gyihova vale bɛ wulale Filisitiama asa anu+ ɛvolɛ 40.
2 Mekɛ zɔhane anu, ɛnee nrenyia bie wɔ Zola+ mɔɔ ɔvi Dan abusua nu,+ bɛfɛlɛ ye Manowa.+ Ɛnee ɔ ye le mota, ɔtɛwole ɛlɛ.+
3 Mekɛ guale nu la, Gyihova anwumabɔvolɛ yele ɔ nwo hilele raalɛ ne na ɔzele ye kɛ: “Nea, ɛle mota, ɛtɛwole ɛlɛ. Noko ɛbanrenzɛ na wɔawo ralɛ nrenyia.+
4 Nea na wɔanno nwanye anzɛɛ nza biala,+ yɛɛ mmadi debie biala mɔɔ anwo ɛnde la.+
5 Nea! Ɛbanrenzɛ wɔawo ralɛ nrenyia, ɔnle kɛ biledi* ka ɔ ti enrinli,+ ɔluakɛ ɔvi kakula ne awolɛ nu,* ɔbayɛ Nazalaenli yeamaa Nyamenle, na ɔbali Yizilayɛma anyunlu yealie bɛ yeavi Filisitiama asa anu.”+
6 Akee raalɛ ne hɔzele ɔ hu kɛ: “Nɔhalɛ Nyamenle ne sonla bie rale me nwo ɛke, na ɔzɔho nɔhalɛ Nyamenle ne anwumabɔvolɛ, ɔ nwo yɛ ɛzulolɛ kpalɛ. Meambiza ye ɛleka mɔɔ ɔvi la, yɛɛ yeambɔ ye duma yeangile me.+
7 Noko ɔzele me kɛ, ‘Nea! Ɛbanrenzɛ na wɔawo ralɛ nrenyia. Mmano nwanye anzɛɛ nza biala, yɛɛ mmadi debie biala mɔɔ anwo ɛnde la, ɔluakɛ ɔvi kakula ne awolɛ nu,* ɔbayɛ Nazalaenli yeamaa Nyamenle kɔkpula kenle mɔɔ ɔbawu la.’”
8 Manowa bodole Gyihova kɛ: “Gyihova mesɛlɛ wɔ, maa nɔhalɛ Nyamenle sonla ne mɔɔ ɛzoanle ye kɛkala la ɛrɛla bieko na ɔrahile yɛ kɛzi ɔwɔ kɛ yɛyɛ kakula ne mɔɔ yɛbawo ye la.”
9 Ɔti nɔhalɛ Nyamenle ne diele Manowa, na nɔhalɛ Nyamenle ne anwumabɔvolɛ ne rale raalɛ ne anwo ɛkɛ bieko wɔ mekɛ mɔɔ ɔde alienwo la. Ɛnee ɔ hu Manowa ɛnle ɔ nwo ɛkɛ.
10 Raalɛ ne nriandile ndɛndɛ hɔzele ɔ hu kɛ: “Nea! Nrenyia ne mɔɔ rale me nwo ɛkɛ ɛkenle la ɛye ɔ nwo ɛhile me bieko.”+
11 Akee Manowa dwazole na ɔ nee ɔ ye hɔle. Ɔrale nrenyia ne ɛkɛ na ɔzele ye kɛ: “Ɛdawɔ a ɛle nrenyia ne mɔɔ nee me ye dendɛle la ɔ?” Ɔbuale ye kɛ: “Medame ɔ.”
12 Akee Manowa hanle kɛ: “Wɔ edwɛkɛ ne ɛyɛ zɔ! Kɛ kakula ne ɛbɛlabɔlɛ bayɛ ɛ, na duzu gyima a ɔbayɛ a?”+
13 Ɔti Gyihova anwumabɔvolɛ ne zele Manowa kɛ: “Ɔwɔ kɛ ɛ ye twe ɔ nwo fi debie biala mɔɔ meha mehile ye la anwo.+
14 Ɔnle kɛ ɔdi vanye ma biala, ɔnle kɛ ɔno nwanye anzɛɛ nza biala,+ yɛɛ ɔnle kɛ ɔdi debie biala mɔɔ anwo ɛnde la.+ Edwɛkɛ biala mɔɔ meha mehile ye la, maa ɔli zo.”
15 Akee Manowa zele Gyihova anwumabɔvolɛ ne kɛ: “Yɛsɛlɛ wɔ, kendɛ maa yɛva abɔnkye ralɛ yɛdo debie yɛmaa wɔ.”+
16 Noko Gyihova anwumabɔvolɛ ne zele Manowa kɛ: “Saa mekendɛ bɔbɔ a, menrɛli wɔ aleɛ ne; noko saa ɛkulo kɛ ɛbɔ ɛyelalɛ afɔle ɛmaa Gyihova a, ɛbahola wɔabɔ.” Ɛnee Manowa ɛnze kɛ ɔle Gyihova anwumabɔvolɛ.
17 Akee Manowa bizale Gyihova anwumabɔvolɛ ne kɛ: “Kɛ bɛfɛlɛ wɔ ɛ,+ amaa saa wɔ edwɛkɛ ne yɛ zɔ a yeawula wɔ anyunlunyia?”
18 Na Gyihova anwumabɔvolɛ ne bizale ye kɛ: “Duzu ati a ɛlɛbiza me duma ɛ? Me duma yɛ nwanwane.”
19 Akee Manowa vale abɔnkye ralɛ ne nee ma afɔlebɔdeɛ ne na ɔbɔle afɔle wɔ bolɛ ne azo ɔmaanle Gyihova. Ɛnee ɔlɛyɛ nwanwane debie wɔ mekɛ mɔɔ Manowa nee ɔ ye anye gyi nwo la.
20 Mɔɔ sendɔlɔra ne vi afɔlemokyea ne azo ɛlɛkɔ anwuma la, Gyihova anwumabɔvolɛ ne luale sendɔlɔra ne mɔɔ vi afɔlemokyea ne azo la anu hɔle anwuma wɔ mekɛ mɔɔ Manowa nee ɔ ye anye gyi ɔ nwo la. Ɛkɛ ne ala bɛbutubutule bɛ nyunlu aze.
21 Gyihova anwumabɔvolɛ ne anye ɔ nwo angile Manowa nee ɔ ye bieko. Akee Manowa nwunle kɛ ɔle Gyihova anwumabɔvolɛ.+
22 Na Manowa zele ɔ ye kɛ: “Kɛ ɔde ye biala la yɛbawu, ɔluakɛ Nyamenle a yɛnwu ye la.”+
23 Noko ɔ ye zele ye kɛ: “Saa Gyihova kulo kɛ ɔku yɛ a, anrɛɛ yeanlie yɛ sa nu ɛyelalɛ afɔlebɔdeɛ+ nee ma afɔlebɔdeɛ ne, anrɛɛ ɔnrɛmaa yɛnrɛnwu ninyɛne ɛhye mɔ amuala yɛɛ anrɛɛ ɔnrɛha ɛhye mɔ anu biala ɔnrɛhile yɛ.”
24 Nzinlii, raalɛ ne wole ralɛ nrenyia na ɔdonle ye Samesɛn;+ mɔɔ kakula ne ɛlɛnyi la, Gyihova hɔle zo yilale ye.
25 Mekɛ guale nu la, Gyihova sunsum ne rale ɔ nwo zo+ wɔ Meehana-dan,+ wɔ Zola nee Ɛhyetayɔlo+ avinli.
Ɔbodwɛkɛ
^ Anzɛɛ “dadeɛ dɛma.”
^ Hibulu aneɛ nu, “kakula ne fi awodeɛ ne anu a.”
^ Hibulu aneɛ nu, “kakula ne fi awodeɛ ne anu a.”
