Nɔmbɛse 9:1-23
9 Mɔɔ bɛvile Yigyibiti azɛlɛ zo la, ye ɛvolɛ nwiɔ ne azo siane ne mɔɔ limoa la anu,+ Gyihova dendɛle hilele Mosisi wɔ Saenae fienemgbole ne anu, ɔse:
2 “Saa mekɛ ne dwu a+ ɔwɔ kɛ Yizilayɛma siezie Akpabɛnwo afɔlebɔdeɛ ne.+
3 Wɔ siane ɛhye kenle 14 ne nɔsolɛ nu,* mekɛ ne dwu a ɔwɔ kɛ bɛsiezie afɔlebɔdeɛ ne. Ɔwɔ kɛ bɛsiezie ye kɛ mɔɔ nwolɛ mɛla nee nwolɛ ngyehyɛleɛ kɔsɔɔti de la.”+
4 Yemɔti Mosisi hanle hilele Yizilayɛma kɛ bɛziezie Akpabɛnwo afɔlebɔdeɛ ne.
5 Ɔti bɛzieziele Akpabɛnwo afɔlebɔdeɛ ne wɔ siane ne mɔɔ limoa la kenle 14 ne nɔsolɛ nu* wɔ Saenae fienemgbole ne anu. Kɛ mɔɔ Gyihova hanle hilele Mosisi la, zɔhane ala a Yizilayɛma yɛle a.
6 Ɛnee menli bie wɔ ɛkɛ mɔɔ bɛva bɛ sa bɛha funli*+ na bɛ nwo ɛgua evinli a, yemɔti bɛangola bɛanziezie Akpabɛnwo afɔlebɔdeɛ ne wɔ kenle zɔhane. Yemɔti menli ɛhye mɔ hɔle Mosisi nee Aalɔn anyunlu wɔ kenle zɔhane+
7 na bɛzele Mosisi kɛ: “Yɛva yɛ sa yɛha funli* na yɛ nwo ɛgua evinli. Duzu ati a mekɛ ne dwu a ɔnle kɛ bɛmaa yɛ adenle bɛmaa yɛboka Yizilayɛma anwo na yɛfa yɛ afɔlebɔdeɛ yɛbɛlɛ Gyihova ɛ?”+
8 Na Mosisi zele bɛ kɛ: “Bɛhendɛ bɛmaa mendie mɔɔ Gyihova baha avale bɛ nwo la.”+
9 Akee Gyihova zele Mosisi kɛ:
10 “Ka kile Yizilayɛma kɛ, ‘Saa bɛ nuhua bie anzɛɛ bɛ bo zo amra bie fa ɔ sa ka funli* na ɔ nwo gua evinli+ anzɛɛ ɔtu adenle ɔkɔ moamoa bɔbɔ a, ɔwɔ kɛ ɔsiezie Akpabɛnwo afɔlebɔdeɛ ne ɔmaa Gyihova.
11 Ɔwɔ kɛ bɛsiezie ye wɔ siane nwiɔ ne+ kenle 14 ne nɔsolɛ nu.* Ɔwɔ kɛ bɛfa paano mɔɔ mgbɔvonle ɛnle nu nee nya nya ɛnwonle bɛboka nwo bɛdi.+
12 Ɔnle kɛ bɛgyakyi bie bɛmaa aleɛ kye zo,+ yɛɛ ɔnle kɛ bɛbu ye bowule biala anu.+ Ɔwɔ kɛ bɛsiezie ye kɛ mɔɔ Akpabɛnwo ne anwo mɛla biala kile la.
13 Noko saa awie anwo te anzɛɛ yeandu adenle yeangɔ moa na ɔbu ɔ nye ɔgua zo kɛ ɔbaziezie Akpabɛnwo afɔlebɔdeɛ ne a, ɔwɔ kɛ bɛye* zɔhane sonla* ne bɛfi ye menli ne avinli,+ ɔluakɛ mekɛ ne dwule la, yeanva Gyihova afɔlebɔdeɛ ne yeambɛlɛ ye. Zɔhane sonla ne bali ye ɛtane ne anwo ɛzonle.
14 “‘Saa ɛyɛvolɛ bie nee bɛ de a, ɔwɔ kɛ ɔdaye noko ɔsiezie Akpabɛnwo afɔlebɔdeɛ ne ɔmaa Gyihova.+ Ɔwɔ kɛ ɔyɛ ye kɛ mɔɔ Akpabɛnwo ne anwo mɛla nee nwolɛ ngyehyɛleɛ kile la.+ Ɛyɛvolɛ o, ekulomeni o, mɛla ko ne ala a wɔ ɛkɛ ne maa bɛ a.’”+
15 Kenle mɔɔ bɛhyehyɛle ɛdanlɛsua ne la,+ amungu hedale ɛdanlɛsua ne, mɔɔ le Daselɛlilɛ ɛdanlɛsua ne la azo, noko ye nɔsolɛ nu, debie mɔɔ zɔho senle la hale ɛdanlɛsua ne azo too nwonlomɔ.+
16 Ɛhye a hɔle zo dahuu a: Amungu ne keda zo alehyenlɛ nu, yɛɛ aledwolɛ nu, debie mɔɔ zɔho senle la bakeda zo.+
17 Mekɛ biala mɔɔ amungu ne kɛmaa ɔ nwo zo kɛvi ɛdanlɛsua ne azo la, Yizilayɛma tu bɛ bo ndɛndɛ,+ na ɛleka mɔɔ amungu ne kɛgyinla la, ɛkɛ ne a Yizilayɛma tɛnla a.+
18 Saa Gyihova ka kɛ bɛhɔ a, ɛnee bɛlɛkɔ, yɛɛ Gyihova ka kɛ bɛdɛnla ɛkɛ a, ɛnee bɛdɛnla ɛkɛ.+ Mekɛ tendenle mɔɔ amungu ne kɛgyinla ɛdanlɛsua ne azo la, bɛtɛnla ɛkɛ.
19 Saa amungu ne kyɛ wɔ ɛdanlɛsua ne azo a, Yizilayɛma tie Gyihova na bɛndu bɛ bo.+
20 Ɔdwu mekɛ ne bie a, amungu ne kyɛ ekyii wɔ ɛdanlɛsua ne azo. Saa Gyihova ka kɛ bɛdɛnla ɛkɛ a, ɛnee bɛdɛnla ɛkɛ, yɛɛ Gyihova ka kɛ bɛhɔ a, ɛnee bɛlɛkɔ.
21 Ɔdwu mekɛ ne bie a amungu ne ka ɛkɛ ɔvi nɔsolɛ kɔdwu nwonlomɔ ala, saa ɔmaa ɔ nwo zo nwonlomɔ a, ɛnee bɛlɛkɔ. Saa amungu ne maa ɔ nwo zo alehyenlɛ nu o, aledwolɛ nu o, ɛnee bɛlɛkɔ.+
22 Saa ɔdi kenle nwiɔ, siane anzɛɛ ɔkyɛ bɔbɔ a, mekɛ ala mɔɔ amungu ne tɛbɔ ɛdanlɛsua ne azo la, Yizilayɛma tɛnla ɛkɛ na bɛndu bɛ bo. Noko saa ɔmaa ɔ nwo zo a, ɛnee bɛlɛkɔ.
23 Saa Gyihova ka kɛ bɛdɛnla ɛkɛ a, ɛnee bɛdɛnla ɛkɛ, yɛɛ Gyihova ka kɛ bɛhɔ a, ɛnee bɛlɛkɔ. Bɛdiele Gyihova na bɛyɛle mɔɔ Gyihova luale Mosisi anwo zo hanle la.
Ɔbodwɛkɛ
^ Hibulu aneɛ nu, “nɔsolɛ nwiɔ ne avinli.”
^ Hibulu aneɛ nu, “nɔsolɛ nwiɔ ne avinli.”
^ Anzɛɛ “ɛkɛla mɔɔ ɛwu.”
^ Anzɛɛ “yɛha ɛkɛla mɔɔ ɛwu.”
^ Anzɛɛ “ɛkɛla mɔɔ ɛwu.”
^ Hibulu aneɛ nu, “nɔsolɛ nwiɔ ne avinli.”
^ Anzɛɛ “bɛku.”
^ Anzɛɛ “ɛkɛla.”
