Nɔmbɛse 8:1-26
8 Gyihova zele Mosisi kɛ:
2 “Ka kile Aalɔn kɛ, ‘Saa ɛsosɔ ahɛnlaneɛ ne mɔ a, ɔwɔ kɛ ahɛnlaneɛ nsuu ne ta wɔ kɛnlaneɛbaka ne anyunlu.’”+
3 Ɔti Aalɔn yɛle zɔ: Ɔsosɔle ahɛnlaneɛ ne mɔ ɔmaanle bɛdale kɛnlaneɛbaka ne anyunlu+ kɛ mɔɔ Gyihova hanle hilele Mosisi la.
4 Kɛ bɛyɛle kɛnlaneɛbaka ne la ɛne: Bɛvale hamenle bɛbolole nvutuke a bɛyɛle a; ɔvi ɔ bo kɔdwu ye ndotolo ne mɔ azo, bɛvale hamenle a bɛbolole a.+ Bɛyɛle kɛnlaneɛbaka ne kɛ mɔɔ Gyihova yele hilele Mosisi la.+
5 Gyihova zele Mosisi bieko kɛ:
6 “Ye Livaema fi Yizilayɛma anu na te bɛ nwo.+
7 Kɛ ɔwɔ kɛ ɛte bɛ nwo la ɛne: Fa nzule mɔɔ wowo ɛtane la kponde bɛ nwo, na maa bɛva biledi* bɛkpa bɛ nwo enrinli ne amuala, bɛkpo bɛ adɛladeɛ, na bɛde bɛ nwo.+
8 Akee bɛbava ɛnlankɛ ralɛ nyinli+ nee nwolɛ ma afɔlebɔdeɛ esamo motoo+ mɔɔ bɛva nwole bɛfɔtɔ la, na wɔava ɛnlankɛ ralɛ nyinli gyɛne mɔɔ ɛbava wɔabɔ ɛtane afɔle la.+
9 Ɛbava Livaema ne wɔahɔ nyianu ɛdanlɛsua ne anyunlu na wɔaboɔboa Yizilayɛma kɔsɔɔti anloa wɔ ɛkɛ.+
10 Saa ɛfa Livaema ɛkɔ Gyihova anyunlu a, Yizilayɛma bava bɛ sa agua Livaema ne ati zo.+
11 Na Aalɔn bava Livaema ne amaa* Gyihova kɛ Yizilayɛma ehono afɔlebɔdeɛ+ amaa bɛayɛ Gyihova gyima ne.+
12 “Akee Livaema ne bava bɛ sa agua nlankɛ nyinli ne mɔ ati zo.+ Ɛhye anzi, fa ko bɔ ɛtane afɔle na fa ko noko bɔ ɛyelalɛ afɔle maa Gyihova fa di Livaema ne ati mgbɔdalɛ.+
13 Ɛbamaa Livaema ne aragyinla Aalɔn nee ɔ mra mrenyia ne mɔ anyunlu na wɔava bɛ wɔamaa* Gyihova kɛ ehono afɔlebɔdeɛ.
14 Ye Livaema fi Yizilayɛma anu amaa Livaema ne ayɛ me ɛdeɛ.+
15 Akee Livaema ne barayɛ gyima wɔ nyianu ɛdanlɛsua ne anu. Kɛ ɔwɔ kɛ ɛte bɛ nwo na ɛfa bɛ ɛmaa* kɛ ehono afɔlebɔdeɛ la ɛne.
16 Ɔluakɛ bɛle menli mɔɔ bɛye bɛ bɛvi Yizilayɛma anu bɛmaa me a. Mebava bɛ meazie Yizilayɛma belamunli mralɛ* kɔsɔɔti agyakɛ anu+ na bɛayɛ me ɛdeɛ.
17 Ɔluakɛ Yizilayɛma belamunli ralɛ biala le me ɛdeɛ, sonla o, nane o.+ Mendele bɛ nwo memaanle me nwo wɔ kenle mɔɔ mengunle belamunli ralɛ biala mɔɔ wɔ Yigyibiti azɛlɛ zo la.+
18 Mebava Livaema meazie Yizilayɛma belamunli mralɛ kɔsɔɔti agyakɛ anu.
19 Mebava Livaema meamaa Aalɔn nee ɔ mra mrenyia ne mɔ kɛ menli mɔɔ bɛye bɛ bɛvi Yizilayɛma anu la, amaa bɛayɛ gyima bɛaboa Yizilayɛma wɔ nyianu ɛdanlɛsua ne anu+ na bɛali Yizilayɛma ati mgbɔdalɛ, amaa Yizilayɛma+ ambikye ɛleka nwuanzanwuanza ne na esiane ando bɛ.”
20 Mosisi nee Aalɔn yɛɛ Yizilayɛma kɔsɔɔti yɛle mɔɔ bɛhilele bɛ wɔ Livaema ne anwo la. Debie biala mɔɔ Gyihova hanle ye wɔ Livaema anwo hilele Mosisi la, zɔhane ala a Yizilayɛma yɛle a.
21 Yemɔti Livaema ne dele bɛ nwo na bɛkpole bɛ adɛladeɛ,+ na Aalɔn vale bɛ maanle* kɛ ehono afɔlebɔdeɛ wɔ Gyihova anyunlu.+ Akee Aalɔn lile bɛ ti mgbɔdalɛ na ɔdele bɛ nwo.+
22 Ɛhye anzi, Livaema hɔyɛle bɛ gyima ne wɔ nyianu ɛdanlɛsua ne anu wɔ Aalɔn nee ɔ mra mrenyia ne mɔ anyunlu. Mɔɔ Gyihova hanle ye wɔ Livaema anwo hilele Mosisi la, zɔhane ala a bɛyɛle bɛ a.
23 Akee Gyihova zele Mosisi kɛ:
24 “Mɔɔ fale Livaema anwo la ɛne: Nrenyia biala mɔɔ ɛli ɛvolɛ 25 mɔɔ kɔ la baraboka menli mɔɔ yɛ gyima wɔ nyianu ɛdanlɛsua ne anu la anwo.
25 Noko saa ɔbo ɛvolɛ 50 a, ɔbavi gyima ne anu na ɔnrɛyɛ bieko.
26 Ɔbahola yeaboa ɔ mediema mɔɔ ɛlɛyɛ gyima wɔ nyianu ɛdanlɛsua ne anu la, noko ɔnrɛyɛ gyima wɔ ɛkɛ. Ɛhye a ɛbayɛ wɔ Livaema nee bɛ gyima ne anwo a.”+
Ɔbodwɛkɛ
^ Anzɛɛ “dadeɛ dɛma.”
^ Hibulu aneɛ nu, “ado ehono amaa.”
^ Hibulu aneɛ nu, “wɔado ehono wɔamaa.”
^ Hibulu aneɛ nu, “ɛto ehono.”
^ Anzɛɛ “belamunli mralɛ kɔsɔɔti mɔɔ kɛde awodeɛ ne anloa la.”
^ Hibulu aneɛ nu, “dole ehono.”
