Nɔmbɛse 5:1-31
5 Gyihova zele Mosisi bieko kɛ:
2 “Ka kile Yizilayɛma kɛ bɛye kokobɛvolɛ biala+ nee awie biala mɔɔ ɔ nwo nzule se gua+ yɛɛ awie biala mɔɔ funli* ɛmaa ɔ nwo ɛgua evinli la bɛvi azokoɛleɛ ɛkɛ.+
3 Nrenyia o, raalɛ o, bɛye ye bɛvi ɛkɛ. Bɛye bɛ bɛvi azokoɛleɛ ɛkɛ, amaa bɛanva evinli+ bɛanga menli mɔɔ mede bɛ avinli la azokoɛleɛ ne.”+
4 Yemɔti Yizilayɛma yɛle ye zɔ na bɛyele bɛ bɛvile azokoɛleɛ ɛkɛ. Kɛ mɔɔ Gyihova hanle hilele Mosisi la, zɔhane ala a Yizilayɛma yɛle a.
5 Gyihova doale zo zele Mosisi kɛ:
6 “Ka kile Yizilayɛma kɛ, ‘Saa nrenyia anzɛɛ raalɛ anli nɔhalɛ ammaa Gyihova na ɔyɛ ɛtane a, zɔhane sonla* ne di fɔlɛ.+
7 Ɔwɔ kɛ ɔka* ɛtane mɔɔ yeyɛ*+ la na ɔtua ye fɔlɛlilɛ ne anwo kakɛ ne amuala na eza ɔfa ezukoa ne ngyɛnu nnu anu ko ɔboka nwo;+ ɔwɔ kɛ ɔfa ɔmaa ahenle mɔɔ ɔyɛle ye ɛtane la.
8 Noko saa ahenle ɛnlɛ ɔ nwo sonla fɔɔnwo mɔɔ balie ezukoa ne a, ɔwɔ kɛ bɛfa bɛkɔmaa Gyihova na ɔbayɛ ɛsɔfo ne ɛdeɛ, noko ɛsɔfo ne bava mgbɔdalɛ boane nyinli ne ali ɔ ti mgbɔdalɛ amaa ye.+
9 “‘Ndoboa nwuanzanwuanza biala+ mɔɔ Yizilayɛma bava arɛlɛ ɛsɔfo ne la bayɛ ye ɛdeɛ.+
10 Awie biala ninyɛne nwuanzanwuanza bayɛ ye ɛdeɛ. Debie biala mɔɔ awie bava amaa ɛsɔfo ne la bayɛ ɛsɔfo ne ɛdeɛ.’”
11 Gyihova doale zo zele Mosisi kɛ:
12 “Ka kile Yizilayɛma kɛ, ‘Saa awie aye wulowula ɔ sa aze na yeanli nɔhalɛ yeammaa ye
13 na nrenyia gyɛne nee ye da noko ɔ hu annwu ye+ yɛɛ yeande nwolɛ edwɛkɛ, na raalɛ ne gua ɔ nwo evinli noko awie biala angye ye anzɛɛ awie biala ɛnli nwolɛ daselɛ a, mɔɔ ɔwɔ kɛ bɛyɛ la ɛne:
14 Saa nrenyia ne twe ɔ ye ati nungule na ye adwenle nu yɛ ye kesee wɔ ye nɔhalɛlilɛ ne anwo, kɛ amgba yegua ɔ nwo evinli anzɛɛ ɔtɛguale ɔ nwo evinli a,
15 ɔwɔ kɛ nrenyia ne fa ɔ ye kɔmaa ɛsɔfo ne, na ɔfa ɔ ye anwo afɔlebɔdeɛ baale esamo yifa ngyɛnu bulu anu ko* ɔboka nwo. Ɔnle kɛ ɔgua nwole zo anzɛɛ ɔfa ayilevuanlɛ ɔto zo, ɔluakɛ ɔle nungulehwenlɛ ma afɔlebɔlɛ, ma afɔlebɔlɛ mɔɔ ɔmaa bɛkakye ɛtane.
16 “‘Ɛsɔfo ne bava raalɛ ne aragyinla Gyihova anyunlu.+
17 Ɛsɔfo ne bava nzule nwuanzanwuanza agua buakɛ nu, na yeava ɛdanlɛsua ne anu azɛlɛ ne anwo ndɛtɛlɛ ne bie yeagua nzule ne anu.
18 Ɛsɔfo ne bamaa raalɛ ne aragyinla Gyihova anyunlu na yeatulutulu raalɛ ne ati enrinli ne na yeava ngakyelɛ ma afɔlebɔdeɛ ne mɔɔ le nungulehwenlɛ ma afɔlebɔdeɛ ne la yeawula raalɛ ne asa anu,+ na ɛsɔfo ne balɛ nzule ɛnwonle ne mɔɔ nee munzule lua la ɔ sa nu.+
19 “‘Akee ɛsɔfo ne bamaa yeaha ndane, na yeaze raalɛ ne kɛ: “Saa ɛ hu gyale wɔ la,* ɛ nee nrenyia gyɛne ɛtɛdale+ yɛɛ ɛtɛwulowulale ɛ sa aze ɛtɛguale ɛ nwo evinli a, nzule ɛnwonle ɛhye mɔɔ nee munzule lua la ɛnrɛyɛ wɔ ɛhwee.
20 Noko saa ɛ hu gyale wɔ la wɔwulowula ɛ sa aze na wɔgua ɛ nwo evinli na wɔmaa nrenyia gyɛne+ nee wɔ ɛla a—”
21 Akee ɛsɔfo ne bamaa raalɛ ne aha ndane na yeali amonle, na ɛsɔfo ne baha ahile raalɛ ne kɛ: “Gyihova ɛmaa wɔ ɛzɔlɛ* ɛde ɛhoane nwolɛ* na ɛko ɛwula, na Gyihova ɛmaa ɛyɛ awie mɔɔ wɔ menli ne bava wɔ aha ndane ali amonle a.
22 Nzule ɛhye mɔɔ nee munzule lua la bahɔ wɔ anyalɛ ne anu na yeamaa ɛ ko awula na wɔ ɛzɔlɛ* ade ahoane nwolɛ.”* Na raalɛ ne balie zo kɛ: “Amen! Amen!”*
23 “‘Ɔwɔ kɛ ɛsɔfo ne kɛlɛ munzule ɛhye mɔ wɔ buluku ne anu na ɔwowo ɔgua nzule ɛnwonle ne anu.
24 Akee ɔbamaa raalɛ ne anlo nzule ɛnwonle ne mɔɔ nee munzule lua la, na nzule ne mɔɔ nee munzule lua la bahɔ ye nu na yeahakyi debie ɛnwonle.
25 Akee ɛsɔfo ne balie nungulehwenlɛ ma afɔlebɔdeɛ ne+ avi raalɛ ne asa anu na yeado ma afɔlebɔdeɛ ne ehono wɔ Gyihova anyunlu na yeava yeahɔ afɔlemokyea ne anwo.
26 Ɛsɔfo ne bavula ma afɔlebɔdeɛ ne ɔ sa ko yeava yeayɛ ngakyelɛ afɔlebɔdeɛ na yeamaa yeakpu wɔ afɔlemokyea ne azo,+ na akee yeamaa raalɛ ne anlo nzule ne.
27 Saa ɔmaa raalɛ ne no nzule ne na saa yegua ɔ nwo evinli yɛɛ yeanli nɔhalɛ yeammaa ɔ hu a, nzule ne mɔɔ nee munzule lua la bahɔ ye nu na yeahakyi debie ɛnwonle, na ɔ ko bawula yɛɛ ye ɛzɔlɛ* bade ahoane nwo,* na raalɛ ne bayɛ awie mɔɔ ye menli ne bava ye aha ndane ali amonle a.
28 Noko saa raalɛ ne ɛtɛguale ɔ nwo evinli na ɔ nwo te a, anzohwenlɛ ɛhye ɛnrɛyɛ ye ɛhwee, na ɔbahola yeanrenzɛ na yeawo mralɛ.
29 “‘Ɛhye a le nungulehwenlɛ nwo mɛla+ mɔɔ wɔ ɛkɛ maa raalɛ mɔɔ kɛwulowula ɔ sa aze na ɔkɛgua ɔ nwo evinli wɔ mekɛ mɔɔ ɔ hu tɛgya ye,
30 anzɛɛ nrenyia mɔɔ twe ɔ ye ati nungule na ye adwenle nu yɛ ye kesee wɔ ye nɔhalɛlilɛ nwo la; ɔwɔ kɛ ɔfa ɔ ye ɔbagyinla Gyihova anyunlu na ɛsɔfo ne fa mɛla ɛhye di ɔ nwo gyima.
31 Nrenyia ne ɛnli fɔlɛ, noko ɔ ye bali ye ɛtane ne anwo ɛzonle.’”
Ɔbodwɛkɛ
^ Anzɛɛ “ɛkɛla bie.” Nea Edwɛkɛbohilelɛ.
^ Anzɛɛ “ɛkɛla.”
^ Hibulu aneɛ nu, “bɛka bɛ.”
^ Hibulu aneɛ nu, “bɛyɛ.”
^ Anzɛɛ “Saa ɛwɔ ɛ hu tumi bo la.”
^ Ɔbayɛ kɛ ɔkile ye awodeɛ.
^ Anzɛɛ “ɛzɛkye.” Bie a ɛhye kile kɛ ɔnrɛhola wo.
^ Ɔbayɛ kɛ ɔkile ye awodeɛ.
^ Anzɛɛ “azɛkye.” Bie a ɛhye kile kɛ ɔnrɛhola wo.
^ Anzɛɛ “Ɔyɛ ɛkɛ! Ɔyɛ ɛkɛ!”
^ Ɔbayɛ kɛ ɔkile ye awodeɛ.
^ Anzɛɛ “azɛkye.” Bie a ɛhye kile kɛ ɔnrɛhola wo.
