Nɔmbɛse 4:1-49
4 Akee Gyihova zele Mosisi nee Aalɔn kɛ:
2 “Bɛdia Kohatema+ mɔɔ wɔ Livaema avinli la, wɔ bɛ mbusua nee bɛ papa mɔ mbusua nu,
3 bɛdia menli kɔsɔɔti mɔɔ ɛli ɛvolɛ 30+ kɔdwu ɛvolɛ 50+ mɔɔ boka ekpunli mɔɔ bayɛ gyima wɔ nyianu ɛdanlɛsua ne anu la anwo la.+
4 “Kohatema gyima mɔɔ bɛbayɛ ye wɔ nyianu ɛdanlɛsua ne anu la ɛne.+ Ɔle debie nwuanzanwuanza kpalɛ:
5 Saa bɛlɛfi azokoɛleɛ ɛkɛ ne a, Aalɔn nee ɔ mra mrenyia ne mɔ baye mgbɛnudanlɛ ne+ na bɛava bɛaheda Daselɛlilɛ ɛlɛka ne anwo.+
6 Bɛbava nane nwoma* bɛagua zolɛ na bɛava ɛdanlɛ buluwu noko bɛagua zo na bɛava mbaka mɔɔ bɛfa bɛsoa la bɛawulowula nwolɛ.+
7 “Eza bɛbava ɛdanlɛ buluwu bɛagua ɛkponle ne mɔɔ bɛfa paano mɔɔ bɛfa bɛkile bɛgua zo la azo+ na bɛava nwolɛ pɛlɛte, kanrɛlɛ ngyikyi, ahyɛnze nee kanrɛlɛ mgbole mɔɔ bɛfa bɛwola afɔlebɔlɛ nza la bɛagua zolɛ;+ ɔwɔ kɛ paano ne mɔɔ bɛfa bɛbɔ afɔle dahuu la+ ka zolɛ.
8 Bɛbava ɛdanlɛ kɔkɔlɛ bɛagua zolɛ na bɛava nane nwoma bɛaheda zo na bɛava mbaka mɔɔ bɛfa bɛsoa la+ bɛawulowula nwolɛ.
9 Akee bɛbava ɛdanlɛ buluwu bɛaheda kɛnlaneɛbaka ne,+ ye ahɛnlaneɛ ne mɔ,+ ye dabekɛ* ne mɔ, ye senlevalɛ ahyɛnze ne mɔ+ yɛɛ ninyɛne mɔɔ bɛfa kɛnlaneɛ nwole bɛgua nu la anwo.
10 Bɛbava nane nwoma bɛakyekye ye nee nwolɛ ninyɛne ne amuala anwo na bɛava bɛado baka mɔɔ bɛfa bɛsoa la azo.
11 Bɛbava ɛdanlɛ buluwu bɛagua nvutuke afɔlemokyea ne anwo,+ bɛava nane nwoma bɛaheda nwolɛ, na bɛava mbaka mɔɔ bɛfa bɛsoa la+ bɛawulowula nwolɛ.
12 Akee bɛbava ɛdanlɛ buluwu bɛakyekye ninyɛne kɔsɔɔti+ mɔɔ bɛfa bɛyɛ gyima dahuu wɔ ɛleka nwuanzanwuanza ne la anwo na bɛava nane nwoma bɛaheda zolɛ na bɛava bɛado baka mɔɔ bɛfa bɛsoa la azo.
13 “Ɔwɔ kɛ bɛfula afɔlemokyea ne azo nzonle* ne+ na bɛfa ɛdanlɛ kɔkɔlɛ nee buluwu afonla bɛkeda zolɛ.
14 Bɛbava afɔlemokyea ne anwo ninyɛne mɔɔ bɛfa bɛyɛ nwolɛ gyima la bɛagua zolɛ: senlevalɛ ahyɛnze ne mɔ, faka ne mɔ, sofi ne mɔ, ahyɛnze ne mɔ, afɔlemokyea ne anwo ninyɛne kɔsɔɔti;+ bɛbava nane nwoma bɛaheda zolɛ na bɛava mbaka mɔɔ bɛfa bɛsoa la+ bɛawulowula nwolɛ.
15 “Saa bɛlɛfi azokoɛleɛ ɛkɛ ne a, ɔwɔ kɛ Aalɔn nee ɔ mra mrenyia ne mɔ keda ɛleka nwuanzanwuanza ne+ nee ninyɛne kɔsɔɔti mɔɔ wɔ ɛleka nwuanzanwuanza ne la anwo. Akee Kohatema barazoa,+ noko ɔnle kɛ bɛfa bɛ sa bɛka ninyɛne mɔɔ wɔ ɛleka nwuanzanwuanza ne la, anrɛɛ bɛkɛwu.+ Ɛhye a le Kohatema gyima* wɔ nyianu ɛdanlɛsua ne anwo a.
16 “Ɛsɔfo Aalɔn ara Ɛlieza+ a banlea kɛnlaneɛ nwole ne,+ ayilevuanlɛ ne,+ dahuu ma afɔlebɔlɛ ne yɛɛ ɛkpokpalɛ nwole ne azo a.+ Ɔdaye a ɔbanlea ɛdanlɛsua ne nee nuhua debie biala, mɔɔ nwuanzanwuanza ɛleka ne nee ɛkɛ ne ninyɛne ne mɔ boka nwo la azo a.”
17 Gyihova zele Mosisi nee Aalɔn bieko kɛ:
18 “Bɛmmamaa Kohate mbusua ne mɔ+ abo zo bɔ wɔ Livaema anu.
19 Bɛyɛ ɛhye bɛmaa bɛ amaa bɛadɛnla ngoane nu na bɛanwu ɔluakɛ bɛhɔ ninyɛne nwuanzanwuanza kpalɛ ne anwo la ati.+ Aalɔn nee ɔ mra mrenyia ne mɔ bawolo ɛkɛ na bɛahile bɛ nuhua ko biala gyima nee ninyɛne mɔɔ ɔbazoa la.
20 Ɔnle kɛ bɛba ɛkɛ ne na bɛ nye bɔ ninyɛne nwuanzanwuanza ne mɔ azo bɔbɔ, anrɛɛ bɛkɛwu.”+
21 Akee Gyihova zele Mosisi kɛ:
22 “Bɛdia Gɛhyɔnoma+ wɔ bɛ papa mɔ mbusua nee bɛdabɛ bɛ mbusua nu.
23 Bɛdia menli kɔsɔɔti mɔɔ ɛli ɛvolɛ 30 kɔdwu ɛvolɛ 50 mɔɔ boka ekpunli mɔɔ bayɛ gyima wɔ nyianu ɛdanlɛsua ne anu la anwo la.
24 Gyima mɔɔ bɛhilele Gɛhyɔn mbusua ne mɔ kɛ bɛbayɛ nee ninyɛne mɔɔ bɛbazoa la ɛne:+
25 Bɛbazoa ɛdanlɛsua ne ndanlɛ ne mɔ,+ nyianu ɛdanlɛsua ne, zolɛ ndanlɛ nee nane nwoma mɔɔ bɛva bɛheda zolɛ,+ nyianu ɛdanlɛsua ne anuhɔlɛ ɛdanlɛ* ne,+
26 ndanlɛ mɔɔ henda alienwo ɛkɛ,+ ɛdanlɛsua ne nee afɔlemokyea ne alienwo ɛkɛ ne anuhɔlɛ ɛdanlɛ* ne,+ bɛ nyɛma ne mɔ, nwolɛ ninyɛne ne amuala yɛɛ debie biala mɔɔ bɛfa bɛyɛ nwolɛ gyima la. Bɛ gyima ɛne.
27 Aalɔn nee ɔ mra ne mɔ banlea gyima kɔsɔɔti nee ninyɛne mɔɔ Gɛhyɔnoma+ bazoa la azo; bɛbahile bɛ ninyɛne mɔɔ ɔwɔ kɛ bɛsoa la.
28 Ɛhye a le nyianu ɛdanlɛsua ne anu gyima mɔɔ Gɛhyɔn mbusua ne mɔ bayɛ a,+ na ɛsɔfo Aalɔn ara Yetamaa+ a banlea bɛ gyima ne azo a.
29 “Bɛbadia Mɛlɛlaema+ wɔ bɛ mbusua nee bɛ papa mɔ mbusua nu.
30 Bɛdia menli kɔsɔɔti mɔɔ ɛli ɛvolɛ 30 kɔdwu ɛvolɛ 50 mɔɔ boka ekpunli mɔɔ bayɛ gyima wɔ nyianu ɛdanlɛsua ne anu la anwo la.
31 Ninyɛne mɔɔ bɛbazoa+ wɔ nyianu ɛdanlɛsua ne anwo la ɛne: ɛdanlɛsua ne felɛmo ne mɔ,+ ye meɛbeanu mbaka,+ ye mpila ne mɔ,+ ye adiabo ne mɔ;+
32 alienwo ɛkɛ ne mpila ne mɔ,+ bɛ adiabo ne mɔ,+ bɛ adakola+ nee bɛ nyɛma ne mɔ nee nwolɛ ninyɛne yɛɛ ninyɛne mɔɔ bɛfa bɛyɛ nwolɛ gyima la amuala. Bɛbobɔ bɛ aluma na bɛhile bɛ ninyɛne mɔɔ bɛbazoa la.
33 Gyima mɔɔ Mɛlɛlae mbusua ne mɔ+ bayɛ wɔ nyianu ɛdanlɛsua ne anwo la ɛne, na ɛsɔfo Aalɔn ara Yetamaa a banlea bɛ gyima ne azo a.”+
34 Akee Mosisi nee Aalɔn yɛɛ menli ne mgbanyima ne mɔ+ dianle Kohatema+ wɔ bɛ mbusua nee bɛ papa mɔ mbusua nu,
35 bɛdianle menli kɔsɔɔti mɔɔ ɛli ɛvolɛ 30 kɔdwu ɛvolɛ 50 mɔɔ boka ekpunli mɔɔ bayɛ gyima wɔ nyianu ɛdanlɛsua ne anu la anwo la.+
36 Menli mɔɔ bɛdianle bɛ wɔ bɛ mbusua ne mɔ anu la dodo le 2,750.+
37 Bɛdianle Kohate mbusua ne mɔ anu menli kɔsɔɔti mɔɔ yɛ gyima wɔ nyianu ɛdanlɛsua ne anwo la. Mosisi nee Aalɔn dianle bɛ kɛ mɔɔ Gyihova luale Mosisi anwo zo hanle la.+
38 Bɛdianle Gɛhyɔnoma+ wɔ bɛ mbusua nee bɛ papa mɔ mbusua nu,
39 bɛdianle menli kɔsɔɔti mɔɔ ɛli ɛvolɛ 30 kɔdwu ɛvolɛ 50 mɔɔ boka ekpunli mɔɔ bayɛ gyima wɔ nyianu ɛdanlɛsua ne anu la anwo la.
40 Menli mɔɔ bɛdianle bɛ wɔ bɛ mbusua nee bɛ papa mɔ mbusua nu la dodo le 2,630.+
41 Bɛdianle Gɛhyɔn mbusua ne mɔ anu menli kɔsɔɔti mɔɔ yɛ gyima wɔ nyianu ɛdanlɛsua ne anwo la. Mosisi nee Aalɔn dianle bɛ kɛ mɔɔ Gyihova hanle la.+
42 Bɛdianle Mɛlɛlaema wɔ bɛ mbusua nee bɛ papa mɔ mbusua nu,
43 bɛdianle menli kɔsɔɔti mɔɔ ɛli ɛvolɛ 30 kɔdwu ɛvolɛ 50 mɔɔ boka ekpunli mɔɔ bayɛ gyima wɔ nyianu ɛdanlɛsua ne anu la anwo la.+
44 Menli mɔɔ bɛdianle bɛ wɔ bɛ mbusua ne mɔ anu la dodo le 3,200.+
45 Ɛhye mɔ a le Mɛlɛlae mbusua ne anu menli mɔɔ Mosisi nee Aalɔn dianle bɛ kɛ mɔɔ Gyihova luale Mosisi anwo zo hanle la a.+
46 Mosisi nee Aalɔn yɛɛ Yizilayɛ mgbanyima ne mɔ dianle Livaema ɛhye mɔ wɔ bɛ mbusua nee bɛ papa mɔ mbusua nu;
47 ɛnee bɛli ɛvolɛ 30 kɔdwu ɛvolɛ 50, na bɛmaanle bɛyɛle nyianu ɛdanlɛsua ne anwo gyima na bɛzoale nwolɛ ninyɛne.+
48 Menli mɔɔ bɛdianle bɛ la amuala dodo le 8,580.+
49 Bɛdianle bɛ kɛ mɔɔ Gyihova luale Mosisi anwo zo hanle la, bɛhilele ko biala gyima nee ninyɛne mɔɔ ɔbazoa la; bɛdianle bɛ kɛ mɔɔ Gyihova hanle hilele Mosisi la pɛpɛɛpɛ.
Ɔbodwɛkɛ
^ Nyevile nu nane bie.
^ Anzɛɛ “fefadeɛ.” Ɔle kɛ akpaso, bɛfa bɛsɔ kɛnlaneɛ nu nyɛma nu.
^ Anzɛɛ “ɛnlome nzonle,” ɛhye kile, nzonle mɔɔ nane mɔɔ bɛva bɛbɔ afɔle la ɛnlome ne ɛfonla ye la.
^ Hibulu aneɛ nu, “adesoa.”
^ Anzɛɛ “mgbɛnudanlɛ.”
^ Anzɛɛ “mgbɛnudanlɛ.”
