Nɔmbɛse 36:1-13
-
Mraalɛ mɔɔ di agya la agyalɛ nwo mɛla (1-13)
36 Manasɛ ara Meekɛ+ ara Geleade mbusua mgbanyima ne mɔ mɔɔ bɛvi Dwosefi abozoamra mbusua ne mɔ anu la rale Mosisi nee Yizilayɛ mgbanyima ne mɔ anwo ɛkɛ.
2 Bɛhanle kɛ: “Gyihova hanle hilele yɛ menle kɛ ɛgua azɛlɛ ne anwo ma*+ na ɛhyɛ ɛmaa Yizilayɛma kɛ bɛ agyapadeɛ; na Gyihova hanle kɛ yɛ menle ɛva yɛ diema Zilɔfɛhade agyapadeɛ ne ɛmaa ɔ mra mraalɛ ne mɔ.+
3 Saa bɛkɔ agyalɛ wɔ Yizilayɛ abusua gyɛne nu a, bɛbaye mraalɛ ne mɔ agyapadeɛ ne bɛavi yɛ papa mɔ agyapadeɛ ne anu bɛava bɛaboka abusua mɔɔ bɛbahɔ agyalɛ wɔ nu la ɛdeɛ ne anwo, yemɔti bɛbaye bɛavi agyapadeɛ ne mɔɔ bɛguale nwolɛ ma* bɛyele bɛmaanle yɛ la anu.
4 Saa Yizilayɛma Fanwodi Ɛvolɛ+ ne dwu a, bɛbava mraalɛ ne mɔ agyapadeɛ ne bɛaboka mbusua mɔɔ bɛbahɔ agyalɛ wɔ nu la agyapadeɛ ne anwo, yemɔti bɛbaye bɛ agyapadeɛ ne bɛavi yɛ papa mɔ abusua ne agyapadeɛ ɛdeɛ ne anu.”
5 Akee Gyihova maanle Mosisi zele Yizilayɛma kɛ: “Edwɛkɛ mɔɔ Dwosefi abozoamra ne ɛlɛka la le ye adenle zo.
6 Edwɛkɛ mɔɔ Gyihova ɛha wɔ Zilɔfɛhade amra mraalɛ ne mɔ anwo la ɛne: ‘Bɛbahola bɛagya awie biala mɔɔ bɛkulo la. Noko ɔwɔ kɛ bɛgya awie mɔɔ vi bɛ papa abusua ne anu la.
7 Ɔnle kɛ Yizilayɛma agyapadeɛ biala fi abusua ko anu kɔ abusua gyɛne nu, ɔwɔ kɛ Yizilayɛma sɔ bɛ nenyia mɔ mbusua agyapadeɛ ne anu kpundii.
8 Ɔwɔ kɛ ralɛ raalɛ biala mɔɔ lɛ agyapadeɛ wɔ Yizilayɛ abusua biala anu la maa nrenyia mɔɔ wɔ ye papa abusua nu la gya ye,+ amaa Yizilayɛma azɔ bɛ nenyia mɔ agyapadeɛ ne anu kpundii.
9 Ɔnle kɛ agyapadeɛ biala fi abusua ko anu kɔ abusua gyɛne nu, ɔluakɛ ɔwɔ kɛ Yizilayɛ mbusua ne mɔ sɔ bɛ agyapadeɛ ne anu kpundii.’”
10 Zilɔfɛhade amra mraalɛ ne mɔ yɛle mɔɔ Gyihova hanle hilele Mosisi la.+
11 Yemɔti Zilɔfɛhade amra mraalɛ ne mɔ,+ Maala, Tɛza, Hɔgela, Melekaa yɛɛ Nowa gyigyale bɛ papa amediema mrenyia ne mɔ amra mrenyia.
12 Bɛgyigyale mrenyia wɔ Dwosefi ara Manasɛ abusua nu amaa bɛ agyapadeɛ ne aha bɛ papa abusua ne anu.
13 Ɛhye a le mɛla nee ngyehyɛleɛ mɔɔ Gyihova luale Mosisi anwo zo vale maanle Yizilayɛma wɔ Mowabe ɛsɛlɛ ne mɔɔ wɔ Dwɔdan ne afoa nu na ɔbikye Gyɛleko la azo a.+
