Nɔmbɛse 35:1-34
35 Wɔ Mowabe ɛsɛlɛ ne mɔɔ wɔ Dwɔdan+ ne afoa nu na ɔbikye Gyɛleko la azo, Gyihova doale zo zele Mosisi kɛ:
2 “Ka kile Yizilayɛma kɛ bɛye bɛ agyapadeɛ ne mɔɔ bɛbanyia la anu azuamgbole ne bie bɛmaa Livaema ɛdɛnla zo,+ na bɛva azuamgbole ne mɔ anwo adidileka ne mɔ bɛmaa Livaema.+
3 Bɛbadɛnla azuamgbole ne mɔ azo, na bɛ nyɛmoa nee bɛ nane gyɛne mɔɔ ɛha la amuala badidi wɔ adidileka ne na bɛava nane ne mɔ anwo ninyɛne bɛagua ɛkɛ.
4 Azuamgbole ne mɔ anwo adidileka ne mɔɔ bɛbava bɛamaa Livaema la nee bane ne avinli bayɛ kubit* 1,000 abɛnga suakpole ne anwo ayia.
5 Ɔwɔ kɛ bɛsuzu kubit 2,000 wɔ suakpole ne aduduleɛ, kubit 2,000 wɔ ye nyiakɛ, kubit 2,000 wɔ ye adɔleɛ, yɛɛ kubit 2,000 wɔ ye sɔlɔ, na suakpole ne gyinla avinli. Ɛhye mɔ a bayɛ bɛ azuamgbole ne mɔ anwo adidileka a.
6 “Azuamgbole mɔɔ bɛbava bɛamaa Livaema la bayɛ ɛvealeka azuamgbole 6+ mɔɔ awie mɔɔ kɛhu sonla la banriandi ahɔ ɛkɛ a,+ yɛɛ akee azuamgbole gyɛne 42.
7 Bɛbava azuamgbole 48 nee bɛ adidileka ne mɔ bɛamaa Livaema.+
8 Ɛbalie azuamgbole mɔɔ ɛbava wɔamaa bɛ la wɔavi Yizilayɛma ɛkɛ.+ Ekpunli mɔɔ anwo zonle la, ɛbalie dɔɔnwo, yɛɛ ekpunli mɔɔ anwo anzo la, ɛbalie ekyi.+ Ekpunli biala banlea ye agyapadeɛ mɔɔ ɔnyianle la anwo ava ye azuamgbole ne bie amaa Livaema.”
9 Gyihova doale zo zele Mosisi kɛ:
10 “Ka kile Yizilayɛma kɛ, ‘Bɛlɛpɛ Dwɔdan ne bɛahɔ Keena azɛlɛ zo.+
11 Bɛye azuamgbole mɔɔ zolɛ ɛhɔlɛ ɛnyɛ se la bɛva bɛyɛ ɛvealeka azuamgbole mɔɔ awie anye ɛnla nwo na ɔku sonla* a ɔnriandi ɔkɔ ɛkɛ a.+
12 Azuamgbole ɛhye mɔ bayɛ ɛvealeka amaa bɛ avi ahenle mɔɔ di mogya nwo nzenralɛ la anwo,+ amaa awie mɔɔ kɛhu sonla la anwu kɔkpula kɛ bɛbali ye edwɛkɛ wɔ menli ne anyunlu.+
13 Ɛvealeka azuamgbole nsia ne mɔɔ bɛbaye la bali bodane ɛhye anwo gyima.
14 Bɛbaye azuamgbole nsa wɔ Dwɔdan ne aduduleɛ+ na bɛaye azuamgbole nsa wɔ Keena azɛlɛ zo bɛava bɛayɛ ɛvealeka azuamgbole.+
15 Azuamgbole nsia ɛhye mɔ bayɛ ɛvealeka amaa Yizilayɛma, ɛyɛvolɛ+ nee awie mɔɔ de bɛ avinli la, amaa awie biala mɔɔ ɔ nye ɛnla nwo na ɔkɛhu sonla* la anriandi ahɔ ɛkɛ.+
16 “‘Noko saa ɔvale bulalɛ a ɔbɔle ye yɛɛ ɔwule a, ɔle kodiawu. Ɔwɔ kɛ bɛku kodiawu ne.+
17 Saa ɔvale bolɛ mɔɔ bahola ahu ye la ɔbɔle ye yɛɛ ɔwule a, ɔle kodiawu. Ɔwɔ kɛ bɛku kodiawu ne.
18 Saa ɔvale debie mɔɔ bɛvale baka bɛyɛle mɔɔ bahola ahu ye la ɔbɔle ye yɛɛ ɔwule a, ɔle kodiawu. Ɔwɔ kɛ bɛku kodiawu ne.
19 “‘Ahenle mɔɔ di mogya nwo nzenralɛ la a bahu kodiawu ne a. Saa ɔ nee ye yia a, ɔbahu ye.
20 Saa ɔvale ɛkpɔlɛ a ɔzuhunle ye anzɛɛ adwenle ɛtane ti* a ɔvuandinle debie ɔbɔle ye ɔhunle ye,+
21 anzɛɛ ɛkpɔlɛ ti a ɔvale ɔ sa ɔbɔle ye yɛɛ ɔwule a, ɔwɔ kɛ bɛku ahenle mɔɔ bɔle ye hunle ye la. Ɔle kodiawu. Saa ahenle mɔɔ di mogya nwo nzenralɛ ne la nee ye yia a, ɔwɔ kɛ ɔku ye.
22 “‘Noko saa tɛ ɔ nye fuu yɛɛ tɛ ɛkpɔlɛ ti a ɔzuhunle ye anzɛɛ tɛ adwenle ɛtane ti* a ɔvuandinle debie ɔbɔle ye,+
23 anzɛɛ yeannwu ye yɛɛ ɔvuandinle bolɛ mɔɔ ɔhɔbɔle ye yɛɛ ɔnle ye kpɔvolɛ anzɛɛ ɔmkpondɛ kɛ ɔboda ye yɛɛ ahenle wule a,
24 ɔwɔ kɛ menli ne dua mɛla ɛhye mɔ azo di ahenle mɔɔ hunle ye nee ahenle mɔɔ di mogya nwo nzenralɛ la edwɛkɛ.+
25 Ɔwɔ kɛ menli ne die ahenle mɔɔ hunle sonla ne la fi ahenle mɔɔ di mogya nwo nzenralɛ ne la asa anu na bɛmaa ɔsia ɔkɔ ye ɛvealeka suakpole ne mɔɔ ɔnriandile ɔhɔle zolɛ la azo, na ɔwɔ kɛ ɔtɛnla ɛkɛ ne kɔkpula kɛ ɛsɔfo kpanyinli ne mɔɔ bɛva nwole nwuanzanwuanza ne bɛkpokpa ye+ la kɛwu.
26 “‘Noko saa ahenle mɔɔ hunle sonla ne la tɛla ɛvealeka suakpole ne mɔɔ ɔnriandile ɔhɔle zolɛ la ɛweɛne ne
27 na ahenle mɔɔ di mogya nwo nzenralɛ la nwu ye wɔ ɛvealeka suakpole ne ɛweɛne ne anzi na ɔku ye a, ɔnli mogya nwo fɔlɛ.
28 Ɔluakɛ ɔwɔ kɛ ɔtɛnla ɛvealeka suakpole ne azo kɔkpula kɛ ɛsɔfo kpanyinli ne kɛwu. Noko saa ɛsɔfo kpanyinli ne wu a, ahenle mɔɔ hunle sonla ne la bazia ahɔ ye azɛlɛ zo.+
29 Ninyɛne ɛhye mɔ bayɛ mɛla mɔɔ bɛbava bɛali edwɛkɛ wɔ bɛ awolɛndoazo kɔsɔɔti anu wɔ ɛleka biala mɔɔ bɛbadɛnla la.
30 “‘Awie biala mɔɔ kɛhu sonla* la, ɔwɔ kɛ bɛgyinla alasevolɛ edwɛkɛ*+ zo bɛku ye kɛ yeyɛ kodiawu;+ noko ɔnle kɛ bɛgyinla dasevolɛ kokye edwɛkɛ zo bɛku awie.*
31 Bɛmmatua ɛkpɔnedeɛ biala bɛdie kodiawu mɔɔ fɛta ewule la ngoane,* ɔluakɛ ɔwɔ kɛ bɛku ye.+
32 Bɛmmamaa awie mɔɔ ɛnriandi ɛhɔ ye ɛvealeka suakpole ne azo la tua ɛkpɔnedeɛ biala na ɔsia ɔkɔ ye azɛlɛ zo kolaa na ɛsɔfo kpanyinli ne awu.
33 “‘Ɔnle kɛ bɛgua azɛlɛ ne mɔɔ bɛde zo la anwo evinli, ɔluakɛ mogya maa azɛlɛ ne anwo gua evinli,+ yɛɛ bɛnrɛhola bɛnrɛli mogya mɔɔ bɛwola bɛgua azɛlɛ ne azo la ati mgbɔdalɛ kyesɛ ahenle mɔɔ hanle mogya ne guale la mogya ne ala.+
34 Bɛmmagua azɛlɛ ne mɔɔ me nee bɛ de zolɛ la anwo evinli; ɔluakɛ medame Gyihova, mede Yizilayɛma avinli.’”+
Ɔbodwɛkɛ
^ Anzɛɛ “na ɔbɔ ɛkɛla ɔku ye.”
^ Anzɛɛ “ɔkɛbɔ ɛkɛla ɔkɛhu ye.”
^ Hibulu aneɛ nu, “ɔbule ɔziale.”
^ Hibulu aneɛ nu, “yeambu yeanzia.”
^ Anzɛɛ “ɛkɛla.”
^ Hibulu aneɛ nu, “alasevolɛ anloa.”
^ Anzɛɛ “ɛkɛla.”
^ Anzɛɛ “ɛkɛla.”
