Nɔmbɛse 32:1-42
-
Bɛdɛnlanle Dwɔdan ne aduduleɛ (1-42)
32 Akee Wulubɛn abozoamra+ nee Gaade abozoamra+ nyianle nyɛmoa dɔɔnwo kpalɛ, na bɛnwunle kɛ Gyeezɛ+ nee Geleade azɛlɛ ne le kpalɛ maa nyɛmoa.
2 Yemɔti Gaade abozoamra nee Wulubɛn abozoamra hɔle Mosisi, ɛsɔfo Ɛlieza nee mgbanyima ne mɔ ɛkɛ na bɛhanle kɛ:
3 “Yɛnwu kɛ Atalɔto, Daebɔn, Gyeezɛ, Nemela, Hɛhyebɔn,+ Ɛleyela, Sebem, Nibo+ yɛɛ Biyɔn,+
4 azɛlɛ ne mɔɔ Gyihova lile zolɛ konim wɔ Yizilayɛma anyunlu+ la le azɛlɛ kpalɛ maa nyɛmoa, yɛɛ wɔ azonvolɛ lɛ nyɛmoa dɔɔnwo.”+
5 Bɛhanle bɛdoale zo kɛ: “Saa yɛnyia ɛ nyunlu ɛlolɛ a, maa bɛva azɛlɛ ne bɛmaa wɔ sonvolɛma kɛ agyapadeɛ. Mmamaa yɛkɔpɛ Dwɔdan ne.”
6 Akee Mosisi zele Gaade abozoamra nee Wulubɛn abozoamra ne kɛ: “Bɛ mediema ne mɔ ɛhɔ konle na bɛmɛ bɛdɛnla ɛke ɔ?
7 Duzu ati a bɛmaa Yizilayɛma asa anu ado kɛ bɛnrɛhɔ azɛlɛ ne mɔɔ Gyihova bava amaa bɛ la azo ɛ?
8 Zɔhane a bɛ papa mɔ yɛle wɔ mekɛ mɔɔ menzoanle bɛ wɔ Keedɛhye-baanea kɛ bɛhɔnlea azɛlɛ ne la.+
9 Mekɛ mɔɔ bɛhɔdwule Ɛhyekɔlo Bɔnza ne anu*+ na bɛnwunle azɛlɛ ne la, bɛmaanle Yizilayɛma arɛle bɔle kɛ bɛkɛhɔ azɛlɛ ne mɔɔ Gyihova hanle kɛ ɔbava yeamaa bɛ la azo.+
10 Kenle zɔhane Gyihova vale bɛ nwo ɛya, yemɔti ɔhanle ndane kɛ:+
11 ‘Menli mɔɔ vi Yigyibiti rale mɔɔ bɛli ɛvolɛ 20 mɔɔ kɔ la ɛnrɛnwu azɛlɛ ne+ mɔɔ menganle nwolɛ ndane mengilele Ebileham, Ayezeke nee Gyekɔbo la,+ ɔluakɛ bɛanva bɛ ahonle muala bɛanli me nzi—
12 kyesɛ Kinaezenli Gyɛfɛna ara Keelɛbe+ nee Nɛn ara Dwɔhyua+ ala, ɔluakɛ bɛvale bɛ ahonle muala bɛlile Gyihova anzi.’+
13 Ɔti Gyihova vale Yizilayɛma anwo ɛya na ɔmaanle bɛluoluale fienemgbole ne anu too ɛvolɛ 40,+ hɔkpulale kɛ awolɛndoazo ne mɔɔ yɛle ɛtane wɔ Gyihova anye zo la abo dule la.+
14 Kɛkala bɛlɛyɛ deɛ ko ne ala mɔɔ bɛ papa mɔ yɛle la kɛ ɛtanevolɛma ekpunli mɔɔ bɛmaa Gyihova ɛya wuluwulu ne ara Yizilayɛma anwo zo kpole a.
15 Saa bɛtwe bɛ nwo bɛfi ɔ nwo a, ɔbagyakyi bɛ wɔ fienemgbole ne anu bieko, na bɛbamaa ɛzɛkyelɛ ara menli ɛhye mɔ amuala anwo zo.”
16 Nzinlii, bɛrale ye ɛkɛ na bɛhanle kɛ: “Maa yɛva awolɛ yɛzi tunli yɛmaa yɛ nyɛmoa wɔ ɛke na yɛkyekye azuamgbole yɛmaa yɛ mra ne mɔ.
17 Noko yɛbaziezie yɛ nwo yɛamaa konle+ na yɛalimoa Yizilayɛma anyunlu kɔkpula kɛ yɛkɛva bɛ yɛkɛhɔ ɛleka mɔɔ bɛkɔ la, na yɛ mra ne mɔ badɛnla azuamgbole mɔɔ bɛlie nwolɛ bane la anu na bɛ nwo adɔ bɛ avi menli mɔɔ wɔ azɛlɛ ne azo la anwo.
18 Yɛnrɛzia yɛnrɛhɔ yɛ azua ne mɔ anu kɔkpula kɛ Yizilayɛnli biala asa kɛha ye azɛlɛ kɛ ye agyapadeɛ la.+
19 Ɔluakɛ yɛnrɛnyia bɛ agyapadeɛ ne bie wɔ Dwɔdan ne anzi lɔ, ɔboalekɛ yɛnyia yɛ agyapadeɛ ɛdeɛ wɔ Dwɔdan ne aduduleɛ ɛke.”+
20 Mosisi buale bɛ kɛ: “Saa bɛbava akodeɛ mɔɔ bɛfa bɛahɔ konle la wɔ Gyihova anyunlu,+
21 yɛɛ saa bɛ nuhua ko biala fa akodeɛ pɛ Dwɔdan ne wɔ Gyihova anyunlu na ɔfoa ye agbɔvolɛ wɔ ɔ nyunlu+
22 kɔkpula kɛ bɛkɛli azɛlɛ ne azo konim wɔ Gyihova anyunlu+ a, akee bɛbahola bɛazia bɛara+ na bɛnrɛli ɛzonle wɔ Gyihova nee Yizilayɛma anyunlu. Akee azɛlɛ ɛhye bayɛ bɛ agyapadeɛ wɔ Gyihova anyunlu.+
23 Noko saa bɛanyɛ ɛhye a, ɛnee bɛyɛ ɛtane bɛtia Gyihova. Ɔba ye zɔ a, bɛnwu ye kɛ bɛbali bɛ ɛtane ne anwo ɛzonle.
24 Ɔti bɛbahola bɛakyekye azuamgbole bɛamaa bɛ mra na bɛayɛ tunli bɛamaa bɛ nyɛmoa,+ noko ɔwɔ kɛ bɛyɛ mɔɔ bɛbɔ nwolɛ ɛwɔkɛ la.”
25 Gaade abozoamra nee Wulubɛn abozoamra ne zele Mosisi kɛ: “Wɔ sonvolɛma bayɛ mɔɔ yɛ menle ɛha la.
26 Yɛ mra, yɛ ye mɔ, yɛ mboane nee yɛ nlankɛ baha Geleade azuamgbole ne mɔ azo,+
27 noko wɔ sonvolɛma mɔɔ ɛziezie bɛ nwo ɛmaa konle wɔ Gyihova anyunlu+ la bahɔho kɛ mɔɔ yɛ menle ɛha la.”
28 Yemɔti Mosisi vale bɛ nwo mɛla maanle ɛsɔfo Ɛlieza, Nɛn ara Dwɔhyua yɛɛ Yizilayɛ mbusua mgbanyima ne mɔ.
29 Mosisi zele bɛ kɛ: “Saa Gaade abozoamra nee Wulubɛn abozoamra ne mɔ, awie biala mɔɔ ɛziezie ɔ nwo ɛmaa konle wɔ Gyihova anyunlu la nee bɛ pɛ Dwɔdan ne na bɛdi konim wɔ azɛlɛ ne azo a, ɛnee bɛva Geleade azɛlɛ ne bɛmaa bɛ kɛ bɛ agyapadeɛ.+
30 Noko saa bɛanva akodeɛ bɛ nee bɛ angɔngo a, ɛnee bɛbadɛnla bɛ avinli wɔ Keena azɛlɛ zo.”
31 Na Gaade abozoamra nee Wulubɛn abozoamra ne buale kɛ: “Mɔɔ Gyihova ɛha ɛhile wɔ sonvolɛma la a yɛbayɛ a.
32 Yɛbava akodeɛ yɛahɔho wɔ Keena azɛlɛ zo wɔ Gyihova anyunlu,+ noko yɛbanyia yɛ agyapadeɛ ne wɔ Dwɔdan ne aduduleɛ ɛke.”
33 Ɔti Mosisi vale azuamgbole mɔɔ wɔ Amɔlema Belemgbunli Saehɔn belemgbunlililɛ ne+ anu nee nwolɛ azɛlɛ mɔɔ zuozua ye, yɛɛ azuamgbole mɔɔ wɔ Beehyan Belemgbunli Ɔɔgo belemgbunlililɛ ne+ anu nee nwolɛ azɛlɛ kɔsɔɔti mɔɔ zuozua ye la maanle Gaade abozoamra nee Wulubɛn abozoamra+ ne, yɛɛ Dwosefi ara Manasɛ abusua ne foa ko ne.+
34 Gaade abozoamra kyekyele* Daebɔn,+ Atalɔto,+ Alowɛ,+
35 Atelɔto-hyofan, Gyeezɛ,+ Dwɔgebɛhaa,+
36 Bɛte-nemela+ yɛɛ Bɛte-hɛlan,+ azuamgbole mɔɔ bɛlie nwolɛ bane la na bɛvale awolɛ bɛzile tunli bɛmaanle bɛ mboane ne mɔ.
37 Na Wulubɛn abozoamra kyekyele Hɛhyebɔn,+ Ɛleyela,+ Keleateeyem,+
38 Nibo+ nee Beeyale-miyɔn+—bɛhakyile bɛ aluma—yɛɛ Sebemaa; na bɛdonle azua mɔɔ bɛziale bɛkyekyele la aluma fofolɛ.
39 Manasɛ ara Meekɛ abozoamra+ hɔhonle vale Geleade na bɛvoanle Amɔlema mɔɔ wɔ ɛkɛ la.
40 Yemɔti Mosisi vale Geleade maanle Manasɛ ara Meekɛ, na ɔdɛnlanle ɛkɛ.+
41 Na Manasɛ ara Gyeeyɛ hɔhonle vale bɛ namunamu ne mɔ, na ɔvɛlɛle bɛ Havɔto-gyeeyɛ.*+
42 Na Noba hɔhonle vale Kinate nee azua mɔɔ zuozua ye la, na ɔvale ye duma Noba ɔvɛlɛle ɛkɛ.
Ɔbodwɛkɛ
^ Anzɛɛ “Azudenle ne anloa.”
^ Anzɛɛ “ziale kyekyele.”
^ Ɔ bo kile “Gyeeyɛ Ɛdanlɛsua Namunamu.”
