Nɔmbɛse 31:1-54
31 Akee Gyihova zele Mosisi kɛ:
2 “Kɔdua Medeanema kakɛ wɔ mɔɔ bɛvale bɛyɛle Yizilayɛma la anwo.+ Ɛhye anzi bɛbazie wɔ kɛ wɔ menli ne la.”*+
3 Ɔti Mosisi hanle hilele menli ne kɛ: “Bɛye menli wɔ bɛ avinli bɛmaa bɛziezie bɛ nwo* na bɛ nee Medeanema ɛhɔho na bɛva Gyihova nzenralɛlilɛ ne bɛrɛla Medeanema anwo zo.
4 Ɔwɔ kɛ bɛye menli 1,000 bɛfi Yizilayɛ abusua ko biala anu bɛmaa bɛkɔ konle ne.”
5 Yemɔti Yizilayɛma apenle apenle ne anu,+ bɛyele menli 1,000 bɛvile abusua biala anu, bɛnyianle menli 12,000 mɔɔ bɛziezie bɛ nwo bɛmaa konle* la.
6 Akee Mosisi maanle abusua biala anu menli 1,000 ne hɔle konle ne, bɛ nee ɛsɔfo Ɛlieza ara Fenɛhaze+ mɔɔ ɛnee lɛ ninyɛne nwuanzanwuanza ne nee konle aweɛne ndendenle ne mɔ+ wɔ ɔ sa nu la a hɔle a.
7 Bɛ nee Medeanema hɔhonle kɛ mɔɔ Gyihova hanle hilele Mosisi la, na bɛhunle nrenyia biala.
8 Bɛhunle Medean arelemgbunli nnu ɛhye mɔ, Yivae, Rilikɛm, Zɛɛle, Hɛɛ yɛɛ Riliba bɛbokale menli mɔɔ bɛhunle bɛ la anwo. Eza bɛvale konle dadeɛ bɛhunle Biyɔ ara Beelam.+
9 Noko Yizilayɛma vale Medean mraalɛ nee ngakula hɔle akɛlɛzonlenlɛ nu. Eza bɛvale bɛ nyɛmoa, bɛ nane gyɛne mɔɔ ɛha la yɛɛ bɛ nwo ninyɛne kɔsɔɔti bɛhɔle.
10 Na bɛvale senle bɛyelale bɛ azuamgbole nee bɛ azokoɛleɛ* kɔsɔɔti mɔɔ bɛdede nu la.
11 Na bɛhyele menli nee nane na bɛvale debie biala mɔɔ bɛnyianle ye wɔ konle ne anu la.
12 Akee bɛvale menli mɔɔ bɛhyele bɛ nee ninyɛne mɔɔ bɛnyianle ye wɔ konle ne anu la bɛrɛlɛle Mosisi nee ɛsɔfo Ɛlieza yɛɛ Yizilayɛma kɔsɔɔti wɔ Mowabe ɛsɛlɛ+ ne mɔɔ wɔ Dwɔdan ne afoa nu na ɔbikye Gyɛleko la anu.
13 Akee Mosisi nee ɛsɔfo Ɛlieza yɛɛ mgbanyima ne mɔ amuala hɔyiale bɛ wɔ azokoɛleɛ ne anzi lɔ.
14 Noko Mosisi vale menli mɔɔ bɛkpa bɛ kɛ bɛnlea konlema ne anwo zo la, menli apenle apenle nee menli ɛya ɛya nwo zo mgbanyima ne mɔ mɔɔ hɔle konle ne na bɛlɛba la anwo ɛya.
15 Mosisi bizale bɛ kɛ: “Bɛgyakyi mraalɛ ne mɔ amuala ɔ?
16 Bɛnlea! Bɛmɛ a bɛluale Beelam edwɛkɛ ne azo bɛbɛlɛbɛlale Yizilayɛma mɔɔ bɛammaa bɛanli nɔhalɛ+ bɛammaa Gyihova wɔ Piyɔ edwɛkɛ ne anwo+ na ɔlua zo ewule radɔle Gyihova menli ne avinli la.+
17 Akee bɛhu kakula nrenyia biala na bɛhu raalɛ biala mɔɔ nrenyia nee ye ɛla ɛlɛ la.
18 Noko bɛbahola bɛagyakyi ngakula mbɛlɛra mɔɔ nrenyia nee bɛ ɛtɛdale ɛlɛ la.+
19 Na bɛdɛnla azokoɛleɛ ne anzi lɔ too kenle nsuu. Ɔwɔ kɛ bɛ nuhua ko biala mɔɔ ɛhu sonla* yɛɛ bɛ nuhua ko biala mɔɔ ɛva ɔ sa ɛha awie mɔɔ bɛhu ye+ la te ɔ nwo+ wɔ kenle nsa ne nee kenle nsuu ne azo, bɛdabɛ nee menli mɔɔ bɛhyele bɛ la.
20 Na bɛde tɛladeɛ biala, debie biala mɔɔ bɛva nwoma, abɔnkye enrinli anzɛɛ baka bɛyɛ la anwo.”
21 Akee ɛsɔfo Ɛlieza zele ɛlɔne mɔɔ hɔle konle ne la kɛ: “Mɛla mɔɔ Gyihova hyehyɛle maanle Mosisi la ɛne,
22 ‘Nvutuke, dwɛtɛ fufule, kɔbele, bulalɛ, kyɛnze yɛɛ sumi,
23 debie biala mɔɔ ka senle a ɔnyela la, bɛva bɛwula senle nu na nwolɛ bade. Noko ɔwɔ kɛ eza bɛfa nzule ne mɔɔ bɛfa bɛte debie nwo la bɛte nwolɛ.+ Debie biala mɔɔ ka senle a ɔyela la, bɛva bɛwula nzule nu.
24 Na ɔwɔ kɛ bɛkpo bɛ adɛladeɛ ne mɔ wɔ kenle nsuu ne azo na bɛ nwo te na akee bɛara azokoɛleɛ ɛkɛ.’”+
25 Akee Gyihova zele Mosisi kɛ:
26 “Ɛdawɔ nee ɛsɔfo Ɛlieza nee mbusua mgbanyinli ne mɔ ɛdia ninyɛne mɔɔ bɛvale bɛrale yɛɛ menli nee nane mɔɔ bɛhyele bɛ la amuala.
27 Bɛhyɛ ninyɛne mɔɔ bɛnyianle la anu nwiɔ bɛmaa ɛlɔne ne mɔɔ hɔle konle ne nee menli mɔɔ ɛha la amuala.+
28 Ɔwɔ kɛ ɛdie adwule wɔ sogyama ne mɔɔ hɔle konle ne la ɛkɛ ɛmaa Gyihova; menli, nlankɛ, asoaso nee mboane 500 biala ɛbalie ɛkɛla* ko wɔavi nu.
29 Ɔwɔ kɛ ɛdie ɛfi bɛ kyɛfoa ne anu ɛfa ɛmaa ɛsɔfo Ɛlieza kɛ Gyihova ndoboa.+
30 Ɔwɔ kɛ ɛye menli, nlankɛ, asoaso, mboane yɛɛ nyɛmoa 50 biala anu ko ɛfi Yizilayɛma kyɛfoa ɛdeɛ ne mɔɔ bɛvale bɛmaanle bɛ la anu ɛmaa Livaema+ mɔɔ yɛ Gyihova ɛdanlɛsua ne anu gyima la.”+
31 Yemɔti Mosisi nee ɛsɔfo Ɛlieza yɛle mɔɔ Gyihova hanle hilele Mosisi la pɛpɛɛpɛ.
32 Ninyɛne mɔɔ menli mɔɔ hɔle konle ne nyianle la mɔɔ hale la dodo le mboane 675,000,
33 nlankɛ 72,000,
34 yɛɛ asoaso 61,000.
35 Mraalɛ mɔɔ nrenyia nee bɛ ɛtɛdale ɛlɛ+ la dodo le 32,000.
36 Menli mɔɔ hɔle konle ne la kyɛfoa ɛdeɛ ne dodo le mboane 337,500.
37 Mboane mɔɔ bɛvale bɛduale adwule bɛmaanle Gyihova la dodo le 675.
38 Bɛnyianle nlankɛ 36,000, na bɛvale 72 bɛduale adwule bɛmaanle Gyihova.
39 Bɛnyianle asoaso 30,500, na bɛvale 61 bɛduale adwule bɛmaanle Gyihova.
40 Bɛnyianle menli* 16,000, na bɛvale nuhua 32 bɛduale adwule bɛmaanle Gyihova.
41 Akee Mosisi vale adwule ne mɔɔ bɛduale kɛ Gyihova ndoboa la maanle ɛsɔfo Ɛlieza,+ kɛ mɔɔ Gyihova hanle hilele Mosisi la.
42 Mekɛ mɔɔ Mosisi yele menli mɔɔ hɔle konle ne kyɛfoa ɛdeɛ maanle bɛ la, Yizilayɛma ɛdeɛ mɔɔ bɛnyianle la ɛne:
43 mboane ne dodo le 337,500,
44 nlankɛ 36,000,
45 asoaso 30,500,
46 yɛɛ menli* 16,000.
47 Akee Mosisi yele menli nee nane 50 biala anu ko vile Yizilayɛma kyɛfoa ɛdeɛ ne anu maanle Livaema+ mɔɔ yɛ Gyihova ɛdanlɛsua ne anu gyima la,+ kɛ mɔɔ Gyihova hanle hilele Mosisi la.
48 Akee menli mɔɔ bɛkpa bɛ mɔɔ bɛnea ɛlɔne apenle apenle ne anwo zo,+ menli apenle apenle nee menli ɛya ɛya nwo zo mgbanyima ne mɔ, rale Mosisi ɛkɛ
49 na bɛzele Mosisi kɛ: “Wɔ azonvolɛ ɛdia konlema mɔɔ yɛnea bɛ nwo zo la, na bɛ nuhua ko bɔbɔ ɛtɛminlinle.+
50 Yemɔti bɛmaa yɛ nuhua ko biala ɛva mɔɔ yenyia la ɛrɛla kɛ Gyihova afɔlebɔdeɛ, nvutuke ninyɛne, bɛ gyakɛ kyeenyi, bɛ sa akɔme nu ngɛba, tumi kpɔdelera, asomadeɛ, yɛɛ agudeɛ gyɛne, amaa yɛava yɛali yɛ ti* mgbɔdalɛ wɔ Gyihova anyunlu.”
51 Ɔti Mosisi nee ɛsɔfo Ɛlieza liele nvutuke ne, agudeɛ ne amuala vile bɛ ɛkɛ.
52 Nvutuke kɔsɔɔti mɔɔ mgbanyima mɔɔ nea menli apenle apenle nee menli ɛya ɛya nwo zo la vale yele ndoboa maanle Gyihova la dodo le hyikɛle* 16,750.
53 Ɛlɔne ne anu ko biala nyianle ninyɛne mɔɔ bɛvale la bie.
54 Mosisi nee ɛsɔfo Ɛlieza liele nvutuke ne mɔɔ mgbanyima mɔɔ nea menli apenle apenle nee menli ɛya ɛya nwo zo vale rale la na bɛvale bɛhɔle nyianu ɛdanlɛsua ne anu bɛvale bɛyɛle ngakyelɛ bɛmaanle Yizilayɛma wɔ Gyihova anyunlu.
Ɔbodwɛkɛ
^ Ɛhye kile kɛ ɔbawu.
^ Anzɛɛ “bɛmaa ɛlɔne ne.”
^ Anzɛɛ “bɛmaa ɛlɔne ne.”
^ Anzɛɛ “azokoɛleɛ mɔɔ bɛlie nwolɛ bane la.”
^ Anzɛɛ “ɛkɛla.”
^ Nea Edwɛkɛbohilelɛ.
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “yɛ ɛkɛla ne mɔ ati.”
