Nɔmbɛse 30:1-16
30 Akee Mosisi hanle hilele Yizilayɛ mbusua mgbanyima ne mɔ+ kɛ: “Edwɛkɛ mɔɔ Gyihova ɛha la ɛne:
2 Saa nrenyia bɔ Gyihova ɛwɔkɛ+ anzɛɛ ka ndane+ kɛ ɔtua ɔ nwo debie* a, ɔnle kɛ ɔtu ye edwɛkɛ ne ɔto.+ Ɔwɔ kɛ ɔyɛ debie biala mɔɔ ɔbɔle ɛwɔkɛ kɛ ɔbayɛ la.+
3 “Na saa raalɛ bɔ Gyihova ɛwɔkɛ anzɛɛ ka ndane kɛ ɔtua ɔ nwo debie wɔ mekɛ mɔɔ ɔle kakula na ɔde ye papa sua nu la
4 na ye papa te ye ɛwɔkɛ ne anzɛɛ ndane mɔɔ yeha kɛ ɔtua ɔ nwo* debie la na ye papa anga nwolɛ ɛhwee a, ye ɛwɔkɛ ne amuala kyekye ye, yɛɛ ndane biala mɔɔ yeha kɛ ɔtua ɔ nwo debie la kyekye ye.
5 Noko saa ye papa te kɛ yebɔ ɛwɔkɛ anzɛɛ yeha ndane kɛ ɔtua ɔ nwo debie na ɔtua ye kɛ ɔmmayɛ a, ɔnkyekye ye. Gyihova bava ahyɛ ye ɔluakɛ ye papa duale ye.+
6 “Noko saa ɔkɔ agyalɛ wɔ mekɛ mɔɔ ɛwɔkɛ ne anzɛɛ ndane ne mɔɔ yeandwenle nwo na ɔhanle la tɛbɔ ɔ nwo zo la
7 na ɔ hu te na yeanga nwolɛ edwɛkɛ wɔ kenle mɔɔ ɔbade la a, ye ɛwɔkɛ ne anzɛɛ ndane ne mɔɔ yeha kɛ ɔtua ɔ nwo debie la kyekye ye.
8 Noko saa kenle mɔɔ ɔ hu kɛde la, ɔtua ye a, nrenyia ne bahola apɛ ɛwɔkɛ ne anzɛɛ ndane ne mɔɔ raalɛ ne andwenle nwo na ɔhanle la anu,+ na Gyihova bava ahyɛ ye.
9 “Noko saa kunlavolɛ anzɛɛ raalɛ mɔɔ bɛbɔ ye ewole la bɔ ɛwɔkɛ a, debie biala mɔɔ yeva yedo ɔ nwo zo la kyekye ye.
10 “Noko saa raalɛ ne bɔle ɛwɔkɛ ne anzɛɛ hanle ndane ne kɛ ɔtua ɔ nwo debie wɔ mekɛ mɔɔ ɔwɔ ɔ hu sua nu la
11 na ɔ hu dele noko yeanga nwolɛ edwɛkɛ anzɛɛ yeandua ye a, ye ɛwɔkɛ ne amuala anzɛɛ ndane mɔɔ yeha kɛ ɔtua ɔ nwo debie la kyekye ye.
12 Noko saa kenle mɔɔ ɔ hu dele la, ɔpɛle ɛwɔkɛ anzɛɛ ndane biala mɔɔ ɔhanle la anu bɔkɔɔ a, bɛnkyekye ye.+ Ɔ hu pɛle nu na Gyihova bava ahyɛ ye.
13 Ɛwɔkɛ biala mɔɔ ɔkɛbɔ anzɛɛ ndane biala mɔɔ ɔkɛha kɛ ɔtua ɔ nwo debie* la, ɔwɔ kɛ ɔ hu die to nu anzɛɛ ɔpɛ nuhua.
14 Noko saa ɔ hu anga nwolɛ edwɛkɛ na mekɛ gua nu a, ɛnee yelie ye ɛwɔkɛ ne mɔ amuala anzɛɛ ndane mɔɔ yeha la amuala yedo nu. Yelie yedo nu ɔluakɛ yeanga nwolɛ edwɛkɛ wɔ kenle mɔɔ ɔdele kɛ ɔlɛka la.
15 Noko saa ɔdele la mekɛ guale nu na yeapɛ nu a, ɔbali raalɛ ne ɛtane ne anwo ɛzonle.+
16 “Mɛla mɔɔ Gyihova vale maanle Mosisi mɔɔ fale nrenyia nee ɔ ye, yɛɛ papa nee ɔ ra kakula raalɛ mɔɔ de ye sua nu la anwo la ɛne.”
Ɔbodwɛkɛ
^ Anzɛɛ “ɔfa gyima yeado ye ɛkɛla nwo zo.”
^ Anzɛɛ “ye ɛkɛla ne.”
^ Anzɛɛ “ndane mɔɔ ɔkɛha kɛ ɔkile ye ɛkɛla ne nyane.”
