Nɔmbɛse 28:1-31

  • Afɔlebɔlɛ ngakyile nwo ngyehyɛleɛ (1-31)

    • Dahuu afɔlebɔlɛ (1-8)

    • Ɛnwomenlelielɛ kenle ne ɛdeɛ (9, 10)

    • Siane biala afɔlebɔlɛ (11-15)

    • Akpabɛnwo ɛdeɛ ne (16-25)

    • Dapɛne Dapɛne Ɛvoyia ɛdeɛ ne (26-31)

28  Akee Gyihova zele Mosisi kɛ: 2  “Ka kile Yizilayɛma kɛ, ‘Bɛnlea kɛ bɛbava me afɔlebɔdeɛ, me aleɛ ne bɛarɛlɛ me. Ɔwɔ kɛ bɛbɔ me afɔle ne mɔ kɛ afɔlebɔlɛ evuanlɛ mɔɔ me nye die nwolɛ* mɔɔ bɛva senle bɛbɔ la wɔ bɛ mekɛ nloa.’+ 3  “Na ka kile bɛ kɛ, ‘Ɛyelalɛ afɔlebɔdeɛ mɔɔ bɛbava bɛarɛlɛ Gyihova la ɛne: bɛbava mboane mralɛ nyinli nwiɔ mɔɔ bɛli ɛvolɛ ko na bɛte kpɔkɛ la bɛabɔ ɛyelalɛ afɔle dahuu.+ 4  Bɛbava boane nyinli ko bɛabɔ afɔle nwonlomɔ na bɛava ko ne noko bɛabɔ afɔle nɔsolɛ,*+ 5  bɛbava esamo motoo yifa ngyɛnu bulu anu ko* mɔɔ bɛva nwole kpalɛ hin ngyɛnu nna anu ko* bɛfɔtɔ la bɛabɔ ma afɔle bɛaboka nwolɛ.+ 6  Ɔle dahuu ɛyelalɛ afɔlebɔlɛ+ mɔɔ bɛhyehyɛle ye wɔ Saenae Boka ne anwo kɛ afɔlebɔlɛ evuanlɛ mɔɔ Gyihova anye die nwolɛ,* afɔle mɔɔ bɛva senle bɛbɔ la, 7  na bɛva nwolɛ nza afɔlebɔdeɛ hin ngyɛnu nna anu ko bɛboka boane nyinli ko biala anwo.+ Bɛwola nza ne bɛgua ɛleka nwuanzanwuanza ne kɛ nza afɔlebɔlɛ bɛmaa Gyihova. 8  Bɛbava boane nyinli ko ne noko bɛabɔ afɔle nɔsolɛ.* Bɛbava ma afɔlebɔdeɛ nee nwolɛ nza afɔlebɔdeɛ bɛaboka nwo kɛ nwonlomɔ ɛdeɛ ne ala la, bɛbava bɛabɔ afɔle kɛ afɔlebɔlɛ evuanlɛ mɔɔ Gyihova anye die nwolɛ,* afɔle mɔɔ bɛva senle bɛbɔ la.+ 9  “‘Noko Ɛnwomenlelielɛ kenle ne,+ bɛbava mboane mralɛ nyinli nwiɔ mɔɔ bɛli ɛvolɛ ko na bɛte kpɔkɛ la bɛabɔ afɔle na bɛava esamo motoo yifa ngyɛnu bulu anu nwiɔ mɔɔ bɛva nwole bɛfɔtɔ la bɛabɔ ma afɔle, nee nwolɛ nza afɔle. 10  Ɛhye a le Ɛnwomenlelielɛ kenle ne ɛyelalɛ afɔlebɔlɛ nee dahuu ɛyelalɛ afɔlebɔlɛ ne nee nwolɛ nza afɔlebɔlɛ ne a.+ 11  “‘Siane biala mɔlebɛbo,* bɛbava nlankɛ mralɛ nyinli nwiɔ, boane nyinli ko yɛɛ mboane mralɛ nyinli nsuu mɔɔ biala ɛli ɛvolɛ ko na bɛte kpɔkɛ la bɛabɔ ɛyelalɛ afɔle bɛamaa Gyihova,+ 12  na bɛava esamo motoo ngyɛnu bulu anu nsa mɔɔ bɛva nwole bɛfɔtɔ la bɛabɔ ma afɔle+ bɛaboka ɛnlankɛ nyinli ko biala anwo, na bɛava esamo motoo ngyɛnu bulu anu nwiɔ mɔɔ bɛva nwole bɛfɔtɔ la bɛaboka boane nyinli ne anwo,+ 13  na bɛava esamo motoo ngyɛnu bulu anu ko mɔɔ bɛva nwole bɛfɔtɔ la bɛaboka boaneralɛ nyinli ko biala anwo kɛ ɛyelalɛ afɔlebɔlɛ,+ afɔlebɔlɛ evuanlɛ mɔɔ Gyihova anye die nwolɛ* mɔɔ bɛva senle bɛbɔ la. 14  Ɔwɔ kɛ bɛfa nwanye hin foa ko bɛboka ɛnlankɛ nyinli ko+ biala anwo na bɛfa hin ngyɛnu nsa anu ko bɛboka boane nyinli+ ne anwo na bɛfa hin ngyɛnu nna anu ko bɛboka boaneralɛ nyinli ne anwo bɛbɔ nza afɔle.+ Ɛhye a le siane biala ɛyelalɛ afɔlebɔlɛ wɔ ɛvolɛ ne anu amuala a. 15  Eza bɛbava abɔnkye ralɛ ko bɛabɔ ɛtane afɔle bɛamaa Gyihova bɛaboka dahuu ɛyelalɛ afɔlebɔlɛ nee nwolɛ nza afɔlebɔdeɛ ne anwo. 16  “‘Siane ne mɔɔ limoa la kenle 14 ne bayɛ Gyihova Akpabɛnwo.+ 17  Siane ɛhye kenle mɔɔ tɔ zo 15 la bayɛ ɛvoyialilɛ. Bɛbali paano mɔɔ mgbɔvonle ɛnle nu la too kenle nsuu.+ 18  Kenle mɔɔ limoa la, bɛbayɛ nyianu nwuanzanwuanza. Ɔnle kɛ bɛyɛ gyima ɛsesebɛ biala. 19  Bɛbava nlankɛ mralɛ nyinli nwiɔ, boane nyinli ko, mboane mralɛ nyinli nsuu mɔɔ biala ɛli ɛvolɛ ko la bɛabɔ ɛyelalɛ afɔle bɛamaa Gyihova. Bɛva nane mɔɔ te kpɔkɛ la.+ 20  Bɛva nwolɛ ma afɔlebɔdeɛ, esamo motoo mɔɔ bɛva nwole bɛfɔtɔ la bɛboka nwo,+ bɛva ngyɛnu bulu anu nsa bɛboka ɛnlankɛ nyinli ko biala anwo na bɛva ngyɛnu bulu anu nwiɔ bɛboka boane nyinli ne anwo. 21  Bɛbava ngyɛnu bulu anu ko bɛaboka mboane mralɛ nyinli nsuu ne anu ko biala anwo, 22  na bɛava abɔnkye ko bɛabɔ ɛtane afɔle bɛali bɛ ti mgbɔdalɛ. 23  Bɛbabɔ afɔle ɛhye mɔ bɛaboka nwonlomɔ ɛyelalɛ afɔlebɔlɛ ne mɔɔ bɛbɔ ye dahuu la anwo. 24  Bɛbabɔ afɔle ɛhye mɔ kɛ mɔɔ bɛbɔ ye alehyenlɛ biala la too kenle nsuu kɛ aleɛ,* afɔlebɔlɛ evuanlɛ mɔɔ Gyihova anye die nwolɛ* mɔɔ bɛva senle bɛbɔ la. Ɔwɔ kɛ bɛfa bɛboka dahuu ɛyelalɛ afɔle ne nee nwolɛ nza afɔle ne anwo bɛbɔ. 25  Kenle nsuu ne azo, bɛbayɛ nyianu nwuanzanwuanza.+ Ɔnle kɛ bɛyɛ gyima ɛsesebɛ biala.+ 26  “‘Kenle mɔɔ bɛkɛde bɛ ma mɔɔ limoa la,+ saa bɛlɛfa ma fofolɛ bɛarɛlɛ Gyihova a,+ ɔwɔ kɛ bɛyɛ nyianu nwuanzanwuanza wɔ bɛ dapɛne dapɛne ɛvoyialilɛ ne anu.+ Ɔnle kɛ bɛyɛ gyima ɛsesebɛ biala.+ 27  Bɛbava nlankɛ mralɛ nyinli nwiɔ, boane nyinli ko yɛɛ mboane mralɛ nyinli nsuu mɔɔ biala ɛli ɛvolɛ ko la bɛabɔ ɛyelalɛ afɔle kɛ afɔlebɔlɛ evuanlɛ mɔɔ Gyihova anye die nwolɛ* la,+ 28  na bɛava nwolɛ ma afɔlebɔdeɛ, esamo motoo mɔɔ bɛva nwole bɛfɔtɔ la bɛaboka nwo, bɛva ngyɛnu bulu anu nsa bɛboka ɛnlankɛ nyinli ko biala anwo na bɛva ngyɛnu bulu anu nwiɔ bɛboka boane nyinli ne anwo, 29  bɛbava ngyɛnu bulu anu ko bɛaboka mboane mralɛ nyinli nsuu ne anu ko biala anwo, 30  na bɛava abɔnkye ralɛ ko bɛabɔ afɔle bɛali bɛ ti mgbɔdalɛ.+ 31  Bɛbava bɛabɔ afɔle bɛaboka dahuu ɛyelalɛ afɔlebɔlɛ ne nee nwolɛ ma afɔlebɔlɛ ne yɛɛ bɛ nza afɔlebɔlɛ ne mɔ anwo. Bɛva nane mɔɔ te kpɔkɛ la.+

Ɔbodwɛkɛ

^ Hibulu aneɛ nu, “me kunlu dwo nwolɛ.”
^ Hibulu aneɛ nu, “nɔsolɛ nwiɔ ne avinli.”
^ Yifa ngyɛnu bulu anu ko le L 2.2. Nea Mok. B14.
^ Hin ko le L 3.67. Nea Mok. B14.
^ Hibulu aneɛ nu, “akunlu dwo nwolɛ.”
^ Hibulu aneɛ nu, “akunlu dwo nwolɛ.”
^ Hibulu aneɛ nu, “nɔsolɛ nwiɔ ne avinli.”
^ Hibulu aneɛ nu, “Bɛ siane ne mɔ mɔlebɛbo.”
^ Hibulu aneɛ nu, “akunlu dwo nwolɛ.”
^ Hibulu aneɛ nu, “paano.”
^ Hibulu aneɛ nu, “akunlu dwo nwolɛ.”
^ Hibulu aneɛ nu, “akunlu dwo nwolɛ.”
NGƐLƐLERA NWUANZANWUANZA—EWIADE FOFOLƐ NGILEBƐBO
Nɔmbɛse 28
Nzema
Kenga Baebolo Ne Wɔ Yintanɛte Ne Azo
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt m. 40