Nɔmbɛse 27:1-23
27 Akee Manasɛ ara Meekɛ, ara Geleade, ara Hifɛ, ara Zilɔfɛhade mɔɔ vi Dwosefi ara Manasɛ abusua ne anu la amra mraalɛ ne mɔ rale. Zilɔfɛhade amra mraalɛ ne mɔ+ aluma a le Maala, Nowa, Hɔgela, Melekaa yɛɛ Tɛza.
2 Bɛragyinlanle Mosisi, ɛsɔfo Ɛlieza, mgbanyima ne mɔ+ yɛɛ menli ne kɔsɔɔti anyunlu wɔ nyianu ɛdanlɛsua ne anuhɔlɛ na bɛhanle kɛ:
3 “Yɛ papa wule wɔ fienemgbole ne anu, noko ɛnee ɔmboka Kɔla asa zo ne mɔ+ mɔɔ hanle bɛ nwo bɔle nu dwazole tiale Gyihova la anwo, ɔdaye ye ɛtane ti a ɔwule a yɛɛ yeanwo mralɛ mrenyia.
4 Kɛmɔ yɛ papa anwo mralɛ mrenyia la ati, duzu ati a ɔwɔ kɛ ye duma minli fi ye abusua ne anu ɛ? Bɛmaa yɛ agyapadeɛ wɔ yɛ papa amediema ne mɔ avinli.”
5 Yemɔti Mosisi vale bɛ edwɛkɛ ne dole Gyihova anyunlu.+
6 Na Gyihova zele Mosisi kɛ:
7 “Zilɔfɛhade amra mraalɛ ne mɔ edwɛkɛ ne le ye adenle zo. Ɔwɔ kɛ ɛmaa bɛ agyapadeɛ wɔ bɛ papa amediema ne mɔ avinli na ɛmaa bɛ papa agyapadeɛ ne badi bɛ sa nu.+
8 Na ka kile Yizilayɛma kɛ, ‘Saa nrenyia anwo ralɛ nrenyia na ɔwu a, ɔwɔ kɛ bɛfa ye agyapadeɛ ne bɛmaa ɔ ra raalɛ.
9 Saa ɔnlɛ ɔ ra raalɛ a, bɛva ye agyapadeɛ ne bɛmaa ɔ mediema mrenyia ne mɔ.
10 Na saa ɔnlɛ ɔ mediema mrenyia a, bɛva ye agyapadeɛ ne bɛmaa ye papa amediema mrenyia ne mɔ.
11 Saa ye papa ɛnlɛ ɔ mediema mrenyia a, bɛva ye agyapadeɛ ne bɛmaa ye busuanli mɔɔ bikye ye kpalɛ wɔ abusua ne anu la na ɔva ɔyɛ ye ɛdeɛ. Mɛla ɛhye bayɛ ngyehyɛleɛ mɔɔ wɔ ɛkɛ maa Yizilayɛma, kɛ mɔɔ Gyihova hanle hilele Mosisi la.’”
12 Akee Gyihova zele Mosisi kɛ: “Kɔ Abalem boka ne+ azo na nea azɛlɛ ne mɔɔ mebava meamaa Yizilayɛma la.+
13 Saa ɛnwu ye a, bɛbazie ɛdawɔ noko kɛ wɔ menli ne la,*+ kɛ mɔɔ bɛziele ɛ diema Aalɔn la,+
14 ɔluakɛ, mekɛ mɔɔ menli ne nee me lile butule wɔ Zen fienemgbole ne anu la, wɔanli edwɛkɛ mɔɔ menganle mengilele wɔ kɛ ɛlua nzule ne azo ɛyɛ me nwuanzanwuanza wɔ menli ne anyunlu la azo.+ Ɛhye a le Mɛleba nzule ne+ mɔɔ wɔ Keedɛhye+ wɔ Zen fienemgbole ne anu la.”+
15 Akee Mosisi zele Gyihova kɛ:
16 “Maa Gyihova, Nyamenle mɔɔ maa menli kɔsɔɔti ngoane la* ɛkpa awie ɛmaa ɔnlea menli ne anwo zo,
17 awie mɔɔ bali bɛ nyunlu ɔ nee bɛ ahɔ na ɔ nee bɛ ara, amaa Gyihova menli ne anyɛ kɛ mboane mɔɔ ɛnlɛ neavolɛ la.”
18 Ɔti Gyihova zele Mosisi kɛ: “Ye Nɛn ara Dwɔhyua, ɔle sonla mɔɔ sunsum wɔ ye nu, na fa ɛ sa gua ɔ nwo zo.+
19 Akee maa ɔgyinla ɛsɔfo Ɛlieza nee menli ne kɔsɔɔti anyunlu, na kpa ye wɔ menli ne anye zo.+
20 Fa wɔ tumi* ne bie maa ye,+ amaa Yizilayɛma kɔsɔɔti adie ye.+
21 Ɔbagyinla ɛsɔfo Ɛlieza anyunlu, na Ɛlieza bava Yulem+ ne abiza adehilelɛ amaa ye wɔ Gyihova anyunlu. Saa ɔka kɛ bɛhɔ a bɛbahɔ, yɛɛ ɔka kɛ bɛrɛla a bɛbara, ɔdaye nee Yizilayɛma mɔɔ boka ɔ nwo la nee menli ne amuala.”
22 Yemɔti Mosisi yɛle mɔɔ Gyihova hanle hilele ye la. Ɔvale Dwɔhyua ɔragyinlanle ɛsɔfo Ɛlieza nee menli ne kɔsɔɔti anyunlu,
23 na ɔvale ɔ sa ɔguale ɔ nwo zo ɔkpale ye,+ kɛ mɔɔ Gyihova luale Mosisi anwo zo hanle la.+
Ɔbodwɛkɛ
^ Edwɛkɛ ɛhye kile kɛ ɔbawu.
^ Hibulu aneɛ nu, “maa nwonane kɔsɔɔti sunsum la.”
^ Anzɛɛ “anyunlunyia.”
