Nɔmbɛse 25:1-18
25 Mɔɔ Yizilayɛma wɔ Hyetim+ la, menli ne bɔle ɔ bo kɛ bɛ nee Mowabe mraalɛ bɔ adwɔmane ɛbɛla.+
2 Mraalɛ ne mɔ dole ɛsalɛ vɛlɛle menli ne hɔle bɛ nyamenle ne mɔ afɔlebɔlɛ ne mɔ abo,+ na menli ne lile na bɛbɔle bɛ ti aze bɛmaanle bɛ nyamenle ne mɔ.+
3 Yemɔti Yizilayɛma hɔbokale Beeyale mɔɔ wɔ Piyɔ+ la ɛzonlenlɛ nwo,* na Gyihova vale Yizilayɛma anwo ɛya.
4 Gyihova zele Mosisi kɛ: “Boɔboa bɛdabɛ mɔɔ bɛli menli ɛhye mɔ ati la* kɔsɔɔti anloa na kendɛhenda bɛ wɔ Gyihova anyunlu ewiazo henlema,* amaa Gyihova ɛya wuluwulu ne avi Yizilayɛma anwo zo.”
5 Akee Mosisi zele Yizilayɛ ndɛnebuavolɛma kɛ:+ “Bɛ nuhua ko biala ɛhu ye menli mɔɔ hɔbokale Beeyale mɔɔ wɔ Piyɔ la ɛzonlenlɛ nwo la.”*+
6 Mekɛ ne anu ala, Yizilayɛnli bie vale Medean raalɛ+ rale ɔ mediema ne mɔ avinli wɔ Mosisi nee Yizilayɛma kɔsɔɔti anye zo wɔ mekɛ mɔɔ ɛnee bɛlɛsu wɔ nyianu ɛdanlɛsua ne anuhɔlɛ la.
7 Mɔɔ ɛsɔfo Aalɔn ara Ɛlieza ara Fenɛhaze+ nwunle ye la, ndɛndɛ ne ala ɔvi menli ne anu ɔdwazole na ɔhɔvale atwɛ.
8 Akee ɔlile Yizilayɛnli ne anzi ɔhɔle ɛdanlɛsua ne anu na ɔvale atwɛ ne ɔwɔle Yizilayɛnli ne nee raalɛ ne amu nwiɔ, na atwɛ ne vindele raalɛ ne mraalɛnu. Ɛhye maanle ewule ne mɔɔ hanle Yizilayɛma la gyakyile.+
9 Menli mɔɔ ewule ne hunle bɛ la dodo le 24,000.+
10 Akee Gyihova zele Mosisi kɛ:
11 “Ɛsɔfo Aalɔn ara Ɛlieza ara Fenɛhaze+ ɛye me ɛya ne ɛvi Yizilayɛma anwo zo, ɔluakɛ ɔhwenle me ti nungule wɔ menli ne avinli.+ Yemɔti meambɔ Yizilayɛma abo zo ɔnva nwo kɛ mekulo kɛ bɛsonle me ngomekye la.+
12 Ɛhye ati, ka kile ye kɛ, ‘Me nee ye bayɛ anzodwolɛ ngyekyeleɛ.
13 Na ɔbayɛ ngyekyeleɛ yeamaa ɔdaye nee ɔ bo zo amra kɛ bɛbayɛ ɛsɔfoma dahuu,+ ɔluakɛ ɔhwenle ye Nyamenle ne ati nungule+ na ɔlile Yizilayɛma ati mgbɔdalɛ.’”
14 Bɛfɛlɛ Yizilayɛnli ne mɔɔ bɛhunle ye bɛbokale Medean raalɛ ne anwo la Zemelae, ɔle Seelu mɔɔ le Semɛyɔn abusua kpanyinli la ara.
15 Bɛfɛlɛ Medean raalɛ ne mɔɔ bɛhunle ye la Kɔzobae, ɔle Zɛɛle+ mɔɔ le Medean+ mbusua ne mɔ ko abusua kpanyinli la ara raalɛ.
16 Nzinlii Gyihova zele Mosisi kɛ:
17 “Bɛgyegye Medeanema na bɛhu bɛ,+
18 ɔluakɛ bɛvale bɛ mɛlɛbɛla nyɛleɛ ne bɛgyegyele bɛ wɔ Piyɔ+ nee Medean abusua kpanyinli ne ara raalɛ Kɔzobae edwɛkɛ ne anwo, bɛ diema raalɛ ne mɔɔ bɛhunle ye+ wɔ kenle mɔɔ Piyɔ anwo edwɛkɛ ne vale ewule ne rale la.”+
Ɔbodwɛkɛ
^ Anzɛɛ “hɔbetanle Beeyale mɔɔ wɔ Piyɔ la anwo.”
^ Hibulu aneɛ nu, “mgbanyima ne mɔ.”
^ Hibulu aneɛ nu, “wɔ sɛnzɛne ne anyunlu.”
^ Anzɛɛ “hɔbetanle Beeyale mɔɔ wɔ Piyɔ la anwo.”
