Nɔmbɛse 23:1-30
23 Akee Beelam zele Beelake kɛ: “Si afɔlemokyea nsuu wɔ ɛke na siezie nlankɛ nyinli nsuu+ yɛɛ mboane nyinli nsuu maa me.”
2 Ɛkɛ ne ala Beelake yɛle mɔɔ Beelam hanle la. Na Beelake nee Beelam vale ɛnlankɛ nyinli ko nee boane nyinli ko bɔle afɔle wɔ afɔlemokyea ko biala azo.+
3 Akee Beelam zele Beelake kɛ: “Gyinla wɔ ɛyelalɛ afɔlebɔdeɛ ne anwo wɔ ɛke na meba. Bie a Gyihova nee me badendɛ. Debie biala mɔɔ ɔbala ye ali yeahile me la, mebaha meahile wɔ.” Yemɔti ɔhɔle boka bie azo.
4 Akee Nyamenle nee Beelam dendɛle,+ na Beelam zele Ye kɛ: “Meziezie afɔlemokyea nsuu ne na meva ɛnlankɛ nyinli ko yɛɛ boane nyinli ko mebɔ afɔle wɔ ko biala azo.”
5 Gyihova vale ye edwɛkɛ ne duale Beelam anloa kɛ:+ “Sia kɔ Beelake anwo lɔ na kɔha edwɛkɛ ɛhye kile ye.”
6 Yemɔti ɔziale na ɔranwunle kɛ Beelake nee Mowabe mgbanyima ne mɔ amuala gyi ye ɛyelalɛ afɔlebɔdeɛ ne anwo.
7 Akee ɔhanle nrɛlaleɛ ɛhye:+
“Mowabe Belemgbunli Beelake ɛrava me wɔ Elam,+Wɔ aduduleɛ awoka ne mɔ azo kɛ:
‘Bɛla na bawa Gyekɔbo amonle maa me.
Ɛhɛe, bɛla na babua Yizilayɛ fɔlɛ.’+
8 Kɛ ɔkɛyɛ na meawa menli mɔɔ Nyamenle ɛtɛwale bɛ amonle la amonle ɛ?
Yɛɛ kɛ ɔkɛyɛ na meabua menli mɔɔ Gyihova ɛtɛbuale bɛ fɔlɛ la fɔlɛ ɛ?+
9 Megyi bodane ne mɔ azo a menwu bɛ,Yɛɛ megyi awoka ne mɔ azo a menwu bɛ.
Bɛle menli mɔɔ bɛ ngome bɛde a;+Bɛmbu bɛ nwo kɛ bɛboka maanle maanle ne mɔ anwo.+
10 Nwane a bahola adia Gyekɔbo munlutu ne+Anzɛɛ yeadia Yizilayɛ ngyɛnu nna anu ko bɔbɔ a?
Maa menwu* tenlenema ewule,Na maa me awieleɛ ɛyɛ kɛ bɛ ɛdeɛ ne la.”
11 Na Beelake zele Beelam kɛ: “Duzu a wɔva wɔyɛ me la? Menvale wɔ membale kɛ ɛrawa me kpɔvolɛma amonle, noko wɔyila bɛ kosoɛɛ.”+
12 Ɔbuale kɛ: “Ɔnle kɛ meka mɔɔ Gyihova ɛva ɛdua me nloa la ɔ?”+
13 Beelake zele ye kɛ: “Mesɛlɛ wɔ, maa yɛhɔ ɛleka fofolɛ mɔɔ ɛgyi a ɛbanwu bɛ la. Ɛbanwu bɛ nuhua ekyi bie ala; ɛnrɛnwu bɛ muala. Wa bɛ amonle wɔ ɛkɛ ne maa me.”+
14 Ɔti ɔvale ye ɔhɔle Zofem azɛlɛ ne mɔɔ wɔ Pesega+ ati zo la azo, na ɔzile afɔlemokyea nsuu, na ɔvale ɛnlankɛ nyinli ko yɛɛ boane nyinli ko ɔbɔle afɔle wɔ afɔlemokyea ko biala azo.+
15 Yemɔti Beelam zele Beelake kɛ: “Gyinla wɔ ɛyelalɛ afɔlebɔdeɛ ne anwo wɔ ɛke na me nee Ye kadendɛ wɔ nehane.”
16 Na Gyihova nee Beelam dendɛle na ɔvale edwɛkɛ ɛhye ɔduale ɔ nloa:+ “Sia kɔ Beelake anwo lɔ na kɔha edwɛkɛ ɛhye kile ye.”
17 Yemɔti ɔziale ɔrale Beelake anwo ɛkɛ na ɔnwunle kɛ ɔ nee Mowabe mgbanyima ne mɔ gyi ye ɛyelalɛ afɔlebɔdeɛ ne anwo ɛlɛkendɛ. Beelake bizale ye kɛ: “Duzu edwɛkɛ a Gyihova ɛha a?”
18 Akee ɔhanle nrɛlaleɛ ɛhye:+
“Beelake, dwazo na tie.
O Zepɔ ara nrenyia, tie me.
19 Nyamenle ɛnle kɛ sonla na yeabɔ adalɛ,+Yɛɛ ɔnle kɛ sonla ra mɔɔ kakyi ye adwenle* la.+
Saa ɔka kɛ ɔyɛ debie a, ɔnrɛyɛ ɔ?
Saa ɔtendɛ a, ɔnrɛli nwolɛ gyima ɔ?+
20 Nea! Bɛvɛlɛ me kɛ menyila;Kɛkala yeyila,+ na menrɛhola menrɛhakyi ye.+
21 Ɔmmaa ngonyia tumi biala ɛnga Gyekɔbo,Yɛɛ ɔmmaa ngyegyelɛ biala ɛndo Yizilayɛ.
Gyihova ye Nyamenle ne nee bɛ lua,+Yɛɛ bɛye ye ayɛlɛ kpole kɛ ɔle belemgbunli wɔ bɛ avinli.
22 Nyamenle nee bɛ vi Yigyibiti ɛlɛba.+
Ɔle kɛ ɛbɔ nu ɛnlankɛ nyinli mɛne ɔmaa bɛ.+
23 Ɔluakɛ sili biala ɛngola Gyekɔbo,+Yɛɛ abisadeɛ biala ɛngola Yizilayɛ.+
Mekɛ ɛhye anu bɛbaha Gyekɔbo nee Yizilayɛ anwo edwɛkɛ kɛ:
‘Nea mɔɔ Nyamenle ɛyɛ la!’
24 Yizilayɛ maanle ne badwazo kɛ awenade,Na yeamaa ɔ nwo zo kɛ awenade la.+
Ɔnrɛla kɔkpula kɛ ɔbali nane mɔɔ yehye ye laNa yeanlo mɔɔ yehu bɛ la mogya.”
25 Akee Beelake zele Beelam kɛ: “Saa ɛnrɛhola ɛnrɛwa ye amonle a, ɛnee noko mmayila ye.”
26 Beelam buale Beelake kɛ: “Meanga meangile wɔ kɛ, ‘Mebayɛ debie biala mɔɔ Gyihova kɛha la’ ɔ?”+
27 Beelake zele Beelam kɛ: “Mesɛlɛ wɔ, maa menva wɔ mengɔ ɛleka fofolɛ. Bie a ɔbazɔ nɔhalɛ Nyamenle ne anye kɛ ɛbawa ye amonle wɔ ɛkɛ ne wɔamaa me.”+
28 Yemɔti Beelake vale Beelam hɔle Piyɔ mɔɔ anye kile Gyehyaemɔn*+ la azo.
29 Akee Beelam zele Beelake kɛ: “Si afɔlemokyea nsuu wɔ ɛke, na siezie nlankɛ nyinli nsuu yɛɛ mboane nyinli nsuu maa me.”+
30 Ɔti Beelake yɛle mɔɔ Beelam hanle la, na ɔvale ɛnlankɛ nyinli ko nee boane nyinli ko ɔbɔle afɔle wɔ afɔlemokyea ko biala azo.
Ɔbodwɛkɛ
^ Anzɛɛ “me ɛkɛla ɛwu.”
^ Anzɛɛ “mɔɔ nu ɔ nwo.”
^ Anzɛɛ ɔkola ɔkile, “ɛsɛlɛ ne; fienemgbole ne.”
