Nɔmbɛse 22:1-41
22 Akee Yizilayɛma dule bɛ bo na bɛhɔdɛnlanle Mowabe ɛsɛlɛ ne mɔɔ wɔ Dwɔdan afoa nu na ɔ nee Gyɛleko+ anye bɔ zo la azo.
2 Mɔɔ Zepɔ ara Beelake+ dele mɔɔ Yizilayɛma ɛva ɛyɛ Amɔlema la,
3 Mowabema ahonle dule kpole ɔlua menli ne ati, ɔluakɛ ɛnee bɛ nwo zonle kpalɛ; nɔhalɛ nu, Yizilayɛma anwo ɛzulolɛ dɔle Mowabema anwo zo.+
4 Ɔti Mowabema zele Medean+ mgbanyima ne mɔ kɛ: “Menli ɛhye mɔ bali debie biala mɔɔ ɛbɔ yɛ nwo mgbɔlɔka ɛyia la, kɛ mɔɔ ɛnlankɛ nyinli di ndile la.”
Mekɛ zɔhane, ɛnee Zepɔ ara Beelake a le Mowabe belemgbunli a.
5 Ɔzoanle menli kɛ bɛhɔ Biyɔ ara Beelam mɔɔ wɔ Pitɔ,+ mɔɔ zua Azule ne* wɔ ye mbusuafoɔ azɛlɛ zo la ɛkɛ. Ɔmaanle bɛhɔzele ye kɛ: “Nea! Menli bie vi Yigyibiti ɛra. Nea! Bɛva azɛlɛ ne azo* amuala,+ na bɛde ɛleka mɔɔ bikye me azɛlɛ ne la.
6 Yemɔti mesɛlɛ wɔ, bɛla bawa menli ɛhye mɔ amonle maa me,+ ɔluakɛ bɛ nwo yɛ se tɛla me. Bie a mebahola meali bɛ nwo zo konim na meavoa bɛ meavi azɛlɛ ne azo, ɔluakɛ meze kɛ awie biala mɔɔ ɛkɛyila ye la bɛyila ye, yɛɛ mɔɔ ɛkɛwa ye amonle la, munzule to ye.”
7 Ɔti Mowabe nee Medean mgbanyima ne mɔ vale abisadeɛ ne anwo ezukoa ne lɛle bɛ sa nu na bɛhɔle Beelam+ ɛkɛ bɛhɔhanle Beelake nrɛlaleɛ ne bɛhilele ye.
8 Na ɔzele bɛ kɛ: “Bɛla ɛke ɛnɛ nɔe na edwɛkɛ biala mɔɔ Gyihova baha ahile me la, mebaha meahile bɛ.” Yemɔti Mowabe mgbanyima ne mɔ dɛnlanle Beelam anwo ɛkɛ.
9 Akee Nyamenle rale Beelam ɛkɛ na ɔbizale ye kɛ:+ “Nwane mɔ a le menli ɛhye mɔ mɔɔ wɔ ɛ nwo ɛke la?”
10 Beelam zele nɔhalɛ Nyamenle ne kɛ: “Zepɔ ara Beelake, Mowabe belemgbunli ne ɛdo me nrɛlaleɛ kɛ,
11 ‘Nea! Menli mɔɔ vi Yigyibiti ɛlɛba la ɛva azɛlɛ ne azo* amuala. Yemɔti bɛla bawa bɛ amonle maa me.+ Bie a mebahola me nee bɛ aho na meavoa bɛ.’”
12 Noko Nyamenle zele Beelam kɛ: “Ɛ nee bɛ mmakɔ. Mmawa menli ne amonle, ɔluakɛ bɛyila bɛ.”+
13 Beelam dwazole nwonlomɔ ne na ɔzele Beelake mgbanyima ne mɔ kɛ: “Bɛhɔ bɛ maanle nu, ɔluakɛ Gyihova ɛmkponle zo kɛ me nee bɛ kɛhɔ.”
14 Yemɔti Mowabe mgbanyima ne mɔ ziale hɔle na bɛhɔzele Beelake kɛ: “Beelam amkponle zo kɛ ɔ nee yɛ kɛra.”
15 Noko Beelake zoanle mgbanyima fofolɛ mɔɔ bɛ nwo zonle na bɛle menli titili bɛtɛla alimoa ɛdeɛ ne la.
16 Bɛrale Beelam ɛkɛ na bɛzele ye kɛ: “Edwɛkɛ mɔɔ Zepɔ ara Beelake ɛha la ɛne, ‘Mesɛlɛ wɔ, mmamaa debie biala si wɔ adenle kɛ ɛkɛra me nwo ɛke,
17 ɔluakɛ mebali wɔ eni kpole na meayɛ debie biala mɔɔ ɛkɛha kɛ menyɛ la. Yemɔti mesɛlɛ wɔ bɛla bawa menli ɛhye mɔ amonle maa me.’”
18 Noko Beelam zele Beelake azonvolɛ ne mɔ kɛ: “Saa Beelake fa ye sua mɔɔ dwɛtɛ fufule nee nvutuke ɛyi ye tɛkɛɛ la yeamaa me bɔbɔ a, menrɛhola menrɛdu Gyihova me Nyamenle ne anloa edwɛkɛ menrɛdo na menrɛyɛ debie kpole anzɛɛ ekyi biala.+
19 Noko mesɛlɛ bɛ, bɛla ɛke ɛnɛ nɔe noko, amaa meanwu mɔɔ Gyihova baha ahile me la.”+
20 Akee Nyamenle rale Beelam ɛkɛ ne nɔe ne na ɔzele ye kɛ: “Saa menli ɛhye mɔ ɛra kɛ bɛbavɛlɛ wɔ a, ɛ nee bɛ ɛhɔ. Noko edwɛkɛ mɔɔ mebaha meahile wɔ la ala a ka a.”+
21 Ɔti Beelam dwazole nwonlomɔ ne na ɔzieziele ye asoaso* ne na ɔ nee Mowabe mgbanyima ne mɔ hɔle.+
22 Noko Nyamenle vale ɛya kɛ ɔlɛkɔ la, na Gyihova anwumabɔvolɛ ragyinlanle adenle ne anu kɛ ɔsi ye adenle. Ɛnee Beelam de ye asoaso ne azo yɛɛ ye azonvolɛ nwiɔ boka ɔ nwo.
23 Mɔɔ asoaso ne nwunle kɛ Gyihova anwumabɔvolɛ gyi adenle ne anu na yehwe ye konle dadeɛ ne la, ɔbɔle mɔdenle kɛ ɔbɔ ɔ ti kpɔkɛ nu. Noko Beelam bɔle ɔ bo kɛ ɔbo asoaso ne yeamaa yeazia yeava adenle ne anu.
24 Akee Gyihova anwumabɔvolɛ ne hɔgyinlanle adenle ekyi bie mɔɔ la vanye egyinli nwiɔ avinli na bane wɔ ye foa ko nee ye foa ko la anu.
25 Mɔɔ asoaso ne nwunle Gyihova anwumabɔvolɛ ne la, ɔbetanle bane ne anwo na ɔmianle Beelam agyakɛ wɔ bane ne anwo, na Beelam bole asoaso ne bieko.
26 Akee Gyihova anwumabɔvolɛ ne pɛle nu hɔgyinlanle adenle ekyi bie mɔɔ ɛfa bɛne zo anzɛɛ fema zo a ɔnyɛ boɛ la anu.
27 Mɔɔ asoaso ne nwunle Gyihova anwumabɔvolɛ ne la, ɔlale aze, yemɔti Beelam vale ɛya kpole na ɔvale ye kpɔma ne ɔhɔle zo ɔbilale asoaso ne.
28 Akee Gyihova maanle asoaso ne dendɛle,*+ na ɔzele Beelam kɛ: “Duzu a meyɛ wɔ mɔɔ ɔti wɔbo me fane nsa ɛhye a?”+
29 Beelam buale asoaso ne kɛ: “Kɛmɔ wɔyɛ me koasea la ati ɔ. Saa melɛ dadeɛ wɔ me sa nu a, anrɛɛ mehu wɔ!”
30 Akee asoaso ne bizale Beelam kɛ: “Asoo tɛ medame a mele wɔ asoaso mɔɔ wɔdɛnla zolɛ wɔ wɔ ngoane mekɛ kɔsɔɔti anu too yeradwu ɛnɛ a? Asoo meyɛ wɔ deɛ ɛhye bie ɛlɛ?” Ɔbuale kɛ: “Kyɛkyɛ!”
31 Akee Gyihova bukele Beelam anye+ na ɔnwunle Gyihova anwumabɔvolɛ ne kɛ ɔlɛ konle dadeɛ ɔgyi adenle ne anu. Ɛkɛ ne ala ɔhotole na ɔbutule ɔ nyunlu aze.
32 Na Gyihova anwumabɔvolɛ ne zele ye kɛ: “Duzu ati a wɔbo wɔ asoaso ne fane nsa ɛhye a? Nea! Mera kɛ mebazi wɔ adenle, ɔluakɛ mɔɔ ɛlɛyɛ la nee me ɛhulolɛdeɛ ɛnyia.+
33 Asoaso ne nwunle me na ɔbɔle mɔdenle kɛ ɔtwe ɔ nwo yeavi me nwo fane nsa.+ Saa yeandwe ɔ nwo yeanvi me nwo a, anrɛɛ kɛkala mehu wɔ na megyakyi asoaso ne.”
34 Beelam zele Gyihova anwumabɔvolɛ ne kɛ: “Meyɛ ɛtane, ɔluakɛ ɛnee menze kɛ ɛdawɔ a wɔragyinla adenle ne anu kɛ ɛyia me a. Saa ɛnea na ɔnle kpalɛ a, mebazia me nzi.”
35 Noko Gyihova anwumabɔvolɛ ne zele Beelam kɛ: “Ɛ nee bɛ ɛhɔ, noko edwɛkɛ mɔɔ mebaha la ala a ka a.” Yemɔti Beelam nee Beelake mgbanyima ne mɔ doale zo hɔle.
36 Mɔɔ Beelake dele kɛ Beelam ɛra la, ɔyɛle ye ndɛndɛ ɔhɔyiale ye wɔ Mowabe suakpole ne mɔɔ wɔ Anɔn ne anloa wɔ azɛlɛ ne ɛweɛne zo la.
37 Beelake zele Beelam kɛ: “Meanzoa kɛ bɛravɛlɛ wɔ ɔ? Duzu ati a wɔamba ɛ? Ɛdwenle kɛ menrɛhola menrɛli wɔ eni kpole ɔ?”+
38 Beelam buale Beelake kɛ: “Kɛkala mera ɛ nwo ɛke. Noko asoo mebanyia adenle meaha edwɛkɛ ɔ? Edwɛkɛ mɔɔ Nyamenle ɛva ɛdua me nloa la ala a mebahola meaha a.”+
39 Yemɔti Beelam nee Beelake hɔle Keleate-huzɔto.
40 Beelake vale nlankɛ nee mboane bɔle afɔle na ɔvale bie ɔhɔmaanle Beelam nee mgbanyima mɔɔ nee ye lua la.
41 Nwonlomɔ ne, Beelake vale Beelam hɔle Beemɔto-beeyale azo; ɔgyi ɛkɛ ne a ɔnwu menli ne amuala.+
Ɔbodwɛkɛ
^ Ɔbayɛ kɛ Yufileti azule ne ɔ.
^ Hibulu aneɛ nu, “anye.”
^ Hibulu aneɛ nu, “anye.”
^ Hibulu aneɛ nu, “asoaso belɛ.”
^ Hibulu aneɛ nu, “ɔbukele asoaso belɛ ne anloa.”
