Nɔmbɛse 21:1-35
21 Mɔɔ Elade belemgbunli+ ne mɔɔ le Keenanli na ɔde Nɛgɛbe nehane la dele kɛ Yizilayɛma ɛlua Atalem adenle ne azo ɛra la, ɔvale konle ɔdoale Yizilayɛma na ɔhyele bɛ nuhua bie mɔ ɔhɔle.
2 Yemɔti Yizilayɛ bɔle Gyihova ɛwɔkɛ ɛhye: “Saa ɛfa menli ɛhye mɔ ɛwula me sa nu a, mebazɛkye bɛ azuamgbole ne mɔ bɔkɔɔ.”
3 Ɔti Gyihova diele Yizilayɛ ane na ɔvale Keenama ɔwulale bɛ sa nu, na bɛzɛkyele bɛ nee bɛ azuamgbole ne mɔ bɔkɔɔ. Yemɔti bɛdonle ɛkɛ ne Hɔɔma.*+
4 Mɔɔ bɛvile Hɔɔ Boka+ ne anwo na bɛlɛtoa bɛ adendulɛ ne azo la, bɛhɔvale Nyevile Kɔkɔlɛ ne anloa amaa bɛanlua Yidɔm azɛlɛ zo,+ na adendulɛ ne yɛle menli ne ɛvɛlɛ.
5 Na menli ne hɔle zo dendɛle tiale Nyamenle nee Mosisi+ kɛ: “Duzu ati a bɛye yɛ bɛvi Yigyibiti bɛra fienemgbole ye anu a? Aleɛ nee nzule biala ɛnle ɛke,+ yɛɛ aleɛ funli ɛhye ɛvonlo yɛ.”*+
6 Yemɔti Gyihova maanle nwɔlɛ anwo ɛzulolɛ* hɔle menli ne anu na bɛkekale bɛ, ɔti Yizilayɛma dɔɔnwo wule.+
7 Ɔti menli ne rale Mosisi anwo ɛkɛ na bɛhanle kɛ: “Yɛyɛ ɛtane, ɔluakɛ yɛdendɛ yɛtia Gyihova nee ɛdawɔ.+ Sɛlɛ Gyihova maa ɔye nwɔlɛ ne mɔ ɔvi yɛ avinli.” Na Mosisi zɛlɛle maanle menli ne.+
8 Akee Gyihova zele Mosisi kɛ: “Yɛ ɛwɔlɛ mɔɔ anwo yɛ ɛzulolɛ la fa kenda baka zo. Na ɛwɔlɛ ka awie a yeado ɔ nye yeanlea ɛwɔlɛ ne na yeadɛnla ngoane nu.”
9 Ɛkɛ ne ala Mosisi yɛle kɔbele ɛwɔlɛ+ na ɔvale ɔhendanle baka zo,+ na mekɛ biala mɔɔ ɛwɔlɛ kɛha awie na ɔkɛdo ɔ nye ɔkɛnlea kɔbele ɛwɔlɛ ne la, ɔnyia ngoane.+
10 Akee Yizilayɛma dule bɛ bo na bɛhɔdɛnlanle Obɔto.+
11 Bɛvile Obɔto na bɛhɔdɛnlanle Aye-abalem+ fienemgbole ne mɔɔ nee Mowabe anye bɔ zo la anu, wɔ aduduleɛ afoa nu.
12 Bɛvile ɛkɛ ne na bɛhɔdɛnlanle Zilɛde Bɔnza*+ ne anwo.
13 Bɛvile ɛkɛ ne na bɛhɔdɛnlanle Anɔn maanzinli+ ne mɔɔ wɔ fienemgbole ne mɔɔ tɛlɛ kɔdwu Amɔlema ɛweɛne zo la anu, ɔluakɛ Anɔn la Mowabe ɛweɛne zo, ɔla Mowabe nee Amɔlema avinli.
14 Ɛhye ati a Gyihova Konle buluku ne ka “Veehɛbe mɔɔ wɔ Sufa nee Anɔn mbɔnza* ne mɔ,
15 yɛɛ mbɔnza* ne mɔ ndololeɛ nu,* mɔɔ tɛlɛ kɔ Aale suakpole ne azo na ɔkɔdwu Mowabe ɛweɛne zo” anwo edwɛkɛ la.
16 Bɛvi ɛkɛ ne la bɛhɔle Biyɛ.* Bula ɛhye a Gyihova hanle nwolɛ edwɛkɛ hilele Mosisi kɛ: “Boɔboa menli ne anloa na maa memaa bɛ nzule” la.
17 Mekɛ zɔhane, Yizilayɛma dole edwɛne ɛhye:
“O bula, maa nzule ɛrɛla!—Bɛlie* zo ɛ!
18 Bula mɔɔ mgbanyima dule, bula mɔɔ menli titili mɔɔ wɔ menli ne anu dule,Bɛvale belemgbunli kpɔma nee bɛ kpɔma ne mɔ a bɛdule a.”
Akee bɛvile fienemgbole ne anu bɛhɔle Matena,
19 bɛvi Matena bɛhɔle Nahaleɛle, yɛɛ bɛvi Nahaleɛle bɛhɔle Beemɔto.+
20 Bɛvi Beemɔto bɛhɔle bɔnza ne mɔɔ wɔ Mowabe+ azɛlɛ zo la anu, ɔwɔ Pesega+ ati zo yɛɛ ɔ nye kile Gyehyaemɔn.*+
21 Akee Yizilayɛma zoanle menli maanle bɛhɔzele Amɔlema Belemgbunli Saehɔn kɛ:+
22 “Maa yɛlua wɔ azɛlɛ ne azo. Yɛnrɛmakyi yɛnrɛhɔ wɔ ɛya anzɛɛ wɔ vanye egyinli nu. Yɛnrɛnlo bula biala anu nzule. Yɛbalua Belemgbunli Adenle ne azo kɔkpula kɛ yɛbapɛ nu wɔ wɔ azɛlɛ ne azo.”+
23 Noko Saehɔn ammaa Yizilayɛma anlua ye azɛlɛ ne azo. Emomu, Saehɔn boɔboale ye menli ne amuala anloa na ɔhɔyiale Yizilayɛma wɔ fienemgbole ne anu, na ɔrale Gyeehaze na ɔ nee Yizilayɛma honle.+
24 Noko Yizilayɛma vale konle dadeɛ lile ɔ nwo zo konim+ na bɛvale ye azɛlɛ ne+ ɔvi Anɔn+ kɔdwu Gyabɔko+ mɔɔ bikye Amɔnoma la, ɔluakɛ Gyeezɛ+ wɔ Amɔnoma ɛweɛne zo.+
25 Ɔti Yizilayɛma vale azuamgbole ɛhye mɔ kɔsɔɔti na bɛdɛnlanle Amɔlema+ azuamgbole ne mɔ amuala azo, Hɛhyebɔn nee azua mɔɔ zuozua ye la amuala azo.
26 Ɛnee Hɛhyebɔn le Amɔlema Belemgbunli Saehɔn mɔɔ nee Mowabe belemgbunli ne honle na ɔliele ye azɛlɛ ne amuala too ɔhɔdwule Anɔn ne anloa la suakpole.
27 Ɛhye ati, bɛbu ɛrɛlɛ bɛfa bɛgolo bɛ nwo kɛ:
“Bɛla Hɛhyebɔn.
Maa bɛkyekye Saehɔn suakpole ne na ɔgyinla kpundii.
28 Ɔluakɛ senle vi Hɛhyebɔn rale, sendɔlɔra vi Saehɔn sua zo rale.
Yeyela Aale mɔɔ wɔ Mowabe, ɛhɛe, Anɔn awoka ne mɔ amenle mɔ.
29 Mowabe, gyakɔ! O bɛmɛ mɔɔ bɛwɔ Kimɔhye,+ bɛbazɛkye bɛ!
Ɔmaa ɔ mra mrenyia di tutɛnla yɛɛ Amɔlema Belemgbunli Saehɔn kye ɔ mra mraalɛ kɔ akɛlɛzonlenlɛ nu.
30 Bɛmaa yɛhɔ bɛ nwo zo;Yɛbazɛkye Hɛhyebɔn too yɛahɔdwu Daebɔn;+Bɛmaa yɛbɔ ɔ bo zo too yɛhɔdwu Nofaa;Senle bazɔ too yeahɔdwu Mɛdeba.”+
31 Yemɔti Yizilayɛma dɛnlanle Amɔlema azɛlɛ zo.
32 Akee Mosisi zoanle menli kɛ bɛhɔnleɛnlea Gyeezɛ+ azo. Bɛhonle bɛvale azua mɔɔ zuozua ye la na bɛvoanle Amɔlema mɔɔ wɔ ɛkɛ la.
33 Akee bɛhakyile bɛ nye bɛhɔvale Beehyan Adenle ne azo. Na Beehyan Belemgbunli Ɔɔgo+ nee ye menli ne amuala vindele rayiale bɛ na bɛ nee bɛ honle wɔ Ɛdelɛyae.+
34 Gyihova zele Mosisi kɛ: “Mmasulo ye,+ ɔluakɛ mebava ɔdaye nee ye menli ne amuala nee ye azɛlɛ ne meawula ɛ sa nu,+ na ɛbayɛ ye kɛ mɔɔ ɛyɛle Amɔlema Belemgbunli Saehɔn mɔɔ ɛnee ɔde Hɛhyebɔn la.”+
35 Yemɔti bɛhunle ɔdaye nee ɔ mra mrenyia ne mɔ yɛɛ ye menli ne amuala, bɛ nuhua ko bɔbɔ anga,+ na bɛvale ye azɛlɛ ne.+
Ɔbodwɛkɛ
^ Ɔ bo kile “Ɛzɛkyelɛ.”
^ Anzɛɛ “yɛ ɛkɛla.”
^ Anzɛɛ “nwɔlɛ mɔɔ anloa yɛ nyane.”
^ Anzɛɛ “Azudenle.”
^ Anzɛɛ “azudenle.”
^ Anzɛɛ “azudenle.”
^ Hibulu aneɛ nu, “anloa anu.”
^ Ɔ bo kile “Bula; Kuma.”
^ Anzɛɛ “Bɛdo bɛlie.”
^ Anzɛɛ ɔkola ɔkile, “ɛsɛlɛ ne; fienemgbole ne.”
