Nɔmbɛse 2:1-34
2 Akee Gyihova zele Mosisi nee Aalɔn kɛ:
2 “Ɔwɔ kɛ Yizilayɛma yɛ bɛ azokoɛleɛ wɔ ɛleka mɔɔ bɛhile bɛ mbusua ekpunli nsa ne la,+ ɔwɔ kɛ ko biala ɛdeɛ bikye ye papa abusua sɛkɛlɛneɛ* ne. Ɔwɔ kɛ bɛyɛ bɛ azokoɛleɛ ne bɛmaa ɔ nye kile nyianu ɛdanlɛsua ne na bɛbɛnga nwolɛ bɛyia.
3 “Bɛdabɛ mɔɔ bɛbayɛ bɛ azokoɛleɛ wɔ aduduleɛ la a le mbusua ekpunli nsa ɛlɔne ne* mɔɔ Dwuda la bɛ nloa la; Dwuda abusua kpanyinli ne a le Amenadabe ara Nahyɔn.+
4 Menli mɔɔ bɛhɛlɛle bɛ aluma wɔ ye ɛlɔne ne anu la le 74,600.+
5 Yesakaa abusua ne bayɛ bɛ azokoɛleɛ wɔ ɔ nwo ɛkɛ; Yesakaa abusua kpanyinli ne a le Zuwaa ara Nɛtanɛle.+
6 Menli mɔɔ bɛhɛlɛle bɛ aluma wɔ ye ɛlɔne ne anu la le 54,400.+
7 Zɛbulɛn abusua ne a doa zo a; Zɛbulɛn abusua kpanyinli ne a le Hilɔn ara Ɛlayabe.+
8 Menli mɔɔ bɛhɛlɛle bɛ aluma wɔ ye ɛlɔne ne anu la le 57,400.+
9 “Ɛlɔne mɔɔ bɛhɛlɛle bɛ aluma wɔ Dwuda azokoɛleɛ ne la amuala le 186,400. Bɛdabɛ a bɛbalimoa bɛadu bɛ bo a.+
10 “Mbusua ekpunli nsa ɛlɔne ne* mɔɔ Wulubɛn+ la bɛ nloa la bayɛ bɛ azokoɛleɛ wɔ nyiakɛ; Wulubɛn abusua kpanyinli ne a le Hyɛdiyɛ ara Ɛlaezɛ.+
11 Menli mɔɔ bɛhɛlɛle bɛ aluma wɔ ye ɛlɔne ne anu la le 46,500.+
12 Semɛyɔn abusua ne bayɛ bɛ azokoɛleɛ wɔ ɔ nwo ɛkɛ; Semɛyɔn abusua kpanyinli ne a le Zulehyadae ara Hyɛlɛmeɛle.+
13 Menli mɔɔ bɛhɛlɛle bɛ aluma wɔ ye ɛlɔne ne anu la le 59,300.+
14 Gaade abusua ne a doa zo a; Gaade abusua kpanyinli ne a le Riliwɛle ara Yilayasafe.+
15 Menli mɔɔ bɛhɛlɛle bɛ aluma wɔ ye ɛlɔne ne anu la le 45,650.+
16 “Ɛlɔne mɔɔ bɛhɛlɛle bɛ aluma wɔ Wulubɛn azokoɛleɛ ne la amuala le 151,450, na bɛdabɛ a bɛbadɔ zo nwiɔ a.+
17 “Saa bɛ nee nyianu ɛdanlɛsua ne ɛlɛkɔ a,+ ɔwɔ kɛ Livaema di menli mɔɔ ɛha la avinli.
“Saa bɛlɛkɔ a, ɔwɔ kɛ bɛyɛ ye kɛ mɔɔ bɛyɛle bɛ azokoɛleɛ ne mɔ la,+ ko biala bali ɔ bo zo ne, kɛ mɔɔ bɛ mbusua ekpunli nsa ne mɔ de la.
18 “Mbusua ekpunli nsa ɛlɔne ne* mɔɔ Yifelaem la bɛ nloa la bayɛ bɛ azokoɛleɛ wɔ adɔleɛ; Yifelaem abusua kpanyinli ne a le Amehɛde ara Ɛlehyama.+
19 Menli mɔɔ bɛhɛlɛle bɛ aluma wɔ ye ɛlɔne ne anu la le 40,500.+
20 Manasɛ abusua ne a doa zo a;+ Manasɛ abusua kpanyinli ne a le Pɛdaazɛ ara Gameeleɛle.+
21 Menli mɔɔ bɛhɛlɛle bɛ aluma wɔ ye ɛlɔne ne anu la le 32,200.+
22 Bɛngyaman abusua ne a doa zo a; Bɛngyaman abusua kpanyinli ne a le Gedɛyonae ara Abaedan.+
23 Menli mɔɔ bɛhɛlɛle bɛ aluma wɔ ye ɛlɔne ne anu la le 35,400.+
24 “Ɛlɔne mɔɔ bɛhɛlɛle bɛ aluma wɔ Yifelaem azokoɛleɛ ne la amuala le 108,100, na bɛdabɛ a bɛbadɔ zo nsa a.+
25 “Mbusua ekpunli nsa ɛlɔne ne* mɔɔ Dan la bɛ nloa la bayɛ bɛ azokoɛleɛ wɔ sɔlɔ; Dan abusua kpanyinli ne a le Amehyadae ara Ahayizɛ.+
26 Menli mɔɔ bɛhɛlɛle bɛ aluma wɔ ye ɛlɔne ne anu la le 62,700.+
27 Ahya abusua ne bayɛ bɛ azokoɛleɛ wɔ ɔ nwo ɛkɛ; Ahya abusua kpanyinli ne a le Ɔkelan ara Peegeɛle.+
28 Menli mɔɔ bɛhɛlɛle bɛ aluma wɔ ye ɛlɔne ne anu la le 41,500.+
29 Nafetalae abusua ne a doa zo a; Nafetalae abusua kpanyinli ne a le Yinan ara Ahaela.+
30 Menli mɔɔ bɛhɛlɛle bɛ aluma wɔ ye ɛlɔne ne anu la le 53,400.+
31 “Ɛlɔne mɔɔ bɛhɛlɛle bɛ aluma wɔ Dan azokoɛleɛ ne la amuala le 157,600. Bɛdabɛ a bɛbali amozi a,+ kɛ mɔɔ bɛ mbusua ekpunli nsa ne mɔ de la.”
32 Yizilayɛma mɔɔ bɛdianle bɛ wɔ bɛ papa mɔ mbusua nu la ɛne; menli mɔɔ bɛhɛlɛle bɛ aluma wɔ ɛlɔne ne anu la dodo le 603,550.+
33 Noko bɛandia Livaema bɛamboka+ Yizilayɛma mɔɔ ɛha la anwo+ kɛ mɔɔ Gyihova hanle hilele Mosisi la.
34 Yizilayɛma yɛle debie biala mɔɔ Gyihova hanle hilele Mosisi la. Bɛyɛle bɛ mbusua ekpunli nsa azokoɛleɛ ne mɔ+ na bɛdule bɛ bo kɛ mɔɔ bɛhyehyɛle bɛ la,+ ko biala nee ye abusua yɛɛ bɛ papa mɔ mbusua.
Ɔbodwɛkɛ
^ Hibulu aneɛ nu, “fɛlɛnra.”
^ Hibulu aneɛ nu, “ɛlɔne ekpunli ekpunli.”
^ Hibulu aneɛ nu, “kɛ mɔɔ bɛ konle ɛlɔne ne mɔ de la.”
^ Hibulu aneɛ nu, “kɛ mɔɔ bɛ konle ɛlɔne ne mɔ de la.”
^ Hibulu aneɛ nu, “kɛ mɔɔ bɛ konle ɛlɔne ne mɔ de la.”
