Nɔmbɛse 19:1-22

  • Ɛnlankɛ belɛ kɔkɔlɛ nee nzule mɔɔ bɛfa bɛte bɛ nwo (1-22)

19  Gyihova zele Mosisi nee Aalɔn bieko kɛ:  “Mɛla mɔɔ Gyihova ɛhyehyɛ la ɛne, ‘Ka kile Yizilayɛma kɛ bɛva ɛnlankɛ belɛ kɔkɔlɛ mɔɔ te kpɔkɛ mɔɔ dɛne ɛnle ɔ nwo+ na bɛtɛfale gyɛnvayile bɛtɛtole ɔ kɔme zo ɛlɛ la bɛrɛlɛ wɔ.  Bɛbava bɛamaa ɛsɔfo Ɛlieza na yeava ye yeahɔ azokoɛleɛ ne anzi lɔ na bɛahu ye wɔ Ɛlieza anyunlu ɛkɛ ne.  Akee ɛsɔfo Ɛlieza bava ɔ sa ɛrɛlɛsɛka abɔ ye mogya ne anu na yeava yeakponde nyianu ɛdanlɛsua ne anyunlu fɔɔnwo fane nsuu.+  Akee bɛbayela ɛnlankɛ ne wɔ ɔ nye zo ɛkɛ ne. Bɛbayela ye nwoma ne nee ye nane ne nee ye mogya ne yɛɛ ye ebinli ne amuala.+  Na ɛsɔfo ne bava sida baka, nyinlanyinla+ nee ɛdanlɛ kɔkɔlɛ na yeavuandi yeagua senle ne mɔɔ bɛlɛyela ɛnlankɛ ne wɔ nu la anu.  Akee ɛsɔfo ne bakpo ye adɛladeɛ ne na yeava nzule yeabia ɔ nwo,* na akee ɔbahola yeara azokoɛleɛ ɛkɛ; noko ɛsɔfo ne anwo bagua evinli kɔkpula nɔsolɛ nu.  “‘Ahenle mɔɔ yelale ɛnlankɛ ne la bakpo ye adɛladeɛ ne na yeava nzule yeabia ɔ nwo,* noko ɔ nwo bagua evinli kɔkpula nɔsolɛ nu.  “‘Awie mɔɔ anwo te la bahuohua ɛnlankɛ ne nzonle+ ne anloa na yeava yeahɔgua azokoɛleɛ ne anzi ɛleka mɔɔ le bɔkɔbɔkɔ la, na ɔwɔ kɛ Yizilayɛma amuala fa sie na bɛfa bɛkpoto nzule nu bɛte bɛ nwo.+ Ɔle ɛtane afɔlebɔdeɛ. 10  Ahenle mɔɔ bahuohua ɛnlankɛ ne nzonle ne anloa la bakpo ye adɛladeɛ ne, noko ɔ nwo bagua evinli kɔkpula nɔsolɛ nu. “‘Ɛhye le mɛla mɔɔ wɔ ɛkɛ ne dahuu maa Yizilayɛma nee ɛyɛvolɛ mɔɔ de bɛ avinli la.+ 11  Awie biala mɔɔ kɛva ɔ sa kɛha funli* la anwo bagua evinli too kenle nsuu.+ 12  Ɔwɔ kɛ sonla zɛhae fa nzule ne bie te ɔ nwo wɔ kenle mɔɔ tɔ zo nsa la azo, na kenle nsuu ne azo ɔ nwo bade. Noko saa yeande ɔ nwo wɔ kenle mɔɔ tɔ zo nsa la azo a, kenle nsuu ne azo ɔ nwo ɛnrɛde. 13  Awie biala mɔɔ kɛva ɔ sa kɛha awie mɔɔ ɛwu la funli* na yeande ɔ nwo la ɛgua Gyihova ɛdanlɛsua ne anwo evinli,+ na ɔwɔ kɛ bɛye* zɔhane sonla ne* bɛfi Yizilayɛma avinli.+ Kɛmɔ bɛanva nzule mɔɔ bɛfa bɛte bɛ nwo+ la bɛamkponde ɔ nwo la ati, evinli tɛbɔ ɔ nwo. Ye evinli ne ɛha ɔ nwo. 14  “‘Saa awie wu ɛdanlɛsua nu a, nwolɛ mɛla ɛne: Awie biala mɔɔ kɛwolo ɛdanlɛsua ne anu yɛɛ awie biala mɔɔ wɔ ɛdanlɛsua ne anu dɛba la anwo bagua evinli too kenle nsuu. 15  Debie biala mɔɔ bɛbuke zo mɔɔ ɔ ti ɛndua zo la anwo ɛnde.+ 16  Awie biala mɔɔ wɔ ɛbɔ nu mɔɔ kɛva ɔ sa kɛha awie mɔɔ ɛdɔ dadeɛ nloa anzɛɛ funli anzɛɛ sonla bowule anzɛɛ nla la anwo bagua evinli too kenle nsuu.+ 17  Ɔwɔ kɛ bɛfa ɛtane afɔlebɔdeɛ ne mɔɔ bɛyelale la nzonle ne bie bɛgua debie nu na bɛwola nzukpa bɛgua nu bɛmaa ahenle mɔɔ anwo ɛnde la. 18  Akee awie mɔɔ anwo te+ la bava nyinlanyinla+ abɔ nzule ne anu na yeakponde ye wɔ ɛdanlɛsua ne nee ninyɛne mɔɔ wɔ ɛkɛ ne la amuala yɛɛ menli* mɔɔ ɛnee wɔ ɛkɛ nee sonla ne mɔɔ vale ɔ sa hanle ahenle mɔɔ bɛhu ye anzɛɛ funli ne anzɛɛ nla ne la anwo. 19  Ahenle mɔɔ anwo te la bakponde ye wɔ mɔɔ anwo ɛnde la anwo wɔ kenle nsa ne nee kenle nsuu ne azo, na yeade ɔ nwo yeavi ɛtane ne anwo wɔ kenle nsuu ne azo;+ akee ɔwɔ kɛ ɔkpo ye adɛladeɛ ne na ɔfa nzule ɔbia, na ɔ nwo bade wɔ nɔsolɛ nu. 20  “‘Noko awie mɔɔ anwo ɛnde na yeande ɔ nwo la, ɔwɔ kɛ bɛye* zɔhane sonla* ne bɛfi Yizilayɛma avinli,+ ɔluakɛ yegua Gyihova ɛleka nwuanzanwuanza ne anwo evinli. Bɛanva nzule ne mɔɔ bɛfa bɛte bɛ nwo la bɛamkponde ɔ nwo, ɔti ɔ nwo ɛnde. 21  “‘Ɛhye bayɛ mɛla mɔɔ wɔ ɛkɛ ne dahuu la amaa bɛ: Ɔwɔ kɛ ahenle mɔɔ bakponde nzule ne mɔɔ bɛfa bɛte bɛ nwo+ la kpo ye adɛladeɛ ne mɔ, na awie mɔɔ bava ɔ sa aha nzule ne mɔɔ bɛfa bɛte bɛ nwo la anwo bagua evinli kɔkpula nɔsolɛ nu. 22  Debie biala mɔɔ awie mɔɔ anwo ɛnde kɛva ɔ sa kɛha ye la anwo bagua evinli, yɛɛ awie* mɔɔ kɛva ɔ sa kɛha deɛ ne la anwo bagua evinli kɔkpula nɔsolɛ nu.’”+

Ɔbodwɛkɛ

Hibulu aneɛ nu, “ɔ nwo nane ne.”
Hibulu aneɛ nu, “ɔ nwo nane ne.”
Anzɛɛ “ɛkɛla biala mɔɔ ɛwu.” Nea Edwɛkɛbohilelɛ.
Anzɛɛ “ɛkɛla biala funli.” Nea Edwɛkɛbohilelɛ.
Anzɛɛ “bɛku.”
Anzɛɛ “ɛkɛla ne.”
Anzɛɛ “ɛkɛla.”
Anzɛɛ “bɛku.”
Anzɛɛ “ɛkɛla.”
Anzɛɛ “ɛkɛla.”