Nɔmbɛse 18:1-32

  • Ɛsɔfoma nee Livaema gyima (1-7)

  • Ɛsɔfo ne mɔ kyɛfoa (8-19)

    • Ngyenle ngyekyeleɛ (19)

  • Livaema ngyɛnu bulu anu ko ne (20-32)

18  Akee Gyihova zele Aalɔn kɛ: “Ɛdawɔ nee ɛ mra mrenyia ne mɔ yɛɛ ɛ bo zo amra bali ɛtane biala mɔɔ tia nwuanzanwuanza ɛleka ne la anwo ɛzonle,+ yɛɛ ɛdawɔ nee ɛ mra mrenyia ne mɔ bali ɛtane biala mɔɔ tia ɛsɔfo gyima ne la anwo ɛzonle.+  Eza maa ɛ mediema Livaema, mɔɔ le wɔ papa mɔ abusua ne anu amra la, ɛbikye wɔ amaa bɛaboka ɛ nwo na bɛaboa ɛdawɔ+ nee ɛ mra mrenyia ne mɔ wɔ Daselɛlilɛ ɛdanlɛsua ne anyunlu.+  Ɔwɔ kɛ bɛyɛ bɛ gyima ne bɛboa wɔ na bɛyɛ ɛdanlɛsua ne anwo gyima ne amuala.+ Noko ɔnle kɛ bɛbikye ninyɛne mɔɔ wɔ ɛleka nwuanzanwuanza ne la nee afɔlemokyea ne anwo, amaa bɛdabɛ o, ɛdawɔ o, biala anwu.+  Bɛbaboka ɛ nwo na bɛayɛ nyianu ɛdanlɛsua ne nee nwolɛ gyima kɔsɔɔti mɔɔ bɛlɛ la, na ɔnle kɛ awie* biala mɔɔ ɛnlɛ nwolɛ adenle la bikye bɛ.+  Ɔwɔ kɛ bɛyɛ ɛleka nwuanzanwuanza ne nee afɔlemokyea ne anwo gyima ne+ mɔɔ bɛlɛ la amaa meanva Yizilayɛma anwo ɛya+ bieko.  Meye bɛ mediema Livaema mevi Yizilayɛma avinli memaa bɛ kɛ ahyɛlɛdeɛ.+ Bɛva bɛ bɛmaa Gyihova kɛ bɛyɛ nyianu ɛdanlɛsua ne anwo gyima.+  Ɛdawɔ nee ɛ mra mrenyia ne mɔ banlea ayɛ bɛ ɛsɔfo gyima ne mɔɔ fale afɔlemokyea ne anwo nee mɔɔ wɔ mgbɛnudanlɛ ne anzi la,+ na bɛdabɛ a ɔwɔ kɛ bɛyɛ gyima ɛhye a.+ Meva ɛsɔfo gyima ne memaa bɛ kɛ ahyɛlɛdeɛ, na awie* biala mɔɔ ɛnlɛ nwolɛ adenle mɔɔ kɛbikye nwolɛ la, ɔwɔ kɛ bɛku ye.”+  Gyihova zele Aalɔn bieko kɛ: “Meva ndoboa mɔɔ bɛye bɛmaa me la mewula ɛ sa nu.+ Meva ninyɛne nwuanzanwuanza kɔsɔɔti mɔɔ Yizilayɛma ɛye la bie memaa ɛdawɔ nee ɛ mra mrenyia ne mɔ kɛ ɔle bɛ kyɛfoa mɔɔ ɔbayɛ bɛ ɛdeɛ dahuu a.+  Ɛhye bayɛ bɛ ɛdeɛ wɔ ninyɛne nwuanzanwuanza kpalɛ mɔɔ bɛva bɛbɔ ɛyelalɛ afɔle la anu: bɛ afɔlebɔdeɛ biala, mɔɔ bɛ ma afɔlebɔdeɛ+ nee bɛ ɛtane afɔlebɔdeɛ+ yɛɛ fɔlɛlilɛ afɔlebɔdeɛ+ boka nwo mɔɔ bɛbava bɛarɛlɛ me la. Ɔle debie nwuanzanwuanza kpalɛ ɔmaa ɛdawɔ nee ɛ mra mrenyia ne mɔ. 10  Ɔwɔ kɛ bɛdi ye wɔ ɛleka mɔɔ le nwuanzanwuanza kpalɛ la.+ Nrenyia biala bahola ali bie. Ɔbayɛ debie nwuanzanwuanza yeamaa bɛ.+ 11  Eza ɛhye le wɔ ɛdeɛ: ahyɛlɛdeɛ mɔɔ bɛfa bɛba+ nee Yizilayɛma ehono afɔlebɔdeɛ+ ne mɔ amuala. Meva memaa ɛdawɔ nee ɛ mra mrenyia nee ɛ mra mraalɛ kɛ ɔle bɛ ɛdeɛ dahuu.+ Awie biala mɔɔ anwo te wɔ wɔ sua nu la bahola ali bie.+ 12  “Meva nwole kpalɛ nee nza fofolɛ kpalɛ kɔsɔɔti yɛɛ bɛ ma mɔɔ limoa+ mɔɔ bɛfa bɛbɛlɛ Gyihova la memaa wɔ.+ 13  Bɛ azɛlɛ ne azo ma biala mɔɔ kɛlimoa kɛbolo mɔɔ bɛkɛva bɛkɛrɛlɛ Gyihova la bayɛ wɔ ɛdeɛ.+ Awie biala mɔɔ anwo te wɔ wɔ sua nu la bahola ali bie. 14  “Debie biala mɔɔ bɛyila zo* wɔ Yizilayɛ la bayɛ wɔ ɛdeɛ.+ 15  “Anyewɔzo abɔdeɛ biala* belamunli ralɛ+ mɔɔ bɛkɛva bɛkɛmaa Gyihova la, sonla o, nane o, ɔbayɛ wɔ ɛdeɛ. Noko ɔwɔ kɛ ɛkpɔne sonla belamunli ralɛ,+ yɛɛ ɔwɔ kɛ ɛkpɔne nane mɔɔ anwo ɛnde la belamunli ralɛ.+ 16  Saa yeli siane ko mɔɔ kɔ la a, ɔwɔ kɛ bɛtua ɛkpɔnelɛ ezukoa ne bɛkpɔne ye, ye bolɛ le dwɛtɛ fufule hyikɛle* nnu+ kɛ mɔɔ bɛsuzu hyikɛle wɔ ɛleka nwuanzanwuanza ne la.* Ɔle gilaa* 20. 17  Ɛnlankɛ nyinli anzɛɛ boaneralɛ nyinli anzɛɛ abɔnkye mɔɔ bɛkɛlimoa bɛkɛwo ye la ɛdeɛ, ɔnle kɛ bɛkpɔne bɛ.+ Bɛle nwuanzanwuanza. Ɔwɔ kɛ ɛfa bɛ mogya ne ɛkponde afɔlemokyea ne anwo,+ na ɛyela bɛ ɛnlome ne kɛ afɔle mɔɔ bɛva senle bɛbɔ, afɔlebɔlɛ evuanlɛ mɔɔ Gyihova anye die nwolɛ* la.+ 18  Bɛ nane ne bayɛ wɔ ɛdeɛ. Ɔbayɛ wɔ ɛdeɛ kɛ mɔɔ ehono afɔlebɔdeɛ ne akɛnra ne nee ɔ gyakɛ fema ne le wɔ ɛdeɛ la.+ 19  Yizilayɛma ndoboa nwuanzanwuanza kɔsɔɔti mɔɔ bɛbaye bɛamaa Gyihova la,+ meva memaa ɛdawɔ nee ɛ mra mrenyia nee ɛ mra mraalɛ kɛ ɔle bɛ ɛdeɛ dahuu.+ Ɔle ngyenle ngyekyeleɛ mɔɔ wɔ ɛkɛ ne dahuu* wɔ Gyihova anyunlu ɔmaa ɛdawɔ nee ɛ bo zo amra.” 20  Gyihova doale zo zele Aalɔn kɛ: “Ɛnrɛnyia agyapadeɛ wɔ bɛ azɛlɛ ne azo, yɛɛ ɛnrɛnyia azɛlɛ biala wɔ bɛ avinli.+ Medame a mele wɔ kyɛfoa nee wɔ agyapadeɛ wɔ Yizilayɛma avinli a.+ 21  “Nea, meva Yizilayɛma debie biala ngyɛnu bulu anu ko+ ne memaa Livaema kɛ bɛ agyapadeɛ ɔlua gyima mɔɔ bɛlɛyɛ wɔ nyianu ɛdanlɛsua ne anwo la ati. 22  Ɔnle kɛ Yizilayɛma bikye nyianu ɛdanlɛsua ne bieko, anrɛɛ bɛbayɛ ɛtane na bɛawu. 23  Livaema a bayɛ nyianu ɛdanlɛsua ne anwo gyima a, yɛɛ bɛdabɛ a bɛbali bɛ ɛtane ne mɔ anwo ɛzonle a.+ Ɔle mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu kɛ bɛnrɛnyia agyapadeɛ wɔ Yizilayɛma kɔsɔɔti avinli.+ 24  Ɔluakɛ meva Yizilayɛma ngyɛnu bulu anu ko ne mɔɔ bɛfa bɛbɛlɛ Gyihova la memaa Livaema kɛ bɛ agyapadeɛ. Ɛhye ati a meha mehile bɛ kɛ, ‘Bɛnrɛnyia agyapadeɛ wɔ Yizilayɛma avinli’ la.”+ 25  Akee Gyihova zele Mosisi kɛ: 26  “Ka kile Livaema kɛ, ‘Bɛ sa baha Yizilayɛma ngyɛnu bulu anu ko ne mɔɔ melie mevi bɛ ɛkɛ ne memaa bɛ kɛ bɛ agyapadeɛ la,+ na ɔwɔ kɛ bɛkyɛ ngyɛnu bulu anu ko ne anu bulu na bɛye ko bɛmaa Gyihova.+ 27  Na bɛbabu ye kɛ ɔle bɛ ndoboa, kɛ asɛɛ yemɔ a le ma ɛwosolɛ ɛleka ne ma+ anzɛɛ nwanye nee nwole dɔɔnwo ne mɔɔ bɛnyia la. 28  Bɛdabɛ noko bɛbalua adenle ɛhye azo bɛaye ngyɛnu bulu anu ko ne mɔɔ bɛnyia bɛfi Yizilayɛma ɛkɛ ne la anu bie bɛamaa Gyihova, na bɛbava nuhua ne mɔɔ le Gyihova ɛdeɛ la bɛamaa ɛsɔfo Aalɔn. 29  Bɛbava ahyɛlɛdeɛ kɔsɔɔti mɔɔ bɛva bɛmaa bɛ+ kɛ debie nwuanzanwuanza la anu kpalɛ ne bɛaye ndoboa bɛamaa Gyihova.’ 30  “Na ka kile bɛ kɛ, ‘Saa bɛfa nuhua kpalɛ ne bɛye ndoboa a, bɛbabu ye kɛ ɔle Livaema ma ɛwosolɛ ɛleka ne ma nee nwanye nee nwole dɔɔnwo ne mɔɔ bɛnyia la. 31  Bɛ nee bɛ sua nu amra bahola ali ye wɔ ɛleka biala, ɔluakɛ ɔle bɛ gyima mɔɔ bɛyɛ wɔ nyianu ɛdanlɛsua ne anwo la anwo ahatualɛ.+ 32  Mekɛ ala mɔɔ bɛkɛva ninyɛne mgbalɛ ne mɔ bɛkɛye ndoboa la, bɛnrɛyɛ ɛtane wɔ ɛhye anwo, na ɔnle kɛ bɛgua Yizilayɛma ninyɛne nwuanzanwuanza ne mɔ anwo evinli, anrɛɛ bɛkɛwu.’”+

Ɔbodwɛkɛ

Hibulu aneɛ nu, “ɛyɛvolɛ,” ɛhye kile, awie mɔɔ ɛnvi Aalɔn abusua ne anu la.
Hibulu aneɛ nu, “ɛyɛvolɛ,” ɛhye kile, awie mɔɔ ɛnvi Aalɔn abusua ne anu la.
Ɛhye kile, debie biala mɔɔ bɛyɛ ye nwuanzanwuanza bɛmaa Nyamenle na bɛva bɛmaa Nyamenle bɔkɔɔ mɔɔ bɛnlie ye bieko la.
Hibulu aneɛ nu, “nwonane biala.”
Hyikɛle ko le g 11.4. Nea Mok. B14.
Anzɛɛ “kɛ mɔɔ nwuanzanwuanza ɛkɛ ne hyikɛle ne de la.”
Gilaa ko le g 0.57. Nea Mok. B14.
Hibulu aneɛ nu, “akunlu dwo nwolɛ.”
Ɛhye kile, ngyekyeleɛ mɔɔ wɔ ɛkɛ dahuu mɔɔ ɔngakyi.