Nɔmbɛse 17:1-13
-
Aalɔn kpɔma ne mɔɔ ɛfefɛ la le sɛkɛlɛneɛ (1-13)
17 Akee Gyihova zele Mosisi kɛ:
2 “Ka kile Yizilayɛma na die kpɔma ko fi abusua biala abusua kpanyinli ne ɛkɛ,+ ɔ muala bayɛ kpɔma 12. Kɛlɛ awie biala duma wɔ ye kpɔma ne anwo.
3 Ɔwɔ kɛ ɛkɛlɛ Aalɔn duma wɔ Livaema kpɔma ɛdeɛ ne anwo, ɔluakɛ abusua ko biala kpanyinli bava kpɔma ko ara.
4 Fa kpɔma ne mɔ gua Daselɛlilɛ ne+ anyunlu wɔ nyianu ɛdanlɛsua ne anu, ɛleka mɔɔ meta meye me nwo mekile wɔ la.+
5 Na ahenle mɔɔ mebakpa ye la kpɔma ne+ bafefɛ nya, na mebamaa Yizilayɛma anzo abo mɔɔ bɛtendɛ bɛtia me nee bɛdabɛ la agyakyi.”+
6 Yemɔti Mosisi hanle hilele Yizilayɛma, na bɛ mgbanyima ne mɔ amuala maanle ye kpɔma—abusua kpanyinli biala vale kpɔma ko rale, ɔ muala le kpɔma 12—na ɛnee Aalɔn kpɔma ne boka bɛ kpɔma ne mɔ anwo.
7 Akee Mosisi vale kpɔma ne mɔ hɔguale Gyihova anyunlu wɔ Daselɛlilɛ ɛdanlɛsua ne anu.
8 Aleɛ hyenle mɔɔ Mosisi hɔle Daselɛlilɛ ɛdanlɛsua ne anu la, nea! ɛnee Aalɔn kpɔma ne mɔɔ gyi ɛkɛ maa Livae abusua ne la ɛfefɛ nya, ɛbɔ ndotolo na yezo alemɔndo ma mɔɔ ɛbolo la.
9 Akee Mosisi yele kpɔma ne mɔ amuala vile Gyihova anyunlu ɔvale ɔrahilele Yizilayɛma kɔsɔɔti. Bɛnleanle kpɔma ne mɔ na awie biala yele ye ɛdeɛ ne.
10 Akee Gyihova zele Mosisi kɛ: “Fa Aalɔn kpɔma ne+ sia kɔdo Daselɛlilɛ ne anyunlu maa ɔyɛ sɛkɛlɛneɛ+ ɔmaa atuadelɛma ne,+ amaa bɛangɔ zo bɛandendɛ bɛ nzo abo bɛantia me na bɛanwu.”
11 Ɛkɛ ne ala Mosisi yɛle mɔɔ Gyihova hanle hilele ye la. Ɔyɛle ye zɔ pɛpɛɛpɛ.
12 Akee Yizilayɛma zele Mosisi kɛ: “Kɛkala yɛbawu, yɛ bo zo baminli, yɛ muala yɛ bo zo baminli!
13 Awie biala mɔɔ kɛbikye Gyihova ɛdanlɛsua ne bɔbɔ la bawu!+ Asoo yɛ muala yɛbawu ɔ?”+
