Nɔmbɛse 15:1-41
-
Afɔlebɔlɛ nwo mɛla (1-21)
-
Mɛla ko ne ala a wɔ ɛkɛ maa ekulomeni nee ɛyɛvolɛ a (15, 16)
-
-
Ɛtane mɔɔ bɛ nye ɛnla nwo la anwo afɔlebɔlɛ (22-29)
-
Ɛtane mɔɔ bɛ nye la nwo la anwo anzohwenlɛ (30, 31)
-
Bɛhunle awie mɔɔ donle Ɛnwomenlelielɛ kenle mɛla ne la (32-36)
-
Bɛnwo nyɛma fufutuu wɔ bɛ adɛladeɛ nloa (37-41)
15 Gyihova zele Mosisi bieko kɛ:
2 “Ka kile Yizilayɛma kɛ, ‘Saa bɛdwu azɛlɛ ne mɔɔ melɛfa meamaa bɛ kɛ bɛdɛnla zo la azo+
3 na bɛfa ɛnlankɛ anzɛɛ boane bɛabɔ afɔle mɔɔ bɛva senle bɛbɔ la bɛamaa Gyihova, saa ɛyelalɛ afɔlebɔdeɛ+ anzɛɛ bɛbɔ ɛwɔkɛ titili bie anwo afɔle anzɛɛ bɛfi bɛ ɛhulolɛ nu bɛabɔ afɔle+ anzɛɛ bɛbɔ afɔle wɔ bɛ ɛvoyia ne mɔ anu+ amaa yeayɛ afɔlebɔlɛ evuanlɛ mɔɔ Gyihova anye die nwolɛ* la a,+
4 ɔwɔ kɛ ahenle mɔɔ ɛlɛbɔ afɔle ne la eza fa ma afɔlebɔdeɛ esamo motoo+ yifa* ngyɛnu bulu anu ko mɔɔ bɛva nwole hin* ngyɛnu nna anu ko bɛfɔtɔ la bɔ afɔle maa Gyihova.
5 Eza ɔwɔ kɛ bɛfa nwanye hin ngyɛnu nna anu ko bɛbɔ nza afɔle bɛboka ɛyelalɛ afɔlebɔlɛ ne+ anzɛɛ boaneralɛ nyinli biala afɔlebɔlɛ ne anwo.
6 Saa bɛfa boane nyinli a, ɔwɔ kɛ bɛfa ma afɔlebɔdeɛ esamo motoo yifa ngyɛnu bulu anu nwiɔ mɔɔ bɛva nwole hin ngyɛnu nsa anu ko bɛfɔtɔ la bɛboka nwo.
7 Ɔwɔ kɛ bɛfa nwanye hin ngyɛnu nsa anu ko bɛbɔ nza afɔle kɛ afɔlebɔlɛ evuanlɛ mɔɔ Gyihova anye die nwolɛ* la.
8 “‘Noko saa bɛfa ɛnlankɛ nyinli bɛabɔ ɛyelalɛ afɔle+ anzɛɛ bɛbɔ ɛwɔkɛ titili bie anwo afɔle+ anzɛɛ bɛbɔ anzodwolɛ afɔle bɛamaa Gyihova a,+
9 ɔwɔ kɛ bɛfa ma afɔlebɔdeɛ+ esamo motoo yifa ngyɛnu bulu anu nsa mɔɔ bɛva nwole hin foa ko bɛfɔtɔ la bɛboka nwo.
10 Eza ɔwɔ kɛ bɛfa nwanye hin foa ko bɛbɔ nza afɔle+ kɛ afɔle mɔɔ bɛva senle bɛbɔ, afɔlebɔlɛ evuanlɛ mɔɔ Gyihova anye die nwolɛ* la.
11 Kɛ ɔwɔ kɛ bɛyɛ ɛnlankɛ nyinli anzɛɛ boane nyinli anzɛɛ mboane mralɛ nyinli anzɛɛ abɔnkye biala la ɛne.
12 Dodo biala mɔɔ bɛkɛva bɛkɛbɔ afɔle la, kɛ ɔwɔ kɛ bɛyɛ ko biala la ɛne.
13 Kɛ ɔwɔ kɛ Yizilayɛnli biala mɔɔ le ekulomeni la bɔ ɛyelalɛ afɔle la ɛne, amaa yeayɛ afɔlebɔlɛ evuanlɛ mɔɔ Gyihova anye die nwolɛ* la.
14 “‘Saa ɛyɛvolɛ bie mɔɔ nee bɛ de anzɛɛ awie mɔɔ nee bɛ ɛdɛnla ɛhyɛ la ɔwɔ kɛ bɔ ɛyelalɛ afɔle kɛ afɔlebɔlɛ evuanlɛ mɔɔ Gyihova anye die nwolɛ* la a, ɔwɔ kɛ ɔyɛ ye kɛ mɔɔ bɛyɛ ye la pɛpɛɛpɛ.+
15 Mɛla ko ne ala a wɔ ɛkɛ ne maa bɛdabɛ Yizilayɛma nee ɛyɛvolɛ mɔɔ nee bɛ de la a. Ɔbayɛ mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu a. Ɔwɔ kɛ ɛyɛvolɛ yɛ kɛ bɛdabɛ ala la wɔ Gyihova anyunlu.+
16 Mɛla ko nee ngyehyɛleɛ ko ne ala a wɔ ɛkɛ ne maa bɛ nee ɛyɛvolɛ mɔɔ bɛ nee ye de la a.’”
17 Gyihova doale zo zele Mosisi kɛ:
18 “Ka kile Yizilayɛma kɛ, ‘Saa bɛdwu azɛlɛ ne mɔɔ melɛfa bɛ meahɔ zo la azo
19 na bɛdi azɛlɛ ne azo aleɛ* ne bie a,+ ɔwɔ kɛ bɛye ndoboa bɛmaa Gyihova.
20 Ɔwɔ kɛ bɛfa bɛ ma mɔɔ limoa la+ esamo ne bie bɛyɛ paano mɔɔ bɛbɔ ye kɛ ngɛba la bɛye ndoboa. Ɔwɔ kɛ bɛye ndoboa ne kɛ mɔɔ bɛye ma ɛwosolɛ ɛleka ne ndoboa ne la.
21 Ɔwɔ kɛ bɛfa bɛ ma mɔɔ limoa la esamo ne bie bɛye ndoboa bɛmaa Gyihova wɔ bɛ awolɛndoazo kɔsɔɔti anu.
22 “‘Noko saa bɛfo na bɛangola bɛanli mɛla ɛhye mɔ amuala mɔɔ Gyihova ɛha ɛhile Mosisi la azo,
23 edwɛkɛ mɔɔ Gyihova ɛlua Mosisi anwo zo ɛha ɛhile bɛ la amuala, ɔvi kenle mɔɔ Gyihova vale mɛla ne maanle la azo too kɔdwu bɛ awolɛndoazo kɔsɔɔti mɔɔ bara la azo,
24 na saa nvonleɛ a maanle bɛyɛle zɔ na menli ne amuala ɛnze a, ɔwɔ kɛ menli ne amuala fa ɛnlankɛ ralɛ nyinli ko bɔ ɛyelalɛ afɔle kɛ afɔlebɔlɛ evuanlɛ mɔɔ Gyihova anye die nwolɛ* la. Bɛva nwolɛ ma afɔlebɔdeɛ nee nwolɛ nza afɔlebɔdeɛ bɛboka nwo kɛ mɔɔ bɛyɛ ye dahuu la,+ na bɛva abɔnkye ralɛ ko bɛbɔ ɛtane afɔle.+
25 Ɛsɔfo ne bali Yizilayɛma amuala ati mgbɔdalɛ yeamaa bɛ na bɛava bɛahyɛ bɛ,+ ɔluakɛ nvonleɛ a bɛyɛle a, yɛɛ bɛvale bɛ afɔlebɔdeɛ bɛrabɔle ɛyelalɛ afɔle bɛmaanle Gyihova na bɛbɔle bɛ nvonleɛ ne anwo ɛtane afɔle wɔ Gyihova anyunlu.
26 Bɛbava bɛahyɛ Yizilayɛma amuala nee ɛyɛvolɛ mɔɔ de bɛ avinli la, ɔluakɛ nvonleɛ a menli ne amuala yɛle a.
27 “‘Saa awie* anye ɛnla nwo na ɔyɛ ɛtane a, ɔwɔ kɛ ɔfa abɔnkye belɛ mɔɔ ɛli ɛvolɛ ko la ɔbabɔ ɛtane afɔle.+
28 Na ɛsɔfo ne bali ahenle* mɔɔ tɛ ɔ nye fuu a ɔyɛle ɛtane wɔ Gyihova anyunlu la ati mgbɔdalɛ, ɔbali ɛtane ne anwo mgbɔdalɛ amaa bɛava bɛahyɛ ye.+
29 Saa Yizilayɛnli mɔɔ le ekulomeni anzɛɛ ɛyɛvolɛ mɔɔ de bɛ avinli la anye ɛnla nwo na ɔyɛ ɛtane a, mɛla ko ne ala a wɔ ɛkɛ ne maa bɛ muala a.+
30 “‘Noko awie* mɔɔ ɔ nye fuu ɔkɛyɛ ɛtane la,+ ekulomeni o, ɛyɛvolɛ o, yebɔ munzule wɔ Gyihova anyunlu, na ɔwɔ kɛ bɛye ye* bɛfi ye menli ne avinli.
31 Kɛmɔ yeambu Gyihova edwɛkɛ ne bie na yeanli ye mɛla zo la ati, ɔwɔ kɛ bɛku zɔhane sonla* ne.+ Ɔbali ye ɛtane ne anwo ɛzonle.’”+
32 Mɔɔ Yizilayɛma wɔ fienemgbole ne anu la, bɛnwunle nrenyia bie kɛ ɔlɛsesa ɛyɛne wɔ Ɛnwomenlelielɛ kenle ne.+
33 Menli mɔɔ nwunle ye kɛ ɔlɛsesa ɛyɛne ne la vale ye rale Mosisi nee Aalɔn yɛɛ menli ne amuala anyunlu.
34 Bɛvale ye bɛziele+ ɔluakɛ ɛnee bɛtɛnwunle debie mɔɔ ɔwɔ kɛ bɛfa bɛyɛ ye la.
35 Na Gyihova zele Mosisi kɛ: “Ɔwɔ kɛ bɛku nrenyia ne;+ ɔwɔ kɛ menli ne amuala si ye awolɛ wɔ azokoɛleɛ ne anzi lɔ.”+
36 Yemɔti menli ne amuala vale ye hɔle azokoɛleɛ ne anzi lɔ na bɛzile ye awolɛ bɛhunle ye kɛ mɔɔ Gyihova hanle hilele Mosisi la.
37 Gyihova doale zo zele Mosisi kɛ:
38 “Ka kile Yizilayɛma kɛ, bɛnwo nyɛma fufutuu wɔ bɛ adɛladeɛ ne mɔ anloa wɔ bɛ awolɛndoazo kɔsɔɔti anu, na bɛva nyɛma buluwu bɛdo bɛ tɛladeɛ ne anloa fufutuu ne anwuma.+
39 ‘Bɛyɛ nyɛma fufutuu ɛhye amaa bɛanwu ye na bɛahakye Gyihova mɛla ne amuala na bɛali zo.+ Bɛmmatoa bɛ ahonle nee bɛ nye mɔɔ ɛlɛmaa bɛabɔ tuutuu wɔ sunsum nu la.+
40 Ɛhye bamaa bɛahakye na bɛali me mɛla ne amuala azo na bɛayɛ nwuanzanwuanza bɛamaa bɛ Nyamenle ne.+
41 Medame a mele Gyihova bɛ Nyamenle ne mɔɔ yele bɛ vile Yigyibiti azɛlɛ zo amaa meahile kɛ mele bɛ Nyamenle la.+ Medame a mele Gyihova bɛ Nyamenle ne a.’”+
Ɔbodwɛkɛ
^ Hibulu aneɛ nu, “akunlu dwo nwolɛ.”
^ Hibulu aneɛ nu, “akunlu dwo nwolɛ.”
^ Hibulu aneɛ nu, “akunlu dwo nwolɛ.”
^ Hibulu aneɛ nu, “akunlu dwo nwolɛ.”
^ Hibulu aneɛ nu, “akunlu dwo nwolɛ.”
^ Hibulu aneɛ nu, “paano.”
^ Hibulu aneɛ nu, “akunlu dwo nwolɛ.”
^ Anzɛɛ “ɛkɛla bie.”
^ Anzɛɛ “ɛkɛla ne.”
^ Anzɛɛ “ɛkɛla.”
^ Anzɛɛ “bɛku ye.”
^ Anzɛɛ “ɛkɛla.”
