Nɔmbɛse 14:1-45
14 Akee menli ne kɔsɔɔti zunle kpole kpalɛ, na bɛhɔle zo bɛzunle nɔe ne amuala.+
2 Yizilayɛma kɔsɔɔti bɔle ɔ bo dendɛle tiale Mosisi nee Aalɔn,+ na menli ne amuala dendɛle tiale bɛ kɛ: “Saa yɛwule wɔ Yigyibiti azɛlɛ zo, anzɛɛ saa yɛwule wɔ fienemgbole ɛhye anu a, anrɛɛ ɔle kpalɛ!
3 Duzu ati a Gyihova ɛlɛfa yɛ ara azɛlɛ ɛhye azo kɛ yɛrawu dadeɛ nloa ɛ?+ Bɛbava yɛ ye mɔ nee yɛ mra bɛahɔ.+ Asoo ɔnle kpalɛ kɛ yɛkɛzia yɛkɛhɔ Yigyibiti ɔ?”+
4 Bɛhanle bɛhilele bɛ nwo ngoko bɔbɔ kɛ: “Bɛmaa yɛkpa kpanyinli ɔli yɛ nyunlu na yɛzia yɛhɔ Yigyibiti!”+
5 Na Mosisi nee Aalɔn butubutule bɛ nyunlu aze wɔ Yizilayɛma kɔsɔɔti mɔɔ ɛyia ɛkɛ la anyunlu.
6 Nɛn ara Dwɔhyua+ nee Gyɛfɛna ara Keelɛbe+ mɔɔ boka menli mɔɔ hɔnleɛnleanle azɛlɛ ne azo anwo la suosuanle bɛ adɛladeɛ ne mɔ anu,
7 na bɛhanle bɛhilele Yizilayɛma kɔsɔɔti kɛ: “Azɛlɛ ne mɔɔ yɛhɔnleɛnleanle zolɛ la le azɛlɛ kɛnlɛma kpalɛ.+
8 Saa Gyihova anye die yɛ nwo a, ɔbava yɛ yɛahɔ azɛlɛ ɛhye azo na yeava yeamaa yɛ, ɔle azɛlɛ mɔɔ meleke nee wolɛ se zolɛ a.+
9 Noko ɔnle kɛ bɛte Gyihova anwo atua, yɛɛ ɔnle kɛ bɛsulo menli mɔɔ de azɛlɛ ne azo la,+ ɔluakɛ yɛbali bɛ nwo zo konim.* Bɛnlɛ banebɔlɛ, yɛɛ Gyihova nee yɛ lua.+ Bɛmmasulo bɛ.”
10 Noko menli ne amuala hanle kɛ bɛsi bɛ awolɛ.+ Na Gyihova anyunlunyia ne dale nyianu ɛdanlɛsua ne azo maanle Yizilayɛma amuala nwunle ye.+
11 Akee Gyihova zele Mosisi kɛ: “Mekɛ tendenle nyɛ a menli ɛhye mɔ ɛnrɛli me eni a,+ yɛɛ mekɛ tendenle nyɛ a sɛkɛlɛneɛ ɛhye mɔ mɔɔ meyɛ wɔ bɛ avinli bɔbɔ la anzi bɛnrɛnyia diedi wɔ me nu a?+
12 Maa menva ewulenzane mendo bɛ avinli membɔ bɛ bo zo, na menyɛ wɔ maanle kpole mɔɔ anwo yɛ se tɛla bɛ a.”+
13 Na Mosisi zele Gyihova kɛ: “Anrɛɛ Yigyibitima mɔɔ ɛvale wɔ tumi ne ɛyele menli ɛhye mɔ ɛvile bɛ avinli la bade,+
14 na bɛbaha nwolɛ edwɛkɛ bɛahile menli mɔɔ de azɛlɛ ɛhye azo la. Bɛdabɛ noko bɛde kɛ wɔmɔ Gyihova, ɛwɔ wɔ menli ne avinli+ yɛɛ wɔye ɛ nwo wɔhile bɛ wienyi.+ Wɔmɔ a ɛle Gyihova a, yɛɛ wɔ amungu ne wɔ bɛ ti zo, na ɛdi bɛ nyunlu wɔ amungu pila nu wɔ alehyenlɛ nu yɛɛ ɛdi bɛ nyunlu wɔ senle pila nu aledwolɛ nu.+
15 Saa ɛku menli ɛhye mɔ ɛkɛ ne ala a,* maanle maanle mɔɔ ɛde wɔ nganeɛ la baha kɛ:
16 ‘Gyihova angola anva menli ɛhye mɔ angɔ azɛlɛ ne mɔɔ ɔhanle ndane kɛ ɔfa yeamaa bɛ la azo, yemɔti yehu bɛ wɔ fienemgbole ne anu.’+
17 Yemɔti Gyihova, mesɛlɛ wɔ, maa wɔ tumi kpole ne ɛla ali, ɔluakɛ ɛbɔle ɛwɔkɛ kɛ:
18 ‘Gyihova kyɛ na yeava ɛya yɛɛ ɛlɔlɛ kpundii* ɛyi ye tɛkɛɛ,+ ɔfa nvonleɛ nee mɛladonlɛ ɔkyɛ, noko ɔmmaa mɔɔ di fɔlɛ la ɛnva ɔ nwo dwɔɔ, ɔfa selɛma ɛtane nwo anzohwenlɛ ɔba bɛ mra nwo zo too ɔkɔdwu awolɛndoazo mɔɔ tɔ zo nsa nee nna ne azo.’+
19 Mesɛlɛ wɔ, dua wɔ ɛlɔlɛ kpundii kpole ne azo fa menli ɛhye mɔ ɛtane kyɛ bɛ, kɛ mɔɔ wɔva wɔhyɛ bɛ ɔvi Yigyibiti too yeradwu ɛnɛ la.”+
20 Akee Gyihova hanle kɛ: “Kɛ mɔɔ wɔha la, meva mehyɛ bɛ.+
21 Noko mekɛ ala mɔɔ mede aze la, Gyihova anyunlunyia ne bayi azɛlɛ ye tɛkɛɛ.+
22 Noko menli mɔɔ nwunle me anyunlunyia ne nee sɛkɛlɛneɛ+ mɔɔ menyɛle wɔ Yigyibiti yɛɛ fienemgbole ye anu noko bɛzɔ me bɛnlea+ too fane bulu na bɛandie me ne la ɛdeɛ, bɛ nuhua ko bɔbɔ+
23 ɛnrɛnwu azɛlɛ ne mɔɔ menvale membɔle bɛ papa mɔ ɛwɔkɛ la. Kyɛkyɛ, menli mɔɔ ɛmbu me la anu ko bɔbɔ ɛnrɛnwu ye.+
24 Noko kɛmɔ asolo sunsum mɔɔ wɔ me sonvolɛ Keelɛbe+ anwo zo na yeva ye ahonle muala yeli me nzi la ati, mebava ye meahɔ azɛlɛ ne mɔɔ ɔhɔle zolɛ la azo, na ɔ bo zo amra bava ayɛ bɛ ɛdeɛ.+
25 Kɛmɔ Amalɛkema nee Keenama+ de bɔnza ne anu la ati, ɛhyema bɛzia bɛ nzi na bɛhɔlua Nyevile Kɔkɔlɛ ne anloa bɛhɔ fienemgbole ne anu.”+
26 Akee Gyihova zele Mosisi nee Aalɔn kɛ:
27 “Mekɛ tendenle nyɛ a amumuyɛma ɛhye mɔ bahɔ zo adendɛ bɛ nzo abo atia me a?+ Mede Yizilayɛma anzo abo mɔɔ bɛlɛtendɛ bɛatia me la.+
28 Ka kile bɛ kɛ, ‘“Mekɛ ala mɔɔ mede aze la,” kɛ Gyihova se la ɛne, “mebava mɔɔ bɛha bɛmaa mede la meayɛ bɛ!+
29 Bɛdabɛ mɔɔ bɛdianle bɛ mɔɔ bɛli ɛvolɛ 20 mɔɔ kɔ la, bɛdabɛ mɔɔ bɛdendɛle bɛ nzo+ abo bɛtiale me la kɔsɔɔti, bɛ avunli bagua fienemgbole ye anu.+
30 Bɛ nuhua ko bɔbɔ ɛnrɛhɔ azɛlɛ ne mɔɔ menganle ndane* kɛ mebamaa bɛadɛnla zo la azo,+ kyesɛ Gyɛfɛna ara Keelɛbe nee Nɛn ara Dwɔhyua ala.+
31 “‘“Na mebava bɛ mra mɔɔ bɛhanle kɛ bɛbava bɛ bɛahɔ la meahɔ zolɛ,+ na bɛbanwu azɛlɛ ne mɔɔ bɛkpo la.+
32 Noko bɛmɛ, bɛ avunli bagua fienemgbole ye anu.
33 Bɛ mra bayɛ mboaneneavolɛma wɔ fienemgbole ye anu ɛvolɛ 40,+ na bɛbali nɔhalɛ mɔɔ bɛanli la* anwo ɛzonle kɔkpula kɛ bɛ nuhua ko mɔɔ kɛha la bawu ala fienemgbole ye anu la.+
34 Kɛ mɔɔ bɛvale kenle 40 a bɛhɔnleɛnleanle azɛlɛ ne azo la,+ kenle ko bayɛ ɛvolɛ ko, na bɛbali bɛ ɛtane ne anwo ɛzonle too ɛvolɛ 40,+ ɔluakɛ bɛbanwu mɔɔ bɛdwazo bɛtia me a* ɔ nee ye lua la.
35 “‘“Medame Gyihova a mese a. Ɛhye a mebava meayɛ amumuyɛma ɛhye mɔ amuala mɔɔ bɛboɔboa bɛ nloa bɛtia me la: Bɛ awieleɛ bara fienemgbole ye anu, na ɛke a bɛbawu a.+
36 Menli mɔɔ Mosisi zoanle bɛ kɛ bɛhɔnleɛnlea azɛlɛ ne azo na bɛrahanle azɛlɛ ne anwo edwɛkɛ ɛtane bɛmaanle menli ne amuala dendɛle bɛ nzo abo tiale ye la,+
37 ɛhɛe, menli mɔɔ rahanle azɛlɛ ne anwo edwɛkɛ ɛtane la, bɛbahwe bɛ nzo na bɛawu Gyihova anyunlu.+
38 Noko Nɛn ara Dwɔhyua nee Gyɛfɛna ara Keelɛbe mɔɔ boka menli mɔɔ hɔnleɛnleanle azɛlɛ ne azo anwo la ɛdeɛ, bɛbadɛnla ngoane nu.”’”+
39 Mɔɔ Mosisi hanle edwɛkɛ ɛhye hilele Yizilayɛma kɔsɔɔti la, bɛlile nyane kpole.
40 Akee bɛdwazole nwonlomɔ mangyee ne ala na bɛbɔle mɔdenle kɛ bɛkɔ boka ne azo, bɛhanle kɛ: “Yɛziezie yɛ nwo kɛ yɛkɔ ɛleka mɔɔ Gyihova hanle nwolɛ edwɛkɛ la, ɔluakɛ yɛyɛ ɛtane.”+
41 Noko Mosisi hanle kɛ: “Duzu ati a bɛlɛbu bɛ nye bɛagua Gyihova edwɛkɛ ne azo a? Ɛhye ɛnrɛwie bɛ boɛ.
42 Bɛmmakɔ, ɔluakɛ Gyihova nee bɛ ɛnlua; na bɛ kpɔvolɛma bali bɛ nwo zo konim.+
43 Ɔluakɛ Amalɛkema nee Keenama nee bɛ bayia wɔ nehane,+ na bɛbadɔ dadeɛ nloa. Kɛmɔ bɛhwe bɛ nwo bɛvi Gyihova anwo la ati, Gyihova nee bɛ ɛnrɛlua.”+
44 Noko bɛlile bɛ ti anwo na bɛhɔle boka ne azo,+ na Gyihova ngyekyeleɛ ɛlɛka ne nee Mosisi andu bɛ bo anvi azokoɛleɛ ne.+
45 Akee Amalɛkema nee Keenama mɔɔ de boka ne azo la dwule aze rahunle bɛ, na bɛmaanle bɛbɔle asande too bɛhɔdwule Hɔɔma.+
Ɔbodwɛkɛ
^ Hibulu aneɛ nu, “ɔluakɛ bɛle kɛ paano bɛmaa yɛ.”
^ Hibulu aneɛ nu, “menli ɛhye mɔ kɛ asɛɛ sonla ko a.”
^ Anzɛɛ “atiakunlukɛnlɛma.”
^ Hibulu aneɛ nu, “mɔɔ memaanle me sa zo.”
^ Hibulu aneɛ nu, “bɛbali bɛ tuutuubɔlɛ ne.”
^ Anzɛɛ “mɔɔ meyɛ bɛ kpɔvolɛ a.”
