Nɔmbɛse 13:1-33

  • Bɛzoa busiama 12 wɔ Keena (1-24)

  • Busiama bulu amaneɛ ɛtane ne (25-33)

13  Akee Gyihova zele Mosisi kɛ:  “Ye abusua biala anu kpanyinli ko+ maa ɔgyinla ye papa mɔ abusua ne agyakɛ anu na soa bɛ maa bɛhɔnleɛnlea* Keena azɛlɛ ne mɔɔ mefa meamaa Yizilayɛma la azo.”+  Yemɔti Mosisi zoanle bɛ maanle bɛvile Peelan fienemgbole ne anu+ bɛhɔle kɛ mɔɔ Gyihova hanle la. Ɛnee mrenyia ne mɔ amuala le Yizilayɛ mgbanyima.  Bɛ aluma ɛne: Wulubɛn abusua nu, Zakɛ ara Hyamua;  Semɛyɔn abusua nu, Hɔlae ara Hyeefate;  Dwuda abusua nu, Gyɛfɛna ara Keelɛbe;+  Yesakaa abusua nu, Dwosefi ara Ayegale;  Yifelaem abusua nu, Nɛn ara Hohyia;+  Bɛngyaman abusua nu, Rilefu ara Pɔletae; 10  Zɛbulɛn abusua nu, Sodae ara Gadeɛle; 11  Dwosefi abusua nu,+ mɔɔ le Manasɛ abusua ne,+ Susae ara Gadae; 12  Dan abusua nu, Gɛmalae ara Ameɛle; 13  Ahya abusua nu, Maekeɛle ara Sitɛ; 14  Nafetalae abusua nu, Vɔfosae ara Naabae; 15  Gaade abusua nu, Meekae ara Giwɛle. 16  Mrenyia mɔɔ Mosisi zoanle bɛ kɛ bɛhɔnleɛnlea azɛlɛ ne azo la aluma ɛne. Na Mosisi donle Nɛn ara Hohyia duma Dwɔhyua.*+ 17  Mekɛ mɔɔ Mosisi ɛlɛsoa bɛ kɛ bɛhɔnleɛnlea Keena azɛlɛ ne azo la, ɔzele bɛ kɛ: “Bɛhɔ Nɛgɛbe nehane na akee bɛhɔ awoka ne mɔ azo.+ 18  Bɛhɔnlea kɛzi azɛlɛ ne de la+ na bɛnlea kɛ menli mɔɔ de zo la anwo yɛ se anzɛɛ bɛ nwo ɛnyɛ se, bɛ nwo zonle anzɛɛ bɛ nwo anzo, 19  bɛnlea kɛ azɛlɛ ne le kpalɛ anzɛɛ ɔnle kpalɛ yɛɛ saa bɛdede azuamgbole mɔɔ bɛtɛdiele nwolɛ bane anzɛɛ mɔɔ bɛlie nwolɛ bane la azo a. 20  Na bɛnlea kɛ azɛlɛ ne kye aleɛ* anzɛɛ ɔngye aleɛ*+ yɛɛ saa mbaka wɔ zo anzɛɛ mbaka ɛnle zo a. Bɛnyia akɛnrasesebɛ+ na bɛva azɛlɛ ne azo ma ne bie bɛrɛla.” Ɛnee ɔle mekɛ mɔɔ vanye ma mɔɔ limoa la ɛbolo a.+ 21  Yemɔti bɛhɔnleɛnleanle azɛlɛ ne azo, ɔvi Zen fienemgbole ne anu+ kɔdwu Rilihɔbo+ mɔɔ bikye Libo-heemate* la.+ 22  Mɔɔ bɛhɔle Nɛgɛbe nehane la, bɛrale Hibulɔn,+ ɛleka mɔɔ ɛnee Ahaeman, Hyihyae nee Talimae+ mɔɔ bɛle Anakema+ la de la. Bɛkyekyele Hibulɔn la ɔlile ɛvolɛ nsuu kolaa na bɛakyekye Zowan mɔɔ wɔ Yigyibiti la. 23  Mɔɔ bɛradwule Ɛhyekɔlo Bɔnza ne anu* la,+ bɛpɛle vanye ma ngane bie mɔɔ vanye ma siakɛ ko wɔ zo la, na mrenyia ne mɔ anu nwiɔ vale dole baka zo zoale; eza bɛvale pɔmegelanate nee feege ma bɛbokale nwo.+ 24  Bɛvɛlɛle ɛkɛ ne Ɛhyekɔlo* Bɔnza*+ ɔluakɛ ɛkɛ ne a Yizilayɛma pɛle vanye ma siakɛ ne a. 25  Kenle 40 anzi,+ menli mɔɔ hɔnleɛnleanle azɛlɛ ne azo la ziale rale. 26  Yemɔti bɛziale bɛrale Mosisi nee Aalɔn yɛɛ Yizilayɛma kɔsɔɔti anwo ɛkɛ wɔ Peelan fienemgbole ne anu wɔ Keedɛhye.+ Bɛhanle mɔɔ bɛnwunle ye la bɛhilele Yizilayɛma amuala na bɛvale azɛlɛ ne azo ma ne bɛhilele bɛ. 27  Mɔɔ bɛhanle bɛhilele Mosisi la ɛne: “Yɛhɔle azɛlɛ ne mɔɔ ɛzoanle yɛ wɔ zolɛ la azo, na nɔhalɛ nu, meleke nee wolɛ se zolɛ,+ yɛɛ zolɛ ma ne bie ɛne.+ 28  Noko menli mɔɔ wɔ azɛlɛ ne azo la anwo yɛ se, yɛɛ bɛlɛ azuamgbole mɔɔ bɛlie nwolɛ bane kpalɛ la. Eza yɛnwunle Anakema wɔ ɛkɛ.+ 29  Amalɛkema+ de Nɛgɛbe nehane,+ Hɛtema, Gyibɛsema+ nee Amɔlema+ de awoka ne mɔ azo, yɛɛ Keenama+ dede nyevile ne nee Dwɔdan ne anloa.”+ 30  Mɔɔ menli ne gyi Mosisi anyunlu ɛkɛ la, Keelɛbe bɔle mɔdenle kɛ ɔmaa bɛazie bɛ nwo dii, na ɔhanle kɛ: “Bɛmaa yɛhɔ ndɛndɛ na kɛ ɔde ye biala la, yɛbava azɛlɛ ne ɔluakɛ yɛbahola yɛali bɛ nwo zo konim.”+ 31  Noko menli mɔɔ nee ye hɔle la hanle kɛ: “Yɛnrɛhola menli ne ɔluakɛ bɛ nwo yɛ se tɛla yɛ.”+ 32  Na bɛhɔle zo bɛhanle azɛlɛ ne mɔɔ bɛhɔnleɛnleanle zolɛ la anwo edwɛkɛ ɛtane+ bɛhilele Yizilayɛma kɛ: “Azɛlɛ ne mɔɔ yɛhɔnleɛnleanle zolɛ la le azɛlɛ mɔɔ ɔme menli mɔɔ de zolɛ la, na menli mɔɔ yɛnwunle bɛ wɔ zolɛ la le kakanyinlima.+ 33  Na yɛnwunle Nɛfelem ne mɔ, Enake amra ne mɔ+ mɔɔ le Nɛfelem ne mɔ abozoamra la wɔ ɛkɛ, na yɛvale yɛ nwo yɛtotole bɛ nwo la, ɛnee yɛzɔho abɛbɛ yɛɛ kɛ bɛdabɛ noko bɛbule yɛ la ɛne.”

Ɔbodwɛkɛ

Anzɛɛ “bɛhɔkpɔla.”
Anzɛɛ “Gyɛhɔhyua,” ɔ bo kile “Gyihova Le Ngoanelielɛ.”
Hibulu aneɛ nu, “le belane.”
Hibulu aneɛ nu, “ɔle nwanlera.”
Anzɛɛ “Heemate adenle zo.”
Anzɛɛ “Azudenle ne anloa.”
Ɔ bo kile “Vanye Ma Siakɛ.”
Anzɛɛ “Azudenle.”