Nɔmbɛse 12:1-16
12 Mosisi gyale Kuhyenli raalɛ, na Kuhyenli raalɛ ne ati, Meleam nee Aalɔn dendɛle tiale ye.+
2 Bɛhanle kɛ: “Asoo Mosisi angomekye a Gyihova ɛlua ɔ nwo zo ɛdendɛ a? Asoo ɔtɛduale yɛdayɛ noko yɛ nwo zo ɔtɛtendɛle ɔ?”+ Na ɛnee Gyihova ɛlɛtie.+
3 Ɛnee Mosisi le bɛlɛvo tɛla menli kɔsɔɔti*+ mɔɔ wɔ azɛlɛ ye azo la.
4 Arɛlevilɛ nu ala, Gyihova zele Mosisi nee Aalɔn yɛɛ Meleam kɛ: “Bɛdabɛ menli nsa, bɛhɔ nyianu ɛdanlɛsua ne anwo.” Yemɔti bɛdabɛ menli nsa ne bɛhɔle.
5 Na Gyihova dwule wɔ amungu pila ne anu+ na ɔragyinlanle ɛdanlɛsua ne anuhɔlɛ na ɔvɛlɛle Aalɔn nee Meleam. Bɛ mu nwiɔ bɛhɔle bɛ nyunlu.
6 Akee ɔhanle kɛ: “Mesɛlɛ bɛ, bɛdie mɔɔ meka la. Saa Gyihova ngapezonli bie wɔ bɛ avinli a, anrɛɛ mebaye me nwo meahile ye wɔ ɛnyelɛzodeɛnwunlɛ nu,+ na meadendɛ meahile ye wɔ ɛlalɛ nu.+
7 Noko tɛ kɛ ɔde wɔ me sonvolɛ Mosisi afoa nu la ɛne! Meva me menli* ne amuala mewula ɔ sa nu.*+
8 Me nee ye tendɛ kɛ mɔɔ sonla nee ɔ gɔnwo tendɛ kile bɛ nwo wienyi la,*+ na tɛ agyebɛ nu ɔ; yɛɛ ɔnwu kɛzi Gyihova de la. Duzu ati a bɛanzulo kɛ bɛbadendɛ bɛatia me sonvolɛ Mosisi a?”
9 Ɔti Gyihova vale bɛ nwo ɛya na ɔgyakyile bɛ ɛkɛ ɔhɔle.
10 Amungu ne vile ɛdanlɛsua ne azo, na nea! ɛnee kokobɛ ɛgua Meleam anwo nwohyee kɛ ezukɔtweaba la.+ Akee Aalɔn dole ɔ nye nleanle Meleam, na ɔnwunle kɛ kokobɛ ɛgua ye.+
11 Ɛkɛ ne ala, Aalɔn zele Mosisi kɛ: “Me menle, mesɛlɛ wɔ! Mmatwe yɛ nzo wɔ ɛtane ɛhye anwo! Mɔɔ yɛyɛ la kile kɛ yɛli ngoaseasɛm.
12 Mesɛlɛ wɔ, mmamaa ɔyɛ kɛ awie mɔɔ bɛkawo ye la ɛnee yewu, na ye nwonane ne foa ko ɛkpɔlɔ la!”
13 Na Mosisi zunle vɛlɛle Gyihova kɛ: “O Nyamenle, mebodo wɔ, yɛ ye ayile!”+
14 Gyihova buale Mosisi kɛ: “Saa ye papa a dole nyɛlɛ ɔ nyunlu a, anrɛɛ ɔ nyunlu ɛnrɛgua aze kenle nsuu ɔ? Bɛmaa ɔ ngomekye ɔdɛnla azokoɛleɛ ne anzi lɔ kenle nsuu,+ na akee ɔbahola yeazia yeara.”
15 Ɔti bɛmaanle Meleam dɛnlanle azokoɛleɛ ne anzi lɔ kenle nsuu,+ na menli ne andu bɛ bo kɔkpula kɛ bɛ nee Meleam ziale rale.
16 Akee menli ne dule bɛ bo vile Hazilɔto+ na bɛhɔdɛnlanle Peelan fienemgbole ne anu.+
Ɔbodwɛkɛ
^ Anzɛɛ “bɛlɛ ɔ nwo aze kpalɛ (le bɛtɛɛ), tɛla awie biala.”
^ Hibulu aneɛ nu, “me sua.”
^ Hibulu aneɛ nu, “Ɔdi nɔhalɛ wɔ me sua nu ɛkɛ ne amuala.”
^ Hibulu aneɛ nu, “Me nee ye yɛ nloa yia wɔ ɛdendɛlɛ nu.”
