Mrɛlɛbulɛ 27:1-27
27 Mmafa ɛhyema ɛtu ɛ nloa anu,Ɔluakɛ ɛnze mɔɔ alehyenlɛ ne bava ara* a.+
2 Maa awie gyɛne* ɛhanvo wɔ, na tɛ ɛdawɔ ɛ nloa;Awie mɔ,* na tɛ ɛdawɔ ɛ nloa babonle ne ɔ.+
3 Bolɛ yɛ ɛlomboɛ yɛɛ ɛnwea yɛ ɛlomboɛ,Noko koasea ɛyahanlɛ* yɛ ɛlomboɛ tɛla bɛ mu nwiɔ.+
4 Ɛya kpole ati yɛ se yɛɛ ɛya le kɛ azuyilɛ,Noko nwane a kɛhola kɛgyinla nungule ɛhwenlɛ nloa a?+
5 Ahwibɛnyunlu wɔ wienyi nu le kpalɛ tɛla ɛlɔlɛ mɔɔ vea la.+
6 Agɔnwolɛ boda wɔ a ɔvi nɔhalɛlilɛ nu,+Noko kpɔvolɛ fo bɛ nloa anwo dɔɔnwo.*
7 Sonla* mɔɔ ako ɛyi la ɛnno wolɛ mɔɔ pepe la,*Noko sonla* mɔɔ ɛhɔne ɛlɛku ye la, debie ɛnwonle bɔbɔ yɛ ye fɛ.
8 Sonla mɔɔ fi ye awuke nu kɔduolua nu laLe kɛ aloma mɔɔ ɛvi* ye sane nu la.
9 Kɛ mɔɔ nwole nee ayilevuanlɛ maa ahonle di fɛlɛko la;Zɔhane ala a agɔnwolɛ mɔɔ tu folɛ kpalɛ* la noko de a.+
10 Mmakpo ɛ gɔnwo anzɛɛ wɔ papa agɔnwo,Yɛɛ mmakɔ ɛ diema sua nu wɔ kenle mɔɔ esiane kɛdo wɔ la;Agɔnwolɛ mɔɔ bikye wɔ la le kpalɛ tɛla adiema mɔɔ wɔ moamoa la.+
11 Me ra, nwu nrɛlɛbɛ, na maa me ahonle ɛli fɛlɛko,+Amaa meahola meabua ahenle mɔɔ tendɛ tia me la.+
12 Sonla mɔɔ anye gyi ɔ ti anwo la nwu esiane na ɔfa ɔ nwo ɔfea,+Noko mɔɔ ɛnlɛ anwubielɛ la kɔ ɔ nyunlu fɔɔnwo na ɔnwu nwolɛ amaneɛ.*
13 Saa sonla di ɛyɛvolɛ agyinlanu a, die ye ɛdanlɛ;Saa ɔdi ɛyɛvolɛ raalɛ* agyinlanu a, die ye debie sie awoba.+
14 Saa awie fa ɛnelɛ kpole yila ɔ gɔnwo wɔ nwonlomɔ mangyee a,Bɛbabu ye kɛ ɔlɛwa amonle.
15 Yelɛ mɔɔ kulo butule* la le kɛ sua mɔɔ ɔ ti zo nwu dahuu wɔ ezule mekɛ nu la.+
16 Awie biala mɔɔ kola si ye adenle la kola si anwoma adenleYɛɛ ɔkola ɔfa ɔ sa fema ɔsɔ nwole nu.
17 Kɛ mɔɔ bulalɛ si bulalɛ la,Zɔhane ala a sonla si ɔ gɔnwo a.*+
18 Sonla mɔɔ nea feege baka zo la bali zolɛ ma,+Yɛɛ sonla mɔɔ nea ɔ menle la bɛbali ye eni.+
19 Kɛ mɔɔ sonla nwu ɔ nyunlu wɔ nzule nu la,Zɔhane ala a sonla ahonle da ɔ gɔnwo ɛdeɛ ali a.
20 Nla nee ɛzɛkyelɛ kuma* ako ɛnyi ɛlɛ,+Zɔhane ala a sonla nye noko akunlu ɛndwo ɔ nwo ɛlɛ a.
21 Kɛ mɔɔ dwinvolɛ buakɛ wɔ ɛkɛ ne maa dwɛtɛ fufule yɛɛ fonlomo wɔ ɛkɛ ne maa nvutuke la,+Zɔhane ala a bɛdua nganvolɛ mɔɔ bɛfa bɛmaa sonla la azo bɛsɔ ye bɛnea a.*
22 Saa bɔbɔ ɛfa dwɔma ɛsi koaseaKɛ ma mɔɔ bɛsi ye wɔ duba nu la a,Ye ngoaseade ne ɛnrɛvi ɔ nwo.
23 Ɔwɔ kɛ ɛnwu kɛzi wɔ mboane ne mɔ anwo de la kpalɛ.
Nea wɔ mboane ne mɔ boɛ.*+
24 Ɔluakɛ anwonyia ɛndɛnla ɛkɛ ne dahuu,+Anzɛɛ abotile ɛndɛnla ɛkɛ wɔ awolɛndoazo kɔsɔɔti anu.
25 Ndile minli, ndile fofolɛ fifi,Na bɛboɔboa awoka zo ndile nloa.
26 Mboane mralɛ nyinli maa wɔ ɛdanlɛ,Yɛɛ mbɔnkye nyinli maa ɛnyia azɛlɛ ezukoa.
27 Na ɛbanyia mbɔnkye meleke dɔɔnwo wɔanlo,Wɔ sua nu amra bɛanyia bie, na wɔanyia bie wɔanlea wɔ sonvolɛ mraalɛ.
Ɔbodwɛkɛ
^ Hibulu aneɛ nu, “bawo ye.”
^ Hibulu aneɛ nu, “ɛyɛvolɛ.”
^ Hibulu aneɛ nu, “Awie mɔɔ vi maanle gyɛne zo.”
^ Anzɛɛ “ahyihanlɛ.”
^ Anzɛɛ ɔkola ɔkile, “ɔnvi ahonle nu; ɔle mialera nu.”
^ Anzɛɛ “Ɛkɛla.”
^ Hibulu aneɛ nu, “ɔtietia zolɛ.”
^ Anzɛɛ “ɛkɛla.”
^ Anzɛɛ “ɛdu ɛvi.”
^ Anzɛɛ “mɔɔ tu folɛ mɔɔ vi ɛkɛla muala anu.”
^ Anzɛɛ “ɔnyia nwolɛ anzohwenlɛ.”
^ Anzɛɛ “ɛyɛvolɛ bie.”
^ Anzɛɛ “tendɛ ɔ nzo abo.”
^ Hibulu aneɛ nu, “si ɔ gɔnwo anyunlu a.”
^ Anzɛɛ “Sheol nee Abadɔn.”
^ Anzɛɛ “Zɔhane ala a bɛdua nganvolɛ zo bɛsɔ sonla bɛnea a.”
^ Anzɛɛ “Fa wɔ ahonle sie zo; Tie bɛ.”
