Mrɛlɛbulɛ 26:1-28

  • Bɛhile kɛzi mgbovonlema de la (13-16)

  • Mmafa ɛ nwo ɛwula awie butule nu (17)

  • Kpo nzɛmedɛ (18, 19)

  • Ɛyɛne ɛnle ɛkɛ a, senle ɛnle ɛkɛ (20, 21)

  • Dumasɛkyevo edwɛkɛ le kɛ aleɛ mɔɔ yɛ fɛ (22)

26  Kɛ mɔɔ wawaa nu ezukɔtweaba nee ma ɛdelɛ mekɛ nu ezule de la,Zɔhane ala a enililɛ ɛnfɛta koasea a.+   Kɛ mɔɔ aloma ɛnli tutɛnla mgbane na nyamenleakatiba ɛndu mgbane la,Zɔhane ala a amowa ɛmba mgbane a.*   Empele fɛta ɛkpɔnwɔ, nyɛma fɛta asoaso,+Yɛɛ baka fɛta ahoasea nzi.+   Mmabua koasea kɛ mɔɔ ye ngoaseade ne de la,Amaa wɔanyɛ kɛ ɔdaye la.*   Bua koasea kɛ mɔɔ ye ngoaseade ne de la,Amaa yeandwenle kɛ ɔze nrɛlɛbɛ.+   Sonla mɔɔ fa edwɛkɛ wula koasea asa anu laLe kɛ sonla mɔɔ bu ɔdaye mumua ne ɔ gyakɛ na ɔboda ɔ nwo* la.   Kɛ mɔɔ wuliravolɛ mɔɔ tia tɔ zo agyakɛ de* la,Zɔhane ala a mrɛlɛbulɛ de wɔ ahoasea anloa anu a.+   Anyunlunyia mɔɔ bɛfa bɛmaa koasea la,Le kɛ bolɛ mɔɔ bɛva bɛkyekye totoabɔ nu la.+   Kɛzi mbowule de wɔ nzanli asa anu la,Zɔhane ala a mrɛlɛbulɛ de wɔ ahoasea anloa anu a. 10  Kɛzi ɛdatovo mɔɔ boda menli mgbane mgbane de la,Zɔhane ala a sonla mɔɔ bɔ koasea anzɛɛ bɛdabɛ mɔɔ bɛlɛpɛ nu bɛaze ɛkpa la noko de a. 11  Kɛ mɔɔ twea sia kɔ ye ɛveleɛ nwo la,Zɔhane ala a koasea sia yɛ ye ngoaseade ne a.+ 12  Wɔnwu sonla mɔɔ dwenle kɛ ɔze nrɛlɛbɛ la ɔ?+ Koasea bɔbɔ lɛ anyelazo tɛla ye. 13  Mgbovonle sonla ka kɛ: “Awenade kakula la adenle ne anu,Awenade wɔ gua ne azo!”+ 14  Kɛ mɔɔ anlenkɛ pɛnepɛne ɔ nwo wɔ ndɛla zo la,Zɔhane ala a mgbovonle kakyihakyi ɔ nwo wɔ ye ɛkpa zo a.+ 15  Mgbovonle sonla fa ɔ sa to ɛyɛba nu,Noko ɔyɛ ye ɛvɛlɛ kpole kɛ ɔbava yeawula ɔ nloa anu.+ 16  Mgbovonle sonla dwenle kɛ ɔze nrɛlɛbɛƆtɛla menli nsuu mɔɔ maa mualɛ kpalɛ la. 17  Sonla mɔɔ ɛlɛpɛ nu na ɔfa ɛya kpole wɔ butule mɔɔ ɛnle ye ɛdeɛ la anwo* laLe kɛ sonla mɔɔ sɔ twea nzo la.+ 18  Kɛ mɔɔ ɛzɛlɛ toto ɛda mbaka, atwɛ nee ninyɛne mɔɔ ku sonla la 19  Zɔhane ala a sonla mɔɔ bɛlɛbɛla ɔ gɔnwo na ɔka kɛ, “Melɛbɔ nzɛmedɛ ala!” la noko de a.+ 20  Saa ɛyɛne ɛnle ɛkɛ a, senle nu,Yɛɛ dumasɛkyevo ɛnle ɛkɛ a, butule bo pɛ.+ 21  Kɛ mɔɔ emunlike maa samɛnlakɛ sɔ na ɛyɛne maa senle sɔ la,Zɔhane ala a sonla mɔɔ kulo manzonle la twehwe butule a.+ 22  Dumasɛkyevo edwɛkɛ le kɛ aleɛ mɔɔ yɛ fɛ* la;Bɛme ye ɛkɛ ne ala bɛmaa ɔkɔtɔ bɛ kunlu.+ 23  Kɛzi dwɛtɛ fufule mɔɔ bɛva bɛfɔlo buakɛ sinli nwo de laZɔhane ala a edwɛkɛ menlemenle* mɔɔ vi amumuyɛnli ahonle nu la noko de a.+ 24  Sonla mɔɔ kpɔ awie mɔ la ɛnla ye ali wɔ ye ɛdendɛlɛ nu,Noko ɔle mɛlɛbɛla wɔ ye ahonle nu. 25  Ɔtendɛ kɛnlɛma ɛdeɛ, noko mmadie ye ɛdi,Ɔluakɛ bɛkyi ninyɛne nsuu wɔ ye ahonle nu.* 26  Ɔfa mɛlɛbɛla ɔkeda ye ɛkpɔlɛ ne azo ɛdeɛ,Noko ye amumuyɛ ne bala ali wɔ asafo ne anu. 27  Sonla mɔɔ fu kuma la badɔ nu,Yɛɛ awie biala mɔɔ kɛhundo bolɛ la—ɔbazia yearadɔ ɔ nwo zo.+ 28  Adalɛ ɛtafinlimalɛ kyi bɛdabɛ mɔɔ yebɛlɛbɛla bɛ la,Yɛɛ ɛnloanlɛ mɔɔ kanvo menli adalɛ nu la fa ɛzɛkyelɛ ba.+

Ɔbodwɛkɛ

Anzɛɛ ɔkola ɔkile, “Zɔhane ala a amowa mɔɔ ɛnfɛta la pɛ nu se a.”
Anzɛɛ “Amaa ɛ nee ye anyɛ ko.”
Hibulu aneɛ nu, “ɔno amumuyɛ.”
Anzɛɛ “henda nwo.”
Anzɛɛ ɔkola ɔkile, “fa ɔ nwo wula nu.”
Anzɛɛ “debie mɔɔ bɛme ye ndɛndɛ.”
Hibulu aneɛ nu, “ɛnloalɛ menlemenle.”
Anzɛɛ “Ɔluakɛ ye ahonle le kyibadeɛ bɔkɔɔ.”