Mrɛlɛbulɛ 20:1-30

  • Nwanye le agolobɛnwo (1)

  • Mgbovonle sonla ɛnzo ɛya wɔ fɔsɛlɛ nu (4)

  • Sonla nzuzulɛ le kɛ azule mɔɔ le kuma la (5)

  • Ɛwɔkɛ mɔɔ bɛpele bɛ nwo bɛbɔ la anwo kɔkɔbɔlɛ (25)

  • Mgbavolɛ anyunlunyia a le bɛ anwosesebɛ (29)

20  Nwanye le agolobɛnwo,+ nza ɛsesebɛ maa sonla yɛ mgbane mgbane;+Awie biala mɔɔ bɛmaa ɔfo adenle la ɛnze nrɛlɛbɛ.+   Belemgbunli nwo ɛzulolɛ le kɛ awenade* mɔɔ ɛlɛkulu la;+Awie biala mɔɔ kɛha ye ɛya la fa ye ngoane to esiane nu.+   Ɔle enililɛ kɛ sonla kɛhwe ɔ nwo kɛvi butulelilɛ nwo,+Noko koasea biala bava ɔ nwo awula nu.+   Mgbovonle sonla ɛnzo ɛya wɔ fɔsɛlɛ nu,Ɔti ɔbazɛlɛzɛlɛ debie wɔ ma ɛdelɛ mekɛ nu wɔ mekɛ mɔɔ ɔnlɛ ɛhwee la.*+   Sonla ahonle nu nzuzulɛ* le kɛ azule mɔɔ le kuma la,Noko sonla mɔɔ lɛ adwenlenunwunlɛ la sa bie.   Menli dɔɔnwo bɔ bɛ ɛlɔlɛ kpundii ne nolo,Noko sonla mɔɔ di nɔhalɛ la, bɛnnyia ye!   Tenlenenli fa nɔhalɛlilɛ* dua.+ Anyelielɛ a le ɔ mra* mɔɔ bɛbara wɔ ɔ nzi la.+   Saa belemgbunli tɛnla ye ebia nu kɛ ɔbua ndɛne a,+Ɔfa ɔ nye ɔye ɛtane kɔsɔɔti ɔfi ɛkɛ.+   Nwane a kola ka kɛ: “Mede me ahonle nu;+Ɛtane ɛnle me nwo bieko” a?+ 10  Adalɛ tone nee adalɛ ɛzuzudeɛ*—Bɛ mu nwiɔ bɛle Gyihova kyibadeɛ.+ 11  Kakula* bɔbɔ, bɛdua ye nyɛleɛ zo a bɛnwu ye a,Saa ye subane nwo te na ɔtenrɛ a.+ 12  Ɛnzolɛ mɔɔ te edwɛkɛ nee ɛnyelɛ mɔɔ nwu debie la,—Gyihova a yɛle bɛ mu nwiɔ a.+ 13  Mmakulo nafelɛ, anrɛɛ ɛbali ehyia.+ Buke ɛ nye, amaa wɔanyia aleɛ dɔɔnwo wɔali.+ 14  Sonla mɔɔ tɔ debie la ka kɛ: “Ɔnle kpalɛ, ɔnle kpalɛ!”Akee ɔfi ɛkɛ ne ɔkɔ na ɔtu ɔ nloa anu.+ 15  Nvutuke wɔ ɛkɛ, yɛɛ ezukoa awolɛ ngɔkɔlɛ* dɔɔnwo noko wɔ ɛkɛ,Noko ɛnloanlɛ mɔɔ maa adwenle la le debie mɔɔ sonle bolɛ.+ 16  Saa sonla di ɛyɛvolɛ agyinlanu a, die ye ɛdanlɛ;*+Saa ɔdi ɛyɛvolɛ raalɛ* agyinlanu a, die ye debie sie awoba.+ 17  Aleɛ mɔɔ bɛdua mɛlɛbɛla adenle zo bɛnyia la yɛ sonla fɛ,Noko nzinlii ɔ nloa anu bayɛ awozaka ngome.+ 18  Agyinla ɛdulɛ* maa ngyehyɛleɛ wie boɛ,*+Na dua adehilelɛ kpalɛ* zo ko wɔ konle.+ 19  Dumasɛkyevo duolua nu da fealeranu edwɛkɛ ali;+Ɛ nee sonla mɔɔ kulo awie mɔ anwo edwɛkɛ ɛhanlɛ la mmatu. 20  Awie biala mɔɔ wa ye papa nee ye mame amonle la,Ye kɛnlaneɛ banlu wɔ mekɛ mɔɔ awozinli kɛra la.+ 21  Agyapadeɛ mɔɔ bɛdua anyebolo zo bɛnyia laAwieleɛ ɛnrɛyɛ nyilalɛ.+ 22  Mmaka kɛ: “Mebadua ɛtane nwo kakɛ!”+ Fa ɛ nye to Gyihova anwo zo+ na ɔbalie wɔ.+ 23  Adalɛ ɛzuzudeɛ* le Gyihova kyibadeɛ,Yɛɛ mɛlɛbɛla tone ɛnle kpalɛ. 24  Gyihova a kile sonla gyakɛ ɛdudulɛ adenle a;+Kɛ ɔkɛyɛ na sonla anwu ye adenle nu* ɛ? 25  Ɔle ɛhane kɛ sonla bapele ɔ nwo ndɛndɛ adea nu kɛ, “Nwuanzanwuanza!”+ Na nzinlii yeadwenle ɛwɔkɛ mɔɔ ɔbɔle la anwo.+ 26  Belemgbunli nrɛlɛbɛvolɛ bɔ amumuyɛma gua+Na ɔfa ma ɛwosolɛ ehwili ɔfo bɛ nwo zo.+ 27  Sonla ɛnwomenle le Gyihova kɛnlaneɛ,Ɔfa ɔneɛnlea mɔɔ vea sonla nu la anu. 28  Ɛlɔlɛ kpundii nee nɔhalɛlilɛ bɔ belemgbunli nwo bane;+Ɔdua ɛlɔlɛ kpundii zo ɔmaa ye belemgbunli ebia ne gyinla.+ 29  Mgbavolɛ anyunlunyia a le bɛ anwosesebɛ,+Yɛɛ mrenyia mgbanyinli enililɛ a le bɛ egyɛne.+ 30  Ɛbodalɛ nee nganlɛ foa* ɛtane,+Yɛɛ ɛbolɛ wowo sonla mumua ne anu.

Ɔbodwɛkɛ

Anzɛɛ “awenade kakula mɔɔ anwo yɛ se.”
Anzɛɛ ɔkola ɔkile, “Ɔbakpondɛ bie wɔ ma ɛdelɛ mekɛ nu noko ɔnrɛnyia ɛhwee.”
Anzɛɛ “adwenle.” Hibulu aneɛ nu, “folɛdulɛ.”
Anzɛɛ “munlililɛ.” Nea Edwɛkɛbohilelɛ.
Hibulu aneɛ nu, “ɔ mra mrenyia.”
Anzɛɛ “Tone nu awolɛ ngakyile nwiɔ nee ɛzuzudeɛ ngakyile nwiɔ.”
Anzɛɛ “Kakula nrenyia.”
Anzɛɛ “tɛladeɛ.”
Anzɛɛ “ɛyɛvolɛ bie.”
Anzɛɛ “Folɛdulɛ.”
Anzɛɛ “gyinla kpundii.”
Anzɛɛ “nrɛlɛbɛ adenle.”
Anzɛɛ “Tone nu awolɛ ngakyile nwiɔ.”
Anzɛɛ “anwu ɛleka mɔɔ ɔwɔ kɛ ɔkɔ la.”
Anzɛɛ “nrinzi.”