Mrɛlɛbulɛ 15:1-33

  • Mualɛ bɛtɛɛ pɛ ɛya zo (1)

  • Gyihova anye wɔ ɛleka biala (3)

  • Nyamenle anye die tenlenema asɔneyɛlɛ nwo (8)

  • Adwenle ngyehyɛleɛ mɔɔ bɛnzuzu nwolɛ la ɛnyɛ boɛ (22)

  • Dwenle kolaa na wɔabua (28)

15  Mualɛ bɛtɛɛ pɛ ɛya zo,+Noko edwɛkɛ mɔɔ wowɔ* la ka ɛya.+   Nrɛlɛbɛvolɛ atafinlima ka ninyɛne mgbalɛ mɔɔ ɔze la,+Noko koasea anloa bɔ ngoaseade nolo.   Gyihova anye wɔ ɛleka biala,Ɔnea ɛtanevolɛma nee kpalɛma.+   Ɛtafinlimalɛ bɛtɛɛ* le ngoane baka,+Noko mɛlɛbɛla ɛdendɛlɛ maa bɛdi nyane.*   Koasea ɛmbu ye papa ɛdenrɛdenrɛlɛ bie,+Noko sonla mɔɔ anye gyi ɔ ti anwo la die ɛdenrɛdenrɛlɛ* to nu.+   Anwonyia dɔɔnwo wɔ tenlenenli sua nu,Noko mɔɔ amumuyɛnli nyia la* twe ngyegyelɛ maa ye.+   Nrɛlɛbɛvolɛ anloa maa adwenle tɛlɛ,+Noko tɛ zɔhane a koasea ahonle de a.+   Amumuyɛma afɔlebɔlɛ le Gyihova kyibadeɛ,+Noko Ɔ nye die tenlenema asɔneyɛlɛ nwo.+   Gyihova kyi amumuyɛnli adenle,+Noko ɔkulo sonla mɔɔ di tenleneyɛlɛ nzi la.+ 10  Ɛdenrɛdenrɛlɛ le ɛtane* maa sonla mɔɔ ɛkpo adenle ne la,+Noko awie biala mɔɔ kyi ahwibɛnyunlu la bawu.+ 11  Gyihova kola nwu bɛdabɛ mɔɔ bɛwɔ Nla* nee ɛzɛkyelɛ kuma* nu la.+ Fane nyɛ a ɔnrɛnwu mɔɔ wɔ sonla ahonle nu a!+ 12  Sonla mɔɔ memaa ɔ nwo zo la* ɛngulo mɔɔ tenrɛdenrɛ ye* la edwɛkɛ.+ Ɔnrɛhɔbiza nrɛlɛbɛvolɛ.+ 13  Anyelielɛ ahonle maa sonla nyunlu te,Noko nyanelilɛ maa sonla nwo bubu ye.*+ 14  Ahonle mɔɔ lɛ ndelebɛbo la kpondɛ adwenle,+Noko koasea anloa di ngoaseade nzi.+ 15  Sonla mɔɔ ɛlɛdi nyane la mekɛ kɔsɔɔti le ɛtane,+Noko sonla mɔɔ lɛ anyelielɛ ahonle* la wɔ ɛkponledolɛ nu dahuu.+ 16  Ɛlɛ ekyi na ɛsulo Gyihova a ɔle kpalɛ+Ɔtɛla anwonyia kpole mɔɔ adwenleadwenle* boka nwo la.+ 17  Nya nya aleɛ mɔɔ ɛlɔlɛ wɔ nu la le kpalɛ+Tɛla ɛnlankɛ nyinli mɔɔ ɛlɔ na ɛkpɔlɛ wɔ nu la.+ 18  Sonla mɔɔ lɛ ahonle kpole la twehwe konle,+Noko sonla mɔɔ kyɛ na yeava ɛya la maa butule ka aze.+ 19  Mgbovonle adenle le kɛ mbowule bane la,+Noko tenlenenli adenle le kɛ ademgbole mɔɔ le sɛsɛ la.+ 20  Ralɛ nrɛlɛbɛvolɛ maa ye papa di fɛlɛko,+Noko koasea ɛmbu ye mame.+ 21  Sonla mɔɔ ɛnlɛ adwenle* la anye die ngoaseade nwo,+Noko sonla mɔɔ lɛ adwenlenunwunlɛ la kɔ ɔ nyunlu fɔɔnwo.+ 22  Ngyehyɛleɛ mɔɔ bɛ nee awie anzuzu nwolɛ la,* ɛnyɛ boɛ,Noko folɛdulɛma dɔɔnwo wɔ nwo a ɔwie boɛ.+ 23  Sonla maa mualɛ kpalɛ a* ɔ nye die,+Yɛɛ edwɛkɛ mɔɔ bɛkɛha ye mekɛ mɔɔ fɛta la—nea kɛzi ɔle kpalɛ a!+ 24  Ngoane adenle kɔ anwuma maa sonla mɔɔ lɛ nwunu la,+Amaa yeangɔ Nla* mɔɔ ɔwɔ aze la anu.+ 25  Gyihova babubu anwomemaazoma azua agua aze,+Noko ɔbamaa ahunlanvolɛ ɛweɛne agyinla ɛkɛ dahuu.+ 26  Gyihova kyi amumuyɛnli adwenle ɛtane ɛvalɛ,+Noko edwɛkɛ kɛnlɛma nwo te maa Ye.+ 27  Sonla mɔɔ kpondɛ nvasoɛ ɛtane la twehwe ngyegyelɛ* maa ye sua nu amra,+Noko sonla mɔɔ kyi belaebo ɛlielɛ la badɛnla ngoane nu.+ 28  Tenlenenli ahonle dwenle kolaa na yeamaa mualɛ,*+Noko amumuyɛma anloa keha ninyɛndane. 29  Gyihova nee amumuyɛma avinli twe,Noko ɔtie tenlenema asɔneyɛlɛ.+ 30  Ɛnyelɛ mɔɔ ta la maa ahonle di fɛlɛko;*Amaneɛbɔlɛ kpalɛ maa mbowule ne mɔ anwo kpundi bɛ.*+ 31  Sonla mɔɔ die ahwibɛnyunlu mɔɔ maa ngoane to nu laNee nrɛlɛbɛvolɛma tɛnla awuke nu.+ 32  Awie biala mɔɔ kpo ɛdenrɛdenrɛlɛ la ɛmbu ye ngoane,*+Noko awie biala mɔɔ die ahwibɛnyunlu to nu la nyia ndelebɛbo.*+ 33  Gyihova ɛzulolɛ le ndetelɛ mɔɔ maa bɛnwu nrɛlɛbɛ,+Yɛɛ mɛlɛbɛnwoaze kɔwie anyunlunyia nu.+

Ɔbodwɛkɛ

Anzɛɛ “yɛ nyane.”
Anzɛɛ “Ɛtafinlimalɛ mɔɔ yɛ ayile la.”
Hibulu aneɛ nu, “bubu sunsum.”
Anzɛɛ “ahwibɛnyunlu.”
Anzɛɛ “nvasoɛ.”
Anzɛɛ “anu yɛ se.”
Anzɛɛ “Sheol,” ɛhye kile, alesama nla. Nea Edwɛkɛbohilelɛ.
Anzɛɛ “nee Abadɔn.”
Anzɛɛ “Agolobɛnwonli.”
Anzɛɛ “mɔɔ twi ɔ nyunlu.”
Anzɛɛ “bubu sunsum ne.”
Anzɛɛ “ahonle kpalɛ.”
Anzɛɛ “ngyegyelɛ.”
Anzɛɛ “ɛnze nrɛlɛbɛ.”
Anzɛɛ “mɔɔ bɛamkpondɛ nwolɛ folɛdulɛ la.”
Hibulu aneɛ nu, “Sonla anloa anu mualɛ maa.”
Anzɛɛ “Sheol,” ɛhye kile, alesama nla. Nea Edwɛkɛbohilelɛ.
Anzɛɛ “anyiemgba.”
Anzɛɛ “dwenle kɛzi ɔbamaa mualɛ la anwo kpalɛ; dwenle kolaa na yeadendɛ.”
Anzɛɛ “Ɛfa anyelielɛ ɛnea awie a ɔmaa ye ahonle di fɛlɛko.”
Hibulu aneɛ nu, “maa mbowule ne mɔ yɛ mbelane.”
Anzɛɛ “ɛkɛla.”
Hibulu aneɛ nu, “ahonle.”