Mrɛlɛbulɛ 11:1-31
11 Gyihova kyi nzisi tone,*Noko ɔ nye die ɛzuzudeɛ mɔɔ di munli la anwo.*+
2 Saa anwomemaazo* ba a, anyiemgba a bali ɔ nzi a,+Noko bɛlɛvoma ze nrɛlɛbɛ.+
3 Tenlenema nɔhalɛlilɛ* a kile bɛ adenle a,+Noko adalɛma mɛlɛbɛla bazɛkye bɛ.+
4 Anwonyia nwo* ɛnrɛra nvasoɛ wɔ ɛya kenle ne,+Noko tenleneyɛlɛ a balie sonla avi ewule nu a.+
5 Sonla mɔɔ edwɛkɛ ɛnle ɔ nwo la tenleneyɛlɛ maa ye adenle tenrɛ fɔɔnwo,Noko amumuyɛnli amumuyɛyɛlɛ bamaa yeadɔ aze.+
6 Tenlenema tenleneyɛlɛ balie bɛ,+Noko mɛlɛbɛlama atiakunluwɔzo bahye bɛ.+
7 Saa amumuyɛnli wu a, ye anyelazo minli;Yɛɛ ye anwosesebɛ ne mɔɔ ɔfa ɔ nwo ɔto zo la noko minli.+
8 Bɛdie tenlenenli bɛfi anwongyelelɛ nu,Na amumuyɛnli kɔdi ɔ gyakɛ anu.+
9 Kpɔkyevolɛ* fa ɔ nloa sɛkye ɔ gɔnwo,Noko bɛdua nrɛlɛbɛ zo a bɛdie tenlenenli a.+
10 Tenlenenli kpalɛyɛlɛ maa suakpole di fɛlɛko,Na saa amumuyɛnli wu a, anyelielɛ ba.+
11 Tenlenema nyilalɛ kpogya suakpole zo,+Noko amumuyɛma anloa maa ɔbɔ.+
12 Sonla mɔɔ ɛnlɛ adwenle* la kyi* ɔ gɔnwo,Noko sonla mɔɔ lɛ nɔhalɛ adwenlenunwunlɛ la yɛ koonwu.+
13 Dumasɛkyevo duolua nu da fealeranu edwɛkɛ ali,+Noko sonla mɔɔ bɛdie ye bɛdi la* fa edwɛkɛ sie.*
14 Saa adehilelɛ kpalɛ* ɛnle ɛkɛ a, menli nwu amaneɛ,Noko folɛdulɛma dɔɔnwo maa ɔwie menli boɛ.*+
15 Mɔɔ di agyinlanu die bosea* maa ɛyɛvolɛ la banwu amaneɛ,+Noko sonla mɔɔ ɛnzoma menli sa nu ɛnyɛ ngyekyeleɛ la anwo badɔ ye.
16 Raalɛ kpalɛ* nyia anyunlunyia,+Noko mrenyia atisesebɛma pele anwonyia nwo.
17 Sonla mɔɔ atiakunlu le kɛnlɛma* la nyia zolɛ nvasoɛ,*+Noko atisesebɛ sonla twe ngyegyelɛ maa ɔ nwo.*+
18 Amumuyɛnli nyia mɛlɛbɛla ahatualɛ,+Noko mɔɔ dua tenleneyɛlɛ ma la nyia nɔhalɛ ahatualɛ.+
19 Mɔɔ gyinla tenleneyɛlɛ nzi kpundii la banyia ngoane,+Noko sonla mɔɔ di ɛtane nzi la bawu.
20 Gyihova kyi bɛdabɛ mɔɔ bɛ ahonle nu le bile la,+Noko ɔ nye die bɛdabɛ mɔɔ edwɛkɛ ɛnle bɛ ndenle nu la anwo.+
21 Nyia anwodozo ɛhye:* Ɛtanevolɛ ɛnrɛva ɔ nwo ɛnrɛli ɛlɛ,+Noko tenlenenli amra banyia bɛ ti.
22 Kɛzi nvutuke ngɛba de wɔ kpolike bonyi nu laZɔhane ala a raalɛ anwofɛlɛko mɔɔ kpo nrɛlɛbɛ la noko de a.
23 Mɔɔ tenlenenli kpondɛ la wie ye boɛ,+Noko mɔɔ amumuyɛnli anye la zo la kɔwie ɛya nu.
24 Sonla ne bie buke ɔ sa nu* noko ɔnyia dɔɔnwo;+Bie noko le abokɛ, noko ɔdi ehyia.+
25 Sonla* mɔɔ atiakunlu le kɛnlɛma la bakpazi,*+Yɛɛ mɔɔ maa awie mɔ anwo tɔ bɛ* la noko anwo badɔ ye.+
26 Mɔɔ fa ma bɔ abokɛ la menli bawa ye amonle,Noko bɛbayila mɔɔ tɔne ye la.
27 Mɔɔ bɔ mɔdenle yɛ kpalɛ la nyia ɛlolɛ,+Noko mɔɔ kpondɛ ɛtane bo zo la—yemɔ ala a bado ye a.+
28 Mɔɔ fa ɔ nwo to ye anwonyia zo la badɔ aze,+Noko tenlenenli bayɛ dokoo kɛ nya amolɛ.+
29 Awie biala mɔɔ fa ngyegyelɛ ba ye sua nu amra anwo zo* la ɛnrɛnyia ɛhwee,*+Yɛɛ koasea bayɛ nrɛlɛbɛvolɛ sonvolɛ.
30 Tenlenenli ma mɔɔ so la le ngoane baka,+Yɛɛ sonla mɔɔ kɛnyia ɛkɛla* dɔɔnwo la le nrɛlɛbɛvolɛ.+
31 Nɔhalɛ nu, saa bɛbadua tenlenenli kakɛ wɔ azɛlɛ ye azo a,Ɛnee nea kɛzi ɔbawie amumuyɛnli nee ɛtanevolɛ a!+
Ɔbodwɛkɛ
^ Anzɛɛ “bolɛ ɛzuzudeɛ nwo.”
^ Anzɛɛ “tone mɔɔ bɛwua nu.”
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Anzɛɛ “munlililɛ.” Nea Edwɛkɛbohilelɛ.
^ Anzɛɛ “Ninyɛne mɔɔ sonle bolɛ la anwo.”
^ Anzɛɛ “Sonla mɔɔ ɛnlie Nyamenle ɛnli la.”
^ Anzɛɛ “ɛnze nrɛlɛbɛ.”
^ Anzɛɛ “ɛmbu.”
^ Hibulu aneɛ nu, “mɔɔ di nɔhalɛ wɔ sunsum nu la.”
^ Hibulu aneɛ nu, “keda edwɛkɛ zo.”
^ Anzɛɛ “adehilelɛ mɔɔ nrɛlɛbɛ wɔ nu la.”
^ Anzɛɛ “maa menli nyia ngoane.”
^ Anzɛɛ “fa debie wula awoba.”
^ Anzɛɛ “Raalɛ mɔɔ anwo yɛ fɛ la.”
^ Anzɛɛ “Sonla mɔɔ lɛ ɛlɔlɛ kpundii.”
^ Anzɛɛ “boa ye ɛkɛla.”
^ Anzɛɛ “gua ɔ nyunlu aze.”
^ Hibulu aneɛ nu, “Ɛsalɛ la ɛsalɛ nu bɔbɔ a.”
^ Hibulu aneɛ nu, “kponde.”
^ Anzɛɛ “Ɛkɛla.”
^ Hibulu aneɛ nu, “bɛbamaa yeayɛ belane.”
^ Hibulu aneɛ nu, “mɔɔ maa awie mɔ nzule.”
^ Anzɛɛ “ɔgua bɛ nyunlu aze.”
^ Hibulu aneɛ nu, “bali anwoma agya.”
^ Nea Edwɛkɛbohilelɛ.
