Lɛvitikɔso 23:1-44

  • Kenle nwuanzanwuanza nee ɛvoyialilɛ (1-44)

    • Ɛnwomenlelielɛ kenle (3)

    • Akpabɛnwo (4, 5)

    • Paano Mɔɔ Mgbɔvonle Ɛnle Nu Ɛvoyia (6-8)

    • Ma mɔɔ limoa la afɔlebɔlɛ (9-14)

    • Dapɛne Dapɛne Ɛvoyia (15-21)

    • Ma ɛdelɛ kpalɛ (22)

    • Aweɛne Ɛbɔlɛ Ɛvoyia (23-25)

    • Mgbɔdalɛ Kenle (26-32)

    • Kpɔda Bo Ɛdɛnlanlɛ Ɛvoyia (33-43)

23  Gyihova doale zo zele Mosisi kɛ:  “Tendɛ kile Yizilayɛma na se bɛ kɛ, ‘Gyihova ɛvoyia ne mɔ+ mɔɔ ɔwɔ kɛ bɛbɔ ye nolo la+ le nyianu nwuanzanwuanza. Me ɛvoyia ne mɔ ɛne:  “‘Bɛbayɛ gyima kenle nsia, noko kenle nsuu ne le ɛnwomenlelielɛ kenle mɔɔ ɔwɔ kɛ bɛdie bɛ menle bɔkɔɔ a,+ ɔle nyianu nwuanzanwuanza. Ɔnle kɛ bɛyɛ gyima biala. Ɔle Gyihova ɛnwomenlelielɛ kenle wɔ ɛleka biala mɔɔ bɛkɛdɛnla la.+  “‘Ɛhye a le Gyihova ɛvoyia ne mɔ a, bɛle nyianu nwuanzanwuanza mɔɔ bɛ mekɛ dwu a ɔwɔ kɛ bɛbɔ ye nolo a:  Siane ne mɔɔ limoa la kenle 14 ne+ nɔsolɛ nu* le Gyihova Akpabɛnwo.+  “‘Siane ɛhye kenle 15 ne le Paano Mɔɔ Mgbɔvonle Ɛnle Nu Ɛvoyia maa Gyihova.+ Ɔwɔ kɛ bɛdi paano mɔɔ mgbɔvonle ɛnle nu la kenle nsuu.+  Kenle ne mɔɔ limoa la, bɛbayɛ nyianu nwuanzanwuanza.+ Ɔnle kɛ bɛyɛ gyima ɛsesebɛ biala.  Noko bɛbabɔ ɛyelalɛ afɔle bɛamaa Gyihova too kenle nsuu. Bɛbayɛ nyianu nwuanzanwuanza wɔ kenle nsuu ne azo. Ɔnle kɛ bɛyɛ gyima ɛsesebɛ biala.’”  Gyihova doale zo zele Mosisi kɛ: 10  “Ka kile Yizilayɛma kɛ, ‘Saa bɛdwu azɛlɛ ne mɔɔ melɛfa meamaa bɛ la azo na bɛte zolɛ ma a,+ ɔwɔ kɛ bɛfa ma mɔɔ bɛkɛlimoa bɛkɛde la file ko bɛbɛlɛ ɛsɔfo ne.+ 11  Na ɔbado ye ehono wɔ Gyihova anyunlu yeamaa bɛanyia ɔ nyunlu ɛlolɛ. Ɔwɔ kɛ ɛsɔfo ne to ye ehono wɔ kenle mɔɔ li Ɛnwomenlelielɛ kenle ne anzi la anu. 12  Kenle mɔɔ bɛbado file ne ehono la, ɔwɔ kɛ bɛfa boaneralɛ nyinli mɔɔ te kpɔkɛ mɔɔ ɛli ɛvolɛ ko la bɛbɔ ɛyelalɛ afɔle bɛmaa Gyihova. 13  Bɛbava esamo motoo yifa ngyɛnu bulu anu nwiɔ* mɔɔ bɛva nwole bɛfɔtɔ la bɛabɔ ma afɔle bɛaboka nwo, afɔlebɔlɛ evuanlɛ mɔɔ Gyihova anye die nwolɛ,* afɔle mɔɔ bɛva senle bɛbɔ la. Bɛbava nwanye hin* ngyɛnu nna anu ko bɛabɔ nwolɛ nza afɔle. 14  Ɔnle kɛ bɛdi paano, ma ngyehye, anzɛɛ ma fofolɛ biala kɔkpula kenle ɛhye, kɔkpula kɛ bɛbava bɛ Nyamenle ne afɔlebɔdeɛ bɛara la. Ɔle mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu wɔ ɛleka biala mɔɔ bɛkɛdɛnla la. 15  “‘Kenle mɔɔ li Ɛnwomenlelielɛ kenle ne anzi, ɔvi kenle mɔɔ bɛbava file ne bɛara bɛamaa bɛava bɛabɔ ehono afɔle ne la,+ ɔwɔ kɛ bɛtia ɛnwomenlelielɛ kenle nsuu. Ɔwɔ kɛ ɔyɛ dapɛne nsuu. 16  Bɛbadia kenle 50+ kɔkpula kenle mɔɔ li Ɛnwomenlelielɛ kenle ne mɔɔ tɔ zo nsuu ne la anzi, na akee bɛava ma fofolɛ afɔlebɔdeɛ bɛarɛlɛ Gyihova.+ 17  Ɔwɔ kɛ bɛfa paano nwiɔ bɛfi ɛleka biala mɔɔ bɛde la bɛbabɔ ehono afɔle. Ɔwɔ kɛ bɛfa esamo motoo yifa ngyɛnu bulu anu nwiɔ* a bɛyɛ a. Ɔwɔ kɛ bɛfa mgbɔvonle bɛwula nu bɛto+ kɛ ma mɔɔ limoa la bɛmaa Gyihova.+ 18  Ɔwɔ kɛ bɛfa mboane mralɛ nyinli nsuu mɔɔ ko biala ɛli ɛvolɛ ko na bɛte kpɔkɛ la, nee ɛnlankɛ ralɛ nyinli ko yɛɛ mboane nyinli nwiɔ bɛboka paano ne anwo bɛba.+ Bɛbava bɛabɔ ɛyelalɛ afɔle bɛamaa Gyihova bɛaboka ma afɔlebɔdeɛ nee nza afɔlebɔdeɛ ne anwo, kɛ afɔlebɔlɛ evuanlɛ mɔɔ Gyihova anye die nwolɛ,* afɔle mɔɔ bɛva senle bɛbɔ la. 19  Ɔwɔ kɛ bɛfa abɔnkye ralɛ ko bɛbɔ ɛtane afɔle+ na bɛfa mboane mralɛ nyinli nwiɔ mɔɔ ko biala ɛli ɛvolɛ ko la bɛbɔ anzodwolɛ afɔle.+ 20  Ɛsɔfo ne bava ma mɔɔ limoa la paano ne yɛɛ mboane mralɛ nyinli nwiɔ ne aboka nwo ado ye ehono kɛ ehono afɔlebɔlɛ wɔ Gyihova anyunlu. Ɔle debie nwuanzanwuanza ɔmaa Gyihova na ɔbayɛ ɛsɔfo ne ɛdeɛ.+ 21  Kenle ɛhye anu, bɛbabɔ nolo+ kɛ bɛbayɛ nyianu nwuanzanwuanza. Ɔnle kɛ bɛyɛ gyima ɛsesebɛ biala. Ɔle mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu wɔ ɛleka biala mɔɔ bɛkɛdɛnla la. 22  “‘Saa bɛlɛte bɛ azɛlɛ ne azo ma a, ɔnle kɛ bɛte mɔɔ wɔ bɛ ɛya ne anloa la amuala yɛɛ ɔnle kɛ bɛsesa bɛ ma mɔɔ bɛkɛde la abo zo ne.+ Bɛgyakyi bɛmaa ehyiavolɛma*+ nee nyɛvolɛ.+ Medame a mele Gyihova bɛ Nyamenle ne a.’” 23  Gyihova doale zo zele Mosisi kɛ: 24  “Ka kile Yizilayɛma kɛ, ‘Siane nsuu ne kenle mɔɔ limoa la, ɔwɔ kɛ bɛdie bɛ menle bɔkɔɔ, ɔle kenle mɔɔ bɛbabɔ nwolɛ aweɛne bɛahakye bɛ+ kɛ ɔle nyianu nwuanzanwuanza a. 25  Ɔnle kɛ bɛyɛ gyima ɛsesebɛ biala, yɛɛ bɛbabɔ ɛyelalɛ afɔle bɛamaa Gyihova.’” 26  Gyihova zele Mosisi bieko kɛ: 27  “Noko siane nsuu ɛhye kenle bulu ne le Mgbɔdalɛ Kenle.+ Ɔwɔ kɛ bɛyɛ nyianu nwuanzanwuanza, na bɛkile bɛ nwo nyane*+ na bɛbɔ ɛyelalɛ afɔle bɛmaa Gyihova. 28  Ɔnle kɛ bɛyɛ gyima biala wɔ zɔhane kenle ne ɔluakɛ ɔle mgbɔdalɛ kenle mɔɔ bɛbava bɛali bɛ ti mgbɔdalɛ+ wɔ Gyihova bɛ Nyamenle ne anyunlu a. 29  Awie* biala mɔɔ angile ɔ nwo nyane* wɔ kenle ɛhye anu la, bɛbaye ye* bɛavi ye menli ne avinli.+ 30  Na mebazɛkye awie* biala mɔɔ kɛyɛ gyima wɔ kenle ɛhye anu la meavi ye menli ne avinli. 31  Ɔnle kɛ bɛyɛ gyima biala. Ɔle mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu wɔ ɛleka biala mɔɔ bɛkɛdɛnla la. 32  Ɔle ɛnwomenlelielɛ kenle mɔɔ ɔwɔ kɛ bɛdie bɛ menle bɔkɔɔ a, na siane ne kenle ngɔnla ne nɔsolɛ nu, bɛbahile bɛ nwo* nyane.+ Bɛli bɛ ɛnwomenlelielɛ kenle ne ɔvi nɔsolɛ nu kɔdwu nɔsolɛ nu.” 33  Gyihova doale zo zele Mosisi kɛ: 34  “Ka kile Yizilayɛma kɛ, ‘Siane nsuu ɛhye kenle 15 ne azo, bɛbali Kpɔda Bo Ɛdɛnlanlɛ* Ɛvoyia ne kenle nsuu bɛawula Gyihova anyunlunyia.+ 35  Kenle mɔɔ limoa la anu, bɛbayɛ nyianu nwuanzanwuanza, na ɔnle kɛ bɛyɛ gyima ɛsesebɛ biala. 36  Ɔwɔ kɛ bɛbɔ ɛyelalɛ afɔle bɛmaa Gyihova kenle nsuu. Kenle mɔtwɛ ne azo, ɔwɔ kɛ bɛyɛ nyianu nwuanzanwuanza+ na bɛbɔ ɛyelalɛ afɔle bɛmaa Gyihova. Ɔle nyianu titili. Ɔnle kɛ bɛyɛ gyima ɛsesebɛ biala. 37  “‘Ɛhye mɔ a le Gyihova ɛvoyia ne mɔ+ mɔɔ ɔwɔ kɛ bɛbɔ ye nolo kɛ bɛle nyianu nwuanzanwuanza+ mɔɔ bɛbava ɛyelalɛ afɔlebɔdeɛ bɛarɛlɛ Gyihova a: ɛyelalɛ afɔlebɔlɛ+ nee ma afɔlebɔlɛ+ yɛɛ nza afɔlebɔlɛ+ kɛ mɔɔ bɛhyehyɛ ye alehyenlɛ biala la. 38  Bɛbabɔ ɛhye mɔ bɛaboka afɔle mɔɔ bɛbɔ wɔ Gyihova ɛnwomenlelielɛ kenle ne,+ bɛ ahyɛlɛdeɛ ne mɔ,+ bɛ ɛwɔkɛbɔlɛ afɔlebɔlɛ ne mɔ+ yɛɛ afɔle mɔɔ ɔwɔ kɛ bɛfi bɛ ɛhulolɛ nu bɛbɔ+ bɛmaa Gyihova la anwo. 39  Noko siane nsuu ne kenle 15 ne azo mɔɔ ɛnee bɛboɔboa bɛ azɛlɛ ne azo aleɛ ne anloa la, ɔwɔ kɛ bɛdi Gyihova ɛvoyia ne too kenle nsuu.+ Kenle ne mɔɔ limoa nee kenle mɔtwɛ ne azo, ɔwɔ kɛ bɛdie bɛ menle bɔkɔɔ.+ 40  Kenle ne mɔɔ limoa la, bɛbava mbaka ngɛnlɛma zo ma, arɛlɛ mrɛlakɛ,+ mbaka mɔɔ lɛ nya dɔɔnwo la ngane nee bɔnza nu* pɔpola mbaka ngane na bɛali fɛlɛko+ wɔ Gyihova bɛ Nyamenle ne anyunlu too kenle nsuu.+ 41  Ɔwɔ kɛ bɛdi Gyihova ɛvoyia ne too kenle nsuu wɔ ɛvolɛ ne anu.+ Ɔle mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu a, ɔwɔ kɛ bɛdi ye wɔ siane nsuu ne anu. 42  Ɔwɔ kɛ bɛtɛnla kpɔda bo too kenle nsuu.+ Ɔwɔ kɛ Yizilayɛma amuala tɛnla kpɔda bo, 43  amaa bɛ awolɛndoazo mɔɔ bara kenle bie la anwu+ kɛ memaanle Yizilayɛma dɛnlanle kpɔda bo wɔ mekɛ mɔɔ menyele bɛ menvile Yigyibiti azɛlɛ zo la.+ Medame a mele Gyihova bɛ Nyamenle ne a.’” 44  Yemɔti Mosisi hanle Gyihova ɛvoyia ne mɔ anwo edwɛkɛ hilele Yizilayɛma.

Ɔbodwɛkɛ

Hibulu aneɛ nu, “nɔsolɛ nwiɔ ne avinli.”
Yifa ngyɛnu bulu anu nwiɔ le L 4.4. Nea Mok. B14.
Hibulu aneɛ nu, “akunlu dwo nwolɛ.”
Hin ko le L 3.67. Nea Mok. B14.
Yifa ngyɛnu bulu anu nwiɔ le L 4.4. Nea Mok. B14.
Hibulu aneɛ nu, “akunlu dwo nwolɛ.”
Anzɛɛ “mɔɔ anwo ɛhyele ye la.”
Anzɛɛ “bɛ ɛkɛla nyane.” “Awie kile ɔ nwo nyane” kile kɛ ɔbadua ɔ nwo ninyɛne bie mɔ, bie a le ɛhɔnehyelɛ.
Anzɛɛ “Ɛkɛla.”
Anzɛɛ ɔkola ɔkile, “mɔɔ angye ɛhɔne.”
Anzɛɛ “bɛbahu ye.”
Anzɛɛ “ɛkɛla.”
Anzɛɛ “bɛ ɛkɛla.”
Anzɛɛ “Kpɔda Mɔɔ Ɔngyɛ Na Bɛadudu.”
Anzɛɛ “azudenle nloa.”